Haberler - Page 27 of 55 - ЦРО ДУМКЦРО ДУМК | Страница 27

Четверг

09

июля

18
Зуль-къаде
1441 | 2020
Утр.3:04
Вос.4:56
Обед.12:53
Пол.16:56
Веч.20:40
Ноч.22:32
Времена намазов
Календари 2020г

Намаз

Haberler - Page 27 of 55 - ЦРО ДУМК

Qırım ve Sevastopol şeeri müsulmanları Diniy idaresi qırımtatar tili kurslarına davet ete

Опубликовано:

Qırım ve Sevastopol şeeri müsulmanları Diniy idaresi qırımtatar tili kurslarına davet ete. Kurslarğa qırımtatar tilinde serbest laf etmekni, oqumaq ve yazmaqnı ögrenmege ve bilgi seviyesini yükseltmege istegenler davet etile. Birinci ders 2018 senesi sentâbr 10 künü saat 18.00-de olıp keçecek. Derste talebelerniñ istekleri köz ögüne alınıp, kurslarnıñ cedveli qurulacaq. Kurslarnıñ programması 4 ay devam etecek. Derslerni filologiya ilimleri namzeti, qırımtatar tili ve edebiyatı boyunca üyken oca Remziye Ametovna Berberova alıp baracaq. Birinci ders sentâbr 10 künü saat 18.00-de olıp keçecek. Adres: Aqmescit ş., Kurçatov, 4 soqağı (QMDİ konferents-zalı). Yazılmaq içün telefon nomerası: +7 978 895 8393 QMDİ matbuat hızmeti

Beslan balalarınıñ hatırasına dua

Опубликовано:

Aqmescitteki merkeziy Kebir caminiñ imamı Edem Lümanov Beslanda olıp keçken terror eyleminiñ qurbanları ruhlarına bağışlanğan dua keçirdi. "Beslan balaları" hatıra aktsiyası Aqmescitteki Gagarin parkında keçirildi. Edem Lümanov, hatıra duasını oqup, terrorizmnen birlik-beraberlikte küreşmege çağırdı. Edem Lümanov: "Balalarğa qarşı yapılğan suiqast – kelecegimiz ve, umumen, insanlıqqa qarşı suiqasttır. Birisiniñ siyasiy baqışları sebebinden balalarnıñ ölümi – eñ deşetli şeylerden biridir. Biz, dinimiz ve milletimizge baqmadan, terrorizmnen küreşmek ve balalarımıznı qorçalamaq içün birleşmek kerekmiz", – dep ayttı. 2004 senesi sentâbrniñ 1-3 künleri Beslanda olıp keçken terror eyleminiñ neticesinde qurban ketken balalarınıñ hatırasına bağışlanğan aktsiya iştirakçileri kökke 186 beyaz ava topunı yiberdiler. Olarnıñ birisinde imam Edem Lümanov arap tilinde: "Böyle facia iç bir vaqıt tekrarlanmasın!", dep yazdı. Tedbir teşkilâtçıları – Qırım paytahtınıñ memuriyeti ile birlikte Qırım Cümhuriyeti tasil, ilim ve yaşlar Nazirligidir. Aktsiyada Aqmescit kazaklar sınıfınıñ kadetleri, studentler ve V.İ. Vernadskiy adına QFU göñüllileri, orta professional tasil müessiseleriniñ studentleri, "Ğalebe göñüllileri", "Yunarmiya" areketiniñ iştirakçileri ve diger cemaat teşkilâtlarnıñ azaları iştirak etti. Teşkilâtçılarnıñ sözlerine köre, umumen, tedbirde 200 insandan ziyade iştirak etti. QMDİ matbuat hızmeti

Aqmescit rayonınıñ balalarına Quranlar berildi (FOTO)

Опубликовано:

Aqmescit rayonınıñ Gvardeyskoye qasabasında eki aylıq Quran oquvı kurslarınıñ mezunlarına Muqaddes kitaplar berildi. Eki ay devamında 3-14 yaşındaki balalar Quran oqumağa ve İslâm dini temellerini ögrendiler. Qısqa müddetli kurslarnıñ soñunda eñ güzel oquyıcı yarışı ötkerildi. Onıñ neticesinde ğalipler ve iştirakçiler qıymetli bahşışlar ve Qırım Müftisi hacı Emirali Ablayev adından teşekkürnameler ile taqdirlendiler. QMDİ matbuat hızmeti

Qırımğa hacılarnıñ birinci taqımı qaytıp keldi (FOTO)

Опубликовано:

22 insandan ibaret olğan hacılarnıñ taqımı Aqmescitke qaytıp keldi. Aeroportta musulmanlarnı Qırım Müftisiniñ muavini Ayder İsmailov ve AVN-Tur hacılıq-operatorınıñ vekilleri qarşılap aldılar. Tahminen üç afta devamında Qırım ve dünya musulmanları büyük hacılıqnıñ merasimlerini yerine ketirdiler, tarihiy mekânlar, İslâm dininde Muqaddes sayılğan Mekke ve Medineni ziyaret ettiler. Qırım Müftisiniñ muavini Ayder İsmailov müsulmanlarnı hacılıqnı muvafaqiyetnen keçkenleri ve sağ-selâm evge qaytqanlarınen hayırladı. "Elhamdulillâh, er şey güzel keçti, hacılarımız sağ-selâmet evge qaytıp keldiler. Allah Muqaddes topraqlarda oquğan dualarını qabul etsin", - dep ayttı Ayder İsmailov. Umumen, bu sene AVN-Tur Qırım hacılıq operatorı 600 musulmannı hacılıqqa yolladı. QMDİ matbuat hızmeti [gallery link="file" columns="4" size="medium" ids="20134,20132,20130,20128,20126,20124,20122,20120,20118,20116,20114,20112"]

“Faydalı ilim” yañı oquv yılını başlay!

Опубликовано:

Sentâbr 8 künü saat 11.00-de Qırım ve Sevastopol şeeri müsulmanları Diniy idaresiniñ "Faydalı ilim" mektebi yañı oquv yılını başlaycaq! "Faydalı ilim" 6 yaşından başlap 8-13 yaşına yetken balalarnı islâm mektebine davet ete. Dersler er cumaertesi künü oquv yılı devamında ötkerilecek. Bu balalar içün tecvid qaidelerine köre Quran oqumaqnı ögrenmek, Peyğamberimiz Muhammed (s.a.s.) ayatını bilmek içün güzel bir fırsattır. Bundan da ğayrı, talebeler sure ve dualarnı oquycaq ve İslâm dini temellerinen tanış olacaqlar. Balalarğa intellektniñ inkişaf etilmesi içün oyunlar ve sport yarışları işlep çıqarılğandır. Açıluv sentâbr 8 künü saat 11.00-de olacaq. "Faydalı ilim" ocaları ana-babalarnı oquv programmasınen tanış etecek ve meraqlandırğan suallerge cevap berecekler. Aqmescit ş., Pobeda caddesi, 128, "Faydalı ilim" oquv-maarif merkezi. Malümat içün telefon +79788920726 "Faydalı ilim" - tek faydalı bilgiler degil, balalarımız içün güzel müittir. QMDİ matbuat hızmeti

Eski Qırımda Quran oquvı boyunca yazlıq kursları yekünlendi (FOTO)

Опубликовано:

Eski Qırım şeerindeki oquv merkezinde Quran oquvı boyunca yazlıq kursları yekünlendi. Yaz mevsimi boyunca 10-dan ziyade qadın arap elifbesini ögrenip, Quran oquvına keçti. Qadınlar bilgilerini açıq derste kösterdiler. Bundan da ğayrı, açıq derste mezunlar ile subet keçirildi. Olarnı Qırım Müftisi adından hayırlap, qadınlarğa Muqaddes Quran kitabınıñ nushaları taqdim etildi. Eski Qırım oquv merkeziniñ temelinde mektep ve mektepten aldın balalar içün İslâm dini temelleri ve Quran oquvı kursları çalışa. Mında 40-tan ziyade bala qatnay. QMDİ matbuat hızmeti [gallery link="file" columns="4" size="medium" ids="20091,20099,20097,20095,20093"]

Qırımda Qurban bayramınıñ qayd etilüvi devam ete (FOTO)

Опубликовано:

Aqmescit civarındaki Levadki qasabasında Qurban bayramı qayd etildi. Tedbir teşkilâtçısı – QMDİ Qırım müsulman qadınlarınıñ birleşmesi "Büllür" teşkilâtıdır. Bayram,  toplanğan hayriye paralarına keçirildi. Tedbirge 200-den ziyade insannı birleştirdi. Bayramnı Ernes Prtıhovnıñ reberligindeki "Nesil" oyun ansambliniñ oyuncıları, Reyane Mustafayeva tarafından yöñetilgen "Emanet" ansambli, ilâhiler ile Bekir Adilov yaraştırdılar. "Pole çudes" bayram studiyası balalarnı meraqlı animatsion programma ile quvandırdı, mında balalar qırımtatarca yırladı, oynadı ve resim yaptılar. Er keske ediyeler berildi, musafirlerni lezzetli pilâvnen siyladılar. "Büllür" CT reberi Niyara Canbazovanıñ sözlerine köre, teşkilât Qırımnıñ farqlı regionlarında tedbirlerni keçirmege niyetinde. QMDİ matbuat hızmeti [gallery link="file" columns="4" size="medium" ids="19966,19964,19962,19960,19958,19956,19954,19952,19950,19948"]

Aqmescitteki qartlar eviniñ sakinlerini Qurban bayramınen hayırladılar (FOTO)

Опубликовано:

Qırım müsulmanları Diniy idaresiniñ "Büllür" cemaat teşkilâtınıñ teşebbüsi ile esli-başlı insanlar içün  tantanalı bayram keçirildi. Tedbir Qurban bayramına bağışlanğan. Qartlar Eviniñ sakinleri içün balalar meraqlı programma azırladılar – şiirler ve dualar oqudılar, Ernes Prtıhovnıñ reberligindeki "Nesil" ansambliniñ küçük artistleri bir qaç oyun nümünesini taqdim ettiler. "Büllür" teşkilâtınıñ reberi Niyara Canbazovanıñ bildirgenine köre, tedbir pansionat memuriyeti ile birlikte teşkil olundı. Niyara Canbazova: "Bizde yañğız qalğan qartlar olğanına çoq yazıq. Pansionat reberligi ile birlikte biz olar içün bayramnı teşkil etmege tırıştıq. Qartlar közyaşlarını gizlep, küldi, kendisini ufaq balalar kibi is ettiler. Qırımtatar halq yırlarını icra etti ve "Haytarma" oynadılar. Biz esli başlılarnıñ göñülini almağa tırıştıq. Allah olarğa qaviy sağlıq ve göñül raatlığı bersin. Allah bizni yanğğız qartlıqtan qorçalasın, ana-babalarıñız, büyüklerge muqayt oluñız, olarnı daa sıq quvandırmağa tırışıñız", - dep ayttı. Teşkilâtçılar tarafından bahşışlar ve tatlı ziyafet azırlanıldı. QMDİ matbuat hızmeti [gallery link="file" columns="4" size="medium" ids="19973,19977,19975"]

Aqmescitte ÜFSİN-ge tabi olğan müessiselerde mahküm etilgen müsulmanlar Qurban bayramını qayd ettiler

Опубликовано:

Qurban bayramınıñ qayd etilüvi munasebetinen № 1 taqiqat izolâtorı ve Rusiyede Qırım Cümhuriyeti ve Sevastopol şeeri  cezahanesini Qırım Müftisiniñ FSİN ile alâqa boyunca yardımcısı Muhammed İslamov ve onıñ yardımcısı İbraim Zinetdinov ziyaret ettiler. Ziyaret çerçivesinde imam Qırım Müftisi hacı Emirali Ablayev adından mahküm etilgenlerni ve taqiqattan keçkenlerni bayram ile hayırlap, olarğa sağlıq, qaviy iman, tezce evlerine qaytıp, qorantalarına qavuşmaqnı tiledi. Ziyaret çerçivesinde Muhammed İslamov mahküm etilgenler ile dua keçirdi. Bundan da ğayrı, o, Qurban bayramınıñ imannıñ qaviyleştirilüvi kibi teren manasından ğayrı,  insannıñ qıyınlıqlarnı yeñmege ve ümüt yolundan ketmege ıntıluvı manasını hatırlattı. Bu çizgi ise serbestlikten marum qalğan adamlarğa pek kerektir. Mahküm etilgenlerge tatlı bahşışlar berildi. Avgust 28 künü ziyaretniñ keçirilüvi Keriç şeerindeki 2-sanlı Koloniyada planlaşıtırıla. QMDİ matbuat hızmeti

Aqmescitte Qurban bayramı qayd etildi (FOTO)

Опубликовано:

Aqmescitte Qurban müsulman diniy bayramı qayd etildi. Trenöva adına parkqa beş biñden ziyade insan keldi. Olar yaqınları, soy-sopları, tuvğanları ile birlikte bayram müitine daldı. Tedbir teşkilâtçıları – Qırım müsulmanları Diniy idaresi, Milletlerara Devlet komiteti ve şeer memuriyetidir. Müsafilerni Qırım Müftisi hacı Emirali Ablayev hayırladı. Müfti: "Epimizge barışıq içinde yaşamağa tileyim, er evde bereket, tuvğan topraqlarımızda seadet olsun,  Qırım sakinlerine ise barışıq ve biri-birine nisbeten ürmet ile yanaşmağa tileyim. Bilemiz ki, bugün bizim yolumızğa menfiy baqqanlar, diger yolnıñ tarafdarları bar, biz daima olarğa qol uzatmağa azırmız. Barışıq -  raatlıq içündir. Qadınlarımız, analarımız ve tatalarımız keder, közyaş  bilmesin. Biz Vetanımızda yaşaymız ve epimiz toprağımıznıñ güllenmesi içün qollarımızdan kelgenini yapmalımız", - dep ayttı. Kontsert yaş oyuncılar ve bala icadiy taqımlarınıñ çıqışları ile başlandı. Küçük artistler qırımtatar milliy oyunlarını, Qırım müsulmanları Diniy idaresiniñ "Emanet" studiyasınıñ iştirakçileri ise ilâhilerni icra ettiler. Zera Kencikayeva ve Bekir Adilov seyircilerni yırları ile quvandırdılar. Qırım paytahtında Qurban bayramı er sene qayd etile. Mında yarımadanıñ farqlı köşelerinden musafirler, ameliy sanat ustaları toplana. Ustalar öz işlerini mahsus yarmalıqlarda taqdim eteler. Bundan da ğayrı, qırımtatar ve rus tilinde diniy ve edebiy kitaplar taqdim etildi. Qırım Müftisiniñ muavini Ayder İsmailovnıñ sözlerine köre, Qurban bayramınıñ qayd etilüvi müsulmanlar içün çoq müimdir. Ayder İsmailov: "Bayram keyfni kötere, ilham bere, insanlarnıñ yüreklerine güzel duyğular bağışlay. Bu keyfni biz kelecek nesillerge yetkizdirmek kerekmiz", - dep ayttı. Kelgen musafirlerini lezzetli pilâv ile siyladılar. Bayram aqşamğa qadar devam etti. Kelgenlerni belli qırımtatar "Qırım" folklor ansambliniñ artistleri, "Haytarma" Qırımtatar yır-oyun ansambliniñ solistleri, Qırımtatar akademik-muzıkalı drama teatriniñ artistleri çıqışları ile quvandırdılar. Qurban bayramı dört kün qayd etile.  Müsulmanlar tuvğanlarnı, qartlarnı ziyaret ete, balalarğa bahşış bere, mezarlıqlarnı ziyaret ete, dualar. Allahqa yapılğan duada – barışıqnı saqlamaq, er bir yürekke iman nurını saçmaq, ümüt bermek ve sevgi, merhametni bağışlamaq kibi bir tilek mevcut. Bugün, yarın, asırlar devamında…  QMDİ matbuat hızmeti [gallery link="file" columns="4" size="medium" ids="19906,19904,19902,19900,19898,19896,19894,19892,19890,19888,19886,19884,19882,19880,19878,19876,19874,19872,19870,19868,19866,19864,19862,19860,19858,19856,19854,19852,19850,19848,19846,19844,19842,19840,19838,19836,19834,19832,19830,19828"]

“İkmet çoqrağı” Hacılıq aqqında

Опубликовано:

Qırım müsulmanları Diniy idaresiniñ "İstoçnik mudrosti" ("İkmet çoqrağı") mecmuasınıñ nevbetteki – IV – sanı dünya yüzüni kördi. Malümatlarnıñ ekseriyeti İslâmnıñ beş şartlarından biri – hacılıqqa bağışlanğandır. Müellifler maqalelerinde ibadetniñ müimligi, diniy merasimlerniñ emiyeti aqqında yazalar. "İkmet çoqrağı" jurnalınıñ yañı sanında imannıñ samimiyligi aqqında felsefeviy fikirler açıqlana. Mında siz ruhiyat saasına ait meraqlı maqaleler, ahlâqnıñ temizligi boyunca fikirlerni tapa bilesiñiz. İnsan ömüriniñ manası aqqında maqale yaşayışımızğa ve etrafqa İslâm dininiñ baqışı ceetinden baqmağa yardım eter. Bundan da ğayrı, mecmuada bala terbiyesine ait meraqlı malümatlar bar. Raatlıq vaqıtıñıznı faydanen keçiriñiz. "İstoçnik mudrosti" – "İkmet çoqrağı" jurnalına er bir poçta bölüginde abune olıp, İslâm dininiñ hususiyetlerini ögreniñiz. Abune indeksi: 68363 QMDİ matbuat hızmeti [gallery link="file" columns="4" size="medium" ids="19588,19596,19594,19592,19590"]

Qırımtatar cemaat erbabı, ekim Leylâ Bilâlova vefat etti

Опубликовано:

"Qırım ve Sevastopol ş. müsulmanları Diniy İdaresiniñ yolbaşçıları ve hadimleri ve şahsen öz adımdan, qırımtatar halqınıñ faal cemaat erbabı Leylâ Bilâlovanıñ vefat etkeni munasebeti ile taziye bildirem. Leylâ hanım belli qırımtatar etnografı ve ülkeşınas Refat Kürtiyevniñ ömürarqadaşı ve Rusiye Federatsiyasınıñ Prezidenti yanındaki milletlerara munasebetler boyunca Şura azasınıñ, "İnkişaf" Regional cemaat teşkilâtı reisiniñ Bilâlov Eskenderniñ anası edi. Leylâ Bilâlova yüksek seviyeli ekim olaraq, bir çoq insanlarğa yardım kösterdi. Bilgisi, tecribesi ve merhametligi onı tanığan vatandaşlarımıznıñ hatırasında saqlanıp qalacaq. Ailesine ve yaqınlarına sabır tileymiz. Epimiz Allahtan keldik ve Allahqa qaytacaqmız…". Qırım Müftisi haci Emirali Ablayev. Cenaze namazı 2018 s. avgustnıñ 7-de, saat 14-te Qırımnıñ Saq rayonındaki Mihaylovka (Tuzlu) köyünde olıp keçecek. Merhumeniñ mekânı cennet olsun!