Qırım Müftiligi Qırımtatar medeniy-tarihiy miras müzeyini 20-yıllığınen hayırladı (FOTO) - ЦРО ДУМКЦРО ДУМК

Суббота

26

сентября

8
Сефер 
1442 | 2020
Утр.5:09
Вос.6:25
Обед.12:39
Пол.15:54
Веч.18:43
Ноч.19:59
Времена намазов
Календари 2020г

Намаз

Qırım Müftiligi Qırımtatar medeniy-tarihiy miras müzeyini 20-yıllığınen hayırladı (FOTO)

Опубликовано:

Qırım Müftisiniñ muavini Ayder İsmailov Qırımtatar medeniy-tarihiy miras müzeyiniñ 20-yıllığına bağışlanğan tantanalı tedbirde iştirak etti. Bundan da ğayrı, tedbirde RF Devlet Dumasınıñ millet vekili Ruslan Balbek, QC Milletlerara munasebetler komitetiniñ başı Albert Kangiyev, QC Medeniyet naziri Arina Novoselskaya, Qırım müendislik ve pedagogika universitetiniñ rektorı Çingiz Yakubov, alim-etnograf İsmet Zaatov ve digerleri iştirak ettiler.

Musafirler müzeyniñ 20-yıllığına bağışlanğan “Qırımtatar müzeyiniñ 20-yıllığı. Tarih. Kollektsiyalar” sergisinen tanış oldılar. Sergide ameliy-süslü sanaat nümüneleri, milliy urbalar, arheologik kollektsiya, mimariy dekorniñ parçaları, muzıka aletleri, soñki yıllar içinde toplanılğan fotovesiqa nümünelerini körmek mümkün.

Tedbirniñ resmiy qısımı devamında musafirler müzey hadimlerini hayırlap, olarğa semereli işler, sevimli işinde muvafaqiyetler, sağlıq, ilham ve qırımtatar müzeyiniñ inkişafında yañı derecelerge yetmekni tilediler.

Ayder İsmailov müzey hadimlerini Qırım Müftisi hacı Emirali Ablayev adından hayırladı.

“Hadimlerniñ pek büyük ilmiy ve teşkiliy işleri sayesinde qırımtatar medeniy miras müzeyi qırımtatar halqınıñ iftiharı oldı, çünki bir çoq qıyınlıqlarğa baqmadan, medeniyetimizni saqlap oldıq. Müzey ekspontaları arasında İslâm medeniyetinen bağlı bir çoq nümüneler bar. Çünki qırımtatar medeniyeti İslâm medeniyetine esaslanıp şekillendi. Milletimiz içün qıymetli olğan medeniyetniñ saqlanuvına isse qoşqan er kesge teşekkürler bildiremiz”, – dedi Ayder İsmailov.

Tantanalı tedbir devamında RF Devlet Dumasınıñ mebüsi Ruslan Balbek ve QC Medeniyet naziri Arina Novoselskaya 2020 soñuna qadar müzeyniñ yañı büyük binada yerleşecegini vade ettiler.

QMDİ matbuat hızmeti