Noman Çelebicihan – şahciyeti, tercimeialı, mirası (FOTO) - ЦРО ДУМКЦРО ДУМК

Пн

26

июля

16
Зуль-хидждже
1442 | 2021
Утр.3:31
Вос.5:12
Обед.12:54
Пол.16:53
Веч.20:27
Ноч.22:08
Времена намазов
Календарь 2021г

Намаз

Noman Çelebicihan – şahciyeti, tercimeialı, mirası (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde Noman Çelebicihannıñ Qırım, Lehistan, Litvaniya ve Aqrusiyeniñ müftisi olaraq saylanğanınıñ 104-yıllığı qayd etildi.

Tedbirniñ teşebbüsçisi – Qırımtatar medeniy-tarihiy miras müzeyi, teşkilâtçısı – Qırım Müftiligidir.

Tögerek masa şekilindeki toplaşuvnı Müfti efendi hacı Emirali Ablayev açtı. O, iştirakçilerge teşebbüskârlıqları içün teşekkür bildirip, muvafaqiyetli çalışmalar tiledi. Toplanğanlar dua oqudılar.

Maruzalar ile filologiya ilimleri doktorı, professor, Qırım müendislik ve pedagogika universiteti erkânında çalışqan qırımtatar tili, edebiyatı, tarihı ve medeniyetini ögrenüv ilmiy tedqiqat merkeziniñ rehberi İsmail Kerimov, Qırımtatar medeniy-tarihiy miras müzeyiniñ ilmiy-maarif faaliyeti boyunca usulşınası Şefiqa Abduramanova ve arap filologiyası doktorı, İslâmiy ilimler Qalay medresesiniñ ocası Rustem Memetov çıqışlar yaptılar.

Qayd etmeli ki, İsmail Kerimov yaqında Moskvadan qaytıp keldi, anda, o, devamlı arhiv vesiqaları ile çalıştı ve Qırım tarihına ait olğan bir asır evelki vaqialarnı ögrendi.

Alimler maruzalarında Noman Çelebicihannıñ ömüri ve faaliyeti boyunca yañı faktlarnen paylaşıp, onıñ safdaşları ve fikirdeşleriniñ taqdiri aqqında tarif etti, bugün o zamanki tarihiy vaqialarnıñ ögrenilüviniñ aktualligini qayd ettiler.

Toplaşuvnıñ soñunda Müfti efendi alimlerge çalışmaları içün teşekkürler bildirdi.

“Noman Çelebicihan kibi büyük şahısnıñ milletimiz içün büyük emiyeti bar, amma, onıñ aqqındaki bilgilerimiz pek azdır, onıñ içün alimlerimiz elde etken er bir malümat qıymetli ve keñiş dairelerge belli olmalı. O zamanki vaqialar aqqında aytacaq olsaq, unutmayıq ki, tarih tekrarlana bile ve biz evel yapqanımız hatalarnı kene yapsaq, kene aynı vaqialarğa yol bergen olurmız ve bu hatalarnı kene deñiştirmege kerek olacaq”, – qayd etti Müfti efendi.

İHTAR: 1917 sene, mart 25 künü Bütünqırım musulmanlar qurultayı olıp keçti. Qurultay vaqıtınca Qırım musulman icra komitetini sayladı, komitetniñ başlığı olaraq 32 yaşındaki Noman Çelebicihan tayin etildi. Bundan da ğayrı, o, Qırım, Lehistan, Litvaniya ve Aqrusiyeniñ müftisi olaraq saylandı.

Vaqıf komissiyasınıñ başlığı olaraq ise, onıñ yaqın safdaşı Cafer Seydamet saylandı.

Qırım MDİ matbuat hızmeti