Qırım Müftisi hacı Emirali Ablayev Qırım Cumhuriyetiniñ Aqmeçit rayonına iş ziyaretinen keldi (FOTO) - ЦРО ДУМКЦРО ДУМК

Четверг

29

июля

19
Зуль-хидждже
1442 | 2021
Утр.3:36
Вос.5:15
Обед.12:54
Пол.16:52
Веч.20:23
Ноч.22:03
Времена намазов
Календарь 2021г

Намаз

Qırım Müftisi hacı Emirali Ablayev Qırım Cumhuriyetiniñ Aqmeçit rayonına iş ziyaretinen keldi (FOTO)

Опубликовано:

Qırım Müftisi hacı Emirali Ablayev Qırımnıñ Aqmeçit (Çernomorskoye) rayonına iş ziyaretinen keldi. Diniy teşkilâtlarnıñ vekilleri ve rayon imamlarınen iş körüşüvi çerçivesinde aktual problemalar ve olarnıñ çezilüv yolları muzakere etildi. Hususan, Müftilik Bel Avuz Qıpçaq (Gromovo) köyünde cami içün topraqnıñ ayırıluvı meselesinde ve mabedlerniñ havfsızlıq pasportlarınıñ (antiterroristik pasportlarnıñ) resmiyleştirilüvinde destek kösterecek.

İşbu meselede QMDİ rehberiyeti akimiyetke maddiy destek sorap, muracaat etecek, çünki ibadet binalarını antiterroristik standartlarına uyğun şekilge ketirmek içün qoşma maddiy destek kerek.

Toplanğanlar köyde yaşağan yaşlarnıñ işnen temin etilüvi, diniy hızmetçilerniñ ihtisasınıñ yükseltilüvi ve rayon köylerinde çalışacaq kadrlarnıñ azırlanuvını da muzakere ettiler, bundan da ğayrı, uzaq yerleşken mesken yerlerde İslâm kurslarınıñ açıluvı meselesine baqıldı. Al-ı azırda Aqmeçit rayonınıñ terkibine 33 köy kire, er 3-4 köyde 1 imam çalışa.

Bundan da ğayrı, ayrı diqqat yaqınlaşqan Ramazan ayına ayırıldı. Qırım Müftisi bildirgenine köre, cemaat namazları ve iftarlarnıñ keçirilüvi cumhuriyette hastalıqnıñ darqaluv derecesinen bağlı olacaq.

Müfti rayon imamlarınıñ, diniy teşkilât vekilleriniñ nümüneviy çalışmalarını ayrıca qayd etti.

“Siz etrafıñızda cemaatnı topladıñız, insanlar sizge işana, bu ise, eñ müimi. Yapqan er şeyiñiz Allah içün, milletimiz içündir”, – ayttı Müfti efendi.

Qırım musulmanlarınıñ maneviy yolbaşçısı rayonnıñ diniy teşkilâtlarınıñ azaları ve vekillerine, cami qurulışında ve Aqmeçit rayonınıñ ömürinde faaliyet köstergen imamlarğa ve göñüllilerge teşekkürnameler taqdim etti. Er birine Quran-ı Kerim nushaları ve ediyeler berildi.

Qırım MDİ matbuat hızmeti