Qarasuvbazar rayonında yañı cami açıldı (FOTO) - ЦРО ДУМКЦРО ДУМК

Среда

23

июня

13
Зуль-къаде
1442 | 2021
Утр.2:49
Вос.4:47
Обед.12:50
Пол.16:55
Веч.20:43
Ноч.22:41
Времена намазов
Календарь 2021г

Намаз

Qarasuvbazar rayonında yañı cami açıldı (FOTO)

Опубликовано:

Qırım Müftisi hacı Emirali Ablayev Qarasuvbazar rayonınıñ Qatırşa Saray (Leçebnoye) köyünde yañı qurulğan caminiñ açıluvı merasiminde iştirak etti.

Tantanalı tedbirde Qırım Müftisi ile onıñ muavini Esadullah Bairov, Qarasuvbazar rayonınıñ baş imamı Siyar Abdulğaniyev, Qatırşa Saray köyüniñ imamı Dilâver İsmailov, Qırım Cumhuriyetiniñ milletlerara munasebetler boyunca devlet komitetiniñ başlığı Ayder Tippa, Qarasuvbazar rayon memuriyetiniñ rehberi Galina Pereloviç, Miçurino köy şurasınıñ başlığı Oksana Sotnikova, yerli sakinler ve musafirler iştirak ettiler.

Qırım Müftisi dua oqup, toplanğanlarnı şu müim vaqianen hayırladı. Çıqışında, o, caminiñ iç bir vaqıt boş qalmayıp, diniy bilgi merkezi ve insanlarnı tuvğan topraqlarında birleştirgen bir mekân olmasını tiledi.

“Biz Vatan sözüniñ qıymetini bilemiz, er bir halq tarihını bilmeli, ancaq böyle şekilde keçmişimiz ve kelecegimiz arasında köpürler qurula bile. Barışıqlıq, birdemlik ve qarşılıqlı yardımlaşuv ile”, – dedi Müftisi efendi.

Bundan da ğayrı, o, caminiñ qurucılığına destek köstergen iş adamı Yusuf Abdulğaniyevge teşekkür bildirip, böyle hayırseverlerniñ sayısı artmasını tiledi.

Tantanalı tedbir esnasında Müfti Qırım Cumhuriyeti ve Sevastopol şeeri musulmanları diniy idaresi adından qurucılıq sponsorı Yusuf Abdulğaniyevge, bundan da ğayrı, Qarasuvbazar rayon memuriyetiniñ başlığı Galina Pereloviçke ve Miçurino köy şurasınıñ başlığı Oksana Sotnikovağa teşkiliy meselelerni çezmege yardım etkenleri içün teşekkürnameler berdi.

“Böyle oğlannı terbiye etken ana-babağa teşekkür etemiz. Cami qurucılığında issesi olğan er keske teşekkür bildiremiz. Vazifemiz – caminiñ qapıları iç bir vaqıt qapalmasın. Cami – adiy bir bina degil, bu – nesillerimizge qaldıracağımız bir miras, ayatnıñ manasını, er bir musulmannıñ özünen ve etraftakilernen tınçlıq içinde yaşaması ve Allah rizası içün eyilik yapması maqsadını hatırlatqan bir mekândır”, – dedi Müfti efendi.

Yusuf Abdulğaniyev ise, sürgünlikten soñ Qatırşa Saray köyünde qorantasınen yerleşken babasınıñ arzusını ömürge keçirgenini añlattı.

“Babam sağ olğanda, köyde cami qurmağa arzu ete edi. O teşebbüs etti, men ise, onıñ arzusını kerçekleştirdim”, – ayttı Yusuf Abdulğaniyev.

Qurucılıq işleri 2020 senesiniñ yanvar ayında başlandı ve pandemiya sebebinden toqtatıldı. Sıñırlanuvlar qısmen lâğu etilgen soñ, işler devam ettirildi ve mayıs 28 künü camide birinci cuma namazı keçirildi.

Cami 150 insan içün qararlaştırılğan, binada kitaphane, qadınlar odası, imam odası, abdesthane bar. İleride minareniñ qurulması planlaştırıla.

Cami Yusuf Abdulğaniyevniñ babası hatırasına Cevcet camisi adını taşıycaq.

Al-ı azırda Qartışa Saray köyünde tahminen 230 qırımtatar qorantası yaşay.

Qırım MDİ matbuat hızmeti