Haberler - Page 35 of 54 - ЦРО ДУМКЦРО ДУМК | Страница 35

Вс

31

мая

8
Шевваль
1441 | 2020
Утр.2:59
Вос.4:50
Обед.12:46
Пол.16:49
Веч.20:32
Ноч.22:23
Времена намазов
Календари 2020г

Намаз

Haberler - Page 35 of 54 - ЦРО ДУМК

Qırımda Noman Çelebicihannı añalar (FOTO)

Опубликовано:

Fevral 19 künü Bağçasaraydaki Medeniyet evinde Noman Çelebicihanğa bağışlanğan hatıra aqşamı olıp keçti. "Unutmamız seni, Noman!" adlı hatıra aqşamı "Ebediyet" ansamblniñ reberi tarafından teşkil etildi. Tedbirde "Avdet", "İlham", "Han-Saray", "Bağçasaray" ansambllerniñ reberleri de iştirak etti. Aqşamğa memuriyet vekilleri, yerli sakinler, mektep ocaları ve talebeleri qoşuldı. Tedbir devamında milliy yır ve nağameler çalındı, Noman Çelebicihan ve Amdi Giraybaynıñ şiirleri oquldı. QMDİ MDT matbuat hızmeti [gallery link="file" columns="4" size="medium" ids="12269,12271,12261,12267,12265,12263"]

Qırım Müftiliginde “Güzel Qırım” yarışınıñ ğaliplerini taqdirlediler (FOTO)

Опубликовано:

Qırım Müftiliginde "Güzel Qırım" bala resimi yarışınıñ neticeleri çıqarıldı. Yarış QMDİ "Hidayet" gazetası ve "Büllür" Qırım müsulman qadınları Birleşmesi tarafından keçirilgen edi. Yarışta Qırımnıñ farqlı köşelerinden 30 bala iştirak etti, jüri azaları 60 ziyade resimni qabul etti.  Jüri terkibine Qırım ve Özbekistanda nam qazanğan ressam Halil Memedlâyev, ressam Lenur Velilâyev ve ressam, dizayner Ervin Seytasanov kirdi.  Ğalebeni 10 yaşındaki Safiye Musayeva qazandı. "Seyircilerniñ alğışı" nominatsiyasında birincilikni 8 yaşındaki Elmaz Sarakayeva aldı. Tedbir iştirakçileri qıymetli bahşişlar ile taqdirlendi, yarışnıñ ğalibi ise professional seviyesindeki molbert elde etti.  Jüri azaları iştirakçilerniñ işlerine yüksek qıymet kestiler. Jüri reisi Halil Memedlâyev ana-babalarğa faal olğanları içün teşekkürler bildirip, aynı olar sağlam intellektual nesilniñ temelini qoyğanını qayd etti. Onıñ içün ana-babalar balalarnıñ inkişafı içün elinden kelgenini yapmalı. Jüri azaları birlikte iştirakçiler içün tasviriy sanat boyunca ögretüv dersini keçirdiler. Derste 20 ziyade bala iştirak etti. "Hidayet" gazetasınıñ baş muarriri Zemine Acimambetovanıñ sözlerine köre, bu kibi dersler er ay ötkerilecek. Derslerni ressam Halil Memedlâyev keçirecek. Tasviriy sanat gruppasına 6 yaşından 14 yaşına qadar balalar yazıla bileler. Tedbirniñ soñunda balaçıqlarnı "Güzel Qırım" yarışınıñ timsalini aks etken tort bekledi. Tasviriy sanat gruppasına nevbetteki telefon boyunca yazılmaq mümkün: +79787085724. QMDİ MDT hızmeti [gallery link="file" columns="4" size="medium" ids="12214,12216,12212,12210,12208,12206,12204,12202,12200"]

Qazan şeerinde qırımtatar milliy urbaları taqdim etildi (FOTO)

Опубликовано:

Tatarstan müsulmanları Diniy idaresinde (Qazan ş.) qırımtatar qadın milliy urbasınıñ taqdimi olıp keçti. Seminarda Qırım müsulmanları Diniy idaresi ve "Büllür" Qırım müsulman qadınları Birleşmesiniñ vekilleri Tatarstan MDİ ile birlikte iştirak ettiler. Milliy urbalarnıñ müimligi, onıñ İslâm dini ile bağı, qadın urbalarınıñ, onı kiygen insanğa olğan tesiri aqqında İslâm dini ocası Zeyneb Bairova tarif etti. Qırımtatar qadın urbalarınıñ hususiyetleri aqqında Qırım Müftiliginiñ temsilcisi Zenife Veli ikâye etti. O, fesniñ yavluqnen kiyilmesi usullarını kösterdi. Bundan da ğayrı, tedbirde Qırım ustaları yapqan farqlı fesler taqdim etildi. Tedbirde milliy urbalar ve eski quşaqlar numayış etildi. Tatarstan Cümhuriyeti adından tedbirde dizayner Nuriya Hanum çıqışta bulundı. O ise, qazan tatarlarınıñ milliy baş kiyimi kollektsiyasını taqdim etti. Bu qırımtatar milliy urbalarına bağışlanğan birinci seminar-taqdim olıp keçti. Nevbetteki kösterüv 2018 senesi yazda olıp keçecek. QMDİ MDT hızmeti [gallery link="file" columns="4" size="medium" ids="12186,12188,12184,12182,12180,12178"]  

Qırım musulmanları Qurultayınıñ qararı ile qırımtatar halqınıñ Şurası meydanğa ketirildi (cedvel)

Опубликовано:

Fevral 17 künü keçirilgen Nevbetten tış Qırım müsulmanlarınıñ Qurultayında qırımtatar  halq Şurasınıñ meydanğa ketirilmesi aqqında qarar alındı. Açıq rey berüv vastası ile Şura terkibi qabul etildi. Teşkilâtqa 15 insan kirdi, olarnıñ arasında farqlı saalarda faaliyet köstergen mütehassıslar: din erbapları, sport, medeniyet, sanat, tibbiyet saasınıñ vekilleri kirdi. Qırımtatar halq Şurasınıñ Nizamnamesini Qırım müsulmanları Diniy idaresiniñ Şurası qabul etecek. Şurağa qırımtatar halqınıñ nevbetteki vekilleri kirdi: Haci Emirali Ablayev- (1962 s.) Qırım Müftisi. Yakubov Fevzi Yakuboviç (1937 s.) Qırım müendislik-pedagogika universitetiniñ esasçısı, al-azırda ise universitetniñ Prezidenti, tehnika ilimleriniñ doktorı. Ukraina qaramanı. Rusiye Federatsiyasınıñ ilim ve tehnika saasınıñ itibarlı hadimi. Kazakov Rustem Abdullayeviç (1947 s.) Küreş milliy sport çeşiti boyunca Qırım Federatsiyasınıñ Prezidenti. Qırım Cumhuriyetinde ONF regional ştabınıñ reisdeşi. Olimpiya çempionı, defalarca dünya ve Avropa çempionı. Sovetler Birliginde nam qazanğan idmancı. "İtibar işareti" ordeniniñ saibi. Bilâlov Eskender (1952 s.) RF Prezidenti erkânında milletlerara munasebetler Şurasınıñ azası, "İnkişaf" qırımtatar cemaat teşkilâtınıñ reisi. İsmailov Ayder Suleymanoviç (1977 s.) Qırım Müftisiniñ muavini. İslâm aqqı magistri. Yakubov Cengiz Fevziyeviç (1972 s.) Qırım müendislik-pedagogika universitetiniñ rektorı, tehnika ilimleri namzeti, doktor-müendis (Almaniya). İslamov Mehti Mustafayeviç (1969 s.) "Dülber" quyumcılıq Eviniñ esasçısı ve bediiy reberi. KC esnaf palatasınıñ vitse-prezidenti. Karl Faberje Ordeniniñ Tekmil Kavaleri. QC nam qazanğan ressam. Halqara seviyede nam qazanğan quyumcı. Bairov Ruslan Talâtoviç (1980 s.) Qırım Müftisiniñ muavini. Mütehassıs ilâhiyatçı.  Acimambetov Ayder Ametoviç (1985 s.) Qırım musulmanları Müftisiniñ mesül kâtibi. Mütehassıs siyasetşınas. Selendili Lemara Sergeyevna (1970 s.) Filologiya ilimleri doktorı, V.İ. Vernadskiy adına Qırım Federal Tavriya akademiyasınıñ qırımtatar ve şarq filologiyası fakultetiniñ qırımtatar filologiyası kafedrasınıñ professorı, Rusiye ilimleri akademiyasınıñ Bütünrusiye türkşınaslar komitetiniñ azası. Nalbantova Elmira Edemovna (1967 s.) Qırım devlet filarmoniyasınıñ "Haytarma" qırımtatar yır ve oyun ansambliniñ bediy reberi. Qırım Cumhuriyeti ve Ukrainada nam qazanğan artist. Emiraciyev Enver Ablâmitoviç (1958 s.) "İndustriya razvitiya" qurucılıq şirketiniñ baş müdiri. Qırım Cumhuriyetinde Cuma caminiñ inşaatındaki  Añlaşma esasında qurucılardan biri. Degirmenci Gayde Sinaverovna (1967 s.) Sevastopol ş. İnkerman qasabasınıñ №6 hastahaneniñ baş ekimi, İnkerman münitsipal qurumınıñ deputatı. Eminova Safiye Lümanovna — Qırımtatar medeniy-tarihiy miras müzeyniñ direktorı. Emirov Ayder Reşatoviç  — tilşınas, publitsist. Gasprinskiy adına cumhuriyet kitaphanesinin birinci müdiri. “Golos Krıma” ve “Poluostrov” gazetalarnın tesisçisi. QMDİ MDT hızmeti

Qırım Rusiye Hacılıq-missiyasınıñ terkibine kirdi

Опубликовано:

Moskvada Rusiye Hacılıq-missiyasınıñ toplaşuvı olıp keçti. Tedbirde 2018 senesi Hacılıqnıñ teşkil etilüv sualleri muzakere etildi. Qırım Cümhuriyeti adından toplaşuvda RF Devlet Dumasınıñ deputatı Ruslan Balbek ve QMDİ tış işleri bölüginiñ reberi Artur Reşetov iştirak ettiler. Muzakereler çerçivesinde 2018 senesi hacılıq ile bağlı olğan çeşit meseleler köterildi. İştirakçiler umumrusiye kvotasınıñ taqsimlenüvi ve tur-operatorlarnıñ işi aqqında söz yürüttiler. Toplaşuvnıñ neticesinde Qırım Cümhuriyeti Rusiye Hacılıq-missiyasınıñ terkibine kirgeni aqqında qarar alındı. Bundan da ğayrı, Qırım 600 insanlıq ayrı kvotanı aldı, ileride zaruriyet olacaq olsa, kvota 1000 yerge qadar arttırıla bile. Toplaşuvda Qırım müsulmanları Diniy idaresi tarafından akkreditatsiyadan keçken tur-operatorğa hacılıq-turlarını mustaqil tarzda teşkil etmege aqqı berildi. QMDİ MDT hızmeti [gallery link="file" columns="4" size="medium" ids="12169,12171"]

“Altın nesil” kubı dostlarını toplay (FOTO)

Опубликовано:

Qırım ve Sevastopol şeeri müsulmanları Diniy İdaresiniñ "Altın nesil" klubında iştirakçilerniñ er aylıq toplaşuvı olıp keçti.  Körüşüv çerçivesinde qırımtatar şairleriniñ eserleri oquluvı boyunca yarış keçirildi. Yarışta Alime Çahmarova, Niyara Nuraliyeva ve Ayşe Velilâyeva ğalebe qazandılar. Bundan da ğayrı, iştirakçiler klub işinde faaliyet köstergeni içün mukâfat aldılar. Ay devamında olar farqlı onlayn yarışlar ve viktorinalarda iştirak ettiler. Tedbirniñ soñunda balalar tatlı sofrağa davet etildi. Hatırlatamız, "Altın nesil" müsulman internet-klubı genç müsulmanlar içün çalışmaqta. Onıñ esas maqsadı 10-16 yaşlı balalar içün alternativ qonuşuv meydanını qurmaqtır. Hususan, qırımtatar müsulmanı içün raatlanğan vaqıtnı faydalı teşkil etmek – esas vazifelerden biridir.  Klub azası – 10-16 yaş etrafındaki er bir musulman olabile. Malümat içün telefon: +79788639566. QMDİ MDT hızmeti [gallery link="file" columns="4" size="medium" ids="11701,11699,11697,11695,11693"]

Hicabnıñ Halqara kününe bağışlanğan fleşmob ilân etildi

Опубликовано:

"Büllür" Qırım müsulman qadınları teşkilâtı Qırım ve Sevastopol şeeri müsulmanları Diniy İdaresiniñ destegi ile fevralniñ 1-de qayd etilgen Halqara hicab kününe bağışlanğan fleşmobnı ilân etti. Fleşmob "Hicabımnıñ tarihı", dep adlandırılğan. Qaide boyunca qadınlar hicab kiymege nasıl etip qarar alğanını añlatalar. "Büllür" teşkilâtınıñ reberi Niyara Canbazovanıñ sözlerine köre, bu künge ayrı diqqatnıñ celp etilüvi – Allahnıñ qadınlarğa bergen emirleriniñ qıymetini hatırlatmaqta. "Fleşmobnıñ maqsadı – İslâmnıñ qıymetleri, tarihı aqqında tarif etmek, cemiyetke qararımıznı añlatmaq ve eñ müimi – diniy tolerantlıqqa davet etmektir", - dep qayd etti Niyara Canbazova. Malümatnı içtimaiy ağlarda yerleştirip, 3-5 musulman qız qardaşlarını davet etmek ve  #İstoriyaMoyegoHicba #bullür_denHicaba#fleşmob_bullür2018 heştegini qoşmaq kerektir. İleride yazılar mahsus cıyıntıqqa kirsetilecek. "Estafetanı hicab kiymegen qızlarğa da yollap, olarnı yavluq kiyip baqmağa davet etmek mümkündir. Bundan da ğayrı, fes ve maramanı taqıp baqmaq mümkün", - dep qayd etti Niyara Canbazova. Teşkilâtçılarnıñ sözlerine köre, fleşmob – hicab kiymege daa qarar almağan qızlarğa destek köstermek, olarnıñ şübeleri, qorquları aqqında bilmek bir imkân, evinde, işinde añlaşılmamazlıqqa oğrağan insanlarğa qol tutmaq içün fırsattır. "Aktsiyanıñ vastası ile biz diger insanlardan üstün olğanımıznı köstermeymiz, yavluq kiymege davet etmeymiz, biz sadece qararımız aqqında tarif etip, diniy tolerantlıqqa çağıramız", - dep ayttı Niyara Canbazova. Fleşmob fevral 1 kününe qadar devam etecek. Eñ samimiy ve tesirli ikâyelerniñ müelliflerini qıymetli bahşışlar bekley. QMDİ MDT hızmeti  

Müftilikte “Güzel Qırım” yarışına yekün çekildi (FOTO)

Опубликовано:

Qırım ve Sevastopol şeeri müsulmanları Diniy idaresinde "Güzel Qırım" bala resimi yarışınıñ jüri azaları toplaştı. Yarışnıñ teşkilâtçıları – QMDİ "Hidayet" gazetası ve "Büllür" Qırım müsulman qadınları birleşmesidir. Yarışta Qırımnıñ farqlı regionlarından balalar iştirak etti. Umumen, 50 iş qabul etildi. Jüri terkibine Qırım ve Özbekistanda nam qazanğan ressam Halil Memedlâyev, ressam Lenur Velilâyev ve ressam, dizayner Ervin Seytasanov kirdi. Jüri azaları iştirakçilerniñ işine qıymet kesip, eñ güzel resimlerni seçip aldılar. Halil Memedlâyevniñ sözlerine köre, bazı işler öz yüksek derecesinen ayrette qaldıra: "Bizim balalarımız pek istidatlı ve bunı inkişaf etmek kerek. Olarnı ögretmek, tasilge daa büyük emiyet bermek kerekmiz. Böylece, biz milletimizniñ yüksek tasil saipleri, istidatlı intelligentsiyasını terbiyelecemiz", - dep ayttı Halil Memedlâyev. Ressam Lenur Velilâyevniñ aytqanına köre, resimlerniñ dörtten bir qısmı ihtisasiy derecede yapılğan. "Bazı işler ayrette qaldıra. Müelliflerni ise endi ressam dep adlandırmaq mümkündir", - dep qayd Lenur Velilâyev. Yarışnıñ neticeleri ve ğaliplerniñ adları fevralniñ başında tantanalı mukâfatlandıruv merasiminde belli olacaq. Bundan da ğayrı, jüri azaları birlikte iştirakçiler içün tasviriy sanat boyunca ögretüv dersini keçirecekler. QMDİ MDT hızmeti [gallery link="file" columns="4" size="medium" ids="11675,11657,11655,11649,11651,11653,11673,11661,11665,11667,11669,11671,11647,11645,11643,11641,11639,11637,11627,11629,11631,11633,11635,11623,11621,11619,11617,11615,11613,11611,11609"]

QMPU-da Prezident saylavlarında qırımtatarlarnıñ rolüni muzakere ettiler (FOTO)

Опубликовано:

Aqmescitte yaqınlaşqan Prezident saylavlarına bağışlanğan "tögerek masa" ötkerildi. Forumnıñ teşkilâtçıları - Qırım müendislik ve pedagogika universitetiniñ İtibarlı prezidenti Fevzi Yakubov ve Qırım Müftisi hacı Emirali Ablayevdir. Tedbirge 50 yaqın insan qoşuldı – qırımtatar cemaat teşkilâtlarınıñ azaları, ilim adamları, icadiy insanlar, din saasınıñ vekilleri ve milliy areketniñ iştirakçileri qoşuldı. "Tögerek masa"da qırımtatar cemaat teşkilâtlarınıñ qırımtatar milleti ve Qırım sakinlerine  mart 18 künü 2018 senesi Rusiye Prezidenti saylavlarında Vladimir Pütinge qol tutmaq teklifinen hitapname qabul etildi. Hususan, hitapnamede yarımada Rusiye Federatsiyasınıñ terkibine kirgenden soñ, müsbet deñişmeler aqqında söz yürütile. "Repressiv milletlerniñ reabilitatsiyası aqqında Ferman imzalandı. Milletimiz Stalinniñ qırımtatarlarğa qarşı yapılğan  repressiyalarnıñ maküm etilmesini eşitti. Musulmanlar 20 yıldan ziyade beklegen Cuma caminiñ qurucılığı başlandı. Qırım müendislik ve pedagogika universitetinde farqlı millet vekilleri içün medeniy merkez qurulmaqta, qırımtatarlar toplu yaşağan yerde yollar, mektepler, bala bağçaları, sport zalları qurula. Qırımtatar tiline devlet tili statusınıñ berilmesi qırımtatarlar içün büyük vaqia oldı", - dep qayd etilmekte vesiqada. "Tögerek masanıñ" iştirakçileri vetandaşlarına muracaat etip, mart 18 künü 2018 senesi çalışqan Prezident Vladimir Pütinge qol tutmağa çağıralar. QMDİ MDT hızmeti [gallery link="file" columns="4" size="medium" ids="11567,11606,11604,11602,11600,11598,11596,11594,11592,11589,11587,11585,11583,11581,11579,11577,11575,11573,11571,11569"]

Vladimir Putin Rusiye müsulmanları Merkeziy  Diniy Teşkilâtlarınıñ Müftileri ve Bulğar İslâm akademiyasınıñ reberleri ile körüşti (FOTO)

Опубликовано:

Qazanda Vladimir Pütin Rusiye müsulmanları Merkeziy  Diniy Teşkilâtlarınıñ Müftileri ve Bulğar İslâm akademiyasınıñ reberleri ile körüşti. Körüşüv çerçivesinde bir bütün musulman diniy tasil sistemasınıñ meydanğa ketirilmesi, devlette din mektepleriniñ inkişafı, Bulğar İslâm akademiyasınıñ işi muzakere etildi. Vladimir Pütin selâmlav sözlerinde İslâm rus medeniy kodınıñ ayırılmaz parçası, müsulman cemiyeti ise Rusiyeniñ çoq milletli ealisiniñ müim qısımı olğanını qayd etti. "Soñki kere mında bulunğan çoqusı insanlar ile 2013 senesi Ufada Rusiyede birinci Müftilikniñ meydanğa ketirilmesiniñ 225-yıllığı munasebetinen körüşken edik. O vaqıt Rusiyede İslâm tasili inkişafınıñ zaruriyeti aqqında laf etken edik. Mezkür tasil er zaman pek teren olıp, büyük tarihnıñ  saibi edi. Aytqanımız kibi, 1917 senesiniñ inqilâbına qadar rusiyeli müsulman din adamları bütün dünyağa belli edi, olarnıñ işleri de çoq qıymetli olaraq sayılğandır. Ebet, sovet devirinde çoq qıymetlikler coyuldı, biz yañı mekteplerni meydanğa ketirmege mecbur edik. Rusiye Prezidenti qayd etkeni kibi, Bulğar İslâm akademiyası üç qısımdan ibaret: medrese, aliy oquv yurtları ve akademiya. O, mezkür leyhanen oğraşqan insanlarğa büyük teşekkürler bildirdi. "Keliñiz, onıñ inkişafı, İslâmnıñ darqalması içün çalışqan diger, küçük olsa da, müim leyhalarnı muzakere eteyik, olarnıñ problemlerini ögreneyik, mütehassıslarnıñ azırlanuvı aqqında tüşüneyik", - dep ayttı Vladimir Pütin. Prezident, yañı munasip nesilni endiden ananeviy İslâm temelinde terbiye etmek kerek, degen fikirni de ilâve etti. Qırım MDİ MDT kremlin.ru malümatlarına esaslanıp [gallery link="file" columns="4" size="medium" ids="11553,11555,11557,11551"]  

Qırım Müftisi  Tatarstan Cumhuriyetini ziyaret etti (FOTO)

Опубликовано:

Qırım Müftisi hacı Emirali Ablayev Tatarstan Cumhuriyetinde iş ziyareti çerçivesinde Cumhuriyetniñ müsulmanları Diniy idaresinde Tatarstan Müftisi Kamil Samigullin ile körüşti. Körüşüv çerçivesinde Samigullin Tatarstan müsulmanları Diniy idaresiniñ leyhalarınen tanış etti, Diniy idare çalışqan binanı kösterdi, Tatarstanda eñ eski, 200-yıllıq Galeyev camisinde ziyaretni keçirdi. Ziyaret Rusiye Prezidenti Vladimir Pütin ile körüşüv çerçivesinde olıp keçti. QMDİ MDT hızmeti [gallery link="file" columns="4" size="medium" ids="11532,11536,11538,11540,11542,11530,11534"]

Aqmescitte qırımtatar qadın urbasınıñ künü qayd etilecek

Опубликовано:

Fevral 3 künü Aqmescitte qırımtatar qadın urbasınıñ künü qayd etilecek. Tedbir, fevral 1 künü qayd etilgen, Halqara hicab kününe bağışlanğandır. Tedbir teşkilâtçıları – Qırım ve Sevastopol şeeri müsulmanları Diniy idaresiniñ qoltutuvı ile "Büllür" Qırım musulman qadınları birleşmesidir. "Büllür" teşkilâtınıñ reberi Niyara Canbazovanıñ sözlerine köre, tedbir çerçivesinde qırımtatar milliy urbalarınıñ belli  ustaları, medeniyetşınaslar, ilâhiyatçılar qırımtatar qadın milliy urbalarınıñ tarihı ve musulman qaideleri boyunca qadın urbaları aqqında tarif etecekler. "Qırımtatar qadınları teşkilâtı olaraq milliy adetlerimizniñ saqlanuvı bizim içün çoq müimdir. Mütehassıslarnıñ yardımınen hicabnıñ qırımtatar versiyasını ögrenmege niyetlendik. Biz Şeriat qaidelerine uyğun olğan urbalarnı populârlaştırmağa isteymiz. Maqsadımız - zemaneviy musulman qadınları milliy urbalarnı sıqça kiysin. Bu bizim ilvanımızdır. Allah farqlı musulman milletlerni yarattı, medeniyetlerimiz biri-birinden farq etmekte. Bu pek güzeldir", - dep ayttı Niyara Canbazova. Tantanalı tedbir çerçivesinde büyük hayriye fesler yarmalığı ötkerilecek. Merasimde zemaneviy fes ustaları davet etildi. Balalar içün animatsion şou ötkerilecek. Kiriş fiyatı – 300 ruble. Balalar içün kiriş serbest olacaq. Toplanğan paralar muhtac qorantalarğa berilecektir! Tedbir fevral 3 künü, saat 10:30 "Yeşil ada" banket salonında, Ak-Meçet mkrn, Aq-Kaya soqağı, 1 adresi boyunca ötkerilece QMDİ MDT hızmeti