Haberler - Page 9 of 56 - ЦРО ДУМКЦРО ДУМК | Страница 9

Вторник

04

августа

14
Зуль-хидждже
1441 | 2020
Утр.3:47
Вос.5:22
Обед.12:54
Пол.16:49
Веч.20:16
Ноч.21:51
Времена намазов
Календари 2020г

Намаз

Haberler - Page 9 of 56 - ЦРО ДУМК

Çeber eller kursı

Опубликовано:

Aqmescitniñ Borçoqraq qasabasında qızlar içün çeber eller kursı teşkil etile.  Yaşı 10-15 civarında olğan qızlar davet etile. Programmada: — akril boyalar ile resim çızmaq; — kvilling dersleri; — biser ile çalışuv (ineler, terekler, çiçekler) — şeritlerden çiçekler yapmaq; — dekorativ zarf yapmaq; — fetr ile çalışuv. Dersler aftada bir kere keçirilecek. Malümat içün telefon nomerası: +7978 041 0226 QMDİ matbuat hızmeti

“Yaş mimar” yarışınıñ ğalibi belgilendi (FOTO)

Опубликовано:

Qırım musulmanları Diniy İdaresi tarafından ilân etilgen "Yaş mimar" adlı Bütün Qırım yarışınıñ neticeleri çıqarıldı. Yarış, bu sene iyül ayınıñ soñunda ilân etildi. Mütehassıslarnıñ diqqatına 20-den ziyade leyha taqdim etildi. Finalda iştirak etmek içün, dört leyha saylanıldı. İştirakçilerniñ vazifesi – caminiñ qurucılığında qırımtatar üslübinden faydalanıp, köntseptsiya ve mimariy-plan qararlarını işlep çıqarmaqtır. Umumen, yarışnıñ maqsadı – caminiñ eñ güzel eskiz leyhasını seçmek,  qırımtatar mimar usulını saqlamaq ve populârlaştırmaq, mimarlarnı ileride icadiy işke ilhamlandırmaqtır. Jüri terkibine Qırım Müftisiniñ muavini Ayder İsmailov, Qırım MDİ qurucılıq ve topraq bölüginiñ reberi Ervin Kerimov, GUP "Krımproyektrestavratsiya" temsilcisi Şükri Halilov, "İndustriya razvitiya" şirketiniñ reberi Enver Emiraciyev, Bağçasaray tarihiy-medeniy qoruq müzeyiniñ müdir muavini Rustem Eminov kirdiler. Finalğa çıqqan iştirakçiler öz cami eskizlerini taqdim ettiler. Yaş iştirakçilerniñ leyhaları, farqlı üslüpte – osmanlı, aq deñiz, yaqın şarq ve hay-tek üslübinde azırlandı. Er leyha, öz özgünliginen  ve ayırılıp turğan hususiy çizgiler ile meraq doğurdı. Final neticelerine köre, jüri azaları ğalipni belgiledi. Birincilikni mimar Alim Valitov aldı. Qırım Müftisi, Alim Valitovğa, Qırım musulmanları Diniy İdaresi ve Qırım hac-operatorı adından bahşış berdi – Mekke ve Medine topraqlarına küçük hacılıqqa (ümrege) yollanmanı ediye etti. Ekinci yer ve bahşış olaraq 3D printerni, cami leyhasını hay-tek üslübinde azırlağan Ahtem Mejmidinov qazandı. Üçünci yer ve lazer printerni dizayner Asan Nuriyev aldı. Jüri azalarınıñ fikirleri ve internet vastasınen rey berüvine köre, "Seyircilerniñ alğışı" nominatsiyasında Nuriye Seitveliyeva ğalip olıp çıqtı. V.İ. Vernadskiy adına Qırım federal universiteti qurucılıq ve mimarcılıq Akademiyasınıñ üçünci kurs studentine mahsus bahşış – qave-maşina berildi. Bahşışnı, Rusiye Federatsiyası Devlet Dumasınıñ deputatı Ruslan Balbek berdi. Qırım Müftisi: "Cami leyhalarınıñ qurucılığında tecribesi olğan istidatlı yaşlarnı körmege – büyük quvançtır. Bu ciddiy maneviy temel, bilgilerniñ timsalidir. Oquñız, milletimizniñ eyiligi oğrunda çalışıñız, siz kibi tasil körgen ve istidatlı yaşlar sayesinde milletimizniñ adı bütün dünyağa belli olsun. Biz ise daima sizge qol tutacaqmız", dep ayttı. Öz nevbetinde, Qırım Müftisiniñ muavini Ayder İsmailov, yaş mimarlarğa, iştirak etkenleri ve leyhalarnıñ güzel taqdimi içün teşekkürler bildirdi ve: "Eminim, bu camiler mıtlaqa Qırımnı yaraştıracaq ve bizim camilerimiz, öz güzelligi ve özgünligi ile dünyanıñ belli camilerinen bir sırada turacaq. İleride de istidatlı yaşlarnı tapmaq içün, biz, bu kibi yarışlarnı keçirmege niyetindemiz. Maqsadımız – bizde istidatlı ve progressiv, büyük potentsialnıñ saibi olğan yaşlar bar olğanını köstermek, sizni, yañı leyhalar ve mimarcılıq sanatında yañı derecelerge irişüviñizge, ileride bizni quvandırmañız içün ilhamladırmaqtır", dep ilâve etti. QMDİ matbuat hızmeti [gallery link="file" columns="4" size="medium" ids="34556,34554,34552,34550,34548,34546,34544,34542,34540,34538,34536,34534,34532,34530,34528,34526,34524,34522,34520,34518,34516,34514,34512,34510,34508,34506,34504,34502,34500,34498"]

Islâm Terek rayonınıñ köyünde cami qurulacaq (FOTO)

Опубликовано:

İslâm Terek rayonınıñ Babenkovo (Essen Eli) köyünde, cami qurulacaq yerde temel qoyuluvınıñ tantanalı merasimi olıp keçti. Tedbirde Qırım Müftisiniñ muavini Ayder İsmailov iştirak etti. Essen Eli köyüniñ musulman sakinleri, 30 yıl devamında topraqnıñ ayırıluvı içün ğayret kösterdiler.. Qararnıñ qabul etilüvi ep sozulğan. Yerli faaliyetçiler ve din cemiyetiniñ azaları, Qırım musulmanları Diniy İdaresiniñ destegi ile vesiqalarnı resmiyleştirdi, cami qurucılığı içün ruhset berildi ve kelecekte qurulacaq caminiñ temeli qoyuldı. Cami 250-300 insannı sığdırabilecek. Qurucılıq, yerli musulmanlar ve qomşu köylerdeki sakinlerniñ sadaqalarına keçirilmekte. Mında cuma namazına Kipçak (Kriniçki) ve Nayman (Abrikosovka) qomşu köyleriniñ musulmanları kelecek. Cami yanında,  İslâm  dini esasları ve qırımtatar tili kursları açmaq közde tutula. Müfti muavini Ayder İsmailov: "Balalar maneviy qıymetlerni daa teren añlaycaq. Bu degerlikler – medeniyetimizniñ, umumen, seadetniñ, Qırımnıñ bereketli topraqlarında muabbetlik ve eyilikniñ temelidir", dep qayd etti. Temel qoyuluvından evel qurban çalındı.  Ayder İsmailov dua oqudı ve toplanğanlarnı bu quvançlı, çoq beklenilgen vaqianen hayırladı. Tedbir yerli sakinler ve musafirler içün ziyafet yekünlendi. QMDİ matbuat hızmeti [gallery link="file" columns="4" size="medium" ids="34576,34574,34572,34570,34568,34566,34564,34562,34560,34558,34494,34492"]

“Menim ailem” kursınıñ II sezonı

Опубликовано:

Qırım musulmanları Diniy İdaresi, "Faydalı ilim" Bütün Qırım maarif leyhası çerçivesinde, Qırım Cumhuriyetinde musulmanlarğa ruhiy destek berüv Birleşmesiniñ regional vekâletligi ile birlikte, qadınlar içün "Menim ailem" kursınıñ II sezonınıñ açıluvı aqqında ilân ete. Programma 7 dersten ibaret, bir ay devam etecek. Mezkür müelliflik kursına İslâm dini esasları, ruhiyat, medeniyet ve diger ilimler kirdi. "Menim ailem" kursı, qoranta ayatını eyi tarafqa deñiştirmege, bu munasebetlerde öz yerini tapmağa, ömür arqadaşını daa yahşı añlamağa, ömür arqadaşı ile munasebetlerni bozmayıp, davalar ve narazılıqlarğa nisbeten daa eyi davranmağa, balalarnı terbiye etüvde ikmetli olmağa, ömür arqadaşı ile şahsiy munasebetlerni eyileştirmege istegenler içün çalışa.  Kursnıñ müellifi ve alıp barıcısı Bairova Zeyneb Muzafarovna — QMDİ "Faydalı ilim" Bütün Qırım maarif leyhasınıñ reberi, Qırım Cumhuriyeti boyunca musulmanlarğa ruhiy destek kösterüv Birleşmesi idaresiniñ azası, İslâm ruhiyatı Halqara Birleşmesiniñ Azasıdır. Tavsilâtlı malümat almaq ve kursqa yazılmaq içün telefon nomerası:+ 7978 863 9566. QMDİ matbuat hızmeti

Amethan Sultannıñ hatırası añıldı (FOTO)

Опубликовано:

Oktâbrniñ 25-de, Qırım paytahtınıñ sakinleri ve musafirleri, Sovetler Birliginiñ eki defa Qaramanı Amethan Sultannıñ adını taşığan meydanda, adı tarih saifelerinde yazılğan uçuvcı-qaramannıñ hatırasını añmaq içün toplaştı. Amethan Sultannıñ 99-yıllığına bağışlanğan tantanalı tedbirde, milletlerara munasebetler ve sürgün etilgen grajdanlarnıñ işleri boyunca Devlet komitetiniñ Reisi Lenur Abduramanov, Aqmescit şeer memuriyeti başınıñ muavini Yaqub Zeytullayev, QC Devlet Şurasınıñ deputatları, Aqmescit şeer şurası deputatlar korpusınıñ vekilleri, veteranlar, cemaat faaliyetçileri, diniy idarelerniñ temsilcileri, studentler ve talebeler iştirak etti. Tedbirniñ musafirleri ögünde, Qırım Müftisiniñ yardımcısı Raim Ğafarov çıqışta bulundı ve qırımtatar milletiniñ şanlı oğlunıñ ruhuna dua oqudı. Raim Ğafarov: "Amethan Sultan köklerde, yükseklerde çalıştı, öz qaramanlığını da yükseklikte köstergen edi. O, daima hatıramızda qalacaq", dep ayttı. Tedbir çerçivesinde, Aqmescit şeeriniñ eñ eyi icadiy taqımlarınıñ icrasında qırımtatar milliy yır ve nağmeleri yañğıradı ve Sovetler Birliginiñ eki defa Qaramanı Amethan Sultannıñ hatıra tahtası yanına güldesteler qoyuldı. Qırım paytahtında, Amethan Sultannıñ 100-yıllığına bağışlanğan bir sıra tedbirlerniñ keçirilüvi közde tutula. Eñ müim tedbirlerden biri – Aqmescitte abideniñ yerleştirilip açıluvıdır. Malümat: Sovetler Birliginiñ eki defa Qaramanı, ulu uçuvcı Amethan Sultan, 48 yıl evel, yañı reaktiv köçüriciniñ sınavı içün yapılğan Tu-16 uçqan laboratoriyasında sınav uçuvı devamında elâk oldı. Ulu Vatan cenki devamında, meşur uçuvcı 603 arbiy uçuvnı eda etti, 150 ava uruşını keçirdi, şahsen ve uçuv taqımlarınen beraber 49, şu cümleden, Qırım kökünde 6 uçaqnı urıp yıqtırdı. QMDİ matbuat hızmeti [gallery link="file" columns="4" size="medium" ids="34462,34460,34458,34456,34454,34452,34450,34448,34446,34444,34442,34440,34438,34436,34434,34432,34430,34428"]

“Halq medresesi” işini devam ete (FOTO)

Опубликовано:

Cürçi qasabasında, Qırım ve Sevastopol şeeri musulmanları diniy idaresiniñ "Halq medresesi" leyhası çerçivesinde nevbetteki ders olıp keçti. Umumen, Cürçi rayonında "Halq medresesi"ne 25 insan qatnay. Esasen, 40 yaşını keçken rayon köyleriniñ sakinleridir. Keçirilgen derste, İslâm uquqı magistri Ayder İsmailov, namaz qılınuvı boyunca ögretüv dersini keçirdi. İslâm ilâhiyatı magistri Raim Ğafarov, İslâm dini baqışında qırımtatar milletiniñ urf-adetleri aqqında ikâye etti. Al-azırda "Halq medresesi" Bağçasaray, Aqşeyh, Saq rayonlarında ve Kezlev şeerinde açıldı. İleride ise Qırımnıñ bütün rayonlarını qaplap almağa közde tutula.  Aqmescitte "Halq medresesi" dersleri, 2019 senesi yanvar ayında başlap, "Seit-Settar" külliyesinde keçirile. 50 ve 30 insandan ibaret olğan eki bölük çarşenbe ve cumaaqşamı künleri oquy. "Halq medresesi"ne 15 yaşını keçken yigiitler ve  erkekler qatnay. "Halq medrese"si kursınıñ programmasına, İslâm dini esaslarınıñ tolu kursı, arap elifbesi ve Quran oquvı, diniy merasimler ve qırımtatar milliy adetleriniñ ögrenilüvi kirmekte. Dersler bedava, qırımtatar tilinde keçirilmekte. "Halq medresesi" leyhasınıñ maqsadı – ileride, camilerde faaliyet köstere ve İslâm dini esasları boyunca dersler alıp barabilecek din saasındaki mütehassıslarnı azırlamaqtır. Oquvını yekünlegen mezunlarğa, diniy faaliyetni alıp barmağa aqqını tasdiqlaycaq sertifikat berilecek. QMDİ matbuat hızmeti [gallery link="file" columns="4" size="medium" ids="34403,34417,34415,34413,34411,34409,34407,34405"]

Qırım Müftisi “Küreş” yarışınıñ ğaliplerini tebrikledi (FOTO)

Опубликовано:

Qırım Müftisi hacı Emirali Ablayev, Küreş quşaq sport boyunca Qırım sportçılarını tebrikledi. Fahriy yarlıqlar ve bahşışlarnıñ taqdim etilüvinen bağlı tantanalı tedbir Qırım musulmanları diniy idaresinde olıp keçti. Körüşüvge, Mingerde (Tatarstan) olıp keçken Küreş quşaq yarışınıñ ğalipleri ve Başqortostan paytahtı Ufa şeerinde olıp keçken Köreş quşaq yarışınıñ Rusiye Kubogınıñ ğalipleri toplandı. 2019 senesi dünya çempionatında 42 devletten kelgen 230 iştirakçi arasında kümüşni Qırım sportçıları Marlen Seytumerov ve Azim Halilov qazandı, Rusiye Kubogınıñ yarışlarında eki kümüş ğalipleri  – Rustem Emirüseinov ve Emirali Osmanov olıp çıqtı ve tunç qazanğan üç çempion  – İzet Kadırov, Abkerim Yunusov ve Eyup Hurdade oldı. Qırım Müftisi hacı Emirali Ablayev sportçılarğa fahriy yarlıqlar ve qıymetli bahşışlarnı ediye etti. Bundan da ğayrı, kümüş medalleriniñ saipleri ananeviy bahşış – qoynı elde etti. Hayırlav sözünde, Qırım Müftisi, Qırım sportçılarınıñ ğayreti sayesinde, Küreş milliy sport çeşiti tek Rusiyede degil de, bütün dünyada populâr ola, dep qayd etti. Qırım Müftisi: "Siz çeşit sport meydanlarında çıqışta bulunğanda, bütün dünya, siz – Qırımdan kelgeniñizni ve qırımtatarlar olğanıñıznı bile. Ğalip unvanını şeref ile taşıñız, ileride büyük  ve keñ ömür yoluñız bar ve sizge, yalıñız siziñ sporttaki kelecegiñiz degil de, milletimizniñ sağlam ruhu bağlıdır. Sizge muvafaqiyetler ve yañı ğalebeler tileymiz. Qırım Müftiligi sizge er daim qol tutacaq", – dep ayttı.    Bundan da ğayrı, hayırlavlarğa, 1972 senesi Münhende olıp keçken Olimpiada çempionı, klassik küreş boyunca Sovetler Birligi sport ustası Rustem Kazakov qoşuldı. Çempion, sportçılarğa, yañı ğalebelerge irişmege ve yetişken nesil içün nümüne olmağa tiledi. Tantanalı tedbir çerçivesinde idmancı ocalar – İsmail İsmailov, Amit Ablâmitov, Bulat Ahmad ve Zair Appazov tebriklendi. Qırım Müftisi olarğa, semereli emekleri, professional muvafaqiyetler, Dünya Çempionatı ve Rusiye Kubogı içün Küreş yarışı boyunca sportçılarnıñ azırlanuvında faal iştirak etkenleri içün teşekkürler bildirdi. Ayrı teşekkürler, Köreş Qırım Federatsiyasınıñ Reisi, sport taqımınıñ reberi Enver Üseinovğa bildirildi. Enver Üseinov, Federatsiya adından, Qırım ve Sevastopol şeeri musulmanları diniy idaresine Qırım manzarasını aks etken resimni ediye etti. QMDİ matbuat hızmeti [gallery link="file" columns="4" size="medium" ids="34368,34366,34364,34362,34360,34358,34356,34354,34352,34350,34348,34346,34344,34342,34340,34338,34336,34334,34332,34330,34328,34326,34324,34322"]

Qırımda Ablâziz Veliyevniñ 80-yıllığı qayd etile (FOTO)

Опубликовано:

Qırım Müftisiniñ muavini Ayder İsmailov, Aqmescitte İ. Gasprinskiy adına kitaphanede olıp keçken, qırımtatar yazıcısı, şairi, jurnalist Ablâziz Veliyeniñ yubileyine bağışlanğan tantanalı tedbirde iştirak etti. Ablâziz Veliyevni doğğan künü ile hayırlamaq içün, meslekdeşleri ve dostları keldi. Bu  – Ablâziz Veliyeniñ icadını sevgen, degerlendirgen insanlardır. Yazıcığa çoq sıcaq sözler ve tilekler aytıldı. Ayder İsmailov, Ablâziz Veliyevge, Qırım Müftisi hacı Emirali Ablayev ve Qırım musulmanları diniy idaresiniñ hadimleri adından samimiy hayırlavlarnı bildirdi ve: "Allah Sizge sağlıq, uzun ömür bersin. İleride de işiñizniñ neticelerini körip quvanayıq. Biz Siziñ daa çoq icadıñıznı köreyik, qırımtatar halqı körsin, faydalansın. Balaçıqlarımız, öz tilini, medeniyetini, şiiriyetini, onıñ şırnıqlığını Siziñ eserleriñizde körsin. Bilsin, yüreklerine siñdirsin…", dep ayttı. Tedbir iştirakçileri, yazıcınıñ qırımtatar edebiyatına qoşqan büyük issesini ve bu eserler vatanperverlik duyğularınen tolu olıp, milliy edebiyatımıznıñ tarihında iz qaldıracağını qayd ettiler. Tedbir çerçivesinde, Ablâziz Veliyevniñ şiirleri yañğıradı. Bu şiirler rus, ukrain tillerine de tercime etildi. Şairniñ şiirlerine yazılğan yırlar icra etildi. Bundan da ğayrı, yazıcınıñ kitapları ve maqaleleriniñ sergisi teşkil etildi. Tedbir devamında şairniñ işdeşleri ve dostları, onıñ icadı ve milliy edebiyatımızdaki yeri aqqında ikâye ettiler. QMDİ matbuat hızmeti [gallery link="file" columns="4" size="medium" ids="34318,34316,34314,34312,34304,34302,34300,34298,34296,34294,34292,34290,34288,34286,34284,34282,34280,34278,34276,34274,34272,34270,34268"]

Qırım Müftiligi vekilleri konfessiyalar dialogında iştirak etti (FOTO)

Опубликовано:

Qırım Müftisiniñ yardımcısı, Qırım ve Sevastopol şeeri musulmanları diniy idaresiniñ diniy teşkilâtlar ile iş alıp baruv bölüginiñ reberi Raim Ğafarov, "Konfessiyalar dialogı – milliy birlikniñ temelidir. Rusiyeniñ itibarı ve şanıdır" yaşlar forumında iştirak etti. Tedbir, Sevastopol şeerindeki "Laspi" Bala tedaviylenüv lagerinde olıp keçti. İştirak etmek içün, Sevastopol Qanun çıqarıcı Keñeşiniñ deputatları, Sevastopol Gübernatorınıñ muavini, Qırım ve Sevastopol diniy idareleri ve tasil teşkilâtlarınıñ vekilleri de davet etildi. Forumda Sevastopolniñ 9 köllecinden 76 eñ eyi studentler iştirak etti. Raim Ğafarov forum iştirakçilerini, Qırım Müftisi hacı Emirali Ablayevniñ adından selâmladı. Raim Ğafarov: "Musulmanlar selâmlaşqanda: "Selâm aleyküm", yani "Sizge selâmetlik tileyim!", dep aytalar. Çünki selâmetlik, muabbetlik,  Tañrı tarafından berilgen eñ müim şeydir ve biz onı saqlamalımız. Ayatımıznıñ temelinde, bizni Yaratqanğa nisbeten sevgi bulunmaqta. Demek, biz Yaradannı sevgenimiz kibi, biri-birimizni de sevmelimiz ve ürmet etmelimiz", dep ayttı. Öz çıqışında Raim Ğafarov, ürmet, merhametlik, dostane munasebetler, yardımseverlik ve sevgi aqqında ikâye etken ikmetli qıssalarnı misal olaraq ketirdi. Raim Ğafarov: "Bizim vazifemiz – umumiy insanlıq degerlerini saqlamaqtır ve, neticede, tıştaki ve bozucı tesirden qorunabilirmiz", dep ilâve etti. Çıqış çerçivesinde, eali birliginiñ müimligi qayd etildi ve "Konfessiyalar dialogı – milliy birlikniñ temelidir. Rusiyeniñ itibarı ve şanıdır" kibi tedbirler, farqlı dinlerge mensüp olğan diniy teşkilât vekillerini birleştirgen muzakere meydanıdır, olarnıñ dostane munasebetlerini ve işbirligini qaviyleştirgen bir yoldır, bundan da ğayrı, hususan, yaşlar arasında ekstremizm ve şovinizmge qarşı vasta olğanı ayrıca qayd etildi. Forumnıñ musafirleri, yaş iştirakçilerge, cemaat, ahlâq, milliy umuminsanlıq printsipleri pekitilmesiniñ esas şartı olğan eyilik, muvafaqiyetler, biri-birini añlamaqnı, seadet tiledi. QMDİ matbuat hızmeti [gallery link="file" columns="4" size="medium" ids="34250,34248,34246,34244,34242,34240,34238,34236,34234,34232,34230,34228,34226"]

“Altın nesil” klubı inkişaf ete (FOTO)

Опубликовано:

İslâm dini esasları, qırımtatar medeniyeti ve tarihını eñ eyi bilgen balalar belgilendi. 2019 senesi 13 oktâbr künü Bağçasaray rayonında "Altın nesil" bala-gençler klubınıñ iştirakçileri arasında İslâm dini esasları boyunca Bütün Qırım yarışınıñ finalı olıp keçti. Yarışnıñ teşkilâtçısı – "Faydalı ilim" leyhasınıñ çerçivesinde, Qırım musulmanları Diniy İdaresidir. İntellektual yarışta 10-14 yaşındaki 8  iştirakçi finalğa çıqtı. Yarış devamında balalar din saasındaki ve qırımtatar halqınıñ medeniyeti boyunca bilgilerini numayış ettiler. Final üç basamaqtan ibaret edi: testler, 12 kategoriya boyunca sualler ve üçünci basamaq – İslâm tarihındaki belli şahıslarğa bağışlandı. Tedbirde bulunğan Qırım Müftisiniñ muavini Esadullah Bairov: "Ümüt etemiz ki, İslâm dini ocaları ve talebeleriniñ sayısı kün-künden artacaq. Qırım musulmanları Diniy İdaresi er daim bu kibi yarışlarğa qol tutacaq ve destek kösterecek", dep ayttı. Finalcılarnıñ cevaplarına jüri azaları qıymet kesti, jüri terkibine Qırım musulmanları Diniy İdaresi erkânında çalışqan "Faydalı ilim" leyhasınıñ ocaları kirdi. Yarış neticelerine köre, birincilikni Akime Manguşeva aldı. Em ğalip, em diger iştirakçiler de bahşış qazanıdlar. İntellektual yarışınıñ iştirakçilerini "Faydalı ilim" leyhasınıñ reberi Zeyneb Bairova hayırlap: "Öz diniñ ve milletiniñ medeniyeti aqqında bilgiler – eñ müim bilgiler sayılmaqta. Yarışta iştirak etken balalar, kerçekten de, altın nesildir", dep ilâve etti. İntellektual yarıştan soñ, tedbirniñ iştirakçileri ve musafirleri içün, "İşaçok" adlı eglence merkezine ziyaret teşkil etildi. QMDİ matbuat hızmeti [gallery link="file" columns="4" size="medium" ids="34154,34152,34150,34148,34146,34144,34142,34140,34138,34136,34134,34132,34130,34128,34126,34124,34122,34120,34118,34116,34114,34112,34110,34108,34106,34104,34102,34100,34098,34096,34094,34092,34090,34088,34086,34084,34082,34080,34078,34076,34074,34072,34070,34068,34066,34064,34062,34060,34058,34056,34054,34052,34050,34048,34046,34044,34042,34040,34038"]

Çoq beklenilgen minare! (FOTO)

Опубликовано:

2019 senesi oktâbr 13 künü Yaltadaki Ay-Vasıl qasabasında tarihiy vaqia – minareniñ tantanalı açıluvı olıp keçti.  Minareden ezan oqulıp, musulmanlarnı namazğa çağırdı. Üyle namazına, Yalta, Aqmescit, Aqyar ve Qırımnıñ diger köşelerinden musafirler ve yerli sakinler toplaştı. Olarnıñ arasında, 1944 senesi sürgünlikten evel Ay-Vasıl köyünde doğğanlar da bar edi. Qırım Müftisiniñ yardımcısı Raim Ğafarov, toplanğanlarnı Qırım Müftisi hacı Emirali Ablayevniñ adından hayırlap, eskiden bu yerde olğan caminiñ ğayrıdan tiklenilüvine ve minareniñ qurulmasına isse qoşqan er keske teşekkürler bildirdi. Raim Ğafarov: "Biz Qırımğa, öz medeniyetimiz, urf-adetlerimiz, dinimizni ğayrıdan tiklemek içün qaytıp keldik. Bu kibi adımlar bizni pek quvandıra.  Yalta sakinleri ve bütün Qırım sakinleri içün büyük quvançtır", dep ayttı. Yalta regionınıñ imamı Osman Topuz, minareniñ qurucılığı içün, Caide hanım Sofunıñ adını ayrıca añdı O, doğma Autkalı rahmetli ağası İffet Sofunıñ vasiyetini ömürge keçirdi. Osman Topuz: "İffet Sofu sağ olğanda, Ay-Vasılda minareniñ qurulmasını arz ete edi, Caide hanım ağasınıñ vasiyetini yerine ketirdi. Yerli sakinler de para toplanuvında iştirak etti, minare umumiy ğayret ile quruldı", dep añlattı. 92 yaşını toldurğan Caide Sofu bayram tedbirini ziyaret etti. Minareniñ qurucılığı boyunca, Türkiyeniñ eñ eyi mütehassısları ile muşavereler keçirildi.  Qurucılıq üç afta devam etti. Minare tübündeki kotlovan 9 kv.m, kotlovan terenligi – 2, 5 metr. Umumen, 12 tonna tsement, 3 tonna armatura, 45 tonna taş, 25 tonna qum kerek oldı. Minareniñ yüksekligi – 33 metrdir. Qırım Müftisiniñ yardımcısı Raim Ğafarov, tarihiy vazifeni eda etti –– minareden birinci ezannı oqudı.  Bundan soñ camide dua keçirdi. Raim Ğafarov: "Musulmanlar yaşağan er yerde cami olmalı. Qırım Müftisiniñ niyeti – köylerniñ episinde cami qurmaqtır. Milletimiz muracaat ete, biz, ğayrıdan tiklemege, yañı camilerni qurmağa tırışacaqmız. İnsanlarnıñ ibadet etmege imkânı olsun". Bu çoq beklenilgen bir kündir, bu künge ketirgen yol onyıllar devam etti. Niayet, cenübiy şeerni kene beyaz minare yaraştıra. Ay-Vasılda büyük bayram!  QMDİ matbuat hızmeti [gallery link="file" columns="4" size="medium" ids="34029,34027,34025,34023,34021,34019,34017,34015,34013,34011,34009,34007,34005,34003,34001,33999"]

Qırım Müftisi ve Simferopol ve Qırım Mitropoliti dostane körüşüvni keçirdiler

Опубликовано:

Körüşüv çerçivesinde, yañı nesilniñ maneviy-ahlâqiy terbiyesi meseleleri, yaşlarnıñ vatanperverligi, tuvğan topraqqa nisbeten sevgi ve onıñ kelecegi içün mesüliet duyğusı, bundan da ğayrı, Qırımda yaşağan farqlı konfessiyalar ve milletlerniñ medeniyetleri arasında biri-birine nisbeten ürmetniñ pekitilüvi meselesi muzakere etildi. Müfti ve Mitropolit, şeer parkında, topraq işleri vaqtında insan kemikleriniñ tapıluvı mevzusını muzakere ettiler. Bugünki künde işler toqtatıldı, uquqqoruyıcı organlarına haber berildi, kemikler ekspertizağa yollanıldı. Tarihçılarnıñ tahminiy malümatına köre, kemikler tapılğan yerde qadimiy musulman mezarlığı yerleşken edi. Maneviy liderler, merhumlarnıñ kemiklerine nisbeten ürmetsiz davranışnı takbih ettiler ve profil teşkilâtlar ve komitetlerge, bu meseleniñ çezilüvine dair kerekli qararlar almaq muracaatında  bulundılar. QMDİ matbuat hızmeti