Qırım Müftiligi bütün Qırım "Ezan sedası" yarışınıñ başlamasını ilân etti (FOTO) - ЦРО ДУМКЦРО ДУМК

Четверг

22

апреля

11
Рамазан
1442 | 2021
Утр.4:09
Вос.5:36
Обед.12:46
Пол.16:33
Веч.19:47
Ноч.21:14
Времена намазов
Календарь 2021г

Намаз

Qırım Müftiligi bütün Qırım “Ezan sedası” yarışınıñ başlamasını ilân etti (FOTO)

Опубликовано:

Qırımda ezannı eñ güzel oquycaqlar arasında “Ezan sedası” yarışınıñ birinci saylav turu başlandı. Birinci tur Cürçi (Pervomayskoye) qasabasında olıp keçti.

Finalğa keçmek içün Cürçi rayonınıñ köylerinden kelgen 16 farqlı yaşta olğan yarışçı ğayret kösterdi. Eñ kiçik yarışçı 7 yaşında edi.

Yarışnıñ başında toplanğanlar ögünde Qırım Müftisiniñ muavini Raim Ğafarov çıqışta bulundı. O, ezan ve onıñ musulmanlar içün müimligi aqqında tarif etti.

“Bir qaç onyıllıq devamında ecdatlarımız, sürgünlik yerlerinde bulunğanda, Qırımğa qaytmağa ve ezan sesini eşitmege arzu ete ediler. Bugün ise, kiçik balalarnıñ bile ezannı oquğanlarını körip, yüregimiz ğururnen ve Qırımda İslâmnıñ ğayrıdan tiklenilmesi ve qaviyleşmesi ümütinen tola. Qırımda ezan sesi iç bir vaqıt tınmasın”, – dedi Raim Ğafarov.

Bundan da ğayrı, o, Cürçi din cemiyetiniñ reisi Vaid Bilâlovğa tedbirniñ teşkil etilmesinde yardımı içün teşekkür bildirdi.

Jüri terkibine Qırım Müftisiniñ muavini Raim Ğafarov, Cürçi rayonınıñ baş imamı Kemal Ğaffarov, Cürçi qasabası camisiniñ imamı Server Yağyayev, QMDİ hadimi Remzi Qurtdede kirdiler. Jüri azaları iştirakçilerge bir qaç kriteriy boyunca qıymet kesti: doğru telâffüz (tecvid), maqam ve sesniñ gür olması.

Birinci saylav turu neticesinde finalğa İslâm İzeyev, İbragim Yakubov ve Alim İbragimov keçtiler.

Nevbetteki yarış mart 9 künü, Aqmescitte, Seit Settar külliyesinde ötkerilecek.

Hatırlatamız, saylav turları mart-aprel ayları devamında, Ramazan ayınıñ başlanuvına qadar keçirilecek.

Yarışta iştirak etmek içün 50 yaşına qadar er kişiler davet etile. Bundan da ğayrı, 6 yaşından başlap, oğlanlar da iştirak ete bile.

İştirakçiler aşağıdaki esas talaplarğa uymaq kerekler: doğru telâffuz, ezan metininiñ doğru oqulması, maqam, sesniñ temizligi, ifadeli eda, özüni sanada güzel tutmaq.

Ezannı eñ güzel oquğanlarnı mütehassıs jüri azaları belgileycek, ğaliplerni taqdirnameler ve tedbir sponsorlarından qıymetli hatıra bahşışları bekley.

Tedbirniñ maqsadı – yaşlar arasında İslâm ükümlerini yaymaq ve populâr etmektir.

Qırım MDİ matbuat hızmeti