Qırımda Qalay medresesiniñ mezunlarına diplomlar berildi (FOTO) - ЦРО ДУМКЦРО ДУМК

Вторник

26

октября

20
Ребиу'ль-эвель
1443 | 2021
Утр.5:47
Вос.7:04
Обед.12:32
Пол.15:14
Веч.17:50
Ноч.19:07
Времена намазов
Календарь 2021г

Намаз

Qırımda Qalay medresesiniñ mezunlarına diplomlar berildi (FOTO)

Опубликовано:

İmam Maturidiy adına Qalay islâmiy ilimler medresesiniñ oğlanlar bölüginde tantanalı diplom taqdimi merasimi olıp keçti. Mezunlarnı hayırlamaq içün ana-babaları, medrese ocaları, yaqınları, dostları keldiler.

Qırım Müftisi hacı Emirali Ablayev dört yigitke diniy tahsilni tamamlağanları aqqında vesiqalarını taqdim etti.

O, mezunlarğa turmadan, inkişaf etmelerini tiledi, milleti ögünde olğan mesülietlerini unutmamalarını, endiden soñ olarğa büyük ümütler bağlanğanını hatırlattı.

“İmam bilgili olmalı, ilim almağa tırışıñız, küçlü ve metanetli oluñız. Bilgileriñizni arttırıñız ve semetdeşleriñizniñ yaşayışına lâqayd qalmañız”, – dep, tiledi Müfti efendi.

Qırım Müftisiniñ muavini Ayder İsmailov da hayırlav sözlerinen çıqışta bulundı. O, qayd etti ki, medrese onıñ mezunları içün ekinci ev kibidir, ve mında daima peyda olğan suallerge cevap tapmaq mümkündir.

“İslâmda istiqamet, doğru yol üzre olmaq pek müimdir, buña köre medresemizge İmam Maturidiyniñ adı berildi. Bu – Qırımda Ehl-i sunnetniñ esas mezheplerinden biri boyunca tahsil berilgeniniñ bir köstergiçidir. Kelecekteki ayatında er angi bir mesele bonca sualleri peyda olğan mezunımız er daim medreseniñ ocalarına, Müftiyatımıznıñ ilâhiyatçılarına muracaat etip, cevabını ala bilir. Ancaq şu şekilde biz ecdatlarımız yüzyıllar evelsi tapqan doğru yolda qala bilirmiz”, – dedi Ayder İsmailov.

Bundan da ğayrı, hayırlav sözlerinen medrese müdiri Edem Lümanov çıqışta bulundı. O, bugün mustaqil ömür yoluna çıqqan talebelerniñ eñ yaqında milletke fayda ketireceklerine eminlikni bildirdi.

Qalay medresesiniñ ocalarına Qırım Cumhuriyeti ve Sevastopol şeeri musulmanları diniy idaresi adından teşekkürnameler berildi.

Qırım MDİ matbuat hızmeti