Kezlevde Noman Çelebicihannıñ hatıra aqşamı olıp keçti (FOTO) - ЦРО ДУМКЦРО ДУМК

Пн

26

июля

16
Зуль-хидждже
1442 | 2021
Утр.3:31
Вос.5:12
Обед.12:54
Пол.16:53
Веч.20:27
Ноч.22:08
Времена намазов
Календарь 2021г

Намаз

Kezlevde Noman Çelebicihannıñ hatıra aqşamı olıp keçti (FOTO)

Опубликовано:

Kezlevniñ A.S. Puşkin adına merkeziy kitaphanesinde Qırımda yaşağan bütün halqlarnıñ birdemligi ve ukuqiy teñligi içün ğayret etken qırımtatar halqınıñ ulu şahsiyeti, cemaat erbabı, Aqrusiye, Lehistan, Litvaniya ve Qırımnıñ birinci müftisi, şair, qırımtatarlarnıñ milliy marşı sözleriniñ müellifi Noman Çelebicihannıñ hatırasına bağışlanğan tedbir olıp keçti.

Hatıra merasiminde Kezlev bölgesiniñ baş imamı Eskender Memetov iştirak etti. Toplanğanlar ögünde çıqışta bulunıp, o, qırımtatar halqınıñ oğlu olğan Noman Çelebicihannıñ hususiy missiyasını qayd etti. Çelebicihan musulmanlarnı birleştirmege ve cumhuriyette yaşağan bütün halqlarnıñ faydası içün Qırımnıñ inkişaf etmesini arzu ete edi.

“Qırımtatar halqınıñ ulu oğlu Allah yolunda şeit tüşti. Quranda böyle buyurıla: “Allah yolunda öldürilgenlerniñ ölüler olğanını tüşünme. Yoq, olar tiridir, Rabbleri yanında, (bergen) nimetleri içindeler” (3:169). Bu – Noman Çelebicihannıñ onı hatırlağan ve ürmet etken insanlarnıñ yüreklerinde daima yaşaycağını köstere”, – dedi Eskender Memetov.

Toplanğanlar Noman Çelebicihannıñ qırımtatar halqınıñ medeniyetine qoşqan salmaqlı issesini qayd ettiler, onıñ ömür yolu ve faaliyetinen tanış oldılar. Tedbirde şairniñ eñ güzel şiirleri yañğıradı. Eserlerni Qırım Cumhuriyetiniñ Kezlev şeeriniñ oqutuvı qırımtatar tilinde alıp barılğan №18 orta tahsil mektebiniñ talebeleri ifadeli oqudılar. Bundan da ğayrı, “Haytarma” qırımtatar yır ve oyun ansambliniñ artistleri milliy muzıkalı eserlerni icra ettiler.

Tedbirde Kezlev şeer şurasınıñ millet vekili Eldar İbragimov, Kezlev şeeri memuriyetiniñ medeniyet ve milletlerara munasebetler idaresiniñ başlığı Veronika Nadeyeva, Kezlev bölgesiniñ baş imamı Eskender Memetov, tarihçı, cemiyetşınas, içtimaiy ilimler namzeti Alife hanım Yaşlavskaya, umumtahsil ve medeniyet müessiseleriniñ, Kezlevniñ milliy-medeniy birleşmeleriniñ ve cemaatçılıqnıñ vekilleri iştirak etti.

Qırım MDİ matbuat hızmeti