Qırımnıñ maneviy liderleri: "Dostluq – evimizdeki barışıqnıñ temelidir" (FOTO) - ЦРО ДУМКЦРО ДУМК

Четверг

29

июля

19
Зуль-хидждже
1442 | 2021
Утр.3:36
Вос.5:15
Обед.12:54
Пол.16:52
Веч.20:23
Ноч.22:03
Времена намазов
Календарь 2021г

Намаз

 Qırımnıñ maneviy liderleri: “Dostluq – evimizdeki barışıqnıñ temelidir” (FOTO)

Опубликовано:

Qırım Müftisi hacı Emirali Ablayev, Aqmescit ve Qırım mitropoliti Lazar ile körüşti.

Bundan da ğayrı, körüşüvde Yalta yepiskopı Nestor, Aqmescit ve Qırım yeparhiyasınıñ kâtibi, Aqmescitteki Petro-Pavlovsk kafedral kilsesiniñ protoiyereyi Aleksandr Yakuşeçkin ve Qırım Müftisiniñ mesül kâtibi Ayder Acimambetov iştirak etti.

Körüşüv iştirakçileri, Qırımda an-aneviy dinlerniñ rolü ve maneviy-ahlâqiy qıymetlikler, barışıq, farqlı din vekilleri arasında ürmetniñ saqlanuvında konfessiyalarnıñ işbirligi meselelerini muzakere ettiler.

Qırım Müftisi hacı Emirali Ablayev Vladıka Lazarge, Qırım müsulmanları içün müim vaqialar, planlar ve Cümhuriyet müsulman ealisiniñ maneviy-ahlâqiy terbiyesi ve diniy maarifi saasında planları ve perspektivaları aqqında tarif etti.

Müfti: “Biz Qırımğa, Vatanğa çeçeklerni saçmağa ve milletimizniñ kelecegi içün qollarımızdan kelgenini yapmağa qaytıp keldik, Qırımda yaşağan farqlı millet vekilleri ile barışıqta yaşamalımız, çünki bu bizim umumiy evimiz ve mında güzellik, temizlik ve raatlıq olmalı”, – dep ayttı.

Bundan da ğayrı, o, Qırım müsulmanları diniy idaresi tarafından işlep çıqarılğan ve ömürge keçirilgen leyhalar aqqında ikâye etti.

Qırım Müftisi: “Bugünki künge qadar bir çoq şey artıq yapıldı. Bir sıra leyhalar ömürge keçirilmekte. Qırımnıñ uzaq köylerinde yerleşken camilerniñ yanında İslâm temelleri ve Quran oquvı kurslarınıñ açılması, ocalarımız yaş nesilge diniy bilgilerni bermek içün faal çalışmaqta. Bundan da ğayrı, Cümhuriyette yerleşken diniy binalarnıñ Müftilik saipligine qaytarılması üzerinde işler alıp barıla, yañı camiler qurula. Elbette, Aqmescitte Cuma cami qurula. İçtimaiy ve hayriye leyhalarınıñ işi devam ete. Bundan da ğayrı, Müftilik mustaqil şekilde müsulmanlarnıñ Mekke ve Medineniñ muqaddes topraqlarına hacılıqnı teşkil etmekte”, dep qayd etti.

Vladıka Lazar ise, öz nevbetinde, Müftige konfessiyalar arasındaki barışıqnıñ pekitilüvi oğrunda yapqan işleri içün teşekkürler bildirdi.

Vladıka Lazar: “Cümhuriyetimizde olğan munasebetlerniñ degerini bilemiz ve umumiy evde yaşağanımıznı añlaymız. İç bir kimse aramıznı bozıp olamadı, Allahnıñ yardımınen munasebetlerimiz bozulmaz”,   dep qayd etti.

Bundan da ğayrı, o, Qırımda musulmanlar ve hristianlar arasında maneviy saasında iç bir narazılıqlar olmağanını ilâve etti ve: “Umumiy ahlâq printsipleri, musulmanlar ve hristianlarnıñ biri-biri ile munasebet temelidir”,  dep ayttı  ve “biz, umumiy areketlerimiz ile er angi bir yaramaylıqnı yeñmek ve insanlarğa çeşit teşviqatqa qapınmağa ruhset bermemelimiz” degen fikirniñ astını çızdı.

Qırım Müftisi hacı Emirali Ablayev: “Allah bizge beraberlikte çalışıp, çoqmilletli, çoq din vekillerinden ibaret olğan cemiyetni yetiştirmege, güzel munasebetlerni qurmağa yardım etsin, bunıñ içün yahşı temel bar. Bu ecdatlarımıznıñ umumiy yaşayışı, bizim umumiy ömürimiz, umumiy tarihımız ve Qırımda barışıq raat yaşayışnı qurmaq içün qollarımızdan kelgenini yapmalımız”, dep yekünledi.

Tedbirniñ soñunda eki taraf da biri-digerine hatıra bahşışlarını ediye ettiler.

QMDİ MDT matbuat hızmeti