Qırım Müftisi Hanlar sarayında keçirilgen restavratsiya işlerinen tanış oldı (FOTO) - ЦРО ДУМКЦРО ДУМК

Четверг

24

июня

14
Зуль-къаде
1442 | 2021
Утр.2:50
Вос.4:47
Обед.12:50
Пол.16:55
Веч.20:44
Ноч.22:41
Времена намазов
Календарь 2021г

Намаз

Qırım Müftisi Hanlar sarayında keçirilgen restavratsiya işlerinen tanış oldı (FOTO)

Опубликовано:

Qırım Müftisi hacı Emirali Ablayev Bağçasaray şeerini ziyaret etip, Hanlar sarayında alıp barılğan restavratsiya işleriniñ ketişatınen ve qazalarğa qarşı alınayatqan tedbirlernen tanış oldı. Bağçasaray tarihiy-medeniy ve arheologik qoruğınıñ müdiri Vadim Martınük Müftige külliyeniñ er bir obyektinde yapılğan işler aqqında tarif etti. İş ziyaretinde Qırım Müftisiniñ muavinleri Ayder İsmailov ve Esadullah Bairov da iştirak ettiler.

Al-ı azırda Hanlar sarayında qazalarğa qarşı tedbirler işlenilip alındı, tezden qurucılar tamirat işlerine keçecekler.

Ayrı diqqat Devlet Geray ve Dilâra Bikeç türbelerinen beraber Cenübiy türbege ayırıldı. Dilâra Bikeçniñ türbesinde işler yekünlendi, lâkin ziyaret esnasında yağğan şiddetli yağmur sebebinden peyda olğan bazı qusurlar aşkâr oldı. Bu munasebet ile qoruqnıñ rehberligine tenqit bildirildi. Bundan da ğayrı, tenqit qaydlarınıñ mulâaza cedvelini resmiy şekilde Qırım Cumhuriyetiniñ Medeniyet nazirligine yollanılması planlaştırıla, çünki Medeniyet nazirligi qazağa qarşı tedbir aluv ve tamirat işleriniñ sımarışçısıdır.

Bundan ğayrı, Devlet Geray türbesinde zemindeki topraq aşağıda yerleşken mezarlarğa çökti. Şu sebepten, türbede yapılacaqlar meselesinde mütehassıslarnıñ ihtilâf etmesinden dolayı, işler toqtalıp qaldı. Mezarlarnı açmaq fikirine cevap bererek, Qırım Müftisi Qırım Cumhuriyeti ve Sevastopol şeeri musulmanları diniy idaresiniñ qattı mevamını seslendirdi, – mezarlar açılmamalı, merhumlarğa toqunılmamalı. Bu mesele boyunca da muracaat Qırım Medeniyet nazirligine yollanılacaq.

İş ziyareti esnasında Qırım Müftisi Hanlar sarayınıñ saasında yerleşken müfti evinde qazalarğa qarşı alınğan tedberler ve keçirilgen tamirat işlerinen de tanış oldı. Şu obyekt boyunca qaydlar ve teklifler de munasip nazirlikke resmiy mektüp ile bildirilecek.

Bağçasaray ziyareti çerçivesinde Qırım Müftisi Orta camini de ziyaret etti. Şu caminiñ fasadını tamir etmek ve topraqnıñ çökip taymasına qarşı tedbir işlerini yapmaq kerek.

Qırım MDİ matbuat hızmeti