Qırım Müftiyatında RF Devlet Dumasınıñ deputatı imamlarnen körüşti (FOTO) - ЦРО ДУМКЦРО ДУМК

Вс

01

ноября

15
Ребиу'ль-эвель
1442 | 2020
Утр.5:54
Вос.7:12
Обед.12:32
Пол.15:07
Веч.17:41
Ноч.18:59
Времена намазов
Календари 2020г

Намаз

Qırım Müftiyatında RF Devlet Dumasınıñ deputatı imamlarnen körüşti (FOTO)

Опубликовано:

Qırım Müftisi hacı Emirali Ablayev RF DD Deputatı Ruslan Balbeknen birlikte regional imamlar ve rayon diniy cemiyetleri yolbaşçılarınen körüşüv keçirdiler. Toplaşuv devamında Aqmescitteki tarihiy mekân  – Qalğa Sultannıñ sarayı yerleşken yerde qanunsız qurucılıq ile bağlı vaziyet muzakere etildi.

Qırım Müftisi qurucılıqnı toqtatmaq içün yapılğan iş, bu cümleden, arhiv ekspertizasınıñ ötkerilüvi aqqında ikâye etti. Bundan da ğayrı, arhiv vesiqaları, litografiyalarnı ögrenip, ekspertlerge muracaat etmek teklif etilgenini bildirdi.

Ruslan Balbek añlatqanı kibi, alimler şurasınıñ qararına esaslanıp, ileride devlet tarihiy-medeniy ekspertizası ve tedqiqatlar keçirip, şu yerde müzey açmaq mümkün olacaqtır.

RF DD deputatı R. Balbek körüşüv devamında Bağçasaraydaki Hanlar sarayında inspektsiya ötkerilgeni ve küzde tamir işleri alıp barılacağanı ayttı, bunıñnen beraber, saray azbarında yañı bağça qurulacağını añlattı.

Saray azbarınıñ abadanlaştırıluvı meselesi QMPU-niñ Alimler  şurası toplaşuvında baqılacaq. Tarihçı, arheologlar, landşaft dizaynerleri öz tekliflerini bermege azırlar. Esas şart – yañı bağça  Qırım Hanlığı devirine ait bağ-bağçacılıq sanatınıñ ananelerine uyğun olmalı.

 “Hanlar Sarayınıñ abadanlaştırıluvı leyihasına kelgende, Alimler şurasınıñ yardımınen şu yerde Orta asırlarğa ait  müitni canlandırmağa tırışacaqmız. Aftanıñ soñuna qadar müzey-qoruq tarafından celp etilgen müelliflerniñ tekliflerine qıymet kesebilecekmiz. Eminim, müzey öz 100 yıllığını Hanlar zamanında kibi  dülber ve abadanlı bir sıfatta qarşılar”, – dedi Ruslan Balbek.

Diniy erbaplar öz nevbetinde rayonlarda yüz bergen tedbirler, vaqialar ve, umumen, yerli müsülmanlarnıñ ayatı aqqında ikâye ettiler. Esas meseleler ise, topraq ile bağlı olğanını añlattılar. Ruslan Balbek bütün problemalarnı nezaret astına almağa vade etti.

QMDİ MDT matbuat hızmeti