Янъы неширлеримиз - ЦРО ДУМКЦРО ДУМК

Пн

20

сентября

13
Сефер 
1443 | 2021
Утр.5:01
Вос.6:18
Обед.12:41
Пол.16:02
Веч.18:54
Ноч.20:12
Времена намазов
Календарь 2021г

Намаз

Янъы неширлеримиз

Опубликовано:

Къырым Джумхуриети ве Севастополь шеэри мусульманлары диний идареси тарафындан янъы неширлер азырланылып бастырылды.
Рамазан айына догъру янъы «Ораза. Пост в Исламе» китабы дюнья юзюни корьди. Муфтиятнынъ хадимлери тарафындан азырланып, рус тилинде бастырылгъан бу китап динимизнинъ беш темелинден бири, муим бир ибадет олгъан ораза акъкъында эр тарафлы малюматны эсас нокъталарынен такъдим эте. Шу джумледен, оразанынъ чешитлери, оразанынъ фарзлары, ваджиплери ве суннетлери, мекрухлары, оразаны бозгъан ве бозмагъан арекетлер, Рамазан оразасыны тутмамакъ ичюн рухсет берген озюрлер киби меселелер анълатыла. Китапта, бунъа иляве оларакъ, Рамазан айыны тесбит этюв усулы ве земаневий тедавийлев усулларынынъ оразагъа тесири акъкъында тариф этиле.
Ораза китабы кенъиш окъуйыджы кутьлеси, ве, энъ эвеля, Рамазан айынынъ оразасы акъкъында догъру ве кениш малюмат тапмагъа истеген мусульманлар ичюн къарарлаштырылгъан.
Ислям динининъ беш темелинден дигери – хаджылыкъ ибадетине багъышлангъан «Хаджылыкъ рехбери» («Путеводитель по хаджу») китабы да баскъыдан чыкъты. Баягъы колемли олгъан бу китап, тюркчеден рус тилине терджиме этилерек бастырылды. Эсернинъ муэллифлери – алимлер, проф. д-р Карагёз Исмаил, Кескин Мехмет, проф. д-р Алтунташ Халиль, дёрт мезхепке коре хаджылыкънен алякъалы бутюн меселелерни тафсилятлы ве эр тарафлы бир шекильде ачыкъладылар. Китапнынъ саифелеринде Ислямда хадж ве умренинъ ери ве эмиети, бу ибадетлернен алякъалы укюмлер, хаджнынъ чешитлери, менасики (айры рукун ве ибадетлери) инджеликлеринен берабер ачыкълана. Хаджылыкъ маниалары, яни хаджылыкъны ерине кетирмеге маниа олгъан себеплер, хаджгъа кеч къалмакъ, дигер инсанлар ерине хадж япмакъ, хаджылылкъ ве умренинъ къаиделерине терс кельген арекетлер ве джезалары киби аспектлер де айдынлатыла.
Ишбу китап, эсасен, хаджылыкъ я да умреге кетмеге истеген мусульманлар ичюн къарарлаштырылгъан. Бундан да гъайры, о, мусульман диний тахсиль оджакъларынынъ оджалары ве талебелери тарафындан дерслик оларакъ къулланмасы мумкюн. Ве, эльбетте, Ислям дини иле меракълангъан эр кес ичюн меракълы олур.
Шу эки китапнен берабер, Къырым Муфтисининъ муавини, фыкъых магистри Айдер Исмаилов тарафындан азырлангъан «Ислямда мезхеплер» («Мазхабы в Исламе») китабы, янъыдан ишленип, экинджи баскъынен бастырылды. Шу китапта ислямий мезхеплернинъ ери, пейда олувы, тарихы, кереклиги, хусусиетлери акъкъында тариф этиле. Эсас дикъкъат фыкъхий мезхеплерге айырыла, амма, бунен берабер, итикъадий мезхеплер ве тарикъатлар да анълатылгъан.