İslâm dünyası ve Qırım hanlığı – Canköy rayonında orta mektep ocaları ve talebeleri içün yarış keçirildi (FOTO) - ЦРО ДУМКЦРО ДУМК

Суббота

26

сентября

8
Сефер 
1442 | 2020
Утр.5:09
Вос.6:25
Обед.12:39
Пол.15:54
Веч.18:43
Ноч.19:59
Времена намазов
Календари 2020г

Намаз

İslâm dünyası ve Qırım hanlığı – Canköy rayonında orta mektep ocaları ve talebeleri içün yarış keçirildi (FOTO)

Опубликовано:

Canköy rayonınıñ Roşçino köyünde “İslâm dünyasınıñ tarihı ve Qırım hanlarınıñ tarihı” mevzusında V Cumhuriyet yarışı olıp keçti. Açıq yarışta orta mektep ocaları ve talebeleri iştirak etti. Cemi, 125 insan qoşuldı.

Yarış, Qırım Müftisi hacı Emirali Ablayevniñ reberliginde Canköy şeer memuriyeti ve Roşçino orta tasil mektebiniñ destegi ile keçirildi.

Yarışnıñ teşkilâtçısı – tarihçı ve cemaat erbabı Reşat Asmanovdır.

Yarışnıñ maqsadı – talebelerniñ intellektual seviyesini yükseltmek ve medeniy-tarihiy asabalıqqa nisbeten ürmet duyğusını aşlamaqtır.

Yarış şartları boyunca, iştirakçiler, İslâm tarihı ve Qırım Hanlığınıñ tarihı  boyunca 4 testten keçmek kerek edi. Neticelerge köre, 10 eñ güzel iştirakçi finalğa çıqtı ve birincilik içün küreştiler.

İştirakçilerniñ bilgilerine jüri azaları qıymet kesti. Jüri erkânına Qırım Müftisiniñ muavini Ayder İsmailov, Müfti yardımcısı Raim Ğafarov, QMDİ diniy tedbirlerniñ teşkil etüv bölüginiñ reberi Zenife Ablayeva kirdi.

Böylece, ocalar arasındaki yarışta Canköy rayonınıñ Tarhanlar köyüniñ orta tasil mektep ocası Tenzile Mustafayeva ğalebe qazandı. Talebeler arasında ise birincilikni Qurman qasabasınıñ 1-sanlı orta tasil mektebiniñ talebesi İmran Kübedinov aldı.

Yarış iştirakçileri ve ğaliplerini Qırım Müftisiniñ muavini Ayder İsmailov hayırladı.

Ayder İsmailov: “Bu kibi yarışlar balalarımıznıñ bilgi seviyesini keñleştirmege yardım ete. Eminim, bu bilgiler olarğa ileride de kerek olur. Çünki er bir dinniñ temsilcileri öz dinini ve medeniyetini bilmek kerekler”, – dep ayttı.  Ayder İsmailov, yarışnıñ teşkil etilüvine ve keçirilüvine destek köstergen er keske teşekkürler bildirdi. Bundan da ğayrı, yarış iştirakçilerini Canköy rayon memuriyetiniñ temsilcisi Oksana Pogrebnaya hayırladı ve bilgi almaq – daima emek talap etkenini, yañı bir şey ögrengende, insan caillikni yengenini qayd etti.

Yarış ğaliplerine qıymetli bahşışlar berildi. Faal iştirakçiler de diqqatsız qalmadı, olar da ediyelerni aldı. Yarış iştirakçileri içün küçük kontsert programması teşkil etildi. İleride  yarışnı er yıl keçirmege  ve yarışqa, cumhuriyetniñ er regionından ocalarını ve talebelerini celp etmek közde tutula.

QMDİ matbuat hızmeti