Qalay islâmiy ilimler medresesi kiriş vesiqalarını qabul ete - ЦРО ДУМКЦРО ДУМК

Вторник

22

сентября

4
Сефер 
1442 | 2020
Утр.5:04
Вос.6:21
Обед.12:41
Пол.15:59
Веч.18:50
Ноч.20:07
Времена намазов
Календари 2020г

Намаз

Qalay islâmiy ilimler medresesi kiriş vesiqalarını qabul ete

Опубликовано:

Qırım Müftiliginde Qalay islâmiy ilimler medresesi ocalarınıñ muşaveresi olıp keçti. Toplaşuv çerçivesinde Qırım Müftisiniñ muavini Ayder İsmailov ocalarnen kiriş kampaniyasınıñ ketişatını ve 2020-2021 yañı oquv yılında kirsetilecek eksperimental eki yıllıq oquv formatını muzakere etti.

Medreseniñ müdiri Edem Lümanovnıñ sözüne köre, bir yarım ay devamında diniy tahsil yurtunıñ ocaları iş taqımı erkânında Qırımnıñ aman-aman bütün bölgelerini ziyaret etip, mezunlarnıñ ana-babaları ve ösmürlernen bir sıra körüşüvler keçirip, medresede oquş aqqında tarif ettiler, oquv programmasınen tanış ettiler ve diniy tahsil almaqnıñ perspektivaları aqqında bilgi berdiler.

“Oğlan ve qızlarnıñ diniy tahsil almağa büyük meraqlarını qayd etmeli. İnşallah, bu sene medreseniñ birinci kurslarınıñ tolmasını bekleymiz”, – dedi Edem Lümanov.

Vesiqalarnı teslim etken abituriyentlernen mulâqat avgust 4 künü keçirilecek. Birinci dersler avgustnıñ 25-nde başlanacaq.

Hatırlatamız, Qalay islâmiy ilimler medresesine kiriş kampaniyası devam ete, vesiqalar onlayn şekilinde iyülniñ 31-ne qadar qabul etilecek.

Oğlanlar ve qızlar bölüklerine 9 ve 11 sınıf mezunları, hafızlıq bölügine ise, 5 sınıfnı yekünlegen talebeler qabul etile.

Er bir bölükte oquv müddeti 2 yılnı teşkil ete.

Medreseniñ oğlan ve qızlar bölükleriniñ mezunları mektepte umumtahsil programmasını yekünlep, tolu orta tahsil boyunca attestatnı, bundan da ğayrı, orta professional diniy tahsil aqqında diplomnı elde etecekler.

Medresede oquv, yaşamaq ve aş-suv bedavadır.

Boş yerler qalsa, qabul etüv, ilâve olaraq, avgust 05-20 künlerinde de keçirilecek.

Oquşqa kirmek içün abituriyentler mulâqattan (red. sobesedovaniye) keçmeli.

Mulâqat esnasında talebeniñ yanında tabel ya da baalar ile attestat olmalı.

Mulâqattan keçken abituriyentler böyle vesiqalarnı taqdim etmeli:

  1. Baalar ile attestatnıñ (tabelniñ) özü ve kserokopiyası;
  2. 086-u şekil tibbiy spravka;
  3. Alınğan aşılavlar cedveliniñ kopiyası;
  4. Flürografiyadan keçkeni aqqında malümat kâğıtı;
  5. Pasport (doğuv şeadetnamesi) kopiyası;
  6. Ana-babadan (resmiy temsilcilerden) birisiniñ pasport kopiyası;
  7. Tibbiy polisniñ kopiyası;
  8. SNİLS-niñ kopiyası;
  9. 3h4 ölçüde 6 renkli fotografiya.

Mulâqat aşağıdaki adreste keçirilecek:

296173, Qırım Cumhuriyeti, Mayskoye köyü, Gasprinskiy soqağı, 1.

Malümat içün telefonlar:

+7978-117-26-17 (Medrese müdiri)

+7978-899-5447 (oğlanlar bölügi);

+7978-143-05-07 (qızlar bölügi);

+7978– 876-70-12 (hafızlıq bölügi)

QMDİ matbuat hızmeti