"Ezan sedası" yarışınıñ coğrafiyası Qırım boyunca keñişley (FOTO) - ЦРО ДУМКЦРО ДУМК

Четверг

29

июля

19
Зуль-хидждже
1442 | 2021
Утр.3:36
Вос.5:15
Обед.12:54
Пол.16:52
Веч.20:23
Ноч.22:03
Времена намазов
Календарь 2021г

Намаз

“Ezan sedası” yarışınıñ coğrafiyası Qırım boyunca keñişley (FOTO)

Опубликовано:

“Ezan sedası” adlı Bütünqırım müezzinler yarışınıñ saylav turları Aqmeçit (Çernomorskoye) qasabasında ve Saq şeerinde olıp keçti. Jüri terkibine İslâm temelleri medresesiniñ ocaları, Qırım Cumhuriyeti ve Sevastopol şeeri musulmanları diniy idaresiniñ hadimleri kirdiler. Ezanlarnıñ icrasına bir qaç kriteriy boyunca qıymet kesildi: doğru telâffuz, maqam ve sesniñ gürligi.

Aqmeçit qasabasındaki yarışnıñ neticesinde eñ muvafaqiyetli müezzinler olaraq Bekir Seitümerov (13 yaşında), Ahtem Qaraumerov (30 yaşında), Dilâver Nusretov (54 yaşında) tanıldılar.

Saq şeerinde ise, ezannı eñ güzel icra etkenler olaraq Edem Mustafayev (12 yaşında), Bilâl Settarov (10 yaşında), Ridvan Capparov (59 yaşında), Server Celâlov (41 yaşında) tanıldılar.

Daa evel saylav turları Cürçi qasabasında, Aqmescitte ve Bağçasarayda olıp keçti. Ezannıñ oqulması boyunca yarışnıñ finalına keçmek içün 6 ile 50 ve daa yuqarı yaşta olğan er kişiler iştirak eteler.

Hatırlatamız, saylav turları mart-aprel ayları devamında, Ramazan ayınıñ soñuna qadar ötkerilecek. Yarışnıñ finalı Ramazan ayından soñ keçirilecek.

Eñ güzel ezan oquyıcılarını mütehassıs jüri azaları belgileycek, ğaliplerni taqdirnameler ve yarış sponsorlarından hatıra bahşışları bekley.

Nevbetteki saylav turı mart 23 künü Aqmescit rayonınıñ Boğurça (Kamenka) qasabasında olıp keçecek, mart 25 künü ise, Canköy şeerinde olacaq.

Qırım MDİ matbuat hızmeti