Yañı camide birinci ezan! (FOTO) - ЦРО ДУМКЦРО ДУМК

Суббота

08

августа

18
Зуль-хидждже
1441 | 2020
Утр.3:54
Вос.5:27
Обед.12:54
Пол.16:47
Веч.20:10
Ноч.21:43
Времена намазов
Календари 2020г

Намаз

Yañı camide birinci ezan! (FOTO)

Опубликовано:

İslâm Terek rayonınıñ Baraq köyünde yañı caminiñ tantanalı açıluv merasimi olıp keçti. Musulman mabediniñ açılışında qurucılıq işlerinde faal iştirak etken insanlar – Baraq köyü ve onıñ civarında yaşağan köylerniñ sakinleri, yerli din cemiyetiniñ azaları ve iş adamları toplandılar.

Tedbirde Qırım Müftisiniñ muavini Esadullah Bairov iştirak etti. Böyle müim vaqia ile köy sakinlerini hayırlamaq içün Rusiye Devlet Dumasınıñ millet vekili Ruslan Balbek keldi. Açıluv tedbiri cuma namazınıñ vaqıtına keliştirilip yapıldı.

Qırım Müftisiniñ muavini Esadullah Bairov Qırım Müftisi hacı Emirali Ablayev adından tebriklerini bildirdi. Onıñ qayd etkenine köre, caminiñ açılışı Qırımtatar bayraq kününe rastkeldi, ve bu – birlikniñ ve birdemliknen çalışıp, inkişaf etmekniñ nişanesidir.

“Camini qurmaq – büyük işniñ birinci adımıdır. Eñ müimi – onı seslernen toldurmaq, camige insanlarnıñ kelmesi, balalarnıñ dinimizni ögrenmesi, öz tamırlarını bilmesi ve iç unutmaması, öz tuvğan topraqları ve milletine hızmet etmesi, ve ezanlarnıñ iç toqtamamasıdır”, – dedi Esadullah Bairov.

Buña ilâve olaraq, o, qayd etti ki, cami daima birligimiz pekingen merkez olğan ve olacaq, Yüce Rabbimiz ögünde çeşit nam ve rutbelerge baqmadan, er kes teñdir.

“Peyğamberimiz (s.a.s.) dedi ki, iç bir kimse, kerçek musulman olmadan, cennetke kirmez. Kerçek musulman olmaqnıñ yekâne yolu – bir-birine yardım etmek ve yamanlıq tilememek”, – ayttı Esadullah Bairov.

RF Devlet Dumasınıñ millet vekili Ruslan Balbek ise, öz nevbetinde, cami qurucılığında iştirak etken er keske bu büyük işke öz isselerini qoşqanları ve maneviy destek köstergenleri içün teşekkür bildirdi.

“Bugün bir künde üç bayram – mubarek cuma, Qırımtatar bayraq künü ve caminiñ açılışıdır. Bu hayırlı işke küç ve ğayret qoşqan er keske teşekkür bildirem. Maqsadımız – İslâmnıñ temel-esaslarına itibar etilsin ve yaşlarımız dinimizge daa yaqın olsun”, – dedi Ruslan Balbek.

Toplanğanlar cuma namazını qıldılar, bundan soñ ise, tedbir musafirlerine ikram etildi.

Cami 7 ay içinde quruldı. Qurucılıq işleri Baraq köyü sakinleriniñ sadaqalarına ve Qırım iş adamlarınıñ maddiy destegi ile yapıldı. Caminiñ büyükligi 150 kv.m teşkil ete, bina birden 130 insannı sığdıra bile.

QMDİ matbuat hızmeti