Qırımda Rusiye musulman qadınlar teşkilâtlarınıñ qurultayı olıp keçti (FOTO) - ЦРО ДУМКЦРО ДУМК

Четверг

05

августа

26
Зуль-хидждже
1442 | 2021
Утр.3:49
Вос.5:24
Обед.12:54
Пол.16:48
Веч.20:14
Ноч.21:49
Времена намазов
Календарь 2021г

Намаз

Qırımda Rusiye musulman qadınlar teşkilâtlarınıñ qurultayı olıp keçti (FOTO)

Опубликовано:

Qırımda IX Bütünrusiye musulman qadınlar teşkilâtlarınıñ qurultayı olıp keçti. Qurultaynıñ mevzusı: “Rusiye musulmanlarınıñ şahsiyeti: din, medeniyet, til ve qoranta ananeleriniñ qaynaşması”.

Qurultay teşkilâtçıları – “Aişa” halqara qadınlar klubu ile Qırım Cumhuriyeti ve Sevastopol şeeri musulmanları diniy idaresidir.

Forumda Rusiyeniñ farqlı bölgelerinden 30-ğa yaqın iştirakçi ve Qırımdan 60-tan ziyade qadın iştirak etti.

Qırım Müftisi hacı Emirali Ablayev adından qurultay iştirakçilerini Müfti muavini Ayder İsmailov selâmladı. Onıñ qayd etkenine köre, qarşılıqlı iş, birlikte ağımdaki problemalarnı muzakere etmek ve planlar qurmaq imkânı em Rusiye musulmanlarına, em de, umumen, bütün cemiyetke semereli neticeler ketire.

“Bizim qadınlar teşkilâtımız Qırımda faal işni alıp bara, onıñ içün olar öz tecribelerinen paylaşalar, diger teşkilâtlarnıñ tecribesinden de faydalanalar. Qırım Cumhuriyeti ve Sevastopol şeeri musulmanları diniy idaresi ise, bu leyhalarğa destek köstere”, – dep, qayd etti Ayder İsmailov.

Hatırlatamız, musulman qadınlar teşkilâtlarınıñ qurultayı doquz yıl devamında er sene toplana, bu yıllar içinde Qırım musulmanları diniy idaresiniñ qadınlar teşkilâtı ve “Faydalı ilim” maarif leyhası üç kere Rusiyeniñ eñ güzel teşkilâtları olaraq olaraq tanıldı.

“Aişa” halqara qadınlar klubunıñ rehberi Natalya Maryam Bariyeva pandemiya şaraitine baqmadan, forumlarnıñ keçirilip turğanını ve işniñ devam etkenini bildirdi.

“Bölgelerniñ vazifeleri bir-birine oşay, amma milliy hususiyetlerni de köz ögüne almalı. O, vazifelerniñ çezilüvine öz issesini qoşa. Yani milliy hususiyetlerge de büyük emiyet berile”, – qayd etti Natalya Maryam Bariyeva.

Forum çerçivesinde musulmanlarğa ruhiy destek mevzusı da diqqatsız qalmadı. Musulmanlarğa ruhiy destek birleşmesi idaresiniñ reisi, ilâhiyat magistri Ölga Pavlova Qırımda çalışqan diniy hadimlerniñ ruhiyat saasında yüksek professional derecelerini qayd etti.

Qadınlar qurultayı keçirilmesiniñ teşebbüsçilerinden biri, “Al-Vasatıya” merkeziniñ müdiri Sergey Zâzin bildirgenine köre, Rusiyede oqutuv Qırımda işlenip çıqarılğan leyhalar boyunca alıp barıla ve bunıñ episi keçirilgen qurultaylar sayesindedir.

Qurultaynıñ neticeleri çıqarıldı. Qırım Cumhuriyeti ve Sevastopol şeeri musulmanları diniy idaresiniñ “Faydalı ilim” leyhasınıñ rehberi Zeyneb Bairova qayd etkenine köre, şu merasim – Qırım içün tarihiy vaqiadır, çünki o qırımtatarlarnıñ tuvğan toprağı – Qırımda olıp keçti.

“Er bir forum iştirakçisi içün bu adiy tedbir degil, – maneviy küç menbasıdır. Ümüt etem ki, iştirakçilerimizniñ alğan energiyası kelecek yılğa, kelecek forumğa qadar yeterli olur”, – dedi Zeyneb Bairova.

Qırım MDİ matbuat hızmeti