Qırımnıñ refahı içün dört adım (FOTO) - ЦРО ДУМКЦРО ДУМК

Среда

27

октября

21
Ребиу'ль-эвель
1443 | 2021
Утр.5:48
Вос.7:05
Обед.12:32
Пол.15:13
Веч.17:48
Ноч.19:06
Времена намазов
Календарь 2021г

Намаз

Qırımnıñ refahı içün dört adım (FOTO)

Опубликовано:

Qırım Müftisiniñ muavini Ayder İsmailov Rusiye Prezidenti Vladimir Pütinniñ Qırım Cumhuriyeti cemaatçılığınıñ vekillerinen keçirgen videokonferentsiyada iştirak etti. Rossiya24 telekanalı tarafından teşkil etilgen işbu videokonferentsiya Qırımnıñ Rusiye Federatsiyasına qoşulğanınıñ 7-yıllığını qayd etüvnen alâqalı olıp, yarımadanıñ inkişafına bağışlanğan edi.

Canlı yayın Aqmescitteki Büyük Cuma cami qurulışından yapıldı.

Ayder İsmailov Prezidentke qırımtatar halqınıñ ömürine tesir etken salmaqlı müsbet deñişmeler, ilk evelâ, repressiyalarğa oğratılğan Qırım halqlarınıñ, şu cümleden, qırımtatarlarnıñ reabilitatsiyası boyunca 2014 sene, aprel 21 künü qabul etilgen fermanı içün teşekkür bildirdi.

“Afsus ki, bu fermannı üyken nesilimizniñ çoqusı öyle de körip olamadı. Ancaq 2014 senesinden soñ adalet yerine keldi”, – dedi Ayder İsmailov.

Vladimir Pütin ise, öz nevbetinde, qayd etti ki, yüksek naaliyetler – er kesniñ beraberce ğayret etmesiniñ neticesidir.

“Qırımtatarlarnıñ ömürinde ve Qırımda alğan yerini añlamalarında çoq şeyler deñişti, çünki olar çoq yıllar devamında hayal ve tasavur etkenleri, amma bir türlü yetip olamağanları şeyler kerçekleşti”, – dedi Vladimir Pütin.

O, Qırımdaki milliy siyasetniñ inkişafı boyunca bir qaç maddeni qayd etti. Hususan, taşınmaz mülkniñ resmiyleştirilüvi, qırımtatar tiline devlet tili statusınıñ berilmesi, Büyük Cuma caminiñ qurulması ve yarımadada yaşağan halqlarnıñ yapıcı ve barışıq qomşulığı siyasetidir.

“Umuman, Rusiyede, ve, hususan, Qırımda, – ki, Qırım – çoq milletli topraq, – yaşağan bütün insanlar özlerini öz topraqlarında öz evinde olğanlarını duysınlar, bu – pek müim. Ve bir-birine yardım etsinler, nasıl dinden olsa-olsun, qomşusınıñ yanında olğanını bilsinder, er bir halqqa öz balasına kibi baqqan Rusiyeniñ olarnıñ umumiy vatanı olğanını duysunlar. Eger biz şu şekilde qursaq, – ki, şu şekilde qurıp kelemiz, şu cümleden, – yardımıñıznen, – demek, biz seadet içinde yaşağan ve kelecekke amanlıq içinde baqqan dostane ve semereli bir qoranta olacaqmız”, – dep, qayd etti Prezident.

Qırım MDİ matbuat hızmeti