Seyitler rayonı Alikeç köyünde ibadethane açıldı (FOTO) - ЦРО ДУМКЦРО ДУМК

Четверг

24

сентября

6
Сефер 
1442 | 2020
Утр.5:06
Вос.6:23
Обед.12:40
Пол.15:57
Веч.18:47
Ноч.20:03
Времена намазов
Календари 2020г

Намаз

Seyitler rayonı Alikeç köyünde ibadethane açıldı (FOTO)

Опубликовано:

Seyitler rayonı Alikeç köyünde yerli müsülmanlar içün ibadethane açıldı. Endiden soñ, köylüler öz diniy ibadetlerini şu yerde yerine ketirecekler.

Bina hayırsever iş adamı tarafından satın alındı.

İbadethaneniñ açıluv merasimi tantanalı şekilde olıp keçti. Tedbir duanen başlandı, toplaşqanlar “Yasin” suresini oqudılar, bundan soñ, QMDİ MDT-nıñ din cemiyetleri ile iş alıp barğan bölükniñ reberi Raim Gafarov hayırlav sözlerinen çıqışta bulundı. O, Qırım Müftisi hacı Emirali Ablayev adından köy müsülmanlarını tebriklep, ibadethaneniñ açıluv işine qol tutqan er keske teşekkürler bildirdi.

 “Arzumız yerine keldi, Vatanımızda yaşaymız, maqsadımız – inkişaf etmek ve diniy mirasımıznı arttırmaqtır”, – dedi Raim Gafarov.

Merasim devamında faallerge teşekkürname ve qıymetli bahşışlar bağışlandı. İbadethane ise, muqaddes Qurandan ayetler yazılğan panno ile yaraştırıldı. Onı Müftiyat hadimleri yerli cemaatqa ediye ettiler. Merasimden soñ, üyle namazı qılındı. Soñra, er kes tatlı sofra başında toplaştı.

Müftiyat vekilleri Seyitler rayonı din cemiyetiniñ reisi Rustem Temirov ile birlikte yerli qabristannı ziyaret ettiler. Yerli imam ve din cemiyetiniñ küçü ve ğayreti sayesinde qabristan sıñırları keñleştirildi. Mında suv keçirildi, cenaze ötkermek içün mahsus yer yapıldı. Qabristanda müsülmanlar merhumlarnıñ ruhuna dua oqudılar.

Soñunda, Raim Gafarov Çkalovo köyüniñ mezarlığına barıp, şu yerde ötkerilgen tamir işleriniñ neticelerinen tanış oldı. Bu sevaplı işte iştirak etken müsülmanlarğa da Müftiyat adından teşekkürnameler taqdim etildi

QMDİ MDT matbuat hızmeti