Haberler - Page 6 of 54 - ЦРО ДУМКЦРО ДУМК | Страница 6

Суббота

30

мая

7
Шевваль
1441 | 2020
Утр.3:00
Вос.4:51
Обед.12:46
Пол.16:48
Веч.20:31
Ноч.22:21
Времена намазов
Календари 2020г

Намаз

Haberler - Page 6 of 54 - ЦРО ДУМК

Büyük Onlar qasabasında Qırımda İslâm tarihı ve Qırım hanlığınıñ tarihı boyunca yarış keçirildi (FOTO)

Опубликовано:

Qurman rayonınıñ Büyük Onlar qasabasında Qurman, Aqmescit ve Canköy rayonından kelgen talebeler ve ocalar arasında "İslâm dünyasınıñ tarihı ve Qırım hanlarınıñ tarihı" boyunca yarış keçirildi. Yarış Qırım Müftisi hacı Emirali Ablayevniñ destegi ile keçirile. Onıñ maqsadı – talebelerniñ tarihiy añını saqlamaq ve şekillendirmek, olarnıñ intellektual derecesini yükseltmek ve medeniy-tarihiy mirasqa nisbeten ürmet aşlamaqtır. Yarışnıñ müellifi ve teşkilâtçısı – Reşat Osmanovdır. Yarış beşinci kere keçirile. Büyük Onlar qasabasınıñ mektebinde ötkerilgen yarışta 100 insan iştirak etti. Jüri terkibine Qırım Müftisiniñ muavini Raim Ğafarov, QMDİ diniy tedbirlerniñ teşkil etilüvi bölüginiñ reberi Zenife Ablayeva, Büyük Onlar qasabasınıñ baş imamı Emil Mustafayev, Büyük Onlar qasabasınıñ №1 gimnaziyanıñ müdiri Ruslan Zakiryayev, Qurman rayonınıñ tasil idaresiniñ reberi Yelena Movçan ve Qurman rayonınıñ usulşınası Mayre Suleymanova kirdiler. Raim Ğafarov yarış iştirakçilerini Qırım Müftisi adından selâmladı. O, teşkilâtçılar ve yarışnı teşkil etmege yardım etken er kesge teşekkürler bildirdi. Raim Ğafarov: "Bizde asırlar devamında şekillengen adetler bar ve olarnı biz yaş nesillerge yetiştirmek kerekmiz. Biz kendimizni ve biri-birimizni bilmelimiz. Böyle tedbirler ise, bizge bunı yapmağa yardım ete", – dedi. Yarış 4 testten ibaret oldı: 2 test İslâm tarihı, daa 2 test ise, Qırım hanlığınıñ tarihınen alâqalı edi. Vazifelerniñ neticesinde 10 eñ bilgili iştirakçı finalğa çıqtı ve birinci yer içün yarıştı. Böylece, ocalar arasında birincilikni Aqmescit rayonınıñ Dobroye köyü tarih ocası Ali Seytmemetov aldı. Talebeler arasında ise, Dobroye köyüniñ talebesi Edem Baybuyev ğalip çıqtı. Yarış ğaliplerine qıymetli bahşışlar berildi, yarışta faal iştirak etkenler de diqqatsız qalmadı, olarğa da ediyeler berildi. Teşkilâtçılar ileride de yarışnı keçirmege niyetlengenlerini bildirdi. QMDİ matbuat hızmeti [gallery link="file" columns="4" size="medium" ids="35743,35741,35739,35737,35735,35733,35731,35729,35727,35725,35723,35721,35719,35717,35715,35713,35711,35709,35707,35705,35703,35701,35699,35697,35695,35693,35691,35689,35687,35685,35683,35681,35679,35677,35675,35673,35671,35669,35667,35665,35663,35661,35659,35657,35655,35653,35651,35649,35647,35645,35643,35641,35639,35637,35635,35633,35631,35629,35627,35625,35623,35621,35619,35617,35615,35613,35611,35609,35607,35605,35603,35601,35599"]

Qırım ve Aqrusiye: tarihiy, medeniy ve diniy miras (FOTO)

Опубликовано:

Qırım Müftisiniñ muavini Ayder İsmailov "Aqrusiye musulmanlarınıñ medeniy-diniy mirası. Tarih saifeleri: saqlanıluvı ve ögrenilüvi" mevzusında tögerek masada iştirak etti. Tedbir Minsk şeeriniñ Cuma camisinde olıp keçti. Tedbirde alimler, ilâhiyatçılar, cemaat ve devlet teşkilâtlarınıñ vekilleri iştirak ettiler. Ayder İsmailov çıqışında caminiñ din erbaplarını hayırladı ve Aqrusiye musulmanları içün bu tedbirniñ ayrı diqqatqa malik olğanını qayd etti. Onıñ qayd etkenine köre, Aqrusiye ve Qırım musulmanları arasında diniy bağlardan ğayrı, tarihiy bağ da bar. Ayder İsmailov: "Altı yüz yıl evelsi qırımtatarlarnıñ bir qısımı zemaneviy Aqrusiye topraqlarına köçip ketti. Onıñ içün bizim qan bağımız ve umumiy tarihiy keçmişimiz bar. Aqrusiyede yaşağan tatarlarnen bizim bağımız hususiydir", – dep, bildirdi. O, qayd etti ki, zemaneviy Aqrusiyeniñ musulman cemiyeti Tavriya musulman idaresi erkânında bulunğan edi, 1917 senesi Qırımtatar halqınıñ I qurultayı Noman Çelebicihannı Qırım, Lehistan, Litvaniya ve Aqrusiye musulmanlarınıñ Müftisi olaraq sayladı. Bundan da ğayrı, Ayder İsmailov Aqrusiye musulmanlarını Minsk Cuma camisiniñ 420-yıllığı ve Aqrusiye musulmanları diniy idaresiniñ 25-yıllığınen hayırladı. Buña ilâve olaraq, o, Qırım musulmanları diniy idaresiniñ ileride de diger cumhuriyetler ve devletlernen munasebetlerini inkişaf ettirmek niyetinde olğanını qayd etti. Tögerek masanıñ oturışı Minsk Cuma camisiniñ 420-yıllığı ve Aqrusiye Cumhuriyetinde Musulman diniy birleşmesiniñ 25-yıllığına bağışlanğan tantanalı tedbirler çerçivesinde olıp keçti. Tedbirde Aqrusiyeniñ farqlı din cemiyetleri, devlet teşkilâtları, diplomatlar, Rusiye Federatsiyasınıñ farqlı regionlarından kelgen musafirler iştirak ettiler. Oturış çerçivesinde Ayder İsmailov Ebu Bekir Şabanoviçni yubileyinen hayırladı ve Qırım Müftisi hacı Emirali Ablayevniñ adından bahşış olaraq Minsk Cuma camisiniñ resimini bağışladı. Ayder İsmailov Ebu Bekir Şabanoviçke qaviy sağlıq, barışıqlıq içün, cemiyet, dinimiz ve İslâm adına semereli çalışmalar tiledi. QMDİ matbuat hızmeti   [gallery link="file" columns="4" size="medium" ids="35769,35767,35765,35763,35761,35759,35757,35755,35753,35751,35749"]

Ayder İsmailov: “Minsk Cuma camisindeki İslâm müzeyi – Aqrusiyeniñ qıymetidir” (FOTO)

Опубликовано:

Qırım Müftisiniñ muavini Ayder İsmailov Minsk Cuma camisi binasında yerleşken İslâm müzeyiniñ tantanalı açıluvı merasiminde iştirak etti. Müzeyniñ sergisine Aqrusiyede ve devlet tışında toplanğan eserler kirdi. Olarğa baqıp, Aqrusiye topraqlarında İslâmnıñ altı asırdan ziyadesine uzanğan tarihını ögrenmek mümkün. Müzey ekspozitsiyasında Aqrusiye musulmanlarına ait bir qaç yüzyıllıq Quranlarnı ve diger kitaplarnı körmek mümkün. Mında arap urufatında ilk basılğan qadimiy kitaplar, elyazmalar bar. Ziyaretçilerge tatar asılzade sülâleleriniñ tamğaları, artıq bozulıp, ğayıp olğan eski ağaç camileriniñ resimlerinen ve turmuş aletlerinen tanış olmaq mümkün. Müzeyniñ açıluvına unikal eşyalar ketirildi. Mahsus reysnen Dağıstandan Minskke Muhammed Peyğamber (s.a.v.) ve onıñ yaqınlarına ait eşyalar ketirildi. Olarnıñ arasında – Peyğamberniñ kasası, qızı Fatimeniñ gügümi, Kâbeniñ anahtarı, Kâbedeki Qara taşnıñ parçaçığı v.s. Ayder İsmailovnıñ qayd etkenine köre, musulmanlarnıñ degerli eşyalarnı körmek imkânları oldı, olar musulmanlar içün çoq qıymetlidir. Bundan da ğayrı, o, Aqrusiye Müftisi Ebu Bekir Şabanoviçni müzeyniñ açıluvınen hayırlap, müzeyniñ eksponatlarnen zenginleşmesini ve Aqrusiye tatar musulmanları içün aziz bir olmasını tiledi. İslâm müzeyiniñ açıluvı Minsk Cuma camisiniñ 420-yıllığı ve Aqrusiye Cumhuriyetinde Musulman diniy birleşmesiniñ 25-yıllığına bağışlanıp keçirilgen tantanalı merasimler çerçivesinde olıp keçti. Tedbirde Aqrusiye farqlı dinlerniñ, devlet teşkilâtlarınıñ vekilleri, diplomatlar, Rusiye Federatsiyasınıñ farqlı regionlarından kelgen musafirler iştirak ettiler. QMDİ matbuat hızmeti

Aq-Meçit camisi tamir işlerinden soñ açıldı (FOTO)

Опубликовано:

2019 senesi dekabr 6 künü Aqmescitte Aq-Meçit qasabasında temelli tamirat işleri bitkenden soñ, tantanalı cami açılışı olıp keçti. Cami 2006 senesi quruldı, qurucılıq 8 yıl devam etti. 2018 senesiniñ yazında yerli sakinlerniñ teşebbüsi ile caminiñ yanında minare quruldı. O zaman camige gaznı keçirmek qararı alındı, çünki suvuq mevsimlerde caminiñ içi +2 derecege qadar suvuy edi. 2019 senesiniñ yazında, Oraza bayramından soñ, cami temelli tamir işleri içün qapatıldı ve qurucılar işke başladı. "Sıcaq taban" qızdıruv sistemasını yerleştirmeknen beraber caminiñ iç donatıluvını ve kilimlerni deñiştirmege qarar alındı. Bütün işler yerli sakinler ve hayırsever iş adamlarınıñ sadaqalarınen yapıldı. Tamir işleri devamında cemaat namazı cami yanındaki sport zalında keçirilgen edi. Aq-Meçit camisiniñ tantanalı açıluvı merasiminde Qırım Müftisiniñ muavini Raim Ğafarov iştirak etti. O, Qırım Müftisi hacı Emirali Ablayev adından qasabanıñ sakinlerini caminiñ yañartılmasınen hayırladı ve bu güzel işte faal iştirak etkenleri içün olarğa teşekkürler bildirdi. Raim Ğafarov: "Biri maddiy taraftan, biri işnen, bazıları maneviy ceetten destek kösterdi. Bu hayır işte Aq-Meçit qasabasınıñ bütün sakinleri iştirak etti. Birlikte biz böyle güzellikni yaptıq, bu bizim vatandaşlarımız içün bir nümüne olsun". Caminiñ açıluvı merasimine toplanğan musulmanlar cuma namazını qıldı. Teşkilâtçılar musafirler içün ziyafet sofrasını azırladı. QMDİ matbuat hızmeti [gallery link="file" columns="4" size="medium" ids="35552,35590,35588,35586,35584,35582,35580,35578,35576,35574,35572,35570,35568,35566,35564,35562,35560,35558,35556,35554"]

Balalar – Allahnıñ emanetidir! (FOTO)

Опубликовано:

2019 senesi, dekabr 3 künü Halqara saqatlar künü çerçivesinde Qırım Müftiligi bala müessiselerinde bir sıra hayriye tedbirlerini keçirdi. QMDİ hadimleri Aqmescitteki Beden ve aqıl sağlıqları sıñırlı balalar ve ösmürler boyunca içtimaiy reabilitatsiya bölügini ziyaret ettiler ve balalarğa "Fındıq" şarq tatlıları tükânından tatlılar taqdim ettiler. Qırım Müftisi ve Qırım musulmanları diniy idaresinden sağlıq, bereket, küç ve kelecekke işanç kibi sıcaq tilekler ayttılar. Beden ve aqıl sağlıqları sıñırlı balalar ve ösmürler boyunca içtimaiy reabilitatsiya bölügininiñ reberi İnna Sviridova Qırım Müftiligine teşekkürler bildirdi ve şu eki müessise arasında işbirlik çoqtan dostluq munasebetlerine çevirilgenini qayd etti. Nevbetteki tedbir №53 "Rusaloçka" adındaki qarışıq usul tipli bala bağçasında olıp keçti. Mında bulunğan balalarnıñ kiçik gruppasına televizor-smart ve "Fındıq" tükânından tatlı ediyeler berildi. Bala bağçasınıñ İrina Balaker yolbaşçılığındaki tibbiy-pedagogik taqımı ve balalar musafirlerge samimiy teşekkürler bildirdiler. "Yoloçka" balalar evine Qırım musulmanları diniy idaresi tarafından pirniç, şeker, kürpeler, bala yemekleri ve diger aşaytlar yollanıldı. "Yoloçka"nıñ müdiri Aleksandr Vasükov ayırılğan diqqat içün Qırım Müftiligine teşekkürler bildirdi. Qırım Müftiligi çoq yıllar devamında mektepten aldın ve mahsus müessiselerde hayriye aktsiyalarını keçire. Bundan da ğayrı, 2019 senesinden başlap, "Merhametlik" aktsiyası deyeyevam ete. Aktsiya çerçivesinde ağır hastalarğa para toplanıla. Sadaqalar bütün Qırım camilerinde ve qırımtatarlar toplu yaşağan yerlerde yerleşken alış-veriş noqtalarında, büyük merasimlerde ve diniy bayramlarda toplanıla. Büyük destekni Qırımnıñ musulman din cemiyetleri, iş adamları ve sıradan vatandaşlar köstere. 2009 senesinden başlap, bugünki künge qadar aktsiya çerçivesinde 19.129.009 ruble toplanıldı. Paralarnıñ büyük qısımı hasta balalarnıñ tedaviylenüvine berildi. QMDİ matbuat hızmeti [gallery link="file" columns="4" size="medium" ids="35415,35417,35455,35453,35451,35449,35447,35445,35443,35441,35439,35437,35435,35433,35431,35429,35427,35425,35423,35421,35419"]  

Aqmescitte balalar Muhammed Peyğamberniñ (s.a.v.) ömüri aqqında tarif etti (FOTO)

Опубликовано:

Aqmescitte Qırım ve Sevastopol şeeri musulmanları diniy idaresiniñ "Faydalı ilim" medeniy-maarif merkezinde hadisler ve Siyer (Muhammed Peyğamberniñ (s.a.v.) ömüri) boyunca bilgi yarışı olıp keçti. Yarışta 8-12 yaşı arasında 18 bala iştirak etti. Yarış şartları boyunca iştirakçiler hadislerni ezberden aytıp, olarnıñ manasını añlattı ve Muhammed Peyğamberniñ (s.a.v.) ömüri boyunca bilgilerini kösterdi. Yarışnıñ neticesinde jüri azaları ğaliplerni belgiledi. Böyleliknen, birinci yerni Alim İbragimov qazandı, ekinci yerde – Hatice Osmanova, üçünci yerni ise, Emir Memetov aldı. Bütün ğalipler bahşışlarnı aldı, yarış iştirakçileri de taqdirlendi. QMDİ matbuat hızmeti [gallery link="file" columns="4" size="medium" ids="35354,35352,35350,35348,35346,35344,35342,35340,35338,35336,35334"]

Qırım Müftiligi 2020 senesi içün musulman taqvimini çıqardı (FOTO)

Опубликовано:

Qırım Müftiligi 2020 senesi içün musulman taqvimini çıqardı. Taqvimge musulmanlarnıñ diniy bayramları ve diniy kün ile geceler, er bir ay içün namaz vaqıtları kirsetildi. Taqvimni "Terciman" kitap evinde: Aqmescit şeeri, Sevastopolskaya soq, 44 ve Qırım musulmanları diniy idaresinde Aqmescit şeeri, Kurçatov soq., 4 unvanları boyunca satın almaq mümkün. QMDİ matbuat hızmeti [gallery link="file" columns="4" size="medium" ids="35378"]

Aqmescitte elifbe bayramı olıp keçti! (FOTO)

Опубликовано:

Aqmescitte Qırım ve Sevastopol şeeri musulmanları diniy idaresiniñ "Yañı baar" leyhası çerçivesinde arap elifbesini ögrengen balalar içün tantanalı bayram olıp keçti. 3-6 yaşındaki balalar üç ay devamında arap elifbesini ögrendi ve dualarnı ezberledi. Bayramğa balalar şiirler, ilâhiyler, diniy mevzuda numayışnı azırladı ve, böylece, alğan bilgilerini kösterdiler. Hususan, evge kirgende, evden çıqqanda ve uyanğanda oqulğan dualarnı ezberden aytıp berdiler. Bütün balalar yüksek bilgi derecesini kösterip, ocalar ve ana-babalarnı quvandırdılar. Er biri "Elifbe alimi" medalinen taqdirlendi. Bundan da ğayrı, ingliz tili dramatik tögerekke qatnağan balalar reberlerinen birlikte ingliz tilinde "Sarı turupçıq" (Turnip) numayışını kösterdiler. Bayramnıñ soñunda ana-babalar arasında qura çekilip, qısmetli olğanğa leyhanıñ baş bahşışı dört yıl evelsi işlenip çıqarılğan "Yañı baar" logotipli saat taqdim etildi. Qırım Müftisi hacı Emirali Ablayevniñ adından balalar ve ana-babalarını Qırım Müftisiniñ muavini Esadullah Bairov hayırladı. Onıñ qayd etkenine köre, maneviy qıymetler, dinge ve tuvğan tilge sevgi, ana-babalarğa ürmet balalıqtan aşlana, ve bugün bu balalarnıñ ana-babaları evlâtlarınıñ kelecegi içün raat ola bile. Merasim devamında Rebiu’l-evel – Muhammed Peyğamberniñ doğğan ayına ve kününe bağışlanğan eserler taqdim etildi. Balalar Peyğamberge ait çizgiler – doğrulığı, ayalı olması, cümertligi, özüni nasıl alıp barğanı, tış qıyafeti, neni sevgeni, balalarğa nisbeten özüni nasıl alıp barğanı aqqında tarif etti. Tedbirniñ soñunda balalar salâvatlar ketirdi, ve, er bir anağa bahşış olaraq, Peyğamber çoq sevgen çiçekleri – güller ediye etildi. Balalar içün teşkilâtçılar tatlı sofra donattılar. QMDİ matbuat hızmeti [gallery link="file" columns="4" size="medium" ids="35374,35372,35370,35368,35366,35364,35362,35360,35358"]

Qırım Müftiliginde medrese ocaları ile toplaşuv keçirildi (FOTO)

Опубликовано:

Toplaşuv devamında iştirakçiler oquv yılınıñ birinci çeriginiñ neticelerini çıqardı, ekinci oquv çerigine oquv-terbiyeviy planını belgiledi ve medreseniñ işinde teşkiliy suallerni muzakere etti. Qırım Müftisiniñ muavini Ayder İsmailov oquv ceryanı devamında talebelerge nezaretni küçlendirmek kerek olğanını bildirdi ve: "Medrese ocaları ve terbiyecileri ögünde, eñ güzel derecesine yetmek ve ocalıq faaliyetini effektiv alıp barmaq maqsadı turmaqta. Bunı yapmaq içün belgilengen programma boyunca çalışmaq kerek. Maqsadımız – imamlarımıznıñ, diniy bilgilerden ğayrı, yüksek medeniyet ve doğru terbiye saipleri olmasıdır", – dep, qayd etti. Hacı İhsan adına İslâm ilimleri Qalay medresesinde tasil ve terbiye ceryanı içün kerekli şarait mevcut, talebeler İslâm dini ile bağlı ilimlerni ögrene ve mektep programmasını keçe. QMDİ matbuat hızmeti

Nalçikte lâyıq devlet şaraitlerinde İslâm uquqiy medeniyetiniñ perspektivaları muzakere etildi (FOTO)

Опубликовано:

Nalçikte "Zemane Rusiyede İslâm uquq medeniyeti: vaziyeti ve perspektivaları" halqara ilmiy-ameliy konferentsiya olıp keçti. Tedbir KBC MDİ ve İslâm medeniyeti, ilimi ve tasili fondunıñ desteginen teşkil olundı. Forumda merkeziy diniy teşkilâtlarnıñ temsilcileri, devlet organlarınıñ vekilleri, ekspertler, diniy ve cemaat erbapları, Orta Asiya devletlerinden kelgen müftiler, Turkiye Diyaneti idaresiniñ vekilleri, Küveyt devletiniñ Din ve vaquflar nazirligi ve digerleri iştirak ettiler. Qırım ve Sevastopol şeeri musulmanları diniy idaresini Qırım Müftisiniñ yardımcısı, Aqmescitniñ baş imamı Muhammed İslamov temsil etti. Onıñ sözlerine köre, mezkür meseleniñ muzakere etilüvi Rusiyede İslâm uquqınıñ farqlı taraflarını, RF vatandaşlıq uquqınıñ işbirligini qonuşmaq içün çıqarıldı. Bu, yaşlarnıñ terbiyelevi vaziyetini eyileştirmege yardım etecek. Muhammed İslamov: "Zemaneviy yaşlarğa olar öz milletini ve İslâm ümmetini temsil etkenlerini añlatmaq kerek. Yaşlarğa baqıp, millet ve İslâm aqqında fikirler şekillenecek. Onıñ içün bizim maqsadımız – yaşlarğa ananeviy qıymetlerni aşlamaq, olarnı doğru medeniy ananeler ile terbiyelemek ve maneviy qıymetlerni aşlamaqtır. İlk evelâ ana-babalarnen, musulmanlarnen munasebetler, musulman ve ğayr-ı müslim cemiyetlernen munasebetlerde adalet olmalı. Devlet ve cemaat strukturalarnen işbirlikniñ cemiyetimizniñ inkişafında büyük emiyeti bar", – dep, qayd etti. Konferentsiyanıñ neticelerine köre, iştirakçiler lâyıq devlet şaraitinde İslâm medeniyeti añlamını añlatqan rezolütsiyanı birdemlik ile qabul ettiler. Vesiqağa binayen, diniy teşkilâtlar devlet organlarınıñ faaliyetine qarışmamaq ve olarnıñ vazifeleri ve mesülietini almamaq kerek. Böyle iş bozuluvınıñ misali olaraq 2018 senesi İnguşetiya Cumhuriyetiniñ icra ve qanun çıqarıcı organlarınıñ faaliyetine qarşılıq olaraq İnguşetiyada şeriat mahkemesiniñ oturışları ketirildi. Rezolütsiyada böyle aytıla: "Böyle faaliyet Rusiye Federatsiyası Anayasasınıñ bozuluvıdır, çoq milletli ve çoq dinli devletniñ inkişafına zıt kelmekte". QMDİ matbuat hızmeti [gallery link="file" columns="4" size="medium" ids="35238,35236,35234,35232,35230,35228,35226,35224"]

“Hidayet” ve “İkmet çoqrağı” neşirlerine abune oluv kampaniyası başlandı

Опубликовано:

"Hidayet" gazetasında – Qırım musulmanlarınıñ ömüri aqqında aktual malümat, QMDİ ocaları, İslâm uquqı ve İslâm maarifiniñ mütehassısları tarafından azırlanğan diniy bilgiler, ocalar ve ruhiyatçılarnıñ analitik maqaleleri basılmaqta. "Hidayet" gazetasınıñ saifelerinde oquyıcılar İslâm noqta-i nazarından sağlıq aqqında malümatnı, bala masalları, qadınlar içün tevsiyeler, qırımtatar sözleri luğatı, musulman taqvimi ve namaz vaqıtı cedvelini tapa bileler. Bundan da ğayrı, gazetada farqlı yarışlar keçirile ve oquyıcılarnıñ suallerine cevap berile. "Hidayet" — musulmanlar ve İslâmnen meraqlanğanlar içün basılıp, ayda bir kere çıqa. Yazıluv indeksi: 21743. Yılğa yazıluvnıñ fiyatı – 156 rub. "İkmet çoqrağı" ("İstoçnik mudrosti") jurnalı keñiş oquyıcı dairesi içün çıqa. Mecmuada diniy bilgiler, tarihiy malümatlar, ruhiyat, felsefe, qoranta ve bala terbiyesi aqqında maqalelerni oqumaq mümkün. "İkmet çoqrağı" mecmuası eki ayda bir, yılda 6 kere çıqa. Poçta kataloglarındaki indeksi: 68363. Yazıluv fiyatı: 6 ayğa (3 sanı) — 192 rub. 12 ayğa (6 sanı) – 390 rub. Yazıluv aktsiyası dekabr 20 kününe qadar devam etecek. QMDİ matbuat hızmeti

Yarış devam ete (FOTO)

Опубликовано:

Aqmescit rayonınıñ Molodöjnoye qasabasında, Bütün Qırım boyunca ötkerilgen "Kırımda İslâm dini tarihı. Qırım hanlarınıñ tarihı" yarışı olıp keçti. Yarışta Aqmescit rayonınıñ ocaları ve talebeleri  – cemi 150 adam iştirak etti. Yarış, Qırım Müftisi hacı Emirali Ablayevniñ yolbaşçılığı altında, Qırım Cumhuriyetiniñ medeniyet Nazirligi, Aqmescit rayon memuriyeti ve Molodöjnoye qasabasındaki orta tasil mektebiniñ memuriyetiniñ destegi ile teşkil etildi. Yarışnıñ ğaye müellifi ve teşkilâtçısı – tarihçı, cemaat erbabı Reşat Asmanovdır. Tedbir başlamazdan evel iştirakçiler ögünde Qırım Müftisiniñ muavini Ayder İsmailov çıqışta bulunıp, Müfti adından selâmlar ve hayırlavlar ayttı ve iştirakçilerge muvafaqiyet tiledi.  Ayder İsmailov: "Mezkür yarış endi  bir qaç kere keçirildi. Yalıñız onıñ intellektual tarafı degil, musulman, qırımtatar medeniyeti ile tanış olmaq, tarihnıñ yañı saifelerini açmaq –  pek müimdir. Eñ esası – biri-birimizge nisbeten olğan sayğı-ürmettir. Biz öz medeniyetimizni bilsek, aramızdaki ürmet ve dostane munasebetler ep qaviyleşecek. Bu ise – cemiyetimizniñ sağlam oluvınıñ ve inkişafnıñ temelidir", dep ayrıca qayd etti.          Molodöjnoye qasabasındaki mektep müdiri Lüdmila Donets: "Böyle tedbir bizim mektebimizde keçirilgeninden quvanç is etemiz. Siziñ bilgileriñiz, cumhuriyetimizniñ bilgi hazinesine isse qoşsın ve ana-babalarıñız, ocalarıñız sizden ğurur duysıñ", dep ayttı.          Yarışnıñ şartları boyunca, iştirakçiler, İslâm dini tarihı ve Qırım hanlığınıñ tarihı boyunca 4 testten keçmek kerek edi. Ocalar ve talebeler arasından eñ eyi neticelerge nail olğanlar finalğa çıqtı.  Jüri erkânına, Qırım Müftisiniñ muavini Ayder İsmailov, Müfti yardımcısı Raim Ğafarov, QMDİ diniy tedbirlerni teşkil etüv bölüginiñ müdiri Zenife Ablayeva, rayon tasil bölüginiñ temsilcileri ve tarih ocaları kirdi.          Ocalar arasından birinci yerge Aqmescit rayonınıñ Pervomayskoye köyüniñ mektep ocası Anna Medvedeva, talebeler arasından ise – Dobroye mektebiniñ talebesi Edem Baybuyev nail oldılar. Mukâfatlı yerlerni Çistenkoye qasabasındaki mektep talebesi Azize İbragimova ve Kölçugino mektep talebesi Hanife Ahtemova qazandılar. Ğaliplerge yarlıqlar, medaller ve qıymetli ediyeler berildi.          Faal iştirakçiler de diqqatsız qalmadı, bahşişlarnı aldı. Tedbir iştirakçileri içün bala icadiy taqımlarınıñ kontserti numayış etildi.          Yarışnıñ nevbetteki basamağı 2019 s. dekabrniñ 7-de Oktâbrskoye (Büyük-Onlar) qasabasındaki mektepte keçirilecek. QMDİ matbuat hızmeti [gallery link="file" columns="4" size="medium" ids="35180,35178,35176,35174,35172,35170,35168,35166,35164,35162,35160,35158,35156,35154,35152,35150,35148,35146,35144,35142,35140,35138,35136,35134,35132,35130,35128,35126,35124,35122,35120,35118,35116,35114,35112,35110,35108,35106,35104,35102,35100,35098,35096,35094,35092,35090,35088,35086,35084,35082,35080,35078,35076,35074,35072,35070,35068,35066,35064,35062,35060,35058,35056,35054,35052,35050,35048,35046,35044,35042,35040,35038,35036,35034,35032,35030,35028,35026,35024,35022,35020,35018,35016,35014,35012,35010,35008,35006,35004,35002,35000,34998,34996"]