Haberler - Page 3 of 56 - ЦРО ДУМКЦРО ДУМК | Страница 3

Пн

10

августа

20
Зуль-хидждже
1441 | 2020
Утр.3:58
Вос.5:30
Обед.12:53
Пол.16:45
Веч.20:07
Ноч.21:39
Времена намазов
Календари 2020г

Намаз

Haberler - Page 3 of 56 - ЦРО ДУМК

Qırım camilerinde cuma namazları keçirildi (FOTO)

Опубликовано:

2020 senesi, iyün 19 künü Qırım camilerinde musulmanlar cuma namazlarını keçirdiler. Bundan üç ay evelsi, yañı COVID-19 virus infektsiyası sebebinden kütleviy diniy tedbirlerniñ, şu cümleden, cemaat ibadetleriniñ keçirilüvi toqtatılğandan soñ, bu cuma – cemaatnen cuma namazlarınıñ qılınğanı ilk cuma oldı. Aqmescitniñ merkeziy Kebir camisinde cuma namazında 200 insan toplandı. Karantinden evel 300-350 insan kele edi. Cemaatnıñ azalması musulman devletlerinden Aqmescitke oquşqa kelgen studentlerniñ yaz tatillerinde vatanlarına qaytması ve esli başlı adamlarnıñ kelmegeninen bağlıdır. Hutbe ve cuma namazı mümkün olğanı qadar qısqa vaqıtta keçirildi. Qırım Müftisiniñ muavini Ayder İsmailovnıñ sözlerine köre, cuma namazı vaqıtında bütün sanitar-epidemiologik qaidelerine riayet etildi. "Caminiñ kirişinde dezinfektsiya vastaları qoyuldı, ve camige kirgen er kes qollarını temizledi. Bundan da ğayrı, cuma namazına kelgenler tibbiy maskalarnı qullanıp, yanlarında şahsiy namazlıqlarını ketirdiler. Cami binasında ictimaiy distantsiya sebebinden yerlerniñ yetmemezligi vaziyetiniñ ihtimalı köz ögünde bulunıp, cami azbarında yerler azırlanıldı. Biz musulmanlarnı vaziyetni añlağanları, kendi ve etraftakilerniñ sağlığına diqqatlı olğanları içün teşekkür bildiremiz", – dep, qayd etti Ayder İsmailov, ve qoştı ki, camide cuma namazları er zamanki tertipte keçirile. Hatırlatamız, 15.06.2020 kününden başlap, Qırım Cumhuriyeti ve Sevastopol şeeri musulmanları diniy idaresiniñ qararı ile cuma namazları keçirilüviniñ toqtatılması ükümi lâğu etildi. QMDİ matbuat hızmeti [gallery link="file" columns="4" size="medium" ids="38553,38551,38549,38547,38545,38543,38541,38539,38537,38535,38533,38531,38529,38527,38525,38523,38521,38519,38517,38515,38513,38511,38509,38507,38505,38503,38501,38499,38497,38495,38493,38491,38489,38487"]

Qırımda cemaat ibadetleri keçirilüviniñ sıñırlanuvı vaqıtınca lâğu etildi

Опубликовано:

Qırım Cumhuriyeti ve Sevastopol şeeri musulmanları diniy idaresi daa evel, Qırım Cumhuriyetinde yañı COVID-19 koronavirus infektsiyasınıñ darqalmaması munasebetinen kirsetilgen Qırım camilerinde cemaat ibadetleriniñ sıñırlanuvı boyunca yasaqnıñ vaqıtınca lâğu etilgenini bildire. İyün 15 kününden başlap, Qırım Müftisiniñ emiri ile, cuma ve cemaat namazları, dualar, ad qoyuv ve nikâh merasimleri, maarif ve tahsil tedbirleri keçirilmege başlaycaq. Lâkin, kütleviy tedbirler esnasında sanitar-epidemiologik qaidelerge riayet etmeli. Camilerni, diger diniy müessiselerni, musulmanlarnıñ diniy ve tahsiliy idariy müessise ve teşkilâtlarını TEK tibbiy maska ve dezinfektsiya vastalarını qullanıp, ziyaret etmek mümkün. Cami ya da diger diniy müessisede ibadet etkenler arasında 1,5 metrlik içtimaiy mesafe olmalı, bundan da ğayrı, şahsiy namazlıq qullanmaq kerek. Camige kelgende, beden kontaktlarından (qol tutuşuv ve quçaqlaşuvdan) vazgeçmeli. Buña ilâve olaraq, pandemiya alâ daa üküm sürgeni sebebinden, cemaat namazlarını, şu cümleden, cuma ve cenaze namazlarını qısqadan ve havfsızlıq qaidelerini köz ögüne alıp, beden kontaktlarından (qol tutuşuv ve quçaqlaşuvdan) vazgeçip keçirmeli. ÖRVİ, ORZ ve mühtelif hronik hastalıqlarğa oğrağan insanlarğa ise, camilerge barmaqtan vazgeçmege tevsiye etile. QMDİ-niñ işbu emiri pandemiya vaqıtında Qırım Cumhuriyetiniñ ve Sevastopol şeeriniñ bütün saasında yürürliktedir. Camige qatnağanlarnıñ sanitar-epidemiologik qaidelerini kütmelerinden yerli din cemiyetleri mesüldir. QMDİ matbuat hızmeti

Qırım Müftiligi maküm etilgenlerni Oraza bayramınen hayırladı (FOTO)

Опубликовано:

Qırım Müftiligi iş adamları ve göñüllilerniñ destegi ile Aqmescitteki №1 taqiqat izolâtorında (SİZO) bulunğanlar ve İK №1 taqiqattan keçkenler içün ananeviy hayriye aktsiyasını keçirdi. Aqmescitniñ baş imamı, Qırım Müftisiniñ Qırım Cumhuriyeti ve Sevastopol şeerinde ÜFSİN ile işbirlik boyunca yardımcısı Muhammed İslamovnıñ sözlerine köre, aktsiya çerçivesinde musulmanlar içün aziz Oraza bayramına bağışlanıp, maküm etilgenler ve taqiqattan keçeyatqanlar içün pilâv pişirildi. "№1 SİZO-da 2 biñ insan içün pilâv pişirildi, tüzeltüv koloniyasında ise – biñ insan içün. Dini ve milletine baqmadan, er kes bayram müitini is etti", – dep, qayd etti Muhammed İslamov.  Bundan da ğayrı, Aqmescitniñ baş imamı bildirgenine köre, koronavirus sebebinden kirsetilgen etraf müitten ayırıluv rejimine baqmadan, taqiqattan keçkenler ve maküm etilgenlerge aşayt mahsulatları, tatlılar, suv, sebzeler, meyvalar da yiberildi. "Qırım Müftisi, cumhuriyetimizniñ musulman diniy idaresi adından taqiqat izolâtorı ve tüzeltüv koloniyasında bulunğan musulmanlarnı hayırlap, olarğa sağlıq, qaviy iman, sabır ve evlerine tezce qaytıp, qorantalarınen qavuşmalarını tiledik. Ümüt etemiz ki, evge qaytqan soñ, olar hidayet yoluna turar ve bir belâğa tüşmezler", – dedi Muhammed İslamov. Buña ilâve olaraq, o, Qırım Müftisi adından hayriye aktsiyasını teşkil etmege yardım etken iş adamları ve göñüllilerge teşekkürler bildirdi. Mayısnıñ 28-inde aynı taqım Keriçteki №2 tüzeltüv koloniyasına aşayt mahsulatlarını teslim etmek içün yolğa çıqacaq. Anda da biñ insanlıq pilâv pişirilecek. QMDİ matbuat hızmet [gallery link="file" columns="4" size="medium" ids="38286,38308,38306,38304,38302,38300,38298,38296,38294,38292,38290,38288"]

Qırım Müftisi hayriye aktsiyalarına qoşulğanlarğa teşekkürler bildirdi

Опубликовано:

Qırım Müftisi hacı Emirali Ablayev Ramazan ayı devamında keçirilgen ve büyük kölemde hayriye işleriniñ yapılmasına vesile olğan hayriye aktsiyalarında iştirak etkenlerge samimiy teşekkürler bildirdi.  "Mubarek Ramazan ayı devamında hayriye aktsiyalarını teşkil etmege ve olarnı keçirmege yardım etken er keske hususiy teşekkürlerimni bildirem. RF Devlet Dumasınıñ millet vekili Ruslan Balbek ve onıñ taqımına, iş adamlarına, hususan Zevay Osmanovğa, bundan da ğayrı, Qırımnıñ çeşit köşelerinde çalışqan regional ve köy imamlarımızğa, hayriye aktsiyalarında faal iştirak eken cemaat, göñülliler ve hayriye teşkilâtlarına, bu işke qoşulğan bütün göñüllilerge teren teşekkürler bildirem. Bundan da ğayrı, Türkiye Diyanet işleri idaresi yanında çalışqan Türkiye Diyanet vıqıfına, Türkiyedeki Qırım inkişafı fondunıñ başlığı, Türkiyeniñ Qırımtatar medeniy birleşmeler birliginiñ reisi Ünver Selge ve "İnkişaf industriyası" mesülieti sıñırlı cemiyeti şirketiniñ (OOO "İndustriya razvitiya") müdiri Enver Emiraciyevge semetdeşlerimizge yardım qolunı uzatqanları içün teşekkürler bildirem. Dinimiz bizni insanlarğa nisbeten barışıqlıq ve dostluqnı yaymağa, birlik ve merametni köstermege ögrete. Muhtac olğanlarğa yardım etkende, biz, asılında, özümizge yardım etemiz. Çünki muhtac olğanğa sadaqamıznı bermek –bizim ihtiyacımızdır, ve o daa büyüktir. Allah bizge ömürimizniñ soñuna qadar dinimiz, barışıqlıq ve merametlik oğurında çalışıp, hızmet etmege imkân bersin. Qorantalarıñızğa baht ve bereket tileyim. "Bergen el, alğan elden daa hayırlıdır" (Müslim). Bunen beraber, Qırım sakinleriniñ sağlıqlarına muqayt olğan tibbiyet hadimlerine, havfsızlıq tedbirlerini teşkil etken İçki işler nazirliginiñ hadimlerine ve bizlerge obyektiv malümatnı taqdim etken kütleviy matbuat vastalarına teşekkürlerimni bildirem. Sizge ve yaqınlarıñızğa sağlıq ve amanlıq tileyim. Allah sizden razı olsun! Allah sizni merhametinden ayırmasın! Amin!" Qırım Cumhuriyeti ve Sevastopol şeeri Müftisi Hacı Emirali Ablayev QMDİ matbuat hızmeti

Qırım musulmanlarına 4 biñ Quran yollanıldı (FOTO)

Опубликовано:

Qırım musulmanlarına Türkiyeden dört biñ aded Quran-ı Kerim kitabı yollanılıp bağışlandı. Muqaddes kitabımıznıñ nushaları Türkiyedeki Qırım inkişafı fondunıñ tesisçisi ve başlığı, Türkiyeniñ Qırımtatar medeniy birleşmeler federatsiyasınıñ reisi Ünver Selniñ teşebbüsi ile çeşit hayriye teşkilâtları ve Türkiyede yaşağan qırımtatarlar tarafından toplanıldı. Quranlarnıñ Qırımğa naqliyatını "İnkişaf industriyası" mesülieti sıñırlı cemiyeti şirketiniñ (OOO "İndustriya razvitiya") müdiri Enver Emiraciyev diger qırımlı iş adamlarınıñ destegi ile teşkil etti.  "Bizim vazifemiz – Quranlarnı ketirmek ve olarnı Qırımdaki musulman cemiyetimizge teslim etmek edi. Öyle bir quvançlı tesadüf ki, Quranlar aman-aman Oraza bayramımıznıñ arefesinde ketirildi, ve bu – büyük bir bahşıştır. Bugün ise, mubarek cuma künü biz musulmanlarğa bu bağışnı teslim etemiz. Bütün Quran nushaları teşkerilgen ve Türkiye Cumhuriyetiniñ Diyanet işleri başqanlığınıñ muyurinen belgilengen", – dedi Enver Emiraciyev. Qırım Müftisiniñ muavini Ayder İsmailov, öz nevbetinde, Enver Emiraciyevni ve onıñ şahısında Quran-ı Kerimlerniñ toplanılıp, Qırımğa yollanılmasını teşkil etme işine issesini qoşqan er kesge teşekkürler bildirdi.  "Türkiyeniñ Diyanet başqanlığı yanındaki Türkiye Diyanet Vaqıfınıñ bu bağışı, kerçekten de, Qırım Cumhuriyeti ve Sevastopol şeeri musulmanları içün pek qıymetli ve kereklidir. Ümüt etemiz ki, Türkiye ile munasebetlerimiz ep ilerileycek, çünki qırımtatar halqı, Qırım musulmanları Qırımdan tış degil de, yarımadamızda yaşaylar, onıñ içün biz medeniyetimizni, tilimizni ve, eñ evelâ, maneviyatımıznı mında kötermek kerekmiz. Qurannıñ ögrenilmesi – Muqaddes Kitabımızğa esaslanğan maneviyatımıznıñ, ananelerimizniñ inkişafı demektir. Qırım Müftisi ve bütün Qırım musulmanları adından Enver Emiraciyevge ve onıñ şahısında bu işke destek olğan bütün iş adamlarına teşekkürler bildirem. Allah sizden razı olsun ve eki dünyada mukâfatlandırsın", – dedi Ayder İsmailov. Müfti muavininiñ qayd etkenine köre, Quran-ı Kerim nushaları medresege, talebelerniñ oquması içün, ve Quran oquvı kursları keçirilgen Qırım camilerine yollanılacaq. Hatırlatamız ki, 2015 senesi Türkiye Cumhuriyeti Qırımğa Qurannıñ 6 biñ nushasını yollağan edi, olar Türkiyedeki hayriye teşkilâtları ve şu ülkedeki qırımtatarlar tarafından toplanğan edi. QMDİ matbuat hızmeti [gallery link="file" columns="4" size="medium" ids="38252,38258,38256,38254"]

Qırım Müftiliginiñ Acıgol qasabasındaki hayriye aktsiyası (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresi "Ramazan – eyi işler ayı" hayriye aktsiyasını devam ete. QMDİ imamları ve göñülliler tarafından muhtac olğanlarğa ve çoq balalı qorantalarğa aşayt torbalarınıñ darqatıluvı aktsiyası teşkil etildi. İşbu aşayt torbaları Kefe bölgesindeki Acıgol qasabasında muhtac olğan qorantalarğa tarqatıldı. QMDİ matbuat hızmeti [gallery link="file" columns="4" size="medium" ids="38222,38236,38234,38232,38230,38228,38226,38224"]

Qırım Müftiligi Qırım musulmanlarını Oraza bayramını evde qayd etmege çağırdı

Опубликовано:

Qırım Cumhuriyeti ve Sevastopol şeeri musulmanları diniy idaresi COVID-19 koronovirus infektsiyasınıñ darqaluvı sebebinden cuma namazları ve bayram namazı toqtatılğanı aqqında haber ete. Qırım Müftiligi semetdeşlerimizge añlayış kösterüvleri ve akimiyet tarafından eali arasında koronovirus darqaluvınıñ qarşısı alınması içün alınğan tedbirlerge uymaları içün teşekkür bildire. Dindaşlarımızğa muracaat etip, kütleviy toplaşuvlardan vazgeçmege, yolculıqlarnı sıñırlandırmağa ve havfsız mesafe qaidelerini kütmege çağıramız. 65 yaştan üyken vatandaşlarımız içün etraftan ayırıluv rejimi devam ete. Sağlıq – Allahtan berilgen emanettir, insan onı saqlamaq ve eñ eyi şekilde qullanmaq kerek. Allah bizni hastalıqlardan, qaza-belâlardan saqlasın ve bu sınavdan qolaylıqnen keçmege nasip etsin! Epimiz içün Allahtan amanlıq, merhametini ve razılığını tileymiz! QMDİ matbuat hızmeti

Qırım musulmanları Qadir gecesini qorantaları ile birlikte keçirecek

Опубликовано:

Qırım musulmanları Ramazan ayınıñ eñ qıymetli gecesi – Qadir gecesini keçirmege azırlanalar. Arapça Leyletu’l-qadr diye añılğan ve qudret ile taqdir gecesi manasına kelgen bu gece bu sene mayısnıñ 19-ını 20-sine bağlağan gecede qayd etile. COVID-19 hastalığınıñ darqalmaması maqsadınen kirsetilgen sıñırlanuvlar sebebinden bu sene bütün cumhuriyette camiler ve ibadethanelerde kütleviy ibadetler toqtatıldı. Qadir gecesini musulmanlar öz evlerinde qorantaları ile birlikte keçire bilecek. Qadir gecesi kün qavuşqanınen başlap, saba tañ atqanına qadar devam ete. İslâm alimleri bu geceniñ Qadir gecesi olaraq adlandırılğanınıñ bir sıra sebeplerini bildireler. "Onıñ qudreti ve azamatı bu gecede Quran-ı Kerim endirilgeninden sebeptir. Bu gece sayısız-esapsız melekler yer yüzüne tüşe. Yüce Rabbimizniñ köstergen bereketi, merhameti ve bağışlavı diger gecelernen qıyaslanmaz. Bu geceni ibadetlernen keçirgen musulman, Allahnıñ merhameti ile, büyük küç ve ayat energiyasınıñ saibi ola". Qadir gecesinde musulmanlar ne yapmalı? Qadir gecesi musulmanlar içün eñ eyisi – yüregi ve tilinen tövbe etip, Allahnıñ onıñ bütün günahlarını afu etmesi içün sebep yaratmaqtır. Bu gece qaza namazları qılına, Quran-ı Kerim oqula, tefekkür etile, can ağırtuvlar afu etile ve kelecekke planlar tizile. Allahnıñ Peyğamberi (s.a.s.) böyle buyurdı: "Qadir gecesini Allahqa işanç ve ümüt ile ibadetnen keçirgen ve Allahtan mukâfatnı beklegenniñ keçken günahları afu etile" (Buhariy, 38; Müslim, 760). Başqa bir hadiste tarif etilgenine köre, Ayşe (r.a.) Peyğamberden (s.a.s.) böyle sorağan: "Ey, Allahnıñ Peyğamberi, Qadir gecesi kelgenini añlasam, ne aytmalım?" O, dedi: "Böyle ayt: "Allahım, Sen Bağışlayıcısıñ, Cümertsiñ, afu etmege sevesiñ, meni afu et! [Allahumme inneke afuvvun, tuhibbu’l-afve fafuanni]" (Tirmiziy, İbn Mace, Hakim). QMDİ matbuat hızmeti

Qırımda qırımtatar halqınıñ sürgüni qurbanlarınıñ hatırasına dua keçirildi (FOTO)

Опубликовано:

Mayısnıñ 18-inde Aqmescitniñ merkeziy camisinde qırımtatar halqınıñ sürgüni qurbanlarınıñ hatırasına bağışlanıp, dua merasimi keçirildi. Dua merasimi "Millet" milliy telekanalı ve "Vatan sedası" radiosınıñ canlı yayınında kösterildi. Duağa Feysbuk ve İnstagram ictimaiy ağlarınıñ qullanıcıları da qoşula bildi. Er yıl mayısnıñ 18-inde Qırımda qırımtatar halqı qurbanlarınıñ hatırasına bağışlanğan matem tedbirleri ötkerile. Cumhuriyetniñ şeerleri ve diger mesken yerlerinde deşetli sürgün qurbanlarını añmaq içün qurulğan abideler yanına güller qoyula, Qırım camilerinde dualar alıp barıla. Bu sene, COVID-19 hastalığınıñ darqaluvınen bağlı vaziyetni köz ögüne alıp, Qırım Müftiligi dua merasimini onlayn şekilde keçirmege qarar berdi. Mayıs 18 künü qırımtatarlar içün matem ve hatıra künüdir, sürgünlikte vefat etken, vatanlarına qaytıp olamağan, ve avdet olıp, tuvğan topraqta yaşamaq bahtına nail olğan yaqınlar ve soy-sopnı hatırlamaq ve olarğa dualar etmek künüdir. QMDİ matbuat hızmeti [gallery link="file" columns="4" size="medium" ids="38184,38206,38186,38182,38180,38178,38176,38174,38172,38170,38168,38166,38164"]

İnsanlarnıñ eñ eyi çizgisi – eyilikke ıntıluvdır! (FOTO)

Опубликовано:

Qırım Müftiligi "Ramazan – eyi işler ayı" hayriye aktsiyasını devam ete. Aktsiya çerçivesinde Aqmescitte yerleşken QC DBOYu "Yoloçka" bala evine bir qısım bala aşları ketirilerek, yardım kösterildi. Bundan da ğayrı, yalıñız qartlarğa, çoq balalı ve muhtac qorantalarğa, COVID-2019 koronovirus hastalığınıñ darqaluvı sebebinden ağır vaziyette qalğan qorantalarğa evlerine barılaraq, yardım kösterildi. Qırım Cumhuriyeti ve Sevastopol şeeri musulmanları diniy idaresiniñ imamları iş adamları ve lâqayd qalmağan semetdeşlerniñ destegi ile Qırımnıñ çeşit bölgelerinde, Aqmescitteki Hoşkeldi ve Maryino qasabalarında aşayt torbalarınıñ darqatıluvını teşkil eteler. Qırım Müftiligi işbu aktsiyada faal iştirak etken er keske samimiy teşekkürlerini bildire. QMDİ matbuat hızmeti [gallery link="file" columns="4" size="medium" ids="38069,38094,38090,38088,38086,38083,38081,38079,38077,38075,38073,38071"]

Ramazan – eyi işler ayı (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresi "Ramazan – eyi işler ayı" hayriye aktsiyasını devam ete. QMDİ imamları muhtac olğanlarğa ve çoq balalı qorantalarğa erzaq torba ve qutularını darqatuv aktsiyasını teşkil ettiler. Hayriye erzaq torbaları İslâm Terek, Qarasuvbazar, Saq rayonlarında ve Aqmescitniñ vatandaşlarımız toplu yaşağan yerlerinde darqatıldı. Para toplavında Qırımnıñ iş adamları, ve, umumen, Ramazan ayında yaqınına yardım qolunı uzatmağa istegen er kes iştirak ete. Ramazan ayında hayriye aktsiyaları er yıl keçirilmekte. QMDİ matbuat hızmeti [gallery link="file" columns="4" size="medium" ids="38062,38060,38058,38056,38054,38048,38046,38044,38042,38040,38038,38036,38034,38032,38030,38028,38026,38024,38022,38020,38018"]

Qırım Müftiligi ve Turkiyede yaşağan qırımtatarlar er yıllıq hayriye aktsiyasını keçireler (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresi "Dünya Qırımtatar Dernegi" cemaat birleşmesi ile birlikte mubarek Ramazan ayı devamında muhtac olğanlarğa ve çoq balalı qorantalarğa erzaq qutularını darqatuv hayriye aktsiyasını keçireler. Al-ı azırda aktsiya çerçivesinde 71 erzaq qutusı darqatıldı. Qırım Müftiligi işbu aktsiyanı Ramazan ayınıñ soñuna qadar devam ettirmege planlaştıra. Erzaq qutusına şeker, pirniç, ösümlik yağı, kürpeler, makaron mahsulatları, zeytin ve diger aşaytlar kirmekte. Hayriye qutuları Aqşeyh, Cürçi ve Orqapı rayonlarında, qısmen Aqmescitte berildi. Yardım qutularınıñ darqatıluvı boyunca iş faal şekilde QMDİ göñüllileri tarafından Qarasuvbazar ve Qırımnıñ diger rayonlarında alıp barılmaqta. Bundan da ğayrı, yardımnı cemaat faaliyetçileri, ocalar, din ocaları ve digerler de aldılar. Mubarek Ramazan ayı devamında hayriye aktsiyaları er yıl keçirile. 2020 senesiniñ Ramazan ayını Qırım musulmanları izolâtsiya rejiminde keçirmekte. Sebebi – COVID-19 virus hastalığınıñ yayılmasıdır. Faaliyetçiler ve göñülliler aşayt qutularını insanlarnıñ evine qadar ketire. QMDİ matbuat hızmeti [gallery link="file" columns="4" size="medium" ids="38008,38006,38004,38002,38000"]