Qırım musulmanları “Mevlid gecesini” – Muhammed Peyğamberniñ (s.a.s.) bu dünyağa kelüvini qayd etti.
Mevlidke bağışlanğan büyük diniy merasim, Aqmesciteki Seit-Settar külliyesinde olıp keçti.
Musulmanlar, Quran, Mevlid oqudı, dua etti ve Peyğamberge (s.a.s.) salâvat ketirdi. “Mevlid gecesi” keçirilgen soñ, qırımtatar ananeviy şerbeti ikram etildi.
Mezkür tedbirler, Saq rayonı, Kezlev, Canköy, Or-Qapı ve cumhuriyetniñ diger şeerlerinde ve qasabalarında keçirildi.
Merasim devamında, daima oqulğan dualardan ğayrı, Peyğamberge (s.a.s.) salâvat ketirile. İlâhiler cemaatnen birlikte maqamı ile oqula ve Peyğamberniñ (s.a.s.) ömüri aqqında subetler keçirile.
Bu kün, adet üzre, soy-sop, qolum-qomşu, dost-eş ziyaret etile, fuqarelerge sadaqa berile.
Musulman alimleriniñ bergen malümatlarına köre, Muhammed Peyğamber (s.a.s.) 571 senesi Rabi-ül-Evvel ayınıñ 12-nci künü, bazarertesi künü, tañ atqanda dünyağa keldi.
QMDİ matbuat hızmeti
