Qırım musulmanları bayram namazını keçirdi (FOTO) - ЦРО ДУМКЦРО ДУМК

Вторник

22

сентября

4
Сефер 
1442 | 2020
Утр.5:04
Вос.6:21
Обед.12:41
Пол.15:59
Веч.18:50
Ноч.20:07
Времена намазов
Календари 2020г

Намаз

Qırım musulmanları bayram namazını keçirdi (FOTO)

Опубликовано:

Bugün Qırımnıñ bütün camilerinde musulmanlarnıñ baş bayramlarından biri olğan Qurban bayramına bağışlanğan bayram namazları olıp keçti.

An-ane olaraq Aqmescitniñ Medeniyet ve zenaat birligi evine Qırımnıñ farqlı köşelerinden kelgen yüzlernen vatandaşlarımız bayram namazını qılmaq, biri-birine eyilik, sağlıq, barışıq tilemek içün toplandılar.

Medeniyet ve zenaat birligi evinde bayram namazını Qırım Müftisi hacı Emirali Ablayev keçirdi.

Bayram hutbesinde, o, musulmanlarnı birlikke ve muabbetlikke çağırdı.

“Bizim ayatımız munasebetlerden ibaret. Tata qardaş arasında, ana-babalar ve balalar, qartlar ve torunlar, dostlar ve qomşular arasındaki munasebetler… eyilik yapqan insan mıtlaq mukâfatını alacaq, onıñ içün biri-birimizge nisbeten merhametli olayıq. Yüregimizde merhametlikni ğıdalayıq, digerlerniñ derdine derman olmağa tırışayıq. Er şey pek qolay – esli başlı adamğa diqqat ayır, öksüzni başından siypa, ana-babalarıña eyi sözler ayt, biri-biriñizge tevsiyenen ve işnen yardım etiñ… aynı bundan bizim ayatımız ibarettir, diger ayatta eyi işlerniñ sayısı manasız amellerimizden artqaç olsun”, – dep ayttı Qırım Müftisi.

Bundan da ğayrı, o, vatandaşlarını muqayt olıp, COVID-19 yañı virus infektsiyasınıñ darqatılmamasına yol bermemege çağırdı.

“Bilhassa, bu esli başlı insanlarımız içün havflıdır. Ebet, er birimiz qartlarımıznı Qurban bayramınen hayırlamağa isteyiz, amma şimdi telefon vastası ile hayırlasaq, daa güzel olur. Böylece, siz yaqınlarıñıznı havf astında qaldırmazsıñız, çünki bilgenimiz kibi, hastalıq qartlarnıñ sağlığına çoq zarar ketire bile. Er kesge sağlıq tileyim. Dünyanı işbu hastalıqtan qurtarmaq içün Allahqa dua eteyik”, – dep ayttı Qırım Müftisi.

500 yıldan berli Aqmescitniñ Cuma camisi sayılğan Kebir camisinde 3 200 insan toplaştı. Bayram namazını Qırım Müftisiniñ muavini Ayder İsmailov keçirdi.

Bugün bütün Qırım boyunca qurbanlar çalına, bundan soñ qurban eti muhtac, çoq balalı qorantalarğa, qartlarğa, öksüzler ve hastalarğa, soy-soplarğa, qomşularğa berilecek.

QMDİ matbuat hızmeti