"Hidayet" gazetası – faydalı bilgilerniñ menbasıdır. (FOTO) - ЦРО ДУМКЦРО ДУМК

Суббота

27

ноября

22
Ребиу'ль-ахир
1443 | 2021
Утр.6:24
Вос.7:47
Обед.12:36
Пол.14:46
Веч.17:15
Ноч.18:38
Времена намазов
Календарь 2021г

Намаз

“Hidayet” gazetası – faydalı bilgilerniñ menbasıdır. (FOTO)

Опубликовано:

Qırım ve Sevastopol şeeri müsulmanları Diniy idaresi tarafından çıqarılğan içtimaiy-diniy “Hidayet” gazetasınıñ yañı sanı çıqtı.

Gazeta saifelerinde siz, QMDİ-niñ faaliyeti, analitik malümatlarnı ve er künlük faydalı tevsiyelerni ögrenebilesiñiz.

Bundan da ğayrı, gazetada Qırım MDİ islâm ilimleri ocaları azırlağan diniy maqalelerni oqumaq mümkün. Ayrı diqqat, ayatımıznıñ er angi inceliklerini aks etken Muqaddes Quran-ı Kerimge ayırıla.

Bu sanda, Muqaddes Qurannıñ 102-nci suresi – “Tekâsur” suresiniñ manası, emiyeti ve tarihı aydınlatıla. Sure, Mekke devirinde endirilgen sekiz ayattan ibarettir. Allah, insannıñ eñ sevmegen  çizgleri hususında tenbiyeley. Bu aqta “Hidayet” gazetasınıñ saifelerinde “Tekâsur” suresi manasınıñ añlatılmasından ögrenmek mümkün.

“Din – bir zindan degildir! İnsanlar İslâm dinini öz isteginen qabul ete, esirge tüşmey!”. Gazetanıñ yañı sanında diniy hızmette olğan qabartuvlar mevzusı açıqlana. İslâmnı yasaqlar dini olaraq köstergen insanlarnıñ maqsadı ne? Bu sualge dair tüşüncelerini Qırım Müftisiniñ muavini Ayder İsmailov ifade ete.

Kene hurafe aqqında… Halq arasında “hayırlı” ve “hayırsız” künler aqqında inançlar yaşay. “Hidayet”niñ bu sanı mezkür meseleni talil ete.  Bundan da ğayrı, yañı sannıñ saifelerinde siz, İslâmnıñ sihirge nisbeten davranışını ögrenebilesiñiz.

“İslâm ve ilim” rubrikasında türk admiral-seyahatçı, Antarktidanıñ yalısını, onıñ açılışından 300 yıl evelsi köstergen Peri-reisniñ tizgen haritasınıñ sırı aqqında oqumaq mümkün.

Aile ayatında ömür arqadaşınıñ destegi – barışıq, bereket ve bahtnıñ temelidir. “Sımalar” rubrikasında bahtlı aile yaşayışınıñ sırlarını Aqmeçit rayonı Yarılğaç köyüniñ imamı Ruslan Abdulvapov ve onıñ ömürarqadaşı, İslâm dini esasları ocası Valide Abdulvapova açalar.

Bundan da ğayrı, gazetanıñ yañı sanında “İrfan” radiosınıñ planları ve perspektivaları aqqında oqumaq mümkün.

“Sual-cevap” rubrikasında Qırım musulmanları Diniy idaresiniñ din ocaları içtimaiy ağlar qullanıcılarınıñ suallerine cevap bere. Mında oquyıcılar, Peyğamberimizniñ sahabeleri aqqında malümatnı, 2019 senesi fevral ayınıñ namaz vaqıtları ve qırımtar sözleriniñ luğatını tapabile.

“Hidayet” – musulmanlar ve İslâm dini ile meraqlanğanlarnıñ gazetasıdır.

“Hidayet” gazetası ayda bir kere 10 biñ nusha tirajınen çıqarıla ve Qırım camilerinde, Qırım müsulmanları Diniy idaresinde (Kurçatov soqağı, 4) bedava darqatıla. “Hidayet” gazetasına Qırımnıñ er bir poçta bölüginde yazılmaq mümkün. Abune indeksi: 21743.

QMDİ matbuat hızmeti