Semaşko adına yañı tibbiy merkezde namaz odası açıldı (FOTO) - ЦРО ДУМКЦРО ДУМК

Пн

26

июля

16
Зуль-хидждже
1442 | 2021
Утр.3:31
Вос.5:12
Обед.12:54
Пол.16:53
Веч.20:27
Ноч.22:08
Времена намазов
Календарь 2021г

Намаз

Semaşko adına yañı tibbiy merkezde namaz odası açıldı (FOTO)

Опубликовано:

Aqmescitteki N.A. Semaşko adına Qırım cumhuriyet klinik hastahanesinde namaz odası açıldı. Hastalarnıñ ihtiyacları köz ögüne alınıp, namaz qıla bilmeleri içün binanıñ birinci qatında mahsus oda azırlanıldı.

Namaz odası Qırım Cumhuriyeti ve Sevastopol şeeri musulmanları diniy idaresi ve İslâm dinini kütken hastahane hadimleriniñ teşebbüsi ile teşkil etildi.

Semaşko adına Qırım cumhuriyet klinik hastahanesiniñ baş ekimi Valentina Fursova ve Qırım Müftisiniñ yardımcısı, Aqmescit şeeriniñ baş imamı Muhammed İslamov köyürüşüvlerinde hastahanelerde namaz odaları olmaq kerek degen aynı fikirge keldiler.

Hastahaneniñ baş ekimi Valentina Fursovanıñ sözlerine köre, ruhiy sağlıq – beden sağlığınıñ temelidir.

“Hastalarnıñ beden ve ruh sağlıqları aqqında aytsaq, bu ekisinden bir de biri eksik olsa, şifağa irişmek zordır. İnsanda yaşamaq ve sağlamlaşmaq içün em maneviy, em fizikiy istegi olsa, o, daa tez ve daa sağlam şekilde tedaviylene. Ve biz qoyğan maqsadımızğa yetemiz”, – dep, qayd etti baş ekim.

Körüşüv çerçivesinde Muhammed İslamov ve Valentina Fursova namaz odasınıñ çalışuv vaqıtını ve musulmanlarnıñ anda namaz vaqıtında problemasız kirmek kerekligini muzakere ettiler.

“Qırım Müftisi hacı Emirali Ablayevniñ avalesi ile, biz hastahanede açılğan namaz odasınıñ işlevi boyunca bütün tafsilâtlarnı hastahane rehberiyetinen muzakere ettik. Er bir hadim ya da hasta anahtarnı kirişteki qaravullardan ala bilecek. Oda beş vaqıt namaz içün açıq olacaq”, – dedi Muhammed İslamov.

Bundan da ğayrı, o, bildirdi ki, odanıñ temizligi ve mescit içün kerekli donatıluvından Qırım Müftiligi mesülietli olacaq. Mesül olaraq Muhammed İslamov tayin etildi.

Qayd etmeli ki, N.A. Semaşko adına Qırım cumhuriyet klinik hastahanesinde ortodoks hristianlar içün de ibadet odası açıldı, o, namaz odasınen yan-yanaşadır.

QMDİ matbuat hızmeti