Qırım Muftiliginde "Ebediy yüreklerimizde" inşalar yarışınıñ neticeleri çıqarıldı (FOTO) - ЦРО ДУМКЦРО ДУМК

Среда

27

октября

21
Ребиу'ль-эвель
1443 | 2021
Утр.5:48
Вос.7:05
Обед.12:32
Пол.15:13
Веч.17:48
Ноч.19:06
Времена намазов
Календарь 2021г

Намаз

Qırım Muftiliginde “Ebediy yüreklerimizde” inşalar yarışınıñ neticeleri çıqarıldı (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde Noman Çelebicihannıñ hatırasına bağışlanğan “Ebediy yüreklerimizde” inşalar yarışı olıp keçti.

Yarış qırımtatar ve rus tilinde oqutılğan orta umumtahsil mektep talebeleri arasında ötkerildi. Umumen, yarışqa 85 iş keldi.

Jüri erkânına Qırım Muftisiniñ muavini Raim Ğafarov, filologiya ilimleri doktorı, QFU qırımtatar ve şarq filologiyasınıñ qırımtatar tili kafedrasınıñ professorı Lemara Selendili, dotsent, filologiya ilimleri namzeti, QFU qırımtatar ve şarq filologiyası kafedrasınıñ qırımtatar filologiyası fakultetiniñ başlığı Ediye Memetova, qırımtatar tilinde çıqqan “Armançıq” mecmuasınıñ baş muarriri Ediye Müslimova, Qırımtatar medeniy-tarihiy miras müzeyiniñ usulşınası Şefiqa Abduramanova, İ. Gasprinskiy adına qırımtatar kitaphanesiniñ yetekçi usulşınası Elmaz Veliyeva kirip, kelgen işlerge qıymet kestiler.

Neticede, jüri aşağıdaki ğaliplerni sayladı:

I yer – İsmail Sotskiy, “№ 2 Mirnoye mektebi”-niñ 9 sınıf talebesi, Aqmescit rayonı;

II yer – Reyyan Keleş, “№2 Eski Qırım UM”, 7 sınıf talebesi;

III yer – Abdurahman Cepparov, “Denisovo mektebi”-niñ 9 sınıf talebesi, Aqmescit rayonı.

Yarış teşkilâtçıları ve jüri azalarınıñ sözlerine köre, er bir iş diqqatqa lâyıq.

“Er bir iş pek meraqlı, inşalarda fikir etmege mecbur etken meraqlı fikirler aks etile. Fikir etmek, tahlil etmek, maqsat qoymaq – bularnıñ episi yaş nesilniñ fikir etmege bilgeniniñ köstergiçidir”, – dedi Raim Ğafarov.

“Balalarnı azırlağan ocalarğa böyle semereli iş içün teşekkürler bildirem, bundan da ğayrı, balalarına doğru terbiye bergen ana-babalarğa minnetdarlığımnı bildirmege isteyim. Eñ müimi – balalarğa baştan doğru yolnı köstermek, o zaman biz yaş nesilden ğurur duyarmız”, – dep, teessüratlarınen paylaştı Ediye Memetova.

Eñ güzel işler Qırım MDİ resmiy saytında ve Qırım Müftiliginiñ resmiy neşirleri olğan “Hidayet” gazetası ile “İkmet çoqrağı” mecmuasında yayınlanacaq.

Ğaliplerniñ tantanalı taqdirlenüvi 2021 senesi, fevral 26 künü Qırım Cumhuriyeti ve Sevastopol şeeri musulmanları diniy idaresinde olıp keçecek.

Qırım MDİ matbuat hızmeti