Moskva. "Qalpte iman ile"! (FOTO) - ЦРО ДУМКЦРО ДУМК

Пн

26

июля

16
Зуль-хидждже
1442 | 2021
Утр.3:31
Вос.5:12
Обед.12:54
Пол.16:53
Веч.20:27
Ноч.22:08
Времена намазов
Календарь 2021г

Намаз

Moskva. “Qalpte iman ile”! (FOTO)

Опубликовано:

VI Bütünrusiye Rusiye halqlarınıñ milliy edebiyatları festivalinde Qırım Cumhuriyeti ve Sevastopol şeeri musulmanları diniy idaresi tarafından neşir etilgen “Qalpte iman ile” kitabı taqdim etildi. Festival iyün 16-20 künleri Moskvada olıp keçti.

“Qalpte iman ile” – 1944 sene, mayıs 18 künü qırımtatarlarnıñ Qırımdan zorbalıqnen sürgün etilgenini körgenlerniñ hatıra cıyıntığıdır. Müellifler – Zenife Ablayeva ve Gülnara İlyasova.

Hatıralar cıyıntığı Dağıstan, Mariy El, Adıgeya, Altay, Qaraçay-Çerkesiya cumhuriyetleri ve Rusiyeniñ diger regionlarından kelgen yazıcılarda meraq doğurdı.

Kitap müellifleriniñ sözlerine köre, cıyıntıqqa ayrı diqqatnı altay şairi Brontoy Bedürov ayırdı. Onıñ fikirince, kitap ğayet kereklidir.

“Siz büyük nesilniñ hatıralarını yazıp alıp, pek doğru yaptıñız. Er bir halq tarihını temel menbalardan bilmeli. Bu diqqatqa lâyıq büyük emektir”, – dep, qayd etti Brontoy Bedürov.

Buña ilâve olaraq, kitap aqqında teessüratlarınen qabarda şairi Zarina Qanuqova paylaşıp, müellifdeşlik tecribesine diqqat çekti: “Müellifdeşlik – güzel tecribedir, o, er bir müellifte olğan icadiy özgünlikni birleştirmege imkân bere”.

“Milliy tilde kitap ve bilingva” muzakereler çerçivesinde müellifler kitapnıñ eki tilde yazıluvı tecribesinen paylaştılar.

Festival çerçivesinde Gülnara İlyasova ve Zenife Ablayeva milliy müelliflerniñ ve tercimanlarnıñ perfomans-körüşüvinde iştirak etip, qırımtatar klassiklerniñ şiiriy icadını taqdim eterek, devletniñ til baylığını numayış ettiler. Festivalniñ baş sanasında Eşref Şemi-zadeniñ (“Arzum”), Bekir Çoban-zadeniñ (“Tuvğan til”, “Bir izin beriñiz…”), Mustafa Cevheriyniñ (“Biri firqat, biri ğurbet, biri aşq”), Yunus Temirkayanıñ (“Ümüt”) eserleri oquldı.

Hatırlatamız, “Qalpte iman ile” hatıralar cıyıntığı qırımtatar halqı içün matem künü olğan 18 mayıs kününe bağışlanıp, 2021 senesi, mayıs 19 künü taqdim etildi.

Leyha Qırım Cumhuriyeti ve Sevastopol şeeri Müftisi hacı Emirali Ablayevniñ destegi ile ömürge keçirildi.

Qırım MDİ matbuat hızmeti