Qırım Müftisi halqara konferentsiyanıñ iştirakçilerini selâmladı (FOTO) - ЦРО ДУМКЦРО ДУМК

Четверг

29

июля

19
Зуль-хидждже
1442 | 2021
Утр.3:36
Вос.5:15
Обед.12:54
Пол.16:52
Веч.20:23
Ноч.22:03
Времена намазов
Календарь 2021г

Намаз

Qırım Müftisi halqara konferentsiyanıñ iştirakçilerini selâmladı (FOTO)

Опубликовано:

Qırım Müftisi “Pandemiya zamanında Rusiye musulmanları diniy idareleri: içtimaiy hızmetniñ yañı usulları” halqara ilmiy-ameliy konferentsiyasınıñ iştirakçilerini selâmladı, tedbirniñ açılışı 2021 sene, aprel 8 künü Aqyarda olıp keçti.

Müfti öz çıqışında qayd etti ki, bütün dünyanı qavrap alğan pandemiya – Allahtan bir imtiandır ve onı sabır ile qabul etip, hastalıqnıñ ögüni almaq içün ellerimizden kelgenini yapmalımız.

“Pandemiya zamanında biz göñülden tüşmedik. Ocalarımız onlayn formatqa keçtiler ve İslâm dininiñ oqutuvını bir künge bile toqtatmadılar. İmamlarımız muhtaclar aqqında malümat topladı, çoq balalı qorantalarğa, esli-başlılarğa ve yalıñız qalğan insanlarğa yardım kösterdi”, – dedi Müfti efendi.

Bundan da ğayrı, o, pandemiyanıñ eñ deşetli künleri er bir insannıñ ömüri içün küreşken ekimlerge teşekkürini bildirdi.

Müfti Qırım Cumhuriyetiniñ akimiyetine operativ ştabnıñ teşkil etilüvi, vaziyetni tolusınen kontrol etkenleri ve cumhuriyette stabil vaziyetni temin etkenleri içün teşekkür bildirdi.

“Men, 27 yıl devamında diniy hızmette çalışqan insan olaraq, qayd etmege isteyim ki, bugünki künde Qırımda camiler açıq ve çalışa. Ezanlar susmay. Künümizde bile Avropa devletlerinde olğan sıñırlanuvlar Qırımda yoq. Böyle vaziyet akimiyet organlarınıñ, cemaatçılıqnıñ ve diniy idarelerniñ beraberce gayretleri sayesinde şekillendi”, – qayd etti Müfti efendi.

Bundan da ğayrı, o, pandemiya zamanında eali arasında añlatuv işlerini ve cenaze namazlarını keçirgen imamlarğa, er vaqıt yardım etmege azır olğan din erbaplarına teşekkürler bildirdi.

Müfti İslâm medeniyetine, ilimi ve tahsiline destek fonduna bir sıra diniy-maarif leyhalarını keçirmege yardım etkeni içün minnetdarlıq bildirdi.

Hatırlatamız, “Pandemiya zamanında Rusiye musulmanları diniy idareleri: içtimaiy hızmetniñ yañı usulları” halqara ilmiy-ameliy konferentsiyasınıñ programmasında Rusiye musulmanlarınıñ yetekçileri, islâmiy tahsil ve maarif teşkilâtlarınıñ vekilleri, aliy oquv yurtlarınıñ ocaları, alimler, jurnalistler, ruhiyatçılar, müzey ve kitaphane hadimleri iştirak ete.

Konferentsiyanıñ teşkilâtçıları – Qırım Cumhuriyeti ve Sevastopol şeeri musulmanları diniy idaresi, İslâm medeniyetine, ilimi ve tahsiline destek fondu ve Qırım medeniyet nazirligidir. Tedbir Qırım Cumhuriyetiniñ içki siyaset, malümat ve bağ nazirliginiñ destegi ile keçmekte.

İşbu ilmiy-ameliy konferentsiyanıñ keçirilüviniñ sebebi – 2020 senesi koronavirus hastalığınıñ darqaluvı ve bu munasebetnen kirsetilgen, ve, şu cümleden, diniy müessiselerniñ, cami ve mescitlerniñ, din hadimleri ve ocalarınıñ, balalar içün diniy-maarif leyhalarnıñ işine tesir etken sıñırlavlardır.

Qırım MDİ matbuat hızmeti