Qırım Müftisi rayon imamlarınen iş körüşüvini keçirdi (FOTO) - ЦРО ДУМКЦРО ДУМК

Вс

28

февраля

17
Реджеб
1442 | 2021
Утр.5:56
Вос.7:12
Обед.13:01
Пол.15:58
Веч.18:39
Ноч.19:55
Времена намазов
Календарь 2021г

Намаз

Qırım Müftisi rayon imamlarınen iş körüşüvini keçirdi (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde rayon imamlarınen iş körüşüvi olıp keçti.

Toplaşuvnıñ başında Qırım Müftisiniñ muavini Raim Ğafarov “İslâmğa çağıruvnıñ usulları” mevzusında lektsiya oqudı.

Körüşüv devamında imamlar ealinen alıp barılğan işni ve camiler yerleşken topraqlarnıñ resmiyleştirilüvinen bağlı bir sıra meselelerni muzakere ettiler. Bundan da ğayrı, din erbapları bölgelerde pandemiyanen bağlı vaziyetniñ eyileşkeni, hastalarnıñ sayısı eksilgeni ve cenazelerniñ peşinden ile ealiniñ sağlığı içün yapılğan dualarnıñ azalğanı aqqında haber ettiler.

– “İmam cemiyetniñ problemalarına lâqayd qalmamalı ve elinden kelgeni qadar farqlı meselelerniñ çezilüvine destek köstermeli”, – dep, qayd etti Raim Ğafarov.

Qırım Müftisiniñ muavini Ayder İsmailov bildirgenine köre, camige qatnağan bir çoq insannıñ ricasınen qattı sıñırlanuvlarnıñ ket-kete lâğu etilmesi, vaazlarnıñ keçirilmesi planlaştırıla, amma, evel olğanı kibi, cuma namazları içtimaiy mesafe ve diger havfsızlıq qaideleriniñ kütülmesi ile keçirilecek.

İş körüşüviniñ soñunda Qırım Müftisi imamlarnen bölgelerde olğan problemalarnı ve olarnıñ çezilüv yollarını muzakere etti. Bundan da ğayrı, o, din erbaplarını Yüce Rabbimiz ve cemiyetimiz ögündeki mesülietlerini unutmamağa çağırıp, olarğa semereli çalışmalar tiledi.

Toplaşuvnıñ soñunda imamlarğa Müftiyatımız tarafından yañı neşir etilgen “Hacılıq rehberi” kitabınıñ nushaları taqdim etildi ve olarğa Qırım Müftiliginiñ neşirleri – “Hidayet” gazetası ve “İkmet çoqrağı” mecmuasına yazıluv aktsiyasına qoşulmağa tevsiye etildi.

Qırım MDİ matbuat hızmeti