Haberler - Page 6 of 55 - ЦРО ДУМКЦРО ДУМК | Страница 6

Вс

05

июля

14
Зуль-къаде
1441 | 2020
Утр.2:59
Вос.4:53
Обед.12:52
Пол.16:56
Веч.20:42
Ноч.22:36
Времена намазов
Календари 2020г

Намаз

Haberler - Page 6 of 55 - ЦРО ДУМК

Qırım Müftisi Bütünqırım küreş yarışınıñ iştirakçilerini hayırladı (FOTO)

Опубликовано:

Qırım Müftisi hacı Emirali Ablayev III Bütünqırım milliy küreş boyunca açıq yarışınıñ tantanalı açıluv merasiminde iştirak etti. Yanvar 12 künü Aqmescitte olıp keçken yarışta Qırım Cumhuriyeti ve Sevastopol şeerinden sportçılar iştirak etti. Qırım Müftisi qayd etkenine köre, bugünki künde milliy küreş tek sport musabaqası degil de, yarımadada barışıqlıq ve muabbetlikniñ timsalidir. Qırım Müftisi: "Barışıqlıqnıñ saqlanması – bizim elimizde. Bugünki künde milliy küreşke büyük diqqat ayırılğanı, yaşlarnıñ çoqusı küreşnen meraqlanıp başlağanı bizni pek quvandıra. Epiñizge muvafaqiyetler ve ğalebeler tileyim. Qayda olsañız-oluñız, qaysı devletke musafirlikke barsañız-barıñız, unutmañız, halqımızğa nisbeten ürmet yaşağan devletimizge, qomşularımızğa nisbeten ürmetnen başlana. Tek şu şekilde biz aydın kelecekni qura bilecekmiz", – dedi. Buña ilâve olaraq, o, turnir teşkilâtçılarına, idmancılarğa sportçılarnı azırlağanları, halqara ve Rusiye çempionatlarında milliy quşaq küreşi yarışlarında faal iştirak etkenleri içün teşekkür bildirdi. Altın quşaqnı ve "Qırımnıñ eñ küçlü küreşçisi" unvanını Aqmescitten İlimdar Saidov qazandı. Qırımda milliy qırımtatar küreşi boyunca bütünqırım açıq çempionatı üçünci kere ötkerile. Quşaq küreşi resmiy olaraq olimpik olmağan sport çeşitleri dünya ağına kirmekte, bundan da ğayrı, halqara küreş federatsiyası çalışa. QMDİ matbuat hızmeti [gallery link="file" columns="4" size="medium" ids="36217,36215,36213,36211,36209,36207,36205,36203,36201,36199,36197,36195,36193,36191,36189,36187"]  

Qırım Müftiliginde 2020 senesi diniy maarif tedbirleriniñ planı muzakere etildi (FOTO)

Опубликовано:

Qırım Müftiliginde 2020 senesiniñ ilk İslâm temelleri ve Quran oquvı kursları ocalarınıñ toplaşuvı olıp keçti. Toplaşuv çerçivesinde keçken seneniñ neticeleri çıqarıldı, ocalar regionlarda yapqan işleri içün esabat berdi. Bugünki künde "Faydalı ilim" leyhasında 80 oca faaliyet köstere, afta soñu çalışqan 75 kurs devam etmekte. İslâm temelleri kursları talebeleriniñ sayısı üç biñni arttı. İslâm temelleri ocaları kelecek sene içün tedbirleniñ planını muzakere etti. Al-ı azırda "Hayrunnisa" yarışına azırlıqlar kete, yarış yanvarniñ soñunda ötkerilecek. Bundan da ğayrı, ocalar taqımı martnıñ soñunda keçirilecek Quran oquvı yarışına azırlana. Fevralde ocalar metodik azırlamalarnı ve derslik qullanmalarını taqdim etecek. Buña ilâve olaraq, toplaşuvda 2020 senesi İslâm temelleri ocalarınıñ ihtisas yükseltilüvi planı tizildi. QMDİ matbuat hızmeti [gallery link="file" columns="4" size="medium" ids="36055,36067,36065,36063,36059,36057"]

Qırım Müftiliginde 2020 senesi iş planı belgilendi (FOTO)

Опубликовано:

Qırım Müftiliginde Qırım Müftisi hacı Emirali Ablayevniñ rayon imamları ile körüşüvi olıp keçti. Din erbapları keçken sene yapqan işleri içün esabat berdi ve 2020 senesi içün planlarnı ve becerilecek vazifelerni belgiledi. Toplaşuv çerçivesinde ayrı diqqat rayonlarda "Halq medresesi" filiallarınıñ açıluvına ayırıldı, hususan, Sudaq ve Kezlev rayonlarında. Bundan da ğayrı, Qırım Müftisi ealiniñ içtimaiy-turmuş, uquqiy, medeniy-maarif ve tasil meseleleriniñ çezilüvi içün yerli akimiyet vekillerinen işbirlikni faalleştirmege tevsiye etti. Qırım Müftisiniñ muavini Raim Ğafarov insannıñ ömürinde dinniñ emiyeti mevzusını açıqladı. Körüşüv çerçivesinde imamlar Qırım ve Sevastopol şeeri musulmanları diniy idaresi neşir etken diniy gazeta ve jurnalına yazıluv kampaniyasına destek köstermege çağırıldı. Qırım Müftisi diniy erbaplarnı cemiyetniñ maneviy-ahlâqiy terbiyesi yolunda biri-birine destek köstermege çağırdı. Körüşüvniñ soñunda imamlar 2019 senesi, dekabrniñ soñunda faniy dünyanı terk etken Bağçasaray rayonınıñ Vilino köyü imamı Midat Tohtarov ve bu dünyanı terk etken er kes içün dua etip, Allahnıñ rahmetinde olmalarını tiledi. QMDİ matbuat hızmeti [gallery link="file" columns="4" size="medium" ids="36068,36100,36098,36096,36094,36092,36090,36088,36086,36084,36082,36080,36078,36076,36074,36072,36070"]

Qırım Müftiligi Midat Tohtarovnıñ qorantasına taziyeler bildire

Опубликовано:

Dekabr 28 künü 2019 senesi Bağçasaray rayonınıñ Vilino köyü imamı Midat Tohtarov faniy dünyanı terk etti. Qırım Cumhuriyeti ve Sevastopol şeeri musulmanlarınıñ diniy idaresi Midat Tohtarovnıñ qorantası, tuvğanları ve yaqınlarına teren taziyeler bildire. Biz dostumız, qardaşımız, Allahnıñ razılığını qazanmaq içün çalışqan aydın musulmandan marum qaldıq. O, tek 35 yaşında edi. Onıñ ömür arqadaşı ve küçük balası qaldı. Biz Allahqa dua etip, Oña qaytqan cannı qabul etmege, oña öz merhametligini köstermege ve ebediy ayat eyilikleriniñ bağışlanmasını tileymiz. Tuvğanlarına ve yaqınlarına ise, baş sağlığı tileymiz. Allahtan keldik, qaytuvımız da Allahqadır. Allah onı bağışlasın, cennet bağçalarına kirsetsin! Amin! Allah rahmet eylesin! Cenaze namazı 29.12.2019 saat 13:00. Vilino köyünde, Kalinina soq.,6 adresi boyunca olacaq. QMDİ matbuat hızmeti

Kalga-Sultan devletniñ qoruvı astında!

Опубликовано:

Qırım Cumhuriyeti ve Sevastopol şeeri musulmanlarınıñ diniy idaresi büyük içtimaiy rezonansqa sebep olğan evelleri Qalga Sultan sarayı yerleşken topraqta qurucılıq işleriniñ alıp barılması meselesinen alâqadar olğanını bildire. Qırım Müftiligi şu qurucılıqnıñ toqtatılması içün kerekli işlevlerni yapqanını bildire. Mezkür topraq Aqmescit ş., Vorovskiy soqağında yerleşe. Bundan evel Qırım Müftiligi tarihiy mekânda yerleşken topraq damartası saibinen bir qaç kere körüşüvler keçirip, şu meselenen alâqadar nasıl areket etilecegini muzakere etti. Çünki alıp barılğan qurucılıq işleri Rusiye Federatsiyasınıñ medeniy mirasnı saqlav aqqındaki qanunğa ters kelip, mümkün degildir. Hatırlatamız ki, 2017 senesiniñ küzünde arheologik qazma işleri keçirildi. Olarğa binayen, topraq Qırım Cumhuriyetiniñ medeniy mirasnı saqlav boyunca devlet komiteti tarafından Arheologik abideler cedveline kirsetildi ve devlet tarafından imaye etile. Bundan sebep mezkür topraqta er angi bir qurucılıq işleriniñ keçirilüvi yasaqtır. Onıñ içün şeer akimiyeti mahkemege muracaat etti, mahkeme ise, öz nevbetinde, qurucılıq işlerini keçirmege yasaq etti. Qırım Müftiligi mezkür meseleniñ çezilmesi içün Qırım Cumhuriyetiniñ devlet akimiyeti organlarına muracaatlarını yolladı. Qırım Müftiligi işbu meseleniñ tamamen çezileceginden emindir, çünki şu topraqta çoqyıllıq davanıñ noqtasını qoyacaq büyük miqyaslı arheologik taqiqatlarnıñ keçirilüvi planlaştırıla. Qırımda farqlı din ve millet vekilleri yaşay. Evel-ezelden Qırımda yaşağan milletler barışıqlıq ve dostane munasebetler içinde yaşap keldi. Soñki beş yıl içinde Qırım Rusiye Federatsiyasınıñ terkibine kirip, daa bir kere bütün dünyağa barışıqlıq ve dostane munasebetlerniñ misalini kösterdi. İleride de aynı böyle olacağından eminmiz! Qayd: Qalga Sultan külliyesi Aqmescit şeerinde, Salğır özeni vadiysinde, künümizdeki Vorovskiy soqağında yerleşe edi. Bunı orta asırlar seyahatçısı Evliya Çelebiniñ yazıları, meşur "Oçerki Krıma" kitabınıñ müellifi Yevgeniy Markovnıñ qaydları, bundan da ğayrı, taqiqatçı Dübua de Monpereniñ işleri tasdıqlay. Atta, de Monpere öz tedqiqatlarına esaslanıp, Qalga Sultannıñ sarayı yerleşken yerni köstergen haritanı bile işlep çıqarğan edi (Dubois de Montpereux F. Voyage autour du Caucase, chez les Tcherkesses et les Abkhases, en Georgie, en Armenie, en Crimee: A 6 v.- Paris, 1843,-V, 6). QMDİ matbuat hızmeti

Qırım Müftiliginde 2019 senesiniñ neticeleri çıqarıldı (FOTO)

Опубликовано:

Qırım musulmanları diniy idaresinde diniy müessiseniñ bütün yönelişleri boyunca işniñ neticeleri çıqarıldı. Müftilikniñ esas missiyası – Qırımda İslâmnıñ ğayrıdan tiklenilüvi içün leyhalarnı ömürge keçirmek ve ealiniñ diniy-medeniy maarifi üzerinde çalışmaq. Qırım musulmanları diniy idaresiniñ esas vazifesi – musulmanlarnıñ diniy ihtiyaclarını yerine ketirmektir. Diniy teşkilâtlar işiniñ nezareti 2019 senesi 62 insan öz ihtisasını yükseltti. Hususan, 25 insan Kezlev şeerinde "Musulmanlarğa ruhiy destek birleşmesi"-niñ kurslarını keçti, 37 insan Tatarstan Cumhuriyetinde din hadimleri içün keçirilgen "Diniy teşkilâtnı idare etüvniñ nazariyesi ve ameliyatı", "Musulman yaşlarnı radikalizatsiyadan qorçalav içün profilaktik işniñ usuliyeti", "Rusiye cemiyetiniñ radikalizatsiyadan qorçalavınıñ vastası olaraq, Rusiye camilerinde İslâm medeniyetiniñ temelleri" zenaat yükseltilüvi kurslarını yekünledi. Bundan da ğayrı, 2019 senesi devamında Bölük 45 din cemiyetni resmiyleştirdi. 2019 senesi "Halq Medresesi" diniy maarif leyhası işini başladı. "Seit Settar" diniy külliyesi erkânında eki taqım toplandı, filiallar ise, öz nevbetinde, Qırımnıñ farqlı regionlarında açılacaq. Kursnı yekünlegen imamlar yaşağan yerlerinde, öz camilerinde işini devam ete. Bölük hadimleri daimiy sürette "Mir – dar Böjiy" ("Barışıqlıq – Tañrı ediyesidir)" Qırımnıñ dinlerara şurasınıñ oturışlarında, sport yarışlarında, hayriye aktsiyalarında, şeer ve cumhuriyet seviyesinde keçirilgen yarışlarda iştirak ete. [gallery link="file" columns="4" size="medium" ids="30835,33132,34813,34765,34608,31245,31237,34586"] Qurucılıq 2019 senesi Qırım Cumhuriyetiniñ aman-aman er bir rayonında camilerniñ qurucılığı devam etti. Hususan, Bağçasaray rayonınıñ Yancu, Acı Bulat köyleri, Saq rayonınıñ Yarkoye köyü, Qarasuvbazar rayonınıñ Litvinenkovo, Zelenogorskoye, Mejgorye köyleri, Aqmescit rayonınıñ Aktaçı Qıyat, Beloye-5, İvanovka, Fontanı-5, Lugovoye-2 köy ve qasabalarında, Qurman rayonınıñ Beşuy köyü, Aqşeyh rayonınıñ Berezovka köyü, Aqmeçit qasabasında yerleşken camilerniñ qurucılığı devam etti. Qırım musulmanları içün çoq qıymetli olğan inşaat – Aqmescitte Cuma caminiñ qurucılığıdır. 2019 senesiniñ soñunda qurucılar caminiñ içki ve tış donatıluvı, vitraj pencereleriniñ yapıluvı ve qoyuluvı, azbarnıñ abadanlaştırıluvı ve müendislik ağlarınıñ yerleştirilmesine keçtiler. 2019 senesi Qırımda bir qaç müim vaqia olıp keçti – bir qaç caminiñ temeli qoyuldı. Tantanalı tedbirler İslâm Terek rayonınıñ Baraq, Kefeniñ Nasipköy, Yedi Quyu rayonınıñ Körpe ve Aqyar civarındaki Baydar köyünde olıp keçti. Aqmescit civarındaki Levadki köyünde Qadir cami açıldı. Tamir işleri ve minareniñ qurulmasından soñ, Qırımnıñ paytahtında yerleşken Aqmeçit qasabasınıñ camisi kene musulmanlar içün açıldı. Buña ilâve olaraq, Yaltadaki Ay-Vasil, Bağçasaray civarındaki Yancu ve Qurman rayonınıñ Buzavçi köyüniñ camileri yanında minareler yükseldi. Qırım ve Sevastopol şeeri musulmanları diniy idaresi tarihiy diniy obyektlerniñ qaytarıluvı boyunca büyük iş yaptı. Hususan, Sudaq rayonınıñ Qapsihor köyünde, Zıncırlı medrese külliyesiniñ onlarnen obyekti, Bağçasaraydaki Orta Medrese ve Kezlevde yerleşken dürbe musulmanlarğa qaytarıldı. Qurucılıq ve topraq bölügi tarafından 37 diniy binanıñ topraq damartalarınıñ resmiyleştirilüvi içün büyük iş yapıldı, bundan da ğayrı, 13 diniy binanıñ vesiqaları resmiyleştirildi. [gallery link="file" columns="4" size="medium" ids="31112,31550,31554,31611,31689,31687,33501,33489,34558,34560,34568,34894,34900,34872,34949,31402,31386,31374,31362,31416,31390"] Diniy tasil 2019 senesi Qalay medresesinde diniy tasil standartları boyunca diniy maarif sisteması saasında islâatlarnıñ keçirilüvi devam etti. Al-ı azırda medresede 70-ke yaqın talebe oquy. 2019 senesi Rİİ-de (Tatarstan Cumhuriyeti, Kazan ş.) aliy diniy tasilni alğan mezunlar Qırım ve Sevastopol şeeri musulmanları diniy idaresinde çalışmağa başladılar. Mezunlar Aqmescit ve Bağçasaray rayonlarınıñ camilerinde diniy faaliyetni alıp baralar. 2019 senesi QMDİ Tasil bölügi tarafından apiste olğan musulmanlar içün mahsus kitaplar azırlandı. Qırım Cumhuriyeti ve Sevastopol şeeri federal icra hızmeti idaresi ile işbirlikte Aqmescit ve Keriç apishanelerinde maküm etilgen musulmanlar içün lektsiyalar ve seminarlar keçirile. Tasil leyhaları erkânında Qırım müendislik ve pedagogika universiteti, Aqmescit avtonaqliye tehnikumı ve Qırım cumhuriyet Diplomdan soñ pedagogik tasil institutında bir sıra lektsiyalar ve treningler ötkerilmekte. [gallery link="file" columns="4" size="medium" ids="29115,29113,29097,29089,29139,30658,30727,30779,30719,31000"] Halq maarifi Altı yıl devamında Qırım ve Sevastopol şeeri musulmanları diniy idaresi erkânında "Faydalı ilim" diniy maarif leyhası çalışa. Onlayn maarif da ep rağbet köre, hususan, "Birlikte rahmet" hayriye marafonı, "Qadınlarnıñ hususiy alları", "Menim ailem" kursları. "Faydalı ilim" leyhasınıñ mütehassısları içtimaiy ağlarda oqutuv kurslarını ve lektsiyalarnı keçire. Hususan, İnstagramm saifesinde "Faydalı ilim"niñ diñleyicilerniñ sayısı 10 500-ge yetti. "Faydalı ilim" leyhası çerçivesinde Qurannı tez ögrenüv kursları çalışa. Olar Ramazan ayı devamında faaliyet köstere. "Faydalı ilim" taqımı balalar arasında İslâm bilgileri boyunca "Altın nesil" bütünqırım yarışı, "Muhammmed - aleyhi selâm - insanlarnıñ eñ yücesidir" edebiy yarışı, "Yañı usul" eñ güzel usuliyet qullanması yarışı, "Hayrunnisa 2019", "Özüñni köster!" istidatlar yarışı ve diger tedbirlerni teşkil etmekte. Qırım MDİ erkânında "Emanet" bala yır studiyası meydanğa ketirildi, studiya iştirakçileri kontsert numayışları ile büyük tedbirlerde iştirak ete. [gallery link="file" columns="4" size="medium" ids="25862,27095,28111,28065,29984,30314,30324,31433,31439,31431,31332,31074"] Neşriyat faaliyeti 2019 senesi devamında Qırım Müftiligi maarif saasında leyhalarnı ömürge keçirmege devam etti. Gazetanıñ mündericesi zenginleşti. Bunı oquyıcılarnıñ müsbet seslenüvleri tasdıqlay. QMDİ tarafından neşir etilgen "İkmet çoqrağı" jurnalı oquyıcılar arasında çoq populârdır. Jurnal maqaleleri musulmanlarnıñ ömüriniñ büyük qısmını qavrap ala, hususan, içtimaiy, ruhiy, diniy maqaleler ve balalarğa ait malümatlar yerleştirile. 2019 senesi QMDİ qırımtatar ve rus tillerinde kitaplar, "İslâmda mezhepler", "40 hadis" kitapları, "Hizb’ut-tahrir misalinde destruktiv teşkilâtlarğa qarşı kontrargumentatsiya", "Hilye-i seadet ve Azret-i Muhammedniñ (s.a.v.) ahlâqı", "Efal-i mükellefin" broşüraları, bundan da ğayrı, İmsakiye, Namaz ögretici plakat, 2020 senesi namaz vaqıtları ile taqvim ve diger neşirler basıldı (bükletler, afişalar, hatırlatuv kitapçıqları. [gallery link="file" columns="4" size="medium" ids="24844,22545,24848,25066,25078,24679,17987,13557"] Kütleviy matbuat vastaları ile işbirlik 2019 senesi devamında Qırım ve Sevastopol şeeri musulmanları diniy idaresi Qırım, federal ve halqara seviyesinde çalışqan kütleviy matbuat vastaları ile faal işbirlik alıp bardı. Meselâ, Ramazan ayı devamında keçirilgen canlı yayınlar, "Millet" telekanalında er aftalıq radio- ve teleyayınlar, videokopürler ve videokonferentsiyalar, diniy mevzuda yayınlar. QMDİ din erbapları "Qırım könsensusı", "Saba", "Meraba, Ramazan", "Açıq laf" ve diger yayınlarda iştirak etti. 2019 senesiniñ noyabr ayında "Din subeti" yayını çıqmağa başladı. Programmanıñ alıp barıcısı – Qırım Müftisiniñ muavini Ayder İsmailov. "Alif-TV" federal diniy telekanalınen işbirlikte Qırım musulmanları aqqında süjetler çıqmaqta. Tış faaliyet 2019 senesi devamında QMDİ temsilcileri halqara konferentsiyalar ve forumlarda iştirak etti. Forumlar Moskva, Çeçenistan Cumhuriyeti, Qaraçay-Çerkessiyada, Tatarstan Cumhuriyeti ve Boşqortostan, Aqrusiye, Türkiye, Poloniyada olıp keçti. Qırım Müftisiniñ muavini Esadullah Bairov Qırım cemaat teşkilâtları ve cumhuriyetniñ milliy medeniy cemiyetleri erkânında Varşavada Avropada havfızlıq ve işbirlik teşkilâtı (OBSE) muşaveresi çerçivesinde keçirilgen "Qırımtatarlar – tünevin ve bugün" serlevalı tögerek masada iştirak etti. Bundan ğayrı, Qırım Müftisiniñ muavini Ayder İsmailov Minsk Cuma camisiniñ 420-yıllığı, Aqrusiye Musulman din cemiyetiniñ 25-yıllığı ve Aqrusiye Müftisi Ebu Bekir Şabanoviçniñ 80-yıllıq yubileyine bağışlanğan tantanalı tedbirlerde iştirak etti. [gallery link="file" columns="4" size="medium" ids="27552,28387,28391,28866,28854,28852,30042,30012,30140,30138,30136,30223,31043,31037,34908,35226,35232,35757,35765,35767"] Hayriye Qırım musulmanları diniy idaresi ağır hasta balalarnıñ tedaviylenüvi içün "Merhametlik" müddetsiz hayriye aktsiyasını devam ete. Büyük destekni Qırımnıñ musulman din cemiyetleri, metsenatlar, iş adamları ve sıradan vatandaşlar köstere. 2009 senesinden başlap, şimdiki zamanğa qadar aktsiya çerçivesinde 19.129.009 ruble toplanıldı. Paralarnıñ ekseriyeti ağır hasta balalarğa berildi. [gallery link="file" columns="4" size="medium" ids="30971,30951,30953,30967,30977"] Elâl sertifikatsiyası 2008 senesinden başlap Qırım ve Sevastopol şeeri musulmanları diniy idaresi erkânında "Elâl" sertifikatsiya ve standartizatsiya merkezi çalışa. 2019 senesi devamında Merkezniñ mütehassısları teftiş ile 14 yerge barıp keldi. "Elâl" sertifikatsiyası komissiyası işiniñ videoçekimi yapıldı. Böyleliknen, 2019 sene sertifikatlarını "Râba Krımskaya" APH "Drujba narodov" şirketi, kolbaslarnı işlep çıqarğan "Mevlid" şirketi, "Krımskiy sultan", "Şerbet" müessiseleri, "Halâl" Bağçasaray aşayt maddeleri", TD "Elsa Emiz", ayvan soymaqnen oğraşqan dört şirket devam ettirdiler. Bundan da ğayrı, sertifikatsiyadan keçken şirketler sırasına "Ariadna-Krım" turistik şirketi kirdi. "Ariadna-Krım" – Qırım Cumhuriyetinde bu saada çalışqan ilk şirkettir. Sertifikatnı Saqtan dondurma çıqarğan OOO "Krımskiye traditsii" şirketi de aldı. Qırım Cumhuriyetinde Qırım ve Sevastopol şeeri musulmanları diniy idaresiniñ "Elâl" sertifikatsiya ve standartizatsiya merkezi tarafından "Elâl" sertifikatını alğan bütün mahsulatlar Qırım MDİ mahsus tamğası ile çıqmaqta. [gallery link="file" columns="4" size="medium" ids="28730"] Diniy tedbirler Qırım MDİ diniy tedbirlerni keçire, hususan, Ramazan ayı devamında Aqmescitniñ merkeziy camisinde musulmanlar içün iftarlar ötkerile. Oraza bayramında muhtaclar ve çoq balalı qorantalar, Qartlar evi, balalar evleri, yanğız qalğanlar ve öksüzlerge aşayt mahsulatları ile Ramazan torbaları berile. Qurban bayramında ise imamlar, QMDİ ocaları, muhtac ve çoq balalı qorantalarğa qurban eti tarqatıla. Er yıl diniy bayramlar künlerinde Qırım Müftiligi Qırım Cumhuriyeti ve Sevastopol şeeriniñ ÜFSİNi ile birlikte Aqmescit ve Keriç şeeriniñ apishanelerinde bayram tedbirlerini teşkil ete. Diniy bayramlarnıñ sırasında eñ güzel müezzinni saylamaq maqsadınen  er yıl keçirilgen "Ezan sedası" yarışı da bar. "Mevlid", "Aşure" tedbirleri, Mirac ve Beraat mubarek gecelerinde camilerde diniy tedbirler olıp keçe. Qırım Müftisiniñ ÜFSİN ile işbirlik boyunca yardımcısı tarafından apishanelerde maküm etilgenler içün lektsiyalar keçirile. Şartlı müddet ile cezalanğanlar içün de lektsiya ötkerile. 2019 senesi Qırımda ilk sefer eñ güzel diniy binanıñ mimarı yarışı olıp keçti. Şartlar boyunca cami qurucılığında qırımtatar mimarcılıqnıñ elementleri olmalı edi. "Qırımda İslâm tarihı ve Qırım hanlarınıñ tarihı" V Bütünqırım yarışı Qırımnıñ üç umumtasil mektebinde olıp keçti: Canköy, Aqmescit ve Qurman rayonlarında. [gallery link="file" columns="4" size="medium" ids="28345,28341,32558,32554,32460,29465,29773,30494,30504,33257,33535,33537,33551,33549,33559,34471,34473,35969"] HACILIQ 2019 senesi AVN-Tur Qırım hacılıq operatorı hacılıqnı muvafaqiyetnen keçirdi. 975 hacığa hızmet kösterildi. Hacılıq operatorı Qırım Müftiligi ile birlikte hacılar içün oñaytlı şaraitni yaratmağa tırıştı. Buña oñaytlı öteller, yahşı logistika, tuvğan yemeklerge yaqın aşaytlar, Mekke ve Medineniñ muqaddes yerlerine transfer, tibbiy destek kirmekte. Bundan da ğayrı, bu sene hacılarnıñ bir taqımı içün qolaylaştırılğan marşrut quruldı: Aqmescit-Moskva-Cidde ve Cidde-Moskva-Aqmescit. Bundan evel Qırım Müftiligi Rusiye Hacılıq missiyasına regionnıñ kvotasını 600-den 1000 yerge qadar arttırmaq ricası ile resmiy mektüp yolladı. Hacılar iyül 26 kününden başlap yolğa çıqtı. Taqımlar 50-şer insandan ibaret edi, olarnıñ içine taqım reberleri ve tibbiyet hadimleri de kire edi. [gallery link="file" columns="4" size="medium" ids="31507,31505,31481,31459,32848,32846,32838,32824,32652,27235,27239,27237"] Planlar Qırım Müftiligi ağımdaki leyhalarnı, tasil sistemasını, tasil standartlarını mükemmelleştirmege, mütehassıslarnı azırlamağa, çalışqan imamlarnıñ ihtisasını yükseltmege planlaştıra. Qırım musulmanları diniy idaresiniñ baş vazifesi – musulmanlarğa diniy ihtiyaclarını yerine ketirmege yardım etmek, musulmanlar arasında sağlam müitni qurmaqtır, ayrı diqqat yaş nesilniñ doğru terbiyelenmesine ayırıla, çünki olar milletniñ sağlam keleceginiñ temelidir. QMDİ matbuat hızmeti

Qırım Müftiligi Qırımtatar tarihiy-medeniy mirası müzeyine Muhammed Peyğamberge (s.a.v.) bağışlanğan qadimiy şiirler cıyıntığını bağışladı (FOTO)

Опубликовано:

Qırım Müftisiniñ muavini Raim Ğafarov Qırımtatar tarihiy-medeniy mirası müzeyiniñ 20 yıllığına bağışlanğan tantanalı tedbirde ve "Qırımtatar müzeyi 20 yaşında. Tarih. Kollektsiyalar" sergisiniñ açıluvında iştirak etti. Raim Ğafarov müzey hadimlerini hayırlap, qırımtatar medeniyeti ve tarihiy qıymetleriniñ saqlanuvında yapqan büyük işleri içün teşekkürler bildirdi. O: "Keçmişsiz kelecegimiz de yoq. Degerlerimizni saqlağanıñız içün sağ oluñız. Bu – bizlerge de, kelecek nesillerimizge de kerek. Olar tamırlarını ögrensin, hatırlasın", – dep qayd etti. Müfti muavini Qırım musulmanları diniy idaresi adından müzeyge müellifi Mehmed Çelebi olğan Muhammed Peyğamberge (s.a.v.) bağışlanğan kitapnı ediye etti. Kitap 1908 senesi neşir etilgen edi. Tedbirniñ soñunda, o, dua oqudı ve müzeyge güllep inkişaf etmesini tiledi. Sergide ince işlemeleri ile ayrette qaldırğan qadimiy nağış örnekleri, quyumcılıq eserleri, baqır savutlar, urbalar, kiramet nümüneleri, muzıka aletleri, müzey fondundan arheologiya aletleri, fotovesiqalar taqdim etildi. QMDİ matbuat hızmeti [gallery link="file" columns="4" size="medium" ids="35995,35993,35991,35989,35987,35985,35983,35981,35979,35977,35975,35973,35971,35969,35967,35965,35963,35961,35959,35957,35955,35953,35951,35949,35947,35945,35943,35941,35939,35937,35935,35933,35931,35929,35927,35925,35923,35921,35919"]

“Sağlam start” balalıqtan başlana! (FOTO)

Опубликовано:

Qırım musulmanları diniy idaresinde "Faydalı ilim" leyhası çerçivesinde balalar meselelerine bağışlanğan "Sağlam start" adında büyük ruhiyat intensivi olıp keçti. İntensivni alıp barğanlar: neyroruhiyatçı, klinika ruhiyatçısı Selime Saidiy balanıñ doğğanından başlap, üç yaşına qadar miyiniñ inkişafı mevzusını açıqladı, inkişafnıñ qıyınlıqları ve balalarnıñ yaşına köre ruhiy buhranları mevzusına toqundı; QMDİ "Faydalı ilim" leyhasınıñ reberi, ilâhiyatçı, ruhiyatçı, psihoterapevt Zeyneb Bairova bala şahısınıñ şekillenüvinde ana ve babanıñ rolü aqqında tarif etti. İntensivde Qırımnıñ farqlı köşelerinden kelgen 40-tan ziyade qadın iştirak etti. Trening 6 saattan ziyade devam etti, iştirakçiler suallerine tolu cevaplarnı ala bildi. Teşkilâtçılarnıñ sözlerine köre, ileride de böyle bir sıra intensivniñ keçirilüvi planlaştırıla. QMDİ matbuat hızmeti [gallery link="file" columns="4" size="medium" ids="35783,35781,35779,35777,35775,35773"]

Büyük Onlar qasabasında Qırımda İslâm tarihı ve Qırım hanlığınıñ tarihı boyunca yarış keçirildi (FOTO)

Опубликовано:

Qurman rayonınıñ Büyük Onlar qasabasında Qurman, Aqmescit ve Canköy rayonından kelgen talebeler ve ocalar arasında "İslâm dünyasınıñ tarihı ve Qırım hanlarınıñ tarihı" boyunca yarış keçirildi. Yarış Qırım Müftisi hacı Emirali Ablayevniñ destegi ile keçirile. Onıñ maqsadı – talebelerniñ tarihiy añını saqlamaq ve şekillendirmek, olarnıñ intellektual derecesini yükseltmek ve medeniy-tarihiy mirasqa nisbeten ürmet aşlamaqtır. Yarışnıñ müellifi ve teşkilâtçısı – Reşat Osmanovdır. Yarış beşinci kere keçirile. Büyük Onlar qasabasınıñ mektebinde ötkerilgen yarışta 100 insan iştirak etti. Jüri terkibine Qırım Müftisiniñ muavini Raim Ğafarov, QMDİ diniy tedbirlerniñ teşkil etilüvi bölüginiñ reberi Zenife Ablayeva, Büyük Onlar qasabasınıñ baş imamı Emil Mustafayev, Büyük Onlar qasabasınıñ №1 gimnaziyanıñ müdiri Ruslan Zakiryayev, Qurman rayonınıñ tasil idaresiniñ reberi Yelena Movçan ve Qurman rayonınıñ usulşınası Mayre Suleymanova kirdiler. Raim Ğafarov yarış iştirakçilerini Qırım Müftisi adından selâmladı. O, teşkilâtçılar ve yarışnı teşkil etmege yardım etken er kesge teşekkürler bildirdi. Raim Ğafarov: "Bizde asırlar devamında şekillengen adetler bar ve olarnı biz yaş nesillerge yetiştirmek kerekmiz. Biz kendimizni ve biri-birimizni bilmelimiz. Böyle tedbirler ise, bizge bunı yapmağa yardım ete", – dedi. Yarış 4 testten ibaret oldı: 2 test İslâm tarihı, daa 2 test ise, Qırım hanlığınıñ tarihınen alâqalı edi. Vazifelerniñ neticesinde 10 eñ bilgili iştirakçı finalğa çıqtı ve birinci yer içün yarıştı. Böylece, ocalar arasında birincilikni Aqmescit rayonınıñ Dobroye köyü tarih ocası Ali Seytmemetov aldı. Talebeler arasında ise, Dobroye köyüniñ talebesi Edem Baybuyev ğalip çıqtı. Yarış ğaliplerine qıymetli bahşışlar berildi, yarışta faal iştirak etkenler de diqqatsız qalmadı, olarğa da ediyeler berildi. Teşkilâtçılar ileride de yarışnı keçirmege niyetlengenlerini bildirdi. QMDİ matbuat hızmeti [gallery link="file" columns="4" size="medium" ids="35743,35741,35739,35737,35735,35733,35731,35729,35727,35725,35723,35721,35719,35717,35715,35713,35711,35709,35707,35705,35703,35701,35699,35697,35695,35693,35691,35689,35687,35685,35683,35681,35679,35677,35675,35673,35671,35669,35667,35665,35663,35661,35659,35657,35655,35653,35651,35649,35647,35645,35643,35641,35639,35637,35635,35633,35631,35629,35627,35625,35623,35621,35619,35617,35615,35613,35611,35609,35607,35605,35603,35601,35599"]

Qırım ve Aqrusiye: tarihiy, medeniy ve diniy miras (FOTO)

Опубликовано:

Qırım Müftisiniñ muavini Ayder İsmailov "Aqrusiye musulmanlarınıñ medeniy-diniy mirası. Tarih saifeleri: saqlanıluvı ve ögrenilüvi" mevzusında tögerek masada iştirak etti. Tedbir Minsk şeeriniñ Cuma camisinde olıp keçti. Tedbirde alimler, ilâhiyatçılar, cemaat ve devlet teşkilâtlarınıñ vekilleri iştirak ettiler. Ayder İsmailov çıqışında caminiñ din erbaplarını hayırladı ve Aqrusiye musulmanları içün bu tedbirniñ ayrı diqqatqa malik olğanını qayd etti. Onıñ qayd etkenine köre, Aqrusiye ve Qırım musulmanları arasında diniy bağlardan ğayrı, tarihiy bağ da bar. Ayder İsmailov: "Altı yüz yıl evelsi qırımtatarlarnıñ bir qısımı zemaneviy Aqrusiye topraqlarına köçip ketti. Onıñ içün bizim qan bağımız ve umumiy tarihiy keçmişimiz bar. Aqrusiyede yaşağan tatarlarnen bizim bağımız hususiydir", – dep, bildirdi. O, qayd etti ki, zemaneviy Aqrusiyeniñ musulman cemiyeti Tavriya musulman idaresi erkânında bulunğan edi, 1917 senesi Qırımtatar halqınıñ I qurultayı Noman Çelebicihannı Qırım, Lehistan, Litvaniya ve Aqrusiye musulmanlarınıñ Müftisi olaraq sayladı. Bundan da ğayrı, Ayder İsmailov Aqrusiye musulmanlarını Minsk Cuma camisiniñ 420-yıllığı ve Aqrusiye musulmanları diniy idaresiniñ 25-yıllığınen hayırladı. Buña ilâve olaraq, o, Qırım musulmanları diniy idaresiniñ ileride de diger cumhuriyetler ve devletlernen munasebetlerini inkişaf ettirmek niyetinde olğanını qayd etti. Tögerek masanıñ oturışı Minsk Cuma camisiniñ 420-yıllığı ve Aqrusiye Cumhuriyetinde Musulman diniy birleşmesiniñ 25-yıllığına bağışlanğan tantanalı tedbirler çerçivesinde olıp keçti. Tedbirde Aqrusiyeniñ farqlı din cemiyetleri, devlet teşkilâtları, diplomatlar, Rusiye Federatsiyasınıñ farqlı regionlarından kelgen musafirler iştirak ettiler. Oturış çerçivesinde Ayder İsmailov Ebu Bekir Şabanoviçni yubileyinen hayırladı ve Qırım Müftisi hacı Emirali Ablayevniñ adından bahşış olaraq Minsk Cuma camisiniñ resimini bağışladı. Ayder İsmailov Ebu Bekir Şabanoviçke qaviy sağlıq, barışıqlıq içün, cemiyet, dinimiz ve İslâm adına semereli çalışmalar tiledi. QMDİ matbuat hızmeti   [gallery link="file" columns="4" size="medium" ids="35769,35767,35765,35763,35761,35759,35757,35755,35753,35751,35749"]

Ayder İsmailov: “Minsk Cuma camisindeki İslâm müzeyi – Aqrusiyeniñ qıymetidir” (FOTO)

Опубликовано:

Qırım Müftisiniñ muavini Ayder İsmailov Minsk Cuma camisi binasında yerleşken İslâm müzeyiniñ tantanalı açıluvı merasiminde iştirak etti. Müzeyniñ sergisine Aqrusiyede ve devlet tışında toplanğan eserler kirdi. Olarğa baqıp, Aqrusiye topraqlarında İslâmnıñ altı asırdan ziyadesine uzanğan tarihını ögrenmek mümkün. Müzey ekspozitsiyasında Aqrusiye musulmanlarına ait bir qaç yüzyıllıq Quranlarnı ve diger kitaplarnı körmek mümkün. Mında arap urufatında ilk basılğan qadimiy kitaplar, elyazmalar bar. Ziyaretçilerge tatar asılzade sülâleleriniñ tamğaları, artıq bozulıp, ğayıp olğan eski ağaç camileriniñ resimlerinen ve turmuş aletlerinen tanış olmaq mümkün. Müzeyniñ açıluvına unikal eşyalar ketirildi. Mahsus reysnen Dağıstandan Minskke Muhammed Peyğamber (s.a.v.) ve onıñ yaqınlarına ait eşyalar ketirildi. Olarnıñ arasında – Peyğamberniñ kasası, qızı Fatimeniñ gügümi, Kâbeniñ anahtarı, Kâbedeki Qara taşnıñ parçaçığı v.s. Ayder İsmailovnıñ qayd etkenine köre, musulmanlarnıñ degerli eşyalarnı körmek imkânları oldı, olar musulmanlar içün çoq qıymetlidir. Bundan da ğayrı, o, Aqrusiye Müftisi Ebu Bekir Şabanoviçni müzeyniñ açıluvınen hayırlap, müzeyniñ eksponatlarnen zenginleşmesini ve Aqrusiye tatar musulmanları içün aziz bir olmasını tiledi. İslâm müzeyiniñ açıluvı Minsk Cuma camisiniñ 420-yıllığı ve Aqrusiye Cumhuriyetinde Musulman diniy birleşmesiniñ 25-yıllığına bağışlanıp keçirilgen tantanalı merasimler çerçivesinde olıp keçti. Tedbirde Aqrusiye farqlı dinlerniñ, devlet teşkilâtlarınıñ vekilleri, diplomatlar, Rusiye Federatsiyasınıñ farqlı regionlarından kelgen musafirler iştirak ettiler. QMDİ matbuat hızmeti

Aq-Meçit camisi tamir işlerinden soñ açıldı (FOTO)

Опубликовано:

2019 senesi dekabr 6 künü Aqmescitte Aq-Meçit qasabasında temelli tamirat işleri bitkenden soñ, tantanalı cami açılışı olıp keçti. Cami 2006 senesi quruldı, qurucılıq 8 yıl devam etti. 2018 senesiniñ yazında yerli sakinlerniñ teşebbüsi ile caminiñ yanında minare quruldı. O zaman camige gaznı keçirmek qararı alındı, çünki suvuq mevsimlerde caminiñ içi +2 derecege qadar suvuy edi. 2019 senesiniñ yazında, Oraza bayramından soñ, cami temelli tamir işleri içün qapatıldı ve qurucılar işke başladı. "Sıcaq taban" qızdıruv sistemasını yerleştirmeknen beraber caminiñ iç donatıluvını ve kilimlerni deñiştirmege qarar alındı. Bütün işler yerli sakinler ve hayırsever iş adamlarınıñ sadaqalarınen yapıldı. Tamir işleri devamında cemaat namazı cami yanındaki sport zalında keçirilgen edi. Aq-Meçit camisiniñ tantanalı açıluvı merasiminde Qırım Müftisiniñ muavini Raim Ğafarov iştirak etti. O, Qırım Müftisi hacı Emirali Ablayev adından qasabanıñ sakinlerini caminiñ yañartılmasınen hayırladı ve bu güzel işte faal iştirak etkenleri içün olarğa teşekkürler bildirdi. Raim Ğafarov: "Biri maddiy taraftan, biri işnen, bazıları maneviy ceetten destek kösterdi. Bu hayır işte Aq-Meçit qasabasınıñ bütün sakinleri iştirak etti. Birlikte biz böyle güzellikni yaptıq, bu bizim vatandaşlarımız içün bir nümüne olsun". Caminiñ açıluvı merasimine toplanğan musulmanlar cuma namazını qıldı. Teşkilâtçılar musafirler içün ziyafet sofrasını azırladı. QMDİ matbuat hızmeti [gallery link="file" columns="4" size="medium" ids="35552,35590,35588,35586,35584,35582,35580,35578,35576,35574,35572,35570,35568,35566,35564,35562,35560,35558,35556,35554"]