Haberler - Page 5 of 73 - ЦРО ДУМКЦРО ДУМК | Страница 5

Четверг

24

июня

14
Зуль-къаде
1442 | 2021
Утр.2:50
Вос.4:47
Обед.12:50
Пол.16:55
Веч.20:44
Ноч.22:41
Времена намазов
Календарь 2021г

Намаз

Haberler - Page 5 of 73 - ЦРО ДУМК

Aqmescit rayonında Oraza bayramı salütnen qayd etildi! (FOTO)

Опубликовано:

Aqmescit rayonınıñ Mamaq (Strogonovka) köyünde balalar içün büyük bayram keçirildi. Bayram teşkilâtçıları – Dilâver Dittanovnıñ yolbaşçılığındaki "Mamaq" yerli din cemiyeti, köy şurasınıñ deputatı Osman Mustafayev ve Svetlana Batırova yolbaşçılığındaki köyniñ faalleridir. Qasabanıñ musafirleri ve sakinleri içün teşkilâtçılar büyük bayram programmasını teşkil ettiler. Toplanğanlar ögünde şeerniñ ve köyniñ icadiy taqımları çıqışta bulundılar, ilâhiyler ve Vatanğa, anağa bağışlanğan yırlar icra etildi. Kontsert programmasınıñ soñunda mühteşem salüt seyircilerni ayrette qaldırdı. Meydanda çeşit master-klasslar, attraktsionlar çalıştı, at kezintisi teşkil etildi. Küreş, karate yarışları olıp keçti, balalar içün bahşışlar ve tatlılıqlar azırlandı. Er kesni pilâvnen sıyladılar. Bayram musafirlerini Qırım Müftisi adından Aqmescitniñ baş imamı Muhammed İslamov hayırladı. O, er keske qaviy sağlıq, işlerinde muvafaqiyetler, köyge ve bütün Qırımğa güllemekni tilep, dua etti. "Kelecekte de böyle toplanmaq, diniy ve milliy bayramlarnı qayd etmek içün Allahqa dua etemiz. Bu bayramlar dini ve milletine baqmadan, Qırımda, ve, hususan, Mamaqta yaşağan er kesni birleştire", – dedi Muhammed İslamov. Bayramnıñ qayd etilüv yeri tesadüfen saylanmadı, ileride şu yerde köyniñ balaları içün mektep ve diger ictimaiy ve medeniy müessiseler qurulacaq. Qasabanıñ sakinlerini Aqmescit rayon başlığınıñ muavini Ruslan Yakubov, Bağçasaray şeer şurasınıñ vekili Ervin Musayev ve diger musafirler hayırladılar. Mamaq köyünde Oraza bayramında biñge yaqın insan toplandı. Qırım MDİ matbuat hızmeti [gallery link="file" columns="4" size="medium" ids="46702,46700,46698,46696,46694,46692,46690,46688"]

Qırımda 1944 senesi sürgüni qurbanlarınıñ hatırası añıldı (FOTO)

Опубликовано:

Yarımadamızda qırımtatarlarnıñ Qırımdan 1944 senesiniñ mayısında zorbalıqnen sürgün etilmesi hatırasına bağışlanğan ananeviy "Çatırdağ seferi" aktsiyası olıp keçti. Aktsiya başlanmadan evel iştirakçiler sefer esnasında riayet etilecek havfsızlıq qaidelerinen tanış oldı. Qırım Müftisi adından iştirakçilerni Müfti muavini Raim Ğafarov selâmladı. "Çatırdağ yolu – halqımıznıñ Vatanğa qaytuv yolunı temsil ete, çünki dağğa köterilgen soñ, er birimiz Vatanımıznıñ güzelligini köre bilemiz", – dedi Raim Ğafarov. Bundan da ğayrı, o, aktsiyanı teşkil etken "Adalet" cemaat teşkilâtına teşekkür bildirdi. İştirakçilerge instruktor ve tibbiy hadim refaqat ettiler. Dağğa tırmanğandan soñ, Aqmescitniñ baş imamı Enver Baqiyev cemaat namazını keçirip, sürgünlikte elâk olğan, Vatanğa qaytıp olamağan vatandaşlarımız içün dua oqudı. "Sürgünlik – er bir qırımtatar qorantasına kirgen bir faciadır, biz bu dehşetli künlerde can bergen vatandaşlarımızğa Allahtan rahmet tileymiz. Merhum olğanlarğa ürmet köstermek – er bir musulmannıñ borcudır", – dep, qayd etti Enver Baqiyev. Çatırdağ seferi – 2006 senesinden başlap, qırımtatar yaşları tarafından keçirilgen ananeviy aktsiyadır. Qırımnıñ farqlı köşelerinden kelgen yaş nesilniñ temsilcileri 1944 senesi sürgünlik qurbanlarını añmaq içün toplana. 2014 sene, aprel 21 künü, Qırım Rusiyege qoşulğan soñ, Rusiye Prezidenti Vladimir Pütin Stalin repressiyalarından zarar körgen qırımtatar ve diger halqlarnıñ reabilitatsiyası aqqında fermannı imzaladı. Qırım MDİ matbuat hızmeti [gallery link="file" columns="4" size="medium" ids="46684,46682,46680,46678,46676,46674,46672,46670,46668,46666,46664,46662,46660,46658,46656,46654,46652,46650,46648,46646,46644,46642,46640,46638,46636,46634,46632,46630,46628,46626"]

Qırım Müftisi hacı Emirali Ablayevniñ Oraza bayramı munasebetinen hayırlavı

Опубликовано:

Bismillâhiʼr-rahmaniʼr-rahim! Ürmetli müminler, qıymetli dindaşlarım! Musulmanlar içün aziz Ramazan ayı soñuna irişti. Bu mubarek aynı epimiz Allahu Taalânıñ razılığına yetmek içün oraza tutıp, teravih namazlarını qılıp, ibadet yapıp, muhtaclarğa yardım etip, Yüce Rabbimizden dualarımıznıñ qabul etelmesini ve günahlarımıznıñ bağışlanmasını tilep keçirmege tırıştıq. Bugün biz Oraza bayramını öz Ana-vatanımızda sevinip, qayd etemiz, ve isteymiz ki, bu sevinç er bir musulmannıñ qalbini aydınlatsın! Şu bayram künlerinde em öz balalarımızğa, em de yetim ve oqşavsız qalğan evlâtlarımızğa ediyeler berip, olarğa bayram sevinçini yaşatayıq. Büyüklerimizni ziyaret etkende, diqqatımızğa muhtac kimsesizlerni de unutmayıq. Çünki bayramnıñ manası bundadır. Bayram – bir-birimizge sevgi köstermek, bir-birimizni bağışlamaq ve bir-birimizge destek olmaqtır. Biz, bir halq olaraq, bunı aqılımızda tutmaq ve mesülietnen yerine ketirmek kerekmiz. Yüce Allah er bir eyi işiñizde yardımcıñız olsun! Rabbimiz tutqan orazalarıñıznı, yapqan niyaz ve dualarıñıznı hayırlısınen qabul ve maqbul eylesin. Epimizge ikmet ve bilgi bağışlasın, ve kelecek Ramazanğa yetişmek içün er birimizge sağlıq, selâmetlik, sabır ve taqat nasip eylesin! Qırım Cumhuriyeti ve Sevastopol şeeri musulmanları diniy idaresinden (Tavriya Müftiyatı) ve öz adımdan bütün musulmanlarnı şu mubarek bayram munasebetinen can-u göñülden hayırlayım. Oraza bayramıñız hayırlı ve mubarek olsun! Qırım Müftisi hacı Emirali Ablayev

Qırımda bayram namazları qılındı (FOTO)

Опубликовано:

2021 senesiniñ mayıs 13 künü, saat 06.00 Qırımnıñ bütün camilerinde mubarek Ramazan ayınıñ peşinden kelgen Oraza bayramınıñ namazı qılındı. Qırım Müftisi hacı Emirali Ablayev bayram namazını Medeniyet ve Zenaat birligi sarayında keçirdi. Namazğa üç biñge yaqın insan qoşuldı. Bayram hutbesinde Müfti musulmanlarnı birleşmege, bir-birine destek köstermege, büyüklerge ürmet etmege çağırdı. "Ürmet, terbiye qorantadan başlana. Ana-babağa, ocalarğa, büyüklerge ürmetniñ esası ailede aşlana. Er birimiz balalarımız içün güzel nümüne olmalımız, çünki bugün köstergenimiz örnek yarın balalarımıznıñ ayat tarzına çevirilecek. Biz bala bağçalarını, mekteplerni qurmalımız, balalarımızğa ana tilimizni ve medeniyetimizni ögretmek kerekmiz. Bular episi elimizdedir, elimizden kelir", – dedi Müfti efendi. O, ilâve olaraq, qayd etti ki, milliy şahsiyemizniñ saqlanması içün dinimizni, tarihımıznı, ana tilimizni, urf-adetimizni bilmek, ecdatlarımız qaldırıp, bizge emanet etkenlerge saip çıqmaq kerek. "Biz çoqasırlıq tarihqa saipmiz, dinimiz – qaviy temelemizdir, tıştan kelgen iç bir tesir dinimizni-imanımıznı sarsmamaq kerek. Bugün barışıqlıq ve amanlıqnı tek din temin ete bile. Allahtan qorqqan insan cinayetke ıntılmaz. Adaletnen yaşamaq, milletimiz, vatanımız ve kelecegimiz içün çalışmaq, vatanımızda itibarlı olmaq – budır bizim vazifemiz. İşte, Oraza bayram birleşmemiz, yardımlaşuvımız ve can ağırtuvlarınıñ afu etilmesi içün vesile olsun", – dedi Müfti. Qırım musulmanlarınıñ yetekçisi qayd etti ki, bayram künlerinde muhtaclarğa, esli başlılarğa, hastalarğa, çoq balalı qorantalarğa, öksüzlerge ayrı diqqat ayırmaq kerek. Bayram namazı yarımadanıñ bütün camilerinde olıp keçti. Aqmescitniñ merkeziy Kebir camisinde bayram namazını Qırım Müftisiniñ muavini Ayder İsmailov keçirdi. O, musulmanlarnı bayramnen hayırlap, qorantalarına amanlıq, eyilik, birlik, büyüklerge ürmet etilmesini, muhtaclar, öksüzlerge diqqat ayırılmasını tiledi. Oraza bayramı üç kün qayd etile. Bu künlerde büyükler, soy-sop ve qomşular, hastalar ziyaret etile, balalarğa tatlılıqlar ve bahşışlar berile. Qırım başlığı Sergey Aksönovnıñ buyurığınen Qırım Cumhuriyetinde raatlıq künü olaraq mayısnıñ 14-i ilân etildi. Oraza bayramı musulmanlarnıñ eki büyük diniy bayramlarından biridir (Qurban bayramınen bir sırada). Oraza bayramında elâllıq soramaq, ana-babanı ziyaret etmek, sadaqa bermek, ediyeleşmek, mezarlarnı ziyaret etip, vefat etken soy-sopnı añmaq adettir. Qırım MDİ matbuat hızmeti [gallery link="file" columns="4" size="medium" ids="46452,46450,46448,46446,46444,46442,46440,46438,46436,46434,46432,46430,46428,46426,46424,46422,46420,46418,46416,46414,46412,46410,46408,46406,46404,46402,46400,46398,46396,46394,46392,46390,46388,46386,46384,46382,46380,46378,46376,46374,46372,46370,46368,46366,46364,46362,46360,46358,46356,46354,46352,46350,46348,46346,46344,46342,46340,46338,46336,46334"]

Qırım Müftisi Qazanda elâk olğanlarnıñ qorantalarına taziye bildirdi

Опубликовано:

Qırım Cumhuriyeti ve Sevastopol şeeri Müftisi hacı Emirali Ablayev elâk olğan Qazandaki gimnaziyanıñ talebeleri ve hadimleriniñ qorantalarına ve yaqınlarına teren taziye bildirdi. Qırım musulmanları adından ve şahsen özümden Qazan şeerindeki mektepte açılğan ateş neticesinde elâk olğanlarnıñ tuvğanları ve yaqınlarına taziye bildirem. Qardaş Tatarstan halqınen beraber keder içindemiz. Bütün zarar körgenlerge de tezce şifalar tileymiz. Mayıs 11 künü, saba 19 yaşındaki İlnaz Galâviyev diger bir cinayetçinen birlikte №175 gimnaziyada ateş açtı. Terakt neticesinde 11 insan elâk oldı, olarnıñ doquzı baladır. Canlarını ğayıp etkenler mektep talebeleri ve oquv yurtunıñ ocalarıdır. Umumen, 32 insan zararlandı, olar şeerniñ hastahanelerinde yollanılğan. Qırım MDİ matbuat hızmeti

Qırım musulmanları Şarqiy Qudusta barışıqlıqqa çağıra

Опубликовано:

Ürmetli vatandaşlar, dindaşlar! Mubarek Ramazan ayınıñ soñki künlerinde biz raatsızlıq ve qasevetnen Şarqiy Qudusta (İyerusalimde) olıp keçkenlerni taqip etemiz. Mayıs 7 künü İsrail havfsızlıq quvetleriniñ areketleri neticesinde muqaddes Mescid-i Aqsa külliyesinde 200 filistinli yaralandı. Şeerniñ eski arap maallesi olğan Şeyh Cerrah semtinden yerli sakinleriniñ sürgün etilmesi, Har Homa bölgesinde kelmeşekler içün 540 meskenniñ qurulması planları boyunca adımlar atılması ve Cenin şeerindeki nezaret ve keçit noqtasında eki filistinliniñ öldürilmesi neticesinde şeerdeki vaziyet ciddiy şekilde kerginleşti. Bugün eki tarafnıñ da raketa darbelerini kerçekleştirgeni belli oldı. Cenk – dünyada ola bilgen eñ dehşetli şeydir. Cenk – ölümler, yaralılar, qaçaqlar, öksüzler, hastalıqlar, açlıq ve yoqsuzlıq demektir. Yaqın künlerde faşizmni yeñmekniñ 76-yıllığını qayd ettik, şimdi de, göñüllerimizni kene qan tökülgeni aqqında haberler sarsıta. Qırım musulmanları, musulman dünyasınıñ bir qısımı olaraq, konfliktniñ tezce çezilmesi, narazılıq kösterip, soqaqlarğa çıqqanlarğa qarşı qullanılğan küçniñ idare etilmesi, barışıqlıq ve amanlıq oğurında Qudusnıñ eski şeerinde muqaddes yerlerge ürmet kösterilmesi içün dua ete. Biz muqaddes topraqlarda barışıqlıq, milletlerara ve dinlerara amanlıq içün Allahqa duacımız. Qırım MDİ matbuat hızmeti

2021 senesi Qırım camilerinde bayram namazı mayıs 13 künü qılınacaq

Опубликовано:

Qırım camilerinde Oraza bayramı namazı bayramnıñ birinci künü – mayıs 13-te, saat 06:00 qılınacaq. Aqmescitte bayram namazı Medeniyet ve zenaat birligi sarayında olıp keçecek (Kiyevskaya soq., 115). Saat 06.00 Qırım Müftisi hacı Emirali Ablayev adet üzre hutbe oqup, cemaat namazını keçirecek. Qırım Cumhuriyetiniñ Başlığı Sergey Aksönovnıñ fermanı ile Oraza bayramınıñ qayd etilüvi munasebetinen mayıs 14 künü (Oraza bayramınıñ ekinci künü) raatlıq künü olaraq ilân etildi. Oraza bayramı – Ramazan orazası yekünlengenden soñ qayd etilgen bayramdır. O, şevval ayınıñ ilk üç kününde qayd etile. Bayram namazından evel musulmanlar fuqarelerge, hastalarğa, yolcularğa ve diger muhtaclarğa fitir sadaqalarını bereler. Bayram namazından soñ ise, bayram sofraları donatıla. Musulmanlar bir-birine ikram eteler, ana-babanı, soy-sopnı, hastalarnı ziyaret etip, bahşışlar ediye eteler. Bu vaqıtta keçmişlerniñ mezarları ziyaret etile, Quran oqula ve ruhlarına dua etile. Qırım MDİ matbuat hızmeti

Qırım Müftisi Yan Epşteynniñ qorantasına taziye bildirdi

Опубликовано:

Qırım Cumhuriyeti ve Sevastopol şeeri Müftisi hacı Emirali Ablayev Bütünqırım yehudiyler kongressiniñ reisi Yan Börisoviç Epşteynniñ bu dünyanı terk etkeni munasebetinen taziyesini bildirdi. Qırım Cumhuriyeti ve Sevastopol şeeri musulmanları diniy idaresi adından ve şahsen özümden Yan Börisoviç Epşteynniñ tuvğanları ve yaqınlarına taziyemni bildirem. Cemiyetimizde dinlerara barışıqlıq ve muabbetlikniñ saqlanuvında Yan Börisoviçniñ issesi büyüktir. O, areketçen, açıq, qoyğan maqsadına azimkârlıqnen yürügen adam edi. Büyük ve semereli iş tecribesi sayesinde cumhuriyetniñ cemaatçılığı arasında itibar qazanğan edi. Tuvğanları, yaqınları, işdeşlerine bu büyük ğayıpnı yaşap keçmek içün sabırlar ve küç-quvet tileymiz. Qırım MDİ matbuat hızmeti

Qırım Müftisi ortodoks hristianlarnı büyük orazalarınıñ yekünlengeninen hayırladı

Опубликовано:

Qırım Müftisi hacı Emirali Ablayev ortodoks (pravoslav) hristianlarnı büyük orazalarınıñ yekünlenmesinen hayırladı. Asırlar devamında Qırım toprağında dinlerara ve milletlerara munasebetleriniñ aenkligi, bütün ananeviy dinler mensüpleri arasında sıcaq ve dostane munasebetler üküm sürmekte. Biz ecdatlarımızdan miras olaraq qalğan dinimizge, urf-adetlerimizge saip çıqıp, olarnı qorçalaymız. Oraza insanlarnı birleştirgen ve ecdatlardan qalğan maneviy degerlerge yöneltken bir ibadettir. Din insanlıqqa umumiy ortaq maneviy degerlerni ögrete ve muvafaqiyetimizni teminlegen ahlâq temelini qoya. Bizim ortodoks dostlarımız ve qomşularımıznıñ yürekleri şu duyğularnen toludır. Er birimiz, din mensübiyetine baqmadan, güzel ahlâq ve maneviy temizlik nümünesini köstermeli, bu pek müimdir. Dostane munasebetlerni ve qarşılıqlı ürmetni saqlamaq da pek müimdir. Bu – cumhuriyetimiz ve, umumen, devletimiz inkişafınıñ ve aydın keleceginiñ kefaletidir. Qaviy sağlıq, eyi allar, qarşılıqlı ürmet ve tınçlıq tileymiz! Yüce Rabbimiz yüreklerimizni aqiqiy iman nuru, etraftakilerimizge sevgi ve feyiznen toldursın! Qırım Müftisi Hacı Emirali Ablayev

Qırımda elâl mahsulatlarınıñ sayısı arta (FOTO)

Опубликовано:

Qırım Müftiliginde QMDİ-niñ "Elâl" sertifikatsiya merkezine muracaat etken qırımlı iş adamlarına elâllıq sertifikatları taqdim etildi. Vesiqalarnı Qırım Cumhuriyeti ve Sevastopol şeeri Müftisi hacı Emirali Ablayev ve Qırım Müftisiniñ muavini Ayder İsmailov berdiler. Böyleliknen, Aqmescitteki Samohvalova, 2 adresi boyunca çalışqan "Vostoçnoye" qavehanesi "elâl" brendi astında çalışıp başladı. Qavehane müşterilerge türlü yemekler, manğalda qavurılğan aşlar ve hamur aşlarını teklif ete. "Bağçasaray kolbasları" şirketi de "elâl" sertifikatını daa bir yılğa devam ettirdi. Şirket kolbaslarnıñ 40 çeşitini ve etten yapılğan farqlı mahsulatlarnı istihsal etip, sata. Müftilikte iş adamlarını sertifikatlarına nail oluvları munasebetinen hayırladılar, olarğa Yüce Rabbimiz ve insanlar ögünde taşığan mesülietlerini unutmamağa, vatanımıznıñ hayırı içün çalışmağa çağıdılar, işlerinde de muvafaqiyetler tilediler. Hatırlatamız, bundan evel "elâl" sertifikatını İçki rayonında çalışqan "Sovetskoye ekomahsulatı" şirketi aldı, şirket cınıs qoylarını asramaqta, bundan da ğayrı, mezbahhane hızmetini taqdim etmekte. Qırım MDİ matbuat hızmeti [gallery link="file" columns="4" size="medium" ids="46185,46183,46181,46071"]

Qırımda “İslâm bilgirleri” yarışı keçirildi (FOTO)

Опубликовано:

Aqmescit rayonında №2 Bulğanaq milliy mektebinde talebeler arasında İslâm yarışı olıp keçti. Tedbirde Bulğanaq milliy mektebi, Kün Tuvğan köyü mektebi ve Ya.M. Slonimskiy adına Mamut Sultan köyü mektep-gimnaziyanıñ talebeleri iştirak ettiler. Tedbir teşkilâtçısı – Qırım Cumhuriyeti ve Sevastopol şeeri musulmanları diniy idaresidir. Tedbirniñ maqsadı – yaş nesilge İslâm dinine meraq aşlamaqtır. Merasimniñ başında Qırım Müftisiniñ muavini Raim Ğafarov Müfti efendi adından er kesni selâmladı ve böyle yarışlar sağlam kelecegimizniñ temeli olğanını qayd etti. Balalarnıñ bilgilerine Raim Ğafarov, QMDİ-niñ diniy tedbirlerni teşkil etüv bölüginiñ reisi Zenife Ablayeva ve Qalay medresesiniñ müdiri Edem Lümanov qıymet kestiler. Yarışta 3 taqım iştirak etti: "İslâm sevdaları", "İslâm taşıycıları" ve "İslâmiy yarıq". Yarış üç basamaqtan ibaret edi. 1-inci tur testler şekilinde keçirildi. 5 sualden ibaret olğan 2-nci turda talebeler İslâm terminlerinen bağlı suallerge cevaplar bermek kerek ediler. Soñki, al etici turda taqımlarğa blits şeklinde 100 sual berildi. Neticede, 35 baa ile üçünci yerni Mamut Sultandan kelgen "İslâmiy yarıq" taqımı, ekinci yerni 50 baa qazanğan Kün Tuvğan mektebiniñ talebeleri, birincilikni ise, "İslâm sevdaları" taqımı aldı. Tedbir devamında Qalay medresesiniñ müdiri Edem Lümanov çıqışta bulundı. O, medrese aqqında video leyhanı taqdim eterek, medreseniñ temel diniy bilgilerni almaq içün güzel bir vasta olğanını añlattı. "Diniy bilgilerni almaq – er bir musulman içün farzdır, medrese ise, bu farznı yerine ketirmek içün güzel bir fırsattır", – dedi Edem Lümanov. Ondan da ğayrı, tedbir musafirleri içün de ayrı viktorina keçirildi, ve sualge doğru cevap bergen balalar hatıralıq bahşışlar aldılar. Bütün yarış iştirakçileri QMDİ adından hatıra ediyelerinen taqdirlendi, yarış ğalipleri ise, tek özleri içün degil de, bütün sınıfları içün ediyeni elde ettiler, – olar mayıs tatilinde Kezlevdeki delfinariumğa kezmege baracaqlar. Qırım MDİ matbuat hızmeti [gallery link="file" columns="4" size="medium" ids="46128,46126,46124,46122,46120,46118,46116,46114,46112,46110,46108,46106,46104"]

Qırım Müftiligi Murat Alimovnıñ tedaviylenüvi içün maddiy yardım taqdim etti (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde Qırım Müftisi hacı Emirali Ablayevniñ Murat Alimovnıñ yaqınlarınen körüşüvi olıp keçti. Körüşüv devamında Qırım Müftisi balanıñ tedaviylenüvi içün onıñ qorantasına toplanğan paralarnı taqdim etti. Hatırlatamız, bala sırt adaleleriniñ II tür atrofiyası degen siyrek bir hastalıqqa oğrağan. Sırt adalelerniñ atrofiyası siyrek genetik bir hastalıq olıp, onıñ sebebinden sırt miyiniñ siñir üceyreleriniñ işleyişi bozula, bu ise, adalelerniñ zayıflamasına, daa soñra atrofiyasına, ve, ileride, felç hastalığına, büs-bütün areketsiz qaluvğa ketire bile. Muratnıñ tedaviylenmesi içün mahsus ZOLGENSMA iñektsiyasını yapmaq kerek, onıñ fiyatı da – 169 mln ruble. Qırım Müftiligi muvaqqatsız "Merhametlik" aktsiyası çerçivesinde bir qaç kere Muratnıñ qorantasına ve yardımda muhtac olğan diger hastalarğa maddiy yardım köstermek içün sadaqalar toplağan edi. Qırım MDİ matbuat hızmeti [gallery link="file" columns="4" size="medium" ids="46094,46096,46098"]