Haberler - Page 7 of 81 - ЦРО ДУМКЦРО ДУМК | Страница 7

Четверг

02

декабря

27
Ребиу'ль-ахир
1443 | 2021
Утр.6:29
Вос.7:53
Обед.12:38
Пол.14:45
Веч.17:13
Ноч.18:37
Времена намазов
Календарь 2021г

Намаз

Haberler - Page 7 of 81 - ЦРО ДУМК

Qırım din erbapları yaşlarğa neofitler aqqında tarif ettiler (FOTO)

Опубликовано:

Qırım Cumhuriyeti ve Sevastopol şeeri Müftisiniñ QC ve Sevastopol şeeri boyunca ÜFSİN ile işbirlik boyunca yardımcısı, Aqmescit şeeriniñ baş imamı Muhammed İslamov QC ve Sevastopol şeeri boyunca ÜFSİN başlığınıñ yardımcısı Roman Tsurkan ile birlikte dinlerara iş taqımınıñ oturışını keçirdi. Oturışta tüzeltüv koloniyalarında tertipniñ pekitilmesi ve, hususan, mahkümlerge yasaq olğan eşyanıñ ketirilmesiniñ ögüni almaq meselesi muzakere etildi. Buña ilâve olaraq, neofitler, yani farqlı diniy aqımlarnıñ yañı adeptleri, azaları aqqında söz lektsiya oquldı. "Neofitler – esasen yaşlardır, olarnıñ fikir ve mevamları daa tolusınen şekillenmegeni içün, olar mevamlarını sıq-sıq deñiştire bile ve qolaylıqnen digerlerniñ tesirine tüşe bileler. Birinci zamanlarda olar diniy saada qarardan zâide ğayret köstereler ve, afsus ki, çoqusı vaqıt radikallar sırasına kireler. Er saada, hususan, diniy meselelerde davranışlarımız aqıl ile olmalı. Tek işançlı menbalarğa muracaat etmek, ihtisaslı imamlarğa sual ile kelmek, şübeli internet saytları ve türlü vaizlerden saqınmaq kerek", – dedi Muhammed İslamov. Tedbir Aqmescitteki №1 Tüzetüv koloniyası erkânında çalışqan Tüzetüv merkezinde olıp keçti. Qırım MDİ matbuat hızmeti [gallery link="file" columns="4" size="medium" ids="49680,49678,49676,49674,49672"]

Qırım Müftiligi Qurban bayramında tedbirlerniñ keçirilüvini sıñırlay

Опубликовано:

Qırım Cumhuriyeti ve Sevastopol şeeri musulmanları diniy idaresi (Tavriya Müftiyatı) Qırım musulmanlarınıñ Qurban bayramı munasebetinen keçirilgen tedbirlerniñ sıñırlanmasını beyan ete. Soñki zamanlarda cumhuriyetimizde koronavirus infektsiyasınıñ keñ darqaluvı munasebetinen Qırım müftiligi Qurban bayramını qayd etüv çerçivesindeki kütleviy tedbirlerniñ keçirilüvini sıñırlay. "Biz insanlarnıñ hastalanmasını minimumğa tüşürmek içün kerekli tedbirlerni almaq kerekmiz. Bilgenimiz kibi, insanlar toplanğan yerler – infektsiyanıñ darqalması içün eñ elverişli müitlerdir. Hastalıqnen bağlı işbu ağır vaziyetni köz ögüne alıp, biz insanlarnı havf astında qaldırıp olamaymız", – dedi Müfti efendi. Bunen beraber, Müfti qayd etti ki, cami azbarında 50-ge qadar bala içün bayram tedbirlerini keçirmek, balalarımıznı sevindirip, olarğa ediyeler tarqatmaq mümkündir. Hatırlatamız, soñki künleri Qırım Cumhuriyeti ve Sevastopol şeerinde künde tahminnen 490 insan koronavirus infektsiyasına oğrap, hastalana. Şu sebepten, Qırım Müftiligi vatandaşlarnı havfsızlıq qaidelerine riayet etmege, insanlar toplu olğan yerlerde maskalarnı kiymege, antiseptikler qullanmağa ve ara mesafesini közetmege, kütleviy tedbirlerni (dua ve toylarnı) keçirmemege çağıra. Qırım MDİ matbuat hızmeti

Qırım Müftiliginde Müftiniñ rayon imamlarınen iş körüşüvi olıp keçti (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde Müfti efendiniñ rayon imamlarınen iş körüşüvi olıp keçti. Adet üzre, din erbapları içün seminar olıp keçti, o, musulmanlarnıñ eki bayramından biri olğan Qurban bayramına bağışlanğan edi. Qırım Müftisiniñ muavini Raim Ğafarov insaniyetlikniñ tarihında farqlı milletlerde qurban etilmesiniñ tarihı ve İbraim ile İsmailnen (a.s.) bağlı vaqialar işbu ananelerni lâğu etkeni aqqında tarif etti. Seminarnıñ soñunda imamlar içün test keçirildi. Qurban meselesi aqqında, hususan, qurban çaluvına nasıl azırlanmalı, kim qurban çalmaq kerek, qurbanlıq ayvanda nasıl şartlar olmaq kerek, quraban çalınacaqta mekruh olğan areketler aqqında Qırım Müftisiniñ muavini Ayder İsmailov tarif etti. Rayon imamları ile körüşüvi esnasında Qırım Müftisi hacı Emirali Ablayev imamlarğa daa bir kere muracaat etip, koronavirus infektsiyasınıñ darqalmaması içün kerekli tedbirlerge riayet etmek meselesinde ealinen aktiv şekilde çalışmağa çağırdı. "Artıq ekinci yıl devamında pandemiya toqtamay, biz tehlikenen yüz-yüzgemiz, ekinci yıldır dünya musulmanları hacılıq ibadetini yerine ketirip olamay. Bu künler tarihqa keçecek. Amma, er kün ve er saat biz milletimiz, onıñ sağlığı ve eyiligi içün mesüliet duymaq kerekmiz. Vaziyet ğayet ciddiy, ve bu halqnıñ tehlikesizlik meselesidir. Er kes qararını özü ala. Ekimler, mütehassıslar bar, işançlı menbalarğa muracaat etiñiz ve farqlı emiş-demişler ve qorquzuvlar peşinden ketmeñiz. Bugün aynı siz milletimiz içün mesülietlisiñiz", – dedi Müfti. İş körüşüvi çerçivesinde din erbapları keçken ayda yapqan işlerinden esabat berdiler ve kelecek ayğa planlarını muzakere ettiler. Hususan, cami topraqlarınıñ resmiyleştirilüvi, kommunal hızmet ücretiniñ vaqıtında tölenilüvi, camilerniñ qurucılığı ve tamirlevi, mekteplerdeki yaz tatili devamında balalar içün diniy tahsil tedbirlerniñ teşkil etilüvi. Qırım MDİ matbuat hızmeti [gallery link="file" columns="4" size="medium" ids="49736,49734,49732,49730,49728,49726,49724,49722"]

Qırım Müftisi Bağçasaray şeeri ve Bağçasaray rayonınıñ cenk iştirakçileri ve partizanları aqqında kitapnıñ taqdiminde iştirak etti (FOTO)

Опубликовано:

Qırım Cumhuriyeti ve Sevastopol şeeri Müftisi hacı Emirali Ablayev yazıcı, jurnalist Gülnara İlyasova tarafından azırlanğan "Bessmertnı vaşi imena" ("Adlarıñız ebediy yaşaycaq") kitabınıñ tantanalı taqdim merasiminde iştirak etti.Tantanalı tedbir İ.Ya.Franko adına Qırım cumhuriy universal kitaphanesinde olıp keçti. Bundan da ğayrı, tedbirde QC İçki işler nazirliginiñ imic siyaseti, malümat ve bağ idaresiniñ başlığı Ruslan Abdureşitov, Qırım Parlamenti Reisiniñ mesleatçısı Ayder Ablâtipov, Qırım yaşlar siyaseti devlet komitetiniñ başlığı Sergey Selimov, "Rusiye birligi" regionlarara cemaat teşkilâtınıñ başlığı Yelena Aksönova, Milletlerara munasebetler boyunca devlet komitetiniñ ve QC Medeniyet nazirliginiñ temsilcileri, "Altın Maydan" leyhasınıñ müellifi ve rehberi, "Tatarstan Cumhuriyeti" gazetasınıñ mahsus korrespondenti Gamira Gadelşina, Rusiye yazıcılar birliginiñ azası, Adıgeya Cumhuriyetinde nam qazanğan artist Adam Açmiz iştirak ettiler. Qırım Müftisi hacı Emirali Ablayev çıqışında çoqmilletli yarımadada yaşağan halqlarnı birleştirgen Ulu Vatan cenki aqqında kitaplarnıñ derc etilüviniñ müimligini ayrıca qayd etti. "Biz tarihımıznı bilmek kerekmiz, aydın kelecegimiz içün qaramanane keçmişimizni hatırlamalımız. Millionlarca qurbanlarınen tarihiy aqiqat ne qadar acı olsa da, biz baba-dedelerimizniñ cesürliginden ibret almalımız. Ve bu cesürlikni balalarımız ve torunlarımızğa aşılamaq kerekmiz. Devletimizde neşir etilgen kitaplar milletlerni birleştirmek, birdemlik duyğusını şekillendirmek kerek, halqlarara munasebetlerge kin ve nefretni soqmamaq kerek. Ancaq cumhuriyetimizde yaşağan farqlı milletlerniñ dostluğı, bir-birine olğan sevgisi ülkemizniñ kerçekten inkişaf etmesini temin ete bile", – dep, qayd etti hacı Emirali Ablayev. Buña ilâve olaraq, Müfti efendi kitap müellifine tarihnıñ saqlanılmasına salmaqlı issesini qoşqanı içün teşekkür bildirdi. "Bessmertnı vaşi imena" ("Adlarıñız ebediy yaşaycaq") kitabı 2020 senesi Qırım Cumhuriyetiniñ İçki siyaset, malümat ve bağ nazirliginiñ destegi ile derc etilip, Ulu Vatan cenkiniñ 75-yıllığına bağışlanğan. Kitapta Ulu Vatan cenkinde Bağçasaray şeeri ve Bağçasaray rayonında olıp keçken müim vaqialar aqqında tarihiy malümat berile. Neşirde cenk iştirakçileri, partizanlar aqqında biografik malümatlar ve olarnıñ hatıraları, Bağçasaray şeeri ve rayonıdaki abideler ve ve hatıra yerleri aqqında malümat toplanğan. Mezkür cıyıntıqnıñ müellifi Gülnara İlyasova tarif etkenine köre, malümat bir yıl devamında Bağçasarayda neşir etilgen "Slava trudu" ("Emekke şeref") gazetasınıñ, Bağçasaray rayonı ve şeerindeki oquv yurtları yanında açılğan cenk ve partizan areketine bağışlanğan müzeylerniñ ve şeer ile rayon sakinleriniñ, cenk iştirakçileri soy-sopunıñ hatıralarına ve arhivleriniñ malümatlarına esaslanıp, toplanıldı.   Qırım MDİ matbuat hızmeti [gallery link="file" columns="4" size="medium" ids="49666,49664,49662,49660,49658,49656,49654,49652,49650,49648,49646,49644,49642,49640,49638,49636,49634,49632,49630,49628,49626,49624,49622,49620,49618,49616"]

Qırım camileri Qurban bayramına azırlana!

Опубликовано:

2021 sene, iyül 11 künü Aqmescit rayonınıñ Levadki qasabasındaki Qadır camisinde talaqa keçirilecek. Talaqa işlerine köyniñ civarında yerleşken Priyatnoye Svidaniye, Acı Qal (Çistenkoye) ve Terek Eli (Tröhprudnoye) köyleriniñ sakinleri ve hayırlı işke qoşulmağa istegen er kes davet etile. Talaqa saat 08:00 başlanacaq. Qırım camilerinde musulmanlarnıñ eki diniy bayramından biri olğan Qurban bayramına azırlıqlar başlandı. Yerli sakinlerniñ qoltutuvınen camilerniñ etrafları abadanlaştırıla, azbarlarda terekler ve çeşit ösümlikler ekile ve binalar aqlana ve boyana. Qırım MDİ matbuat hızmeti

Büyük Cuma caminiñ qurucılığı devam etile (FOTO)

Опубликовано:

Qırım Cumhuriyetiniñ Nazirler şurasında Aqmescitteki Büyük Cuma caminiñ qurucılığını yekünlemek maqsadınen bir sıra tedbirlerniñ becerilmesi boyunca iş muşaveresi keçirildi. Muşaverede qurucılıqqa alâqası olğan nazirlikler, idareler, teşkilâtlar ve Qırım Müftiligi iştirak etti. Tedbir QC Nazirler şurası Reisiniñ muavini Mihail Nazarov yolbaşçılığında ötkerildi. Mihail Nazarov kiriş sözünde qayd etti ki, Büyük Cuma cami külliyesinde qurucılıq işlerniñ çoqusı artıq yekünlendi, qurucı şirket deñişti, ve yaqın zamanda işler tezleştirilecek. Öz nevbetinde, Qırım MDİ mesül kâtibi Ayder Acimambetov bir sıra çezilecek meselelerni seslendirdi. Olarnıñ arasında elektrik ceryannı teminlegen ağnıñ qurulıp, külliyeniñ saasından 110 kV yüksek voltlıq ağlarnıñ çıqarıluvı, hocalıq ve yağmurlıq kanalizatsiyalarınıñ yapılıp, umumiy ağlarğa qoşulması, radio, internet ve telefon ağlarınıñ keçirilmesi, gaz ağınıñ keçirilip, çalıştırılması  ve diger meseleler añaldı. Buña ilâve olaraq, naqliye içün qoşma yol yolağınıñ yapılması, yol astı keçitiniñ qurulması, cemaat naqliye turağınıñ başqa yerge avuştırılması, Büyük Cuma Cami külliyesi yanından keçken avadaki kabel ağlarınıñ cami saasından uzaqlaştırılması, trolleybus ağlarınıñ da yerleri deñişmesi zaruriyeti seslendirildi. Bundan da ğayrı, tedbir iştirakçileri Büyük Cuma cami yanında yerleşken ormanlıq saanıñ Qırım MDİ mülkiyetine keçirilüvi protsedurasını ve bu topraqnıñ abadanlaştırıluvı meselesini muzakere etttiler. Muşavereniñ neticesinde er afta vitse-premyerniñ yolbaşçılığında muşavelerni keçirmek ve qurucılıq esnasında peyda olğan meselelerni operativ şekilde çezmek qararı alındı. Hatırlatamız, 2021 senesi, mayıs 17 künü Rusiye Prezidenti Vladimir Pütin RF ve Qırım akimiyetlerine, alâqadar teşkilâtlarnı celp etip, Aqmescitteki Büyük Cuma caminiñ qurucılığını yekünlemege destekçi olmalarını avale etti. Bunı ifade etken madde mart 18 künü Qırım Cumhuriyeti ve Sevastopol şeeriniñ cemaatçılığı vekillerinen keçirilgen körüşüvniñ neticesinde berilgen avaleler arasında mevcuttır. Qırım MDİ matbuat hızmeti [gallery link="file" columns="4" size="medium" ids="49531,49529,49527"]

Qırım Müftisiniñ koronavirus hastalığınıñ tekrar darqatıluvınen bağlı muracaatı

Опубликовано:

Qırım Müftisi Qırım musulmanlarını vatandaşlıq mesülietini kösterip, koronavirus infektsiyasınıñ darqalmaması içün kerekli tedbirlerni almağa çağırdı. Ürmetli dindaşlar, qıymetli semetdeşeler. Qırımda koronavirus hastalığınıñ tekrar darqaluvı sebebinden biz er kün yaqınlarımıznı, tuvğanlarımıznı, dostlarımıznı, vatandaşlarımıznı ğayıp etemiz. Bugün de bugün vaziyet daa da kerginleşe. Qırım Müftiligine kelgen malümatlarğa köre, qırımtatar halqı arasında hastalarnıñ sayısı nisbeten daa ziyadedir. Belki de bu musulmanlar içün ananeviy olğan büyük toylar, kütleviy dua merasimleri ve cenazeler, diger tedbirlernen bağlıdır. Aziz musulmanlar, sizge muracaat etip, özüñizniñ ve yaqınlarıñıznıñ sağlığına muqayt olmañıznı rica etem. Dinimiz bizni er bir insannıñ ve, umumen, cemiyetniñ sağlığını saqlamaqnı emir ete. Bugün ise, daima olğanı kibi, bu er birimizniñ mesülietidir. Quranda böyle buyurıla: "Özüñizni tehlikege atmañız!" ("Baqara" suresi, 2/195). Al-ı azırda Qırımda ealiniñ koronavirus infektsiyasından aşılanuvı areketi faal şekilde keçirile. Ricam, emiş-demişlerge ve esassız delillerge itibar etmeñiz, özüñizniñ ve etrafıñıznıñ sağlığını tüşüñiñiz, özüñizni ve etraftakileriñizni hastalıqtan qorçalanıñız. Havfsızlıq qaidelerine riayet etmege rica etem. Musulmanlarğa lâyıq olğanı kibi, şahsiy temizlik qaidelerine riayet eteyik, insanlar çoq olğan yerlerden uzaqlaşayıq, imkânğa köre, maksimum şekilde qatnavlarımıznı azlaştırayıq. Hususan, bu üyken nesil içün aktualdir. İmkânğa köre, büyük toylar ve kütleviy tedbirlerni soñrağa qaldırayıq, cenaze merasimlerni qısqartayıq, cenazelerde havfsızlıq mesafesine riayet eteyik. Camige kelgende, şahsiy namazlıqlarımıznı alayıq. Cuma namazlarında bir yarım metr mesafe tutayıq ve mıtlaqa maskalar qullanayıq. Böylece, em özümizni, em etraftakilerni tehlikeden uzaqlaştırımız. Hastalıq alâmetlerini duysaq, alsızlınsaq, camige kelmeyik, hastalıqnıñ darqalması içün sebepçi olmayıq. Hastalıq alâmetlerini körsek, mıtlaqa ekimge muracaat etiyik, özümizce hastalığımıznı tedaviy etüvge başlamayıq. Allahqa dua etip, bizni qaza-belâlardan saqlamasını, hastalarğa şifa bermesini ve bu dünyanı terk etkelerge rahmet etmesini niyaz etemiz. Qırım MDİ matbuat hızmeti

Qırım Müftiliginde “Merhametlik-2021” aktsiyası keçirildi (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde "Merhametlik-2021" hayriye aktsiyasınıñ neticeleri çıqarılıp, tedaviylevge muhtac ağır hasta balalarnıñ qorantalarına maddiy destek kösterildi. Hayriye aktsiyası çerçivesinde yıl devamında, keçken yılnıñ Ramazan ayından başlap, bu yılnıñ Ramazan ayınıñ soñuna qadar Qırımnıñ bütün camilerinde hasta balalar içün sadaqalar toplanıldı. Umumen, yıl devamında 2 mln ruble toplanıldı. Şu paralardan 1 millionı Alim Muratov ve Elvina Jurayevanıñ tedaviylevleri içün berildi. Şimdi de aktsiya çerçivesinde 1 million ruble darqatıldı. Paralar hastalıqnıñ ağırlığı ve tedaviylenüvniñ paalığına köre, hastalarnıñ qorantalarına darqatıldı. Umumen, yıl devamında Qırım Cumhuriyeti ve Sevastopol şeeri musulmanları diniy idaresine maddiy destekni almaq içün 36 ariza keldi, bundan da ğayrı, yıl devamında 40 acele ariza qabul etildi. Qırım Müftisi hacı Emirali Ablayev hastalarnıñ qorantalarına sabır ve, iç bir şeyge baqmadan, tedaviylenüvge işançnı coymamaqnı tiledi. Bundan da ğayrı, Müfti efendi toplanğanlarnıñ diqqatını koronavirus infektsiyasınen bağlı vaziyetniñ ciddiyetine çekti. "Er birimiz özümiz qarar alamız. Elbette, aşılav aqqında çoq emiş-demişler, laflar yüre. Bazıda olmaycaq şeyler aytıla. Amma epimiz öz sağlığımız, yaqınımızdaki ve etrafımızdaki insanlarnıñ sağlağı içün mesülietli olğanımıznı unutmayıq. Bizge tevsiye etecek ekimler, mütehassıslar bar, amma qararnı biz özümiz alamız. Özümizniñ ve yaqınlarımıznıñ havfsızlığına doğru adım atmaq qararını. Adetimizde körüşkende, quçaqlaşmaq, cemaatnı toplap, büyük toylar ve dualar keçirmek bar. Afsus ki, şimdi böyle cıyınlardan vazgeçip, mesafe qaidelerine uymaq ve antiseptikler, maskalar qullanmaq vaqıtıdır. Biz şu devirni mümkün olğanı qadar az zararnen keçirmelimiz, amma şimdi vaziyet bayağı kergin. Müftilikke kelgen muracaatlarğa esasen, eñ çoq hasta sayısı halqımız arasında. Lütfen, kendiñizge ve yaqınlarıñızğa muqayt oluñız. Allahqa dua etip, şu imtianlardan sağ-selâmet keçmekni niyaz etemiz", — dep ayttı Müfti efendi. Qırım musulmanları diniy idaresi ağır hasta balalarnıñ tedaviylenüvi içün müddetsiz "Merhametlik" hayriye aktsiyasını devam ete. Sadaqalar bütün Qırım camilerinde, qırımtatarlar toplu yaşağan yerlerde çalışqan tükânlarda, kütleviy tedbirlerde ve bayramlarda toplana. Şu aktsiyağa Qırımdaki musulman din cemiyetleri, metsenatlar, iş adamları ve adiy vatandaşlarımız büyük destek köstereler. "Merhametlik" aktsiyası boyunca Ramazan ayından başlap, nevbetteki Ramazan ayına qadar sadaqalar toplanıla, arada acele tedaviylevge muhtac olğanlarğa yardım kösterile. 2009 senesinden başlap, bugünki künge qadar aktsiya çerçivesinde 23.182.009 ruble toplanıldı. Paralarnıñ ekseriyeti ağır hasta balalarnıñ tedavilevine berildi. Qırım musulmanları diniy idaresi hasta balalarğa yardım etmeñizge çağıra, çünki olarnıñ kelecegi bizge bağlıdır. "Merhametlik" aktsiyasına qoşulıñız. Lâqayd qalmañız. Qırım MDİ matbuat hızmeti [gallery link="file" columns="4" size="medium" ids="49516,49466,49476,49486,49456,49464,49462,49460,49458,49474,49472,49470,49468,49484,49482,49480,49478,49494,49492,49490,49488,49504,49502,49500,49498,49496,49512,49522,49520,49518,49514,49508,49510,49506"]

Qırım Müftiligini Moskvadan kelgen eyyet ziyaret etti (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresine dostane ziyaret ile Moskvadan bir eyyet keldi. Qırım Cumhuriyeti ve Sevastopol şeeri Müftisi haci Emirali Ablayev Rusiye Federatsiyasınıñ 2 derece devlet mesleatçısı, RF Prezidenti yanında milletlerara munasebetler şurası Prezidiumınıñ azası, İEA RAN baş ilmiy hadimi, RF Cemaat Palatasınıñ azası, milletlerara ve dinlerara munasebetlerniñ eyileşüvi komissiyasınıñ başlığı Vladimir Zorin ve Avrasiya teleyayınlav ve radio akademiyasınıñ Prezidenti, Avrasiya halqları assambleyası baş kâtibiniñ muavini Valeriy Ruzin ile körüşti. Körüşüv devamında Müftisi efendi hacı Emirali Ablayev Qırım musulmanlarınıñ yaşayışı, ömürge keçirilgen diniy-maarif ve hayriye tedbirleri aqqında tarif etti. Buña ilâve olaraq, taraflar Qırım musulmanları – qırımtatarlarğa bağışlanğan medeniy ve maarif leyhalarınıñ işbirlikte keçirmek imkânını muzakere ettiler. Körüşüvniñ soñunda musafirlerge Qırım musulmanları diniy idaresi tarafından neşir etilgen "Qalpte iman ile" kitabı ediye etildi. Zenife Ablayeva ve Gülnara İlyasova tarafından tertip etilgen kitapta 1944 senesi, mayıs 18 künü qırımtatarlarnıñ Qırımdan zorbalıqnen sürgün etilmesini yaşağanlarnıñ hatıraları toplanıldı. Qırım MDİ matbuat hızmeti [gallery link="file" columns="4" size="medium" ids="49447,49455,49453,49451,49449,49542"]

Qırımdaki hafızlar mektebi Rusiye Quran hafızları birleşmesiniñ birinci toplaşuvında iştirak etti (FOTO)

Опубликовано:

Qazanda (Tatarstan Cumhuriyeti) Rusiye Quran hafızları birleşmesiniñ birinci toplaşuvı olıp keçti. İşbu teşkilât Quran bilgirlerini yetiştirüv merkezi vekilleri tarafından meydanğa ketirildi. Tedbirde Qırımnı İmam Maturidiy adına Qalay islâmiy ilimler medresesiniñ hafızlar bölügi rehberi Suleyman Samedinov temsil etti. Oturıştan evel Quran hafızları merkezlerinde çalışqan ocalar içün ihtisas yükseltilüvi kursı olıp keçti, kursnıñ soñunda iştirakçiler mahsus sertifikatlarnı elde ettiler. Buña ilâve olaraq, ocalar yañı birleşmeniñ perspektivalarını muzakere ettiler. Al-ı azırda Rusiye Quran hafızları birleşmesine Rusiyeniñ farqlı bölgelerinden 12 hafız yetiştirüv ocağı kirdi. İşbu teşkilât Rusiye Federatsiyası İslâm tahsili şurasınıñ terkibine kirecek. Qırım MDİ matbuat hızmeti [gallery link="file" columns="4" size="medium" ids="49427,49429"]

Qırım Müftiligi “Qurbanıñnı medresege bağışla” aktsiyasını ilân ete!

Опубликовано:

Qırım Müftiligi medreseni oquv yılı boyunca etnen temin etmek içün "Qurbanıñnı medresege bağışla" hayriye aktsiyasını ilân ete. Aktsiya çerçivesinde istegenler qurbanlarını İmam Maturidiy adına Qalay islâmiy ilimler medresesine bere bile, ya da paralarnı Qırım musulmanları hayriye fondunıñ esabına keçirmek mümkün. Qırım musulmanları hayriye fondu İNN/KPP 9102201739, 910201001 Esap 40703810041300000158 Korrespondent esabı № 30101810335100000607 ÖGRN 1159102132012 Bank: RNKB BANK (PAO) BİK 043510607 Ödeme maqsadı: İmam Maturidiy adına Qalay islâmiy ilimler medresesine bağış. Tafsilâtlı malümat nevbetteki telefon vastası boyunca: +7978 0741847 Qırım MDİ matbuat hızmeti

Nalçikte Qalay medresesiniñ Rusiye ilmiy-tahsil sistema çerçivesinde iş tecribesi aqqında tarif etildi

Опубликовано:

Qırım Müftisiniñ muavini Esadullah Bairov "Rusiyeniñ ilmiy-tahsil sistemasında İslâmnıñ rolü ve yeri" konferentsiyasında iştirak etti. Tedbir Nalçik şeerinde çalışqan Ebu Hanife adına Şimaliy Qafqaz İslâmiy universitetiniñ 25-yıllağına bağışlanğan edi. Forum iştirakçileri ögünde çıqışta bulunıp, Esadullah Bairov toplanğanlarnı Qırım Müftisi hacı Emirali Ablayev adından hayırladı. Buña ilâve olaraq, o, universitetni 25-yıllığınen hayırlap, işlerinde muvafaqiyetler tiledi. "Biz aliy islâmiy tahsil saasında yapqan işiñizge yüksek qıymet kesemiz. Uzaq 90-ncı seneleri büyüklerimiz ikmetnen bugünki islâmiy maarifniñ ve, umumen, İslâm tahsiliniñ temelini qoyğan ediler. Olarnıñ şu isselerine büyük qıymet kesemiz", – dedi Esadullah Bairov. Konferentsiya esnasında Esadullah Bairov "Qalay medresesiniñ Rusiye ilmiy-tahsil sisteması çerçivesindeki tecribesi" mevzusında maruzasınen çıqışta bulundı. Maruzasında o, Qırım Cümriyetinde çalışqan diniy müessiseniñ 23 yıllıq iş tecribesinen paylaştı. Qırım MDİ matbuat hızmeti