Qalay islâmiy ilimler medresesinde qız mezuniyeti olıp keçti (FOTO) - ЦРО ДУМКЦРО ДУМК

Вс

25

июля

15
Зуль-хидждже
1442 | 2021
Утр.3:29
Вос.5:11
Обед.12:54
Пол.16:54
Веч.20:28
Ноч.22:10
Времена намазов
Календарь 2021г

Намаз

Qalay islâmiy ilimler medresesinde qız mezuniyeti olıp keçti (FOTO)

Опубликовано:

İmam Maturidiy adına Qalay islâmiy ilimler medresesiniñ qızlar bölüginde tantanalı müitte mezunlarğa diplomlar berildi. Bu sene medreseni altı qız yekünledi.

Oquşnıñ yekünlenüvi ile qızlarnı medrese müdiri Edem Lümanov hayırladı. O, mezunlarğa İslâm oğrundaki faaliyetlerinde muvafaqiyetler tiledi.

“Er biriñiz milletimizge dinimizniñ yarığını yetkizdiresiñiz. Aynı siz yaş nesilge medresede alğan bilgileriñizni beresiñiz. Siz balanıñ bütün ömürlik diniy bilgileriniñ temelini qurasıñız. Yüce Rabbimiz eyi işleriñizde yardımcıñız olsun”, – dedi Edem Lümanov.

Qırım Müftisi adından mezunlarğa bahşış olaraq Quran qapları taqdim etildi. QMDİ diniy tedbirlerni teşkil etüv bölüginiñ rehberi Zenife Ablayeva diniy idare adından mezunlarnı hayırlap, olarğa irişken seviyelerinde toqtalmayıp, bilgilerini mükemmelleştirmek, digerlernen paylaşmaq ve Qırım cemaatını oqutmaq tiledi.

“Sizler içün ediye alğanımızda, qırımtatar medeniyeti, antanelerimiz ve İslam özara sıq bağlı olğanından areket etken edik. Epimiz bilemiz ki, evlengen er bir qız yañı evine muqaddes Quran-ı Kerim nushasını alıp kele. Buña köre de sizlerge ananeviy nağışlı Quran qaplarını ediye etmege qarar berdik”, – dedi Zenife Ablayeva.

Qırım MDİ matbuat hızmeti