Qırımda Oraza bayramı qayd etildi… Aqmescit, Bağçasaray, Qarasuvbazar! (FOTO) - ЦРО ДУМКЦРО ДУМК

Четверг

29

октября

12
Ребиу'ль-эвель
1442 | 2020
Утр.5:50
Вос.7:08
Обед.12:32
Пол.15:10
Веч.17:45
Ноч.19:03
Времена намазов
Календари 2020г

Намаз

Qırımda Oraza bayramı qayd etildi… Aqmescit, Bağçasaray, Qarasuvbazar! (FOTO)

Опубликовано:

Qırım musulmanları tantanalı sürette esas musulman diniy bayramlarından biri Oraza bayramını qayd ettiler. Bayram tedbirleri Qırımnıñ çeşit köşelerinde olıp keçti. Hususan, QMDİ-niñ destegi ile Qarasuvbazarda parknıñ yanında Refat Veliula adına Merkeziy camisinde bala bayramı olıp keçti. Teşkilâtçılar şeer sakinleri ve musafirleri içün büyük bayram programmasını azırladılar. Musafirler ögünde şeerniñ bala icadiy taqımları çıqışta bulundı, Bekir Adilov ve Qırım musulmanları diniy idaresiniñ “Emanet” balalar studiyasınıñ icrasında ilâhiler  yanğıradı. Bundan da ğayrı, analar ve Vatanğa bağışlanğan yırlar icra etildi.

Meydançıqlarda ebru ve hna qoyuv resimleri boyunca ögretüv dersleri olıp keçti. Bundan da ğayrı, küreş, armresling, çeki sport çeşiti boyunca yarışlar ötkerildi. Balalar içün sürprizler ve bahşışlar azırlandı. Qarasuvbazar rayonınıñ imamı Siyar Abdulganiyev, bayram musafirlerini, Qırım Müftisi adından hayırlap, er bir qorantağa barışıq, merhametlik ve baht tiledi ve Qırım Müftisi adından bayram teşkilâtçılarına teşekkürnamelerni berdi. Bundan da ğayrı, o, iş adamlarına, destekleri içün minnetdarlıq bildirdi. Qarasuvbazarda bayramğa bir yarım biñ insan qoşuldı.

Bağçasaraydaki Orta cami camisinde de büyük bayram olıp keçti. Teşkilâtçılar balalar ve ana-babalar içün meraqlı programmanı azırladı – viktorinalar, kvestler, bundan da ğayrı, küreş ve armresling boyunca sport yarışları, attraktsionlar, batut, hna resimleri… Balalarğa bahşışlar berildi. Bağçasaray rayonınıñ imamı Ramazan Asanovnıñ sözlerine köre, eñ müimi – yaş nesilge, maneviy qıymetliklerniñ, İslâm temelleri olğan milliy urf-adetleriniñ müimligini yetkizdirmektir.

Ramazan Asanov: “Qırım Müftiligi, musulman din cemiyeti ve hayırseverlerge bayramnıñ teşkil etilüvinde destekleri içün büyük teşekkürler bildiremiz”, – dep ayttı. Bayram tedbirinde 150 insan iştirak etti.

Aqmescit rayonınıñ Beloye-5 qasabasınıñ camisinde ötkerilgen bayramğa da bir çoq adam qoşuldı. Mında musafirler ögünde bala icadiy taqımları çıqışlar yaptı. Milliy oyunlar, yırlar, şiirler – bunıñ episi cami erkânında çalışqan maarif işleriniñ reberi Zamira Smailova, “Ramazan” adlı yerli musulman din cemiyetiniñ reisi Asan Kürtiyev ve faaliyetçi Zair Smailovnıñ büyük işiniñ neticesidir. Animatorlarnen beraber balalar qırımtatar tilinde yırlar yırladı, ingliz tilinde şiirlerni ayttılar. Bayramda qırımtatar milliy yırları ve ilâhiler yanğıradı. Musafirler ögünde Bekir Adilov ve QMDİ “Emanet” ansambli çıqışta bulundılar. Balalar içün batutlar, salıncaqlarda oynap, labirintlerden keçmek imkânları oldı.

Bayramnıñ soñunda er bir bala bahşış aldı.

 QMDİ matbuat hızmeti