Qırımdaki diniy teşkilâtlar ve din erbapları tarafından faaliyetlerinde qırımtatar tiliniñ qullanıluvı – ananeviy tecribedir. Bu aqta, X Bütünrusiye tatar din erbapları forumınıñ muzakere meydanında Qırım Müftisiniñ muavini Ayder İsmailov bildirdi. İştirakçiler diniy teşkilâtlarnıñ işlerinde tuvğan tilniñ qullanıluvını muzakere ettiler.
Ayder İsmailov: “Qırımtatarlar Vatanğa qaytqanından berli, bütün diniy merasimlerde tek qırımtatar tili qullanıla. Bu ananeviy tecribe, evel-ezelden ananeviy İslâm mektebiniñ bütün ibadetleri qırımtatar tilinde keçirilgen. 2014 senesi qırımtatar tiline devlet tili statusı berildi. Camilerde keçirilgen bütün hutbeler ve diniy merasimler qırımtatar tilinde alıp barıla”, – dep ayttı.
Bundan da ğayrı, Müfti muavini, Quranda Allahnıñ: “Biz, öz milletiniñ tilinde laf etken Peyğamberlerni yolladıq” buyurığını hatırlattı ve: “Demek, til – sade malümat berüv usulı degil de, bu işanuv tilidir. Dinimizniñ talaplarından biridir”, – dep ilâve etti.
QMDİ matbuat hızmeti
