Qırım müsülmanları Diniy İdaresi Kezlev şeerinde yerleşken “Alladin” qavehanesine “Elâl” sertifikatını berdi. Qavehanede şarq, qırımtatar yemeklerini şariat boyunca azırlaylar. İş-adamları muracaat etken soñ, Qırım Müftiyatı hadimleri qavehaneni ziyaret ettiler. Mahsulatlarnıñ satın aluv, yemeklerniñ azırlav ceryanı, odalar ve menü terkibini ögrendiler. Teşkerüvni keçirip, Müftiyat vekilleri er şey talaplarğa uyğun olğanını qayd ettiler. Sertifikatnı Müfti muavini Ayder İsmailov berdi. O, iş-adamlarına muvafaqiyetler tilep, Allah ve adamlar ögünde mesül olğanlarını unutmamağa rica etti. “Elâl” sertifikatı bir yılğa berile, ondan soñ, kene de teşkerüv ötkerile. Şimdiki vaqıtta, Qırımda ondan ziyade elâl işhane çalışa.
QMDİ MDT matbuat hızmeti