Haberler - Page 8 of 84 - ЦРО ДУМКЦРО ДУМК | Страница 8

Четверг

27

января

24
Джумазие'ль-ахир 
1443 | 2022
Утр.6:38
Вос.7:58
Обед.13:01
Пол.15:21
Веч.17:54
Ноч.19:14
Времена намазов
Календарь 2022

Намаз

Haberler - Page 8 of 84 - ЦРО ДУМК

Qırım Müftisi milliy areket veteranı Şefiqa Konsulnıñ qorantasına taziye bildirdi

Опубликовано:

Qırım ve Sevastopol şeeri Müftisi hacı Emirali Ablayev Qırım Cumhuriyeti ve Sevastopol şeeri musulmanları diniy idaresi adından qırımtatar milliy areket veteranı Şefiqa Konsulnıñ qorantası, tuvğanları ve yaqınlarına teren taziye bildire. Şefiqa Konsul 84 yaşına kelip, bu faniy dünyanı terk etti. Şefiqa Konsul (qızlıq soy adı – İslâmova) 1937 senesi, fevral 18 künü Kökköz (Sokolinoye) köyünde dünyağa keldi. Qırımtatarlar Qırımdan zorbalıqnen sürgün etilgende, 1944 sene, mayıs 18 künü Şefiqa 7 yaşında edi. Şefiqa Konsulnıñ qorantası Özbekistannıñ Samarqand vilâyetine tüşti. Vaqıt keçkeninen Şefiqa Mustafa Konsulğa aqayğa çıqtı ve olarnıñ qorantası Samarqandda milliy arektniñ eñ teşebbüsçi qorantalardan biri oldı. Toplaşuv ve mitinglerde Şefiqa Konsul vatandaşlarnı kelgen malümatlernen tanış ete edi. 1980 senesi Konsullar qorantası Krasnodar ülkesiniñ Abinsk şeerine köçip keldi ve mında aqlarnıñ tiklenilüvi içün küreşni devam etti. 1987 senesi, TASS-nıñ iftira haberinden soñ, Şefiqa Konsul miting keçirdi. Bundan soñ, o, Qırımtatar milliy areketi teşkilâtınıñ birinci qurultayında ve diger müim tedbirlerde çıqışlar yapqan edi. Şefiqa Konsul ömüriniñ soñki künlerine qadar milletiniñ içtimaiy ömürinde faal iştirak ete edi. Şefiqa Konsulnıñ ayatı ve faaliyeti – milletke hızmet ve Vatanğa sevginiñ nümünesidir. Onıñ fedakârlığı, sebatkârlığı ve adaletke ıntıluvı sayesinde bugün milletimiz vatanında yaşay ve inkişaf ete. Biz vatandaşlarımıznıñ, Şefiqa Konsulnı bilgen, onen çalışqan, ğayelerinde ortaq olğan er bir insannıñ acısını duyamız. Qorantasına, yaqınlarına ve dostlarına taziyemizni bildiremiz. Allah rahmet eylesin. "Epimiz Allah içünmiz ve qaytuvımız Oñadır!" ("Baqara" suresi, 2/156). Qırım MDİ matbuat hızmeti

Qırım – kelecek elâl sanayısındadır!

Опубликовано:

"Elâl" – bu ilk evelâ havfsızlıq, temizlik, insan sağlığı içün fayda, zararlı konservantsız ve maddesiz aşayt mahsulatları, ve olarnıñ uyğun şaraitte ve ruhset etilgen müddet devamında saqlanılmasıdır. Qırımda elâl sanayısı Soñki bir qaç yıl devamında Qırımda elâl sanayısı ep inkişaf ete. Tükânlarda elâl aşaytlarnıñ sayısı arta, elâl qavehane ve restoranlar açıla, içkisiz gastronomlar çalışıp başlay, "Muslim" üslübinde urba tükânları, öteller ve turistik şirketler populârlaşa. 2008 senesinden başlap, Qırım Cumhuriyeti ve Sevastopol şeeri musulmanları diniy idaresi erkânında "Elâl" sertifikatsiya ve standartizatsiya merkezi çalışa. Ortalıqta "elâl" markirovkası ile çet ellerde ve devletimizde istihsal etilgen bir sıra aşayt mahsulatlarınıñ peyda olması sebebinden Müfilikte "Elâl" sertifikatsiyası ve standartizatsiyası işlenip azırlanıldı. Şu nizamnameniñ esas maddeleri: istihsalnıñ doğru teşkil etilüvi, ham maddelerniñ uyğunlığı, ayvanlarnıñ soyuluvına olğan talaplar, alet ve malzemelerde olmaq kerek talaplar, şirket hadimlerine nisbeten talaplar v.s. Sertifikat berilgen soñ şirkette em planlaştırılğan, em de apansız teşkerüvler keçirile. Elâllıq meselesi – keyfiyet ve işanç meselesidir. Qırım MDİ sertifikatı bir yıllıq müddetke berile. Müddet keçken soñ, şirket onı devam ettire bile. Kontraktqa nevbetteki talaplar kire: laborator tedqiqat, qoşma malzemelerniñ ve terkipniñ teşkerilüvi, muntazam teşkerüvlerdir. İşbu qaidelerden biriniñ bozuluvı sebebinden Qırım MDİ sertifikatnı lâğu ete bile. Bugünki künde Qırımda elâl qaideleri boyunca 64 şirket çalışa. Olar arasında qavehaneler, restoranlar, et mahsulatlarını, kolbaslarnı, yarı azır hamur ve et aşlarını, fito ve konditer yemeklerni istihsal etken şirketler, köy fermer hocalıqları ve mezbahaneler mevcuttır. 2021 senesiniñ sekiz ayı devamında Qırım Cumhuriyeti ve Sevastopol şeeri musulmanları diniy idaresi 21 "elâl" sertifikatını berdi. Er bir insannıñ sağlığı ve vucudı içün faydalı olğannı saylamağa aqqı bar, ve "Elâl" sertifikatsiyası bu imkânnı bere. Elâl ya da sahte? "Elâl" tamğası ile er bir mahsulat ya da hızmet asılında elâllıq qaidelerine uymay bile. Buña diqqat etmeli. İnsafsız iş adamları "elâl" tamğası ile teşkerilmegen mallarnı satıp, sahte "elâllıq" sertifikatlarını kösterip, müşterilerni aldatqanı vaziyetler de ola. Bazı iş adamları kelirini arttırmaq içün adiy suvğa "elâl" tamğasını qoyıp satalar. Suv zaten elâldır, tabiy ki, içine spirt ya da diger içilmesi haram madde qoşulmasa. Qırımda Qırım ve Sevastopol şeeri MDİ elâllıq sertifikatsiyasından keçken mahsulatlarda mahsus Qırım MDİ tamğası bar. Müşteriler aşaytlarnı ve hızmetlerni alğanda, markirovkağa diqqat etmeli. Hatırlatamız, Qırım Cumhuriyeti ve Sevastopol şeeri musulmanları diniy idaresi cumhuriyetten tış "elâl" tamğası ile işlep çıqarılğan mahsulatlar içün mesülietli degil. Elâl mahsulatlarınıñ müsbet taraflarını tek musulmanlar degil de, diger dinlerni kütken insanlar da añlay, onıñ içün eminliknen qayd etmek mümkün ki, kelecek – elâl mahsulatlarındadır! Qırım Cumhuriyeti ve Sevastopol şeeri musulmanları diniy idaresiniñ destegi ile "Elâl" sertifikatsiyası merkezi. Adres: 295001, Qırım Cumhuriyeti, Aqmescit şeeri, Kurçatov soq, 4. Mob.tel: +7 978 074 1847 e-mail: halal@qmdi.org Qırım MDİ matbuat hızmeti

“Bilgi – insannıñ eñ büyük zenginligidir!” (FOTO)

Опубликовано:

Qırım ve Sevastopol şeeri Müftisiniñ muavini Raim Ğafarov Aqmescitteki Rusiye qaramanı Alime Abdenanova adına № 44 umumtahsil orta mektebinde Bilgi künü munasebetinen keçirilgen tantanalı tedbirde iştirak etti. Qırım Müftisi hacı Emirali Ablayev ve Qırım Cumhuriyeti ve Sevastopol şeeri musulmanları diniy idaresi adından Raim Ğafarov ocalarnı ve talebelerni yañı oquv yılınen hayırlap, talebelerge muvafaqiyetli oquvlar, ocalarğa semereli çalışmalar, ana-babalarğa ise, sabır tiledi. Bundan da ğayrı, o, bilginiñ qıymetini hatırlattı. "Bilgi öyle bir degerdir ki, onı iç bir kimse ve iç bir vaqıt bizden alamaz. Bilgi saibi olmaq – iftihar içün sebeptir. Bilmeseñiz, bilgili insanlardan sorap, bilgige ıntılıñız,", – dedi Raim Ğafarov. Çıqışnıñ soñunda, o, dua oqudı. Buña ilâve olaraq, ocalarnı ve talebelerni Qırım Cumhuriyeti Milletlerara munasebetler boyunca devlet komitetiniñ reisi Ayder Tippa da hayırladı. Qırım MDİ matbuat hızmeti [gallery link="file" columns="4" size="medium" ids="50883,50891,50889,50893,50887,50885"]

Qırımda “Musulman qadınları yetekçilik mektebiniñ” V Qurultayı olıp keçti (FOTO)

Опубликовано:

Qırımda Qırım musulmanları diniy idaresi ve Musulmanlarğa ruhiy destek birleşmesiniñ destegi ile Qırım musulman qadınlarınıñ "Büllür" cemaat birleşmesi tarafından teşkil etilgen Musulman qadınlarınıñ yetekçilik mektebiniñ V qurultayı olıp keçti. Yubileylik qurultayda Qırımnıñ ve Rusiyeniñ farqlı köşelerinden kelgen 44 qadın iştirak etti. Teşkilâtçılar treningler, seminarlar, Musulmanlarğa ruhiy destek birleşmesi tarafından keçirilgen ameliy vazifelerden ibaret meraqlı programmanı azırladılar. Hususan, "Qadınnıñ bahtlılığı" psihodramatik praktikumı ve ruhiyatçı, "Aişa" halqara klubnıñ rehberi, Natalya Maryam Bariyeva (Moskva ş.) stresske qarşı turmaq qabiliyeti boyunca master-klassnı ve "Çare bar" art-terapiyasını keçirildi. Qurultay programmasında ilk sefer qoranta ruhiyatçısı, ekzistentsional analitigi, mültimedeniy mesleatçı Elmira Miyassarova iştirak etti (Qazan ş). O, iştirakçilerni tabiiy qoqulı yağlar dünyasınen tanış etip, (ruhiyat ameliyatınıñ siyrek yönelişi olğan) aromaterapiya seansını keçirdi. Qoranta ruhiyatçısı Nadika İsmailova (Qırım) qurultay iştirakçileri içün "Tayanma noqtası" seminarını keçirdi. Bundan da ğayrı, qızlar "Qına gecesinde" iştirak etip, toy arefesinde kelin içün keçirilgen eski adetimiznen tanış oldılar. "Zuhruf" brendiniñ tesisçisi Leylâ Seitmemetovanen beraber iştirakçiler qırımtatar baş kiyimi olğan feslerni tikmege ögrendiler. Qurultay Bağçasaray rayonınıñ Özenbaş köyünde yerleşken raatlıq merkezinde olıp keçti. İştirakçiler içün elâl aşaytlar ve raatlanmaq içün şarait teşkil etildi. Yetekçilik mektebiniñ üç künlük programması Kiçik kanyonğa cip-turnen yekünlendi. Teşkilâtçılarnıñ sözlerine köre, tedbir güzel bir ananege çevirildi ve farqlı yaşta, içtimaiy statusta olğan ve çeşit zenaatqa saip iştirakçilerniñ sayısı seneden senege ep arta. "Bu sene Yetekçilik mektebinde iştirak etmek istegenlerniñ sayısı pek çoq oldı. Bu ise, leyhanıñ keniş dairede tanılması, yüksek derecede keçirilmesi ve teşkilâtçılar ile spikerlerge nisbeten yüksek işançnıñ olmasından sebeptir. Bu, bizler, içtimaiy leyhalarnı ömürge keçirgen qadın cemaat teşkilâtı içün pek qıymetlidir", – dep, paylaştı "Büllür" teşkilâtınıñ rehberi Niyara Canbazova. Yüce Rabbimiz bizge cemiyetimizniñ eyiligi içün daa nice leyhalarnı ömürge keçirmege qısmet etsin. Qırım MDİ matbuat hızmeti [gallery link="file" columns="4" size="medium" ids="50935,50933,50931,50929,50927,50925,50923,50921,50919,50917,50915,50913,50911,50909,50907,50905,50903,50901,50899,50897"]

Qırımda Cürçi rayonınıñ Müniy köyüniñ imamınen vedalaştılar

Опубликовано:

Qırım Müftisi Qırım Cumhuriyeti ve Sevastopol şeeri musulmanları diniy idaresi adından yürek hastalığı sebebinden bu dünyanı terk etken Cürçi rayonındaki Müniy köyüniñ imamı Qaybullayev Nusret Enveroviçniñ ölümi sebebinden taziyelerini bildire. Qaybullayev Nusret Enveroviç 1956 senesi Taşkent vilâyetinde dünyağa keldi. Onıñ qorantası 1983 senesi Qırımğa qaytıp keldi. Yıllar devamında Nusret Qaybullayev yerli köy mektebinde muzıka ocası olıp çalıştı. 2012 senesi ise, Cürçi rayonınıñ Müniy köyüne imam olaraq tayin etildi. Nusret efendi köydeşleri ve vatandaşları tarafından ürmet etilgen adam edi. Er kes onı namuslı, adaletli musulman, yardımsever ve vatanperver adam olaraq bile edi. O, insanlarnıñ eyiligi ve Allahnıñ razılığını qazanmaq içün çalışa edi. Biz Nusret Qaybullayevni bilgen bütün semetdeşlerimiznen beraber keder içindemiz. Allahqa dua etip, Oña qaytqan canğa mağfiret ve rahmet etmesini ve Nusret Qaybullayevni Cennet bağçalarına kirsetmesini niyaz etemiz. Quran-ı Kerimde buyurıla ki: "Şübesiz, inanıp eyi ameller yapqanlar, Rabbleri ögünde alçaq göñülli olğanlar – Cennet sakinleridir, anda ebediy qalacaqlar" ("Hud" suresi, 11/23). Allah rahmet eylesin. "Epimiz Allah içünmiz ve qaytuvımız Oñadır!" ("Bakara" suresi, 2/156). Qırım MDİ matbuat hızmeti

“Aq ketenniñ üstünde”. Köktebelde “Tatar nağışları albomı” müellifiniñ hatırası saqlanıldı (FOTO)

Опубликовано:

Köktebelde Maksimilian Voloşinnıñ ev-müzeyinde qırımtatar halq icadınıñ saqlanıluvına büyük isse qoşqan Aleksandra Mihaylovna Petrovanıñ 150-yıllığına bağışlanğan hatıra tahtasınıñ açıluvı merasimi olıp keçti. Aleksandra Petrova (1871-1921) "Eski Qırım rayonınıñ tatar nağışları albomı"-nı neşirge azırlağan edi. O, qırımtatar nağışçılığına ait 1 400-ge yaqın nümünesiniñ resimlerini toplağan, şu cümleden, aradarında maramalardan resim etilip alınğan qırımtatar örnekleri ve diger resimler bar. Resimlerde nağışlardaki renkler, nağış üslüpleri, eşya saipleriniñ adları ve nağışnıñ ne vaqıt yapılğanı qayd etilgen. Bütün bu resimler Moskvada, Devlet tarihiy müzeyinde saqlanılmaqta. Aleksandra Petrovanıñ hatırasını abide ile saqlamaqnıñ teşebbüsçisi – Qırım medeniyet nazirligi ve Maksimilian Voloşinniñ ev-müzeyiniñ destegi ile Qırım Cumhuriyeti ve Sevastopol şeeri musulmanları diniy idaresidir. Memorial tahtanıñ açıluv merasiminde Qırım Cumhuriyeti ve Sevastopol şeeri Müftisiniñ muavini Raim Ğafarov çıqışta bulundı. O, qayd etti ki, Aleksandra Petrovanıñ adı, onıñ Qırımğa nisbeten sevgisi ve titizligi, şu qadimiy topraqnıñ kerçek hazinelerini yañı nesilge saqlap yetiştirmek istegi – etrafında farqlı din, millet ve medeniyetke ait insanlarnı topladı. "Bugün biz daa bir kere Qırım halqlarınıñ birlik olğanına şaat oldıq. Aleksandra Mihaylovnanıñ adı, onıñ qırımtatar halqınıñ saqlanıluvına qoşqan issesi esaplanacaq kibi degil", – dedi Raim Ğafarov. Tantanalı tedbir devamında muzıkal eserler yañğıradı, toplanğanlar ögünde Qırımnıñ eston ve italyan milliy-medeniy avtonomiyalarınıñ temsilcileri çıqışta bulundı, musafirlerni Aleksandra Petrovanıñ ayatından meraqlı saifelernen tanış ettiler. Qırım musulmanları diniy idaresine teşekkür ile Aleksandra Petrovanıñ torunı Aleksandr Petrov çıqışta bulundı. Buña ilâve olaraq, hatıra tahtası qoyuluvınıñ teşebbüsçilerine Qırım Cumhuriyetiniñ milletlerara munasebetler komiteti adından teşekkür bildirildi. Tedbirniñ ürmetli musafirleri arasında "Rus birligi" regionlarara cemaat teşkilâtınıñ başlığı Yelena Aksönova, sanatoriyler ve kurortlar kompleksi ve turizm boyunca QC Devlet Şurası komitetiniñ başlığı Aleksey Çernâk, Qırım Cumhuriyeti Kefe şeer belediyesiniñ rehberi – Kefe şeer şurasınıñ başlığı Anjela Serdükova, Kefe şeer memuriyeti başlığınıñ birinci muavini Svetlana Doroş, filologiya ilimleri doktorı, professor Lemara Selendili, "Qırım qaramanları" cemaatçılıq areketiniñ rehberi İbraim Şirin, Qırımtatar medeniy ve tarihiy miras müzeyiniñ müdiresi Safiye Eminova bulundılar. Qırım MDİ matbuat hızmeti [gallery link="file" columns="4" size="medium" ids="50798,50800,50785,50781,50779,50777,50775,50773,50771,50769,50767,50765,50761,50759,50757,50755,50753,50751,50749,50747,50745,50743,50793,50791,50789,50787"]

Qırım Müftisi Üsein Umerovnıñ qorantasına taziye bildirdi

Опубликовано:

Qırım Müftisi hacı Emirali Ablayev Qırım Cumhuriyeti ve Sevastopol şeeri musulmanları diniy idaresi adından Cürçi rayonınıñ Sarı Baş köyü imamınıñ yardımcısı Üsein Umerovnıñ qorantasına, tuvğanlarına ve yaqınlarına teren taziyesini bildire. Umerov Üsein Enveroviç 1975 senesi doğdı, 1989 senesi qorantasınen beraber Qırımğa qaytıp keldi. Oquşnı bitirgen soñ, Üsein Ümerov yerli mektepte müdir muavini olaraq çalıştı, köy şurasınıñ millet vekili edi. Dört yıl evelsi Üsein Ümerov yerli köy camisiniñ tamir etilüviniñ teşebbüsçisi oldı, köyniñ abadanlaştırıluvında faal iştirak etti – mında yollar tamir etildi, soqaqlar yarıqlandırıldı. 2021 senesi aprel ayında Üsein Umerov Sarı Baş köyünde imam yardımcısı olaraq tayin etildi, cemaat namazlarını keçirdi, hayriye aktsiyalarında iştirak etti, köydeşlerine yardım etti. Üsein Umerov koronavirus infektsiyası neticesinde peyda olğan hastalıqtan şu faniy dünyanı terk etti. Sarı Baş köyünde defin etildi. Biz Üsein Umerovnıñ yaqınları, işdeşleri, fikirdeşleri ile keder içindemiz. Şu hastalıq sebebinden tek qartlar degil, yaşlar da bu dünyanı terk ete. Bu ise, acımıznı arttıra. Yüce Rabbimizge dua etip, Oña qaytqan canğa rahmet köstermesini ve Cennet bağçaları ile mukâfatlandırmasını niyaz etemiz. Muqaddes Quranda böyle keçe: "Şübesiz, inanıp eyi ameller yapqanlar, Rabbleri ögünde alçaq göñülli olğanlar – Cennet sakinleridir, anda ebediy qalacaqlar" ("Hud" suresi, 11/23). Allah rahmet eylesin. "Epimiz Allah içünmiz ve qaytuvımız Oñadır!" ("Bakara" suresi, 2/156). Qırım MDİ matbuat hızmeti

Qırımda çalışqan “FUNDUK” şirketi “Elâl” sertifikatını aldı (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde "Funduk" ("Fındıq") ticariy markasınıñ temsilcisi Temur Menumerovğa elâllıq sertifikatı berildi. Şirket farqlı konditer mahsulatlarnı, desertlerni azırlay: baqlava, elva, loqum, rollar, elva, çak-çak, Qırım tatlılıqları, ballı desertler, çaylar, balzamlar, bal ve kökteyller. Qırım Cumhuriyeti ve Sevastopol şeeri musulmanları diniy idaresiniñ "Elâl" sertifikatsiya merkeziniñ vesiqasını Qırım Müftisiniñ muavini Ayder İsmailov taqdim etti. O, Temur Menumerovğa em Qırımda, em de yarımadadan tış işlerinde muvafaqiyetli çalışmalar tiledi. "Elâl" mefhumı keyfiyet, havfsızlıq ve doğrulıqnı temsil ete. Şirketiñizge müşterilerniñ inançını qazanmaq ve işlep çıqarğan malıñıznen insanlarnı sevindirmeñizni tileyim", – dep tiledi Ayder İsmailov. Buña ilâve olaraq, o, Temur Menumerovğa "Funduk" ticariy markasınıñ Qırım Müftiliginiñ hayriye aktsiyalarında faal iştirak etkeni içün teşekkür bildirdi. Qırım MDİ matbuat hızmeti [gallery link="file" columns="4" size="medium" ids="50725,50727,50731,50729"]

Qırım Müftisi Milletlerara munasebetler boyunca devlet komitetiniñ başlığını doğğan kününen hayırladı (FOTO)

Опубликовано:

Qırım Cumhuriyeti ve Sevastopol şeeri Müftisi Qırım Cumhuriyeti Milletlerara munasebetler boyunca devlet komitetiniñ reisi Ayder Tippanı doğğan kününen hayırladı. Qırım Müftisi Milletlerara munasebetler boyunca devlet komitetiniñ cumhuriyette milletlerara ve dinlerara barışıqlıqnıñ saqlanıluvında büyük issesi olğanını qayd etti. "Siziñ rehberligiñiz altında reabilitatsiya olunğan halqlarnıñ temsilcileri toplu yaşağan yerlerde meskenlerniñ, infrastruktura obyektleriniñ qurulması doğrusında işler alıp barıla", – qayd etile Ayder Tippağa yollanılğan hayırlav telegrammasında. Bundan da ğayrı, Müfti Ayder Tippağa qaviy sağlıq, qoranta muabbetligi, işinde yañı naaliyetlerge irişmeler, işançlı fikirdeşler ve çoqmilletli Qırımnıñ, Vatannıñ  hayırı içün semereli çalışmalar tiledi. Qırım MDİ matbuat hızmeti [gallery link="file" columns="4" size="medium" ids="50737,50739"]

Qırım Müftiligi Saq rayonı imamları içün ihtisas yükseltüvi kursunı keçirdi (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresiniñ diniy maarif faaliyeti çerçivesinde Saq şeerinde bölgeniñ imamları içün ihtisas yükseltüvi kursu ötkerildi. İhtisas yükseltüvi kursu çersivesinde lektsiyalar ve seminarlar keçirildi. "İman esasları", "İslâmda itiqadiy mezhepler" mevzusında lektsiyalarını Qırım Müftisiniñ muavini, fıqıh magistri Ayder İsmailov oqudı. Qırım Müftisiniñ muavini Raim Ğafarov "İslâm aqaidiniñ aktual meseleleri", "Destruktiv diniy aqımlar: tarihları, peyda oluv sebepleri ve cemiyetke menfiy tesiri" mevzusında lektsiyalar oqudı. İmamlarnıñ ihtisas yükseltüvi programmasına Qırım devlet müendislik-pedagogika universiteti ocalarınıñ lektsiyaları da kirdi. Professor, filologiya ilimleri namzeti İsmail Kerimov diñleyicilerge XX asırnıñ başında Qırım musulmanlarınıñ yaşayışı aqqında tarif etti, tarihçı-içtimaiyatçı, içtimaiy ilimler namzeti Refiq Qurtseitov lektsiyasını Ekinci Cian cenkiniñ qırımtatarlardan olğan qaramanları ve iştirakçilerine bağışladı. Umumen ihtisas yükseltüvi kursunda Saq rayonından 50 qadar imam iştirak etti. Qırım Müftisiniñ muavini Ayder İsmailovnıñ sözlerine köre, kursnıñ maqsadı – ealiniñ diniy bilgi seviyesini arttırmaq ve İslâm maarifiniñ keyfiyetini yükseltmek, ekstremizmge qarşı çalışmaqtır. "Biz bir sıra mevzularnı qavrap almağa tırıştıq, amma eñ büyük diqqatnı imanğa ayırdıq, çünki din hadimleri Qırımnıñ musulman ümmetinde peyda olğan suallerge tolu cevap bermek kerekler. Biznen beraber çalışıp, ealiniñ maarifine büyük isse qoşqan İslâm medeniyeti, ilimi ve tahsiline destek fonduna, QMPU rehberiyeti ve ocalarına teşekkürler bildiremiz", – dep, qayd etti Ayder İsmailov. İhtisas yükseltüvi kursları Qırımnıñ diger bölgelerinde de keçirilmege devam etecek. Qırım MDİ matbuat hızmeti [gallery link="file" size="medium" ids="50717,50715,50713,50711,50709,50707,50705,50703,50701"]

Qalay medresesi abituriyentlerni davet ete

Опубликовано:

İmam Maturidiy adına Qalay islâmiy ilimler medresesi oğlanlar bölügine ilâve qabulnı ilân ete. Vesiqalar avgust 30 kününe qadar qabul etilecek. Medresede oqumağa istegenler vesiqalarnı teslim etip, suhbetten keçerek, oquşqa qoşula bileler. Qalay medresesine kiriş kampaniyası bu yılnıñ iyül ayında başlandı, medreseniñ qızlar bölügine ve Qurman rayonındaki hafızlıq bölügine yeteri qadar talebi qabul etildi. Hatırlatamız, medresege 9 ve 11 sınıflarnı bitirgen talebeler qabul etile. Bütün bölüklerde oquv müddeti 2 yıldır. Medreseniñ qızlar ve oğlanlar bölüginiñ mezunları, mektepte umumtahsil programmasını yekünlep, tolu orta tahsil aqqında attestatnı alalar ve orta professional diniy tahsil aqqında diplomnı elde eteler. Medresede oquv, qaluv ve aş-suv bedavadır. Oquşqa kirmeden evel abituriyentler mulâqattan keçeler. Mulâqatta tabel ya da baalar ile attestatnı ketirmek kerek. Mulâqatqa kelgen abituriyentler nevbetteki vesiqalarnı taqdim etmeli: Baalar ile attestatnıñ asıl nushası ve kopiyası; Tibbiy spravkanıñ 086-u şekili; Aşılamalar aqqında cedvelniñ kopiyası; Flüorografiyanı keçkeni aqqında qayd vesiqası; Pasportnıñ (doğuv şeadetnamesiniñ) kopiyası; Ana-babalardan (resmiy temsilcilerniñ) biriniñ pasportınıñ kopiyası; Tibbiy polisniñ kopiyası; SNİLS-niñ kopiyası; 3h4 şekilinde 6 renkli mat fotoresimi Mulâqat nevbetteki adres boyunca keçirilecek: 296173, Qırım Cumhuriyeti, Canköy rayonı, Mayskoye köyü, Gasprinskiy soq., 1 ev. Telefonlar: +7978-117-26-17 (Medrese müdiri) +7978-899-5447 (oğlanlar bölügi). Qırım MDİ matbuat hızmeti

Qırım ve Sevastopol Müftisi Özbekistan Müftisi Usmanhon hacı Alimovnıñ ölümi sebebinden taziye bildirdi

Опубликовано:

Qırım Cumhuriyeti ve Sevastopol şeeri Müftisi hacı Emirali Ablayev Özbekistan musulmanları diniy idaresiniñ reisi, Müfti Usmonhon Alimovnıñ ölümi sebebinden taziyesini bildirdi. Qırım Cumhuriyeti ve Sevastopol şeeri musulmanları diniy idaresi ve, şahsen, öz adımdan Usmonhon Alimovnıñ ölümi sebebinden teren taziyemni bildirem. Biz özbek halqınıñ acısına payedarmız ve Usmonhon Alimovnıñ qorantasına, tuvğanları ve yaqınlarına teren taziyemizni bildiremiz. Bütün Özbekistan halqınen beraber keder içindemiz. Yüce Rabbimizge dua etip, oña mağfiret ve rahmet etmesini, qorçalamasını, yaqınlarına ise, baş sağlığı, sabır-çıdam bermesini niyaz etemiz. Şübesiz, epimiz Allah içünmiz ve qaytuvımız Oñadır. Usmonhon (Usmon) Alimov 1950 senesi, yanvar 1 künü Özbekistanda, Samarqand vilâyetiniñ İştıhan şeerinde dünyağa keldi. O, Buhara medresesinde diniy tahsil aldı. 1989–1990 seneleri Marokkoda Qaraviyin universitetinde tahsil aldı. Özbekistannıñ baş Müftisi olmadan evel, 2006 senesi Alimov Samarqand vilâyetiniñ baş müftisi edi. Usmonhon Alimov 72 yaşına kelip, Moskvada yürek hastalığından dünyasını avuştı. Allah rahmet eylesin. Qırım MDİ matbuat hızmeti (Foto: Valeriy Şarifulin / TASS)