"İslâm bilgirleri" qadimiy Kezlev şeerini ziyaret ettiler (FOTO) - ЦРО ДУМКЦРО ДУМК

Вс

26

сентября

19
Сефер 
1443 | 2021
Утр.5:09
Вос.6:25
Обед.12:39
Пол.15:54
Веч.18:43
Ноч.19:59
Времена намазов
Календарь 2021г

Намаз

“İslâm bilgirleri” qadimiy Kezlev şeerini ziyaret ettiler (FOTO)

Опубликовано:

“İslâm bilgirleri” breyn-ring yarışınıñ ğalipleri Kezlev şeerine kezintige bardılar.

“İslâm bilgirleri” intellektual yarışı Boğurça qasabasınıñ genç sakinleri arasında keçirilip, Aqmescitteki İmam Ebu Hanife adına camide teşkil etilgen edi.

Tedbir teşkilâtçısı İslâm medeniyeti, ilimi ve tahsiline destek fondunıñ destegi ile Qırım Cumhuriyeti ve Sevastopol şeeri musulmanları diniy idaresidir. Yarış ekinci kere ötkerildi, bu seneniñ mayıs ayında yarış Aqmescit rayonında, №2 Kölçugino mektebinde de keçirilgen edi.

İntellektual yarışda üç taqım iştirak etti – “Fetanet”, “İlim teregi” ve “İslâm balaları”. İştirakçilerniñ bilgilerine mütehassıs jüri qıymet kesti, onıñ terkibine Qırım Müftisiniñ muavini Raim Ğafarov, imam Bekir Adilov, QMDİ diniy tedbirlerni teşkil etüv bölüginiñ rehberi Zenife Ablayeva kirdiler.

Breyn-ringniñ neticesinde 80 baa ile “İlim teregi” taqımı ğalebe qazandı. “Fetanet” taqımı 69 baa ile ekinci yerde, üçünci yerni ise, 56 baa qazanğan “İslâm balaları” taqımı aldı.

Ğalebe qazanğan taqım prizini – Kezlev şeerine kezintini qazandılar. Kezinti esnasında balalar İslâm medeniyetiniñ tarihına ait abidelerni – Hanlar camisini, Dervişler tekiyesini ziyareti ettiler, qadimiy Kezlev şeeriniñ soqaqlarını kezdiler ve şeer delfinariumında yunus balıqlarınıñ mühteşem şousını seyir ettiler.

Qırım Müftisiniñ muavini Raim Ğafarov balalarnıñ diniy bilgi seviyesine yüksek qıymet kesti.

“Balalarnıñ meraqlanğanı, sualler bergeni ve oquğanı quvandıra. Bir vaqıtları üyken nesilimiz bunıñ aqqında ancaq hayal ete bile edi, biz ise, şu hayalnıñ kerçekleşkenini köremiz. Balada diniy temel atılsa, onıñ kelecegi güzel olur”, – dep, qayd etti Raim Ğafarov.

Tedbir teşkilâtçılarınıñ fikirince, böyle yarışlar balalarnı birleştire, dostluqnıñ qaviyleşmesine ve taqım duyğusınıñ peyda olmasına siltem bere.

Yañı oquv yılında Qırım Müftiligi “İslâm bilgirleri” yarışını cumhuriyetniñ mekteplerinde keçirmege planlaştıra.

Qırım MDİ matbuat hızmeti