Cürçi rayonınıñ memuriyeti, Gvardeyskoye köyüniñ sakinleri ve Qırım Cumhuriyeti ve Sevastopol şeeri musulmanları diniy idaresiniñ “Aqçora” musulman din teşkilâtına, Qurban bayramını teşkil etmege yardım köstergenleri içün teşekkürler bildire.
Bayram tedbirini, rayonnıñ yerli icadiy taqımlarınıñ icrasındaki qırımtatar yırları yaraştırdı.
Musafirlerni pilâvnen siyladılar, bayramnıñ küçük musafirlerine ise tatlı bahşışlar berildi.
“Küreş” milliy sport yarışlarınıñ ğalipleri qıymetli bahşışlarğa nail oldı. Ananeviy “canlı” bahşışnı (qoynı) ğalip Nazim Davletşayev omuzlarına köterdi.
Rayon memuriyetiniñ teşekkürnamesinde: “Bütün musulmanlarnı bu bereketli ve quvanç tolu bayramnen hayırlaymız. Bizim eyi işlerimiz ise dinlerara ve bütün milletler arasındaki birlikni qaviyleştirir”, dep aytıla.
QMDİ matbuat hızmeti
