Haberler - Page 2 of 81 - ЦРО ДУМКЦРО ДУМК | Страница 2

Суббота

27

ноября

22
Ребиу'ль-ахир
1443 | 2021
Утр.6:24
Вос.7:47
Обед.12:36
Пол.14:46
Веч.17:15
Ноч.18:38
Времена намазов
Календарь 2021г

Намаз

Haberler - Page 2 of 81 - ЦРО ДУМК

Qarasuvbazarnıñ merkeziy camisinde oksigen kontsentratorları mevcut (FOTO)

Опубликовано:

Qarasuvbazar iş adamları koronavirus hastalığı sebebinden acele tedaviylenüvde muhtac olğan insanlar içün oksigen kontsentratorlarını satın aldı, olar Qarasuvbazarnıñ merkeziy camisinde bulunmaqta. Yerli din cemiyetiniñ başlığı Ablâkim Azizovnıñ sözlerine köre, Qarasuvbazarnıñ iş adamları ve yerli din cemiyet muhtac hastalarğa yardım etmege tırışalar. "Vaziyet pek ağır, insanlar qorantalarnen hastalana, belli olğanı kibi, virus oksigen yetişmemezligine sebe pola, hastalar nefes alıp olamay. Bizim iş adamlarımız ve cemaatımız muhtac hastalarğa yardım etmege tırışalar", – dedi Ablâkim Azizov. Oksigen kontsentratorları bedava olaraq acele yardım köstermek içün belli bir vaqıtqa berilecek. Nevbetteki adres boyunca muracaat etmek mümkün: Qarasuvbazar ş., Lunaçarskiy soq., 16, Refat Veliulla adına merkeziy cami. Telefon: +7978 215 2451 Ablâkim Azizov. Qırım MDİ matbuat hızmeti

Qırım milletlerara munasebetler boyunca devlet komitetinde diniy teşkilâtlarnıñ vekilleri ile antikovid tedbirleri muzakere etildi (FOTO)

Опубликовано:

Kezlev bölgesiniñ baş imamı Eskender Memetov Qırımnıñ diger dinler vekillerinen beraber diniy teşkilâtlarda ve müessiselerde antikovid tedbirlerniñ teşkil etilüvi boyunca muşaverede iştirak etti. Muşavere Milletlerara munasebetler boyunca devlet komitetinde onıñ başlığı Ayder Tippa reisliginde olıp keçti. İşbu iş toplaşuvı koronavirus infektsiyasınıñ profilaktikası boyunca devlet tevsiyeleriniñ bildirilmesi munasebetinen olıp keçti. Ayder Tippa Qırım cumhuriyetiniñ çeşit din vekillerine muracaat etip, ibadet yerlerine kelgen insanlarğa nevbetteki malümatnı yetkizmege rica etti. Qırım Cumhuriyeti Başlığınıñ 2021 senesi, oktâbr 20 tarihlı Fermanına esasen cumhuriyet saasında koronavirus infektsiyasınıñ darqalmaması içün yañı sıñırlanuvlar kirsetile. Din erbaplarına inanğanlarnı kütleviy tedbirlerni keçirmemege çağırmaq ve daimiy şekilde havflı virus hastalığı aqqında añlatuv işini alıp barmaq tevsiye etile. Cami, ibadethane, musulmanlarnıñ memuriy ve diniy tahsil müessiselerini ve teşkilâtlarnı ziyaret etkende, maskanı taqmaq, dezinfektsiya vastalarını qullanmaq, cemaat namazlarında ibadet etkenlerniñ aralarında 1,5 metrlik aralıq qaldırmaq, şahsiy namazlıqlarnen kelmek tevsiye etile. Qoltutuv ve quçaqlaşuvdan vazgeçmege, cenaze ve dua merasimleriniñ vaqıtını mükün olğanı qadar qısqartmaq rica etile. Bundan da ğayrı, özlerini ve etraftakilerni hastalıqtan qorçalamaq içün vatandaşlarğa aşılanuvdan keçmek tevsiye etildi. Farqlı tedbirler keçirilgende, Q-kod ya da keçirilgen kövid hastalığı aqqında sertifikatnı, yahut da aşılanuv keçirilemeycegi aqqında tibbiy red vesiqası taqdim etilmeli. Yaşı 65 ve daa ziyade olğan insanlarğa kütleviy tedbirlerden vazgeçmege ve izolâtsiyada qalmağa rica etile. Bundan da ğayrı, suvuqlanuv alâmetleri ve hronik hastalıqları olğan insanlarğa kütleviy merasimlerge qoşulmamaq tevsiye etile. Ferman pandemiya devirinde cumhuriyetniñ bütün saasında ükümdedir, onıñ ibadet etkenler tarafından ömürge keçirilmesi yerli diniy teşkilâtlarnıñ mesülietindedir. "İşbu hastalıqnıñ tez süratnen darqaluvını köz ögüne alınaraq, bu doğru bir qarardır. Bugün bizim vazifemiz – işbu tevsiyelerni qatiyen yerine ketirmektir", – dep, qayd etti Ayder Tippa. Dinlerniñ vekilleri işbu sıñırlanuvnıñ ve bugünki künde mezkür hastalıqnen küreş içün yekâne ve effektiv vasta olğan aşılanuvnıñ müimligini qayd ettiler. Hatırlatamız, Rusiye Prezidenti Vladimir Pütin koronavirus infektsiyasınıñ darqaluvını toqtatmaq maqsadınen raatlıq künleri aqqında fermanını imzaladı. Vesiqada: "2021 senesi, oktâbr 30 – noyabr 7 künlerini aylıqlarnıñ saqlanıluvı ile raatlıq künleri olaraq belgilemek", – dep, buyurıla. Akimiyetke şu devirde medeniyet ve sağlıqnı saqlav müessiseleriniñ iş rejimini belgilemek avale etildi. Halqqa açıq akimiyet müessiseleri, diger müessise ve teşkilâtlar işlerini temin etecek insanlarnıñ sayısını belgilemeli. Qırım MDİ matbuat hızmeti [gallery link="file" columns="4" size="medium" ids="51845,51847,51849"]

Şifa ümüti ile! Cumhuriyet bala hastahanesinde güller saçıldı (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresiniñ teşebbüsinen, Aqmescit ve Qırım Yeparhiyasınen beraber Cumhuriyet bala klinik hastahanesiniñ saasında "Ümüt çiçekleri" aktsiyası keçirildi, aktsiya çerçivesinde ineyapraqlı terekler, güller ve çalılıqlar saçıldı. Aktsiya İslâm medeniyeti, ilimi ve tahsiline destek fondunıñ qoltutuvı ile keçirildi. Tedbirde Qırım Müftisiniñ muavini Raim Ğafarov, Aqmescit protoiyereyi İoann, Müftilik ile Aqmescit ve Qırım Yeparhiyasınıñ hadimleri, Qırım Cumhuriyeti milletlerara munasebetler boyunca devlet komitetiniñ ve Aqmescit şeer memuriyetiniñ vekilleri iştirak ettiler. "Balalar – ömürimizniñ çiçekleridir. Çiçekler ise, ümütni temsil ete. Bugün biz ümüt ve merhamet, sevgi, digerlerniñ acısına hassaslıq işançını bağışladıq. Hasta olğan balalarğa acele şifalar tileymiz. Allah olarğa yardımcı olsun. Olarnıñ ana-babalarına ise, sağlıq, sabır ve eyi neticege işanç tileymiz", – dedi Raim Ğafarov. Qırım MDİ matbuat hızmeti [gallery link="file" columns="4" size="medium" ids="51829,51827,51825,51823,51821,51819,51817,51815,51813,51811,51809,51807,51805,51803,51801,51799,51797,51795,51793,51791,51789,51787,51785,51783,51781"]

Qırım Müftisi musulmanlarnı yaqınlaşqan Mevlid-i Şerifnen hayırladı

Опубликовано:

Ürmetli musulmanlar, aziz vatandaşlar! Qırım Cumhuriyeti ve Sevastopol şeeri musulmanları ve öz adımdan sizni kelecek Mevlid-i Şerifnen – Peyğamberimiz Hazret-i Muhammed (s.a.s.) doğğan gecesinen hayırlayım. Bu sene şu mubarek gece oktâbr 17-18 arasındaki gecege doğru keldi. Mevlid-i Şerif – er bir musulmannıñ Allahnıñ Peyğamberi doğğanı munasebetinen quvanç ve şükür duyğanı vaqıttır. Şu mubarek gecede musulmanlar Allahnıñ peyğamberi Muhammedge (s.a.s.) salâvatlar ketire, onıñ peyğamberlik vazifesini hatırlay, Quran-ı Kerimni ve diniy kitaplar oquy, dualar ete. Musulmanlar dinimizce yaşamaları, maneviy olaraq arınmaları ve ilerilemeleri içün Hazret-i Peyğamberniñ sunnetini, onıñ ömür yolunı ögrenmeli. Keliñiz, şu mubarek geceni Quran oqup, Muhammed Peyğamberge salâvatlar ketirip keçireyik, bir-birimizniñ sağlığı ve tuvğan Qırımımızda eyilik olması içün dua eteyik. Yüce Rabbimiz dualarımıznı ve hayırlı amellerimizni qabul etsin, er bir evge rahmet ve bereket bersin! Qırım Cumhuriyeti ve Sevastopol şeeri Müftisi hacı Emirali Ablayev

Aqmescit sakinleri içün yañı elâl “Rayhon” qavehanesi açıldı (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde iş adamı Nurmatov Abdulvohid Abdulhomidoviçke elâllıq sertifikatı berildi. "Rayhon" qavehanesi içün şu vesiqanı Qırım Müftisi hacı Emirali Ablayev taqdim etti. O, iş adamına muvafaqiyetli çalışmalar ve müşterilerniñ işançını coymamaqnı tiledi. "Siz Rabbimiz ögünde mesülietlisiñiz, siziñ işiñiz – Rabbimizniñ razılığını qazanıp, insanlarnıñ eyiligi içün çalışmaqtır. Digerler içün örnek oluñız", – dedi Müfti efendi. "Rayhon" elâl qavehanesi Aqmescit şeeri, Borçoqraq qasabası, Adalet soq., 6-g adresi boyunca çalışa. "Rayhon" qavehanesi – tedbirler, yubileyler, bala bayramları ve diger merasimlerni keçirmek içün büyük azırlanğan büyük bir binadır. Sıcaq mevsimde musafirler çeşmeli ve çiçekli güzel bir azbarçıqta otura bileler. Usta aşçılar sizni şarq ve qırımtatar yemeklerinen, birinci ve ekinci aşlarnen, tandır ve mangal aşlarınen, etli salatlar ve qahvaltılarnen, türlü desertlernen quvandıra bileler. "Rayhon" qavehanesi – raat ve sıcaq müitte qonuşmaq ve raatlanmaq içün güzel bir yerdir. QMDİ matbuat hızmeti

Qalay medresesinde masa üstü tennis yarışı (FOTO)

Опубликовано:

İmam Maturidiy adına Qalay islâmiy ilimler medresesinde I-III kurs talebeleri arasında masa üstü tennis boyunca turnir olıp keçti. Yarışnıñ teşkilâtçıları – medreseniñ ocalarıdır. Turnir eki basamaqtan ibaret oldı – saylav turı ve final. Umumen yarışta 30 talebe iştirak etti. Eñ güzel neticeni üçünci kurs talebesi Seytmer Abdurahimov kösterdi. Ekinci yerni onıñ kursdaşı Seydamet Ebu qazandı. Üçünci yerge ise, birinci kurs talebesi Eskender Ahtemov nail oldı. Turnir ğaliplerini medreseniñ müdiri Edem Lümanov hayırladı. Onıñ qayd etkenine köre, tennis – insannıñ sağlığına müsbet tesir ete ve oña güzel duyğularnı bağışlay. Turnir teşkilâtçısı, medrese ocası Rustem Memetovnıñ aytqanına köre, tennis – tek faal sport çeşiti degil de, dostlarnen birlikte vaqıt keçirmek, birdemlik taqım ruhunı duymaq içün güzel imkândır. Qalay islâmiy ilimler medresesinde sport turnirleri talebeler arasında dostane müitni qurmaq, sağlam ayat tarzına celp etmek ve çeşit sport oyunlarını populârlaştırmaq içün keçirile. İleride de farqlı sport musabaqalarınıñ, meselâ, yaqında masa üstü hokkeyniñ keçirilüvi planlaştırıla. Qırım MDİ matbuat hızmeti [gallery link="file" columns="4" size="medium" ids="51696,51694,51692,51690,51688,51686"]

İçki qasabasınıñ merkeziy camisi Qırım Müftiliginiñ mülkiyetine keçti (FOTO)

Опубликовано:

İçki (Sovetskiy) qasabasında tantanalı müitte merkeziy caminiñ qasaba balansından Qırım Cumhuriyeti ve Sevastopol şeeri musulmanları diniy idaresiniñ balansına keçirilüvi aqqında aqd imzalandı. Teslim aqdını İçki köy şurasınıñ başlığı Yuriy Repiç ile Qırım Müftisiniñ muavini Raim Ğafarov imzaladılar. Vesiqa imzalanğan soñ, Raim Ğafarov rayon musulmanlarını çoq beklenilgen şu vaqianen hayırlap, cumhuriyet ve köy akimiyetlerine semereli işbirlik içün teşekkürler bildirdi. "Maqsadımız – tek diniy binalarımıznı mülkiyetimizge qaytarmaq degil, camilerimiz boş qalmasın, mında yaşı da, qartı da kelsin, ibadetlerini yerine ketirsin, diniy bilgiler alsın, qırşılıqlı yardımlamaqnı ögrensin, maneviy qıymetlerimizge ürmetnen yanaşsın", – dedi Raim Ğafarov. Tedbirde rayonda yaşağan qırımtatarlar bulundı. Vesiqa imzalanğan soñ, olar dua ettiler, bir-birini hayırladılar ve Qırım Müftisi hacı Emirali Ablayevge yapılğan iş içün teşekkür bildirdiler. Qırım MDİ matbuat hızmeti [gallery link="file" columns="4" size="medium" ids="51722,51717,51715,51713,51711,51709,51707,51705,51703,51701"]

Qırım Müftiliginde din ocalarınıñ toplaşuvı olıp keçti (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde İslâm temelleri ve Quran oquvını ögrenken qadın-qız ocalarınıñ iş toplaşuvı olıp keçti. Toplaşuvnı Qırım Müftisiniñ muavini Raim Ğafarov keçirdi. Tedbir devamında ocalar yaz mevsimi devamında ve keçken ayda yapılğan işke yekün çekip, rayonlarda çalışqan İslâm temelleri kursları gruppalarınıñ sayısı boyunca esabat berdiler ve kelecek ayğa planlarnı tizdiler. Bundan ğayrı, ocalar mektep çağındaki ve mektepten evel yaştaki balalar arasında diniy-maarif tedbirlerniñ keçirilüvini muzakere ettiler. Qırım Müftisiniñ muavini Raim Ğafarov din ocalarına muvafaqiyetli çalışmalar tiledi. Qırım MDİ matbuat hızmeti [gallery link="file" columns="4" size="medium" ids="51683,51681,51679,51677,51675,51673,51671,51669,51667,51665,51663"]

Qırım Müftisi Tatarstan Cumhuriyeti baş naziriniñ muavininen körüşti (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde Qırım Müftisi hacı Emirali Ablayev ve Tatarstan Cumhuriyeti akimiyetiniñ baş naziri muavini, Bütündünya tatarlar kongressiniñ Milliy Şurası başlığı Vasil Gabtelgayazoviç Şayhraziyevnen körüşti. Körüşüv devamında Bütündünya kongressiniñ rehberi Qırım Müftisine İtil boyu Bulğarnıñ İslâmnı qabul etüviniñ 1100-yıllığınen bağlı tantanalı tedbirleriniñ azırlanuvı aqqında tarif etti. Vasil Şayhraziyev Qırım Müftisini 2022 senesi mayıs ayında Tatarstan Cumhuriyetinde ötkerilecek işbu merasimlerde iştirak etmesi içün davet etti. Müfti efendi, öz nevbetinde, Qırımda İslâm medeniyeti mirasına ait abidelerniñ saqlanıluvı boyunca planlarınen paylaştı, bundan da ğayrı, Aqmescitte Büyük Cuma caminiñ qurucılığı aqqında tarif etti. Körüşüv çerçivesinde taraflar umumiy leyhalarını, hususan, diniy, maarif ve bayram tedbirlerniñ keçirilüvini muzakere ettiler. Qırım Cumhuriyeti ve Sevastopol şeeri Müftisi hacı Emirali Ablayev Vasil Şayhraziyevge ziyareti içün teşekkür bildirdi. "Ğayet faydalı, manalı ve yapıcı oldı", – dedi Müfti efendi Vasil Şayhraziyevge. Al-ı azırda Tatarstan Cumhuriyeti baş naziriniñ muavini Qırımda dostane ziyaret ile bulunmaqta. Qırım MDİ matbuat hızmeti [gallery link="file" columns="4" size="medium" ids="51657,51649,51647"]

Qırım Müftisiniñ Ocalar kününen hayırlavı

Опубликовано:

Ürmetli ocalar! Qırım Cumhuriyeti ve Sevastopol şeeri musulmanları diniy idaresi adından ve şahsen öz adımdan Sizni zenaat bayramıñıznen hayırlayım! Şu müim künde sizni aydın ve güzel bayram munasebetinen tebrikleyim! Siziñ zenaatıñız – ğayretleriñiz sayesinde bilgige sevgi aşlağan, yañı ilimlerni ögrenmege istek doğurğan bir meslek, bir ğonül alıdır. İlim ve bilgi – Yüce Rabbimiz tarafından berilgen bir nimettir, insaniyet ise, ileri ketmesi içün ocalarğa minnetdar olmalı. İslâm medeniyetinde oca zenaatı eñ müim ve büyüktir, çünki cemiyetniñ maneviyatı ocanen bağlı, onıñ tesiri bütün cemiyetni, milletni ve, atta, bütün dünyanı qavrap ala. Ocanıñ cemiyet ve Rabbimiz ögünde büyük mesülieti bar – talebelerine doğru bilgi bermek ve güzel, liyaqatlı nesilni terbiye etmektir. Men, oca zenaatını saylağan er kesge Rabbimizniñ rahmetini ve razılığını qazanmasını tileyim, maarif yolunda yapqan emekleri içün Allah olarnı mukâfatlandırsın. İnsan içün emeginiñ neticelerini körmek ve olarnen paylaşmaq – büyük bir bahttır! Allah Sizge qaviy sağlıq, qorantalarıñızğa amanlıq ve muabbetlik bersin, işiñizde muvafaqiyetler ve istidatlı talebeler nasip eylesin! Qırım Müftisi Hacı Emirali Ablayev

Qırım Müftiliginde daa bir “Elâl” sertifikatı berildi

Опубликовано:

Qırım Cumhuriyeti ve Sevastopol şeeri musulmanları diniy idaresinde "Shukur" ticariy markasınıñ vekiline elâllıq sertifikatı berildi. Elâllıq sertifikatsiya ve standartizatsiya vesiqası "Shukur" TM vekili Bucurova Sadet Sabriyevnağa Qırım Müftisiniñ muavini Ayder İsmailov tarafından taqdim etildi. O, cemiyetniñ eyiligi ve Yüce Rabbiniñ razılığı içün muvafaqiyetli çalışmalar tiledi. "Elâl" sertifikatı – Rabbimiz ögünde mesüliet ve insanlar içün hayırlısını yapmaq istegidir. Allah işiñizde yardımcı olsun", – dedi Ayder İsmailov. "Shukur" TM konditer mahsulatlarını ve tatlılıqlarnı azırlap sata: yüzüm qurusı ve şokoladlı keksler, mürebbeli boynuzlar, penirli haçapuri, baqlava, indistan baqlavası, çaq-çaq. "Shukur" TM-niñ istihsal atelyesi Aqmescit şeeri, Glinka, 55 adresi boyunca yerleşe. Qırım MDİ matbuat hızmeti

Qırım Müftiligi ocalar arasında Abdul Teyfuq adına futbol turnirine destek kösterdi (FOTO)

Опубликовано:

Aqmescitte umumtahsil mektepleriniñ ocaları arasında Sovetler Birliginiñ Qaramanı Abdul Teyfuq adına futbol turniri olıp keçti. Yarış Ocalar kününe bağışlanıp keçti. Futbol yarışı ötkerilmesiniñ teşebbüsçisi tarihçı, cemaat erbabı Asmanov Reşat Rasuloviç Qırım Cumhuriyeti ve Sevastopol şeeri musulmanları diniy idaresiniñ destegi ile teşkil etti. Turnir Qırım Cumhuriyetiniñ tahsil, ilim ve yaşlar nazirligi, Qırım medeniyet nazirligi ve Qırım Cumhuriyetiniñ futbol birleşmesiniñ qol tutuvı ile ötkerildi. Turnirde Aqmescit, Bağçasaray, Qarasuvbazar, Qurman, Krasnoperekopsk rayonlarınıñ ocaları iştirak etti. Yarış başlanmadan evel selâmlav sözünen Qırım Müftisiniñ muavini Ayder İsmailov çıqışta bulundı. O, yarış iştirakçilerini Ocalar kününen hayırlap, oca zenaatı er zaman eñ müim zenaatlardan biri olğanını ayrıca qayd etti. "Ulu Vatan cenkinde ocalar büyük isse qoşqanınen ğururlanam, bugün de biz Sovetler Birliginiñ qaramanı Abdul Teyfuqnı añamız. O da oca edi. Yaş nesilge vatanperverlikni, diniy degerlerni aşlamaq, qaramanlarımıznı populârlaştırmaq – bizim maqsadımızdır, ve biz, Qırım musulmanlarınıñ diniy idaresi olaraq, şu hayırlı işke öz issemizni qoşamız", – dedi Ayder İsmailov. Bundan da ğayrı, o, tedbirni teşkil etmege yardım etken er kesge ve şahsen Reşat Rasuloviç Asmanovğa teşebbüsi içün teşekkür bildirdi. İcadiy taqımlarnıñ iştiraginen olıp keçken qısqa kontsertten soñ turnir başlandı. Oyun eki meydanda keçirildi, taqımlar bir-birine kirişip, ardı-sıra gol urulacaq allarnı kösterdiler ve gollar urdılar. Turnirniñ neticesinde ğalipler belgilendi. Sovetler Birliginiñ qaramanı Abdul Teyfuq adına cumhuriyet turniriniñ ğalip taqımı – Qarasuvbazar rayonınıñ ocaları oldı. Ekinci yerni Qurman rayonınıñ ocaları, üçünci yerni Kezlev rayonınıñ ocaları qazandılar, dörtünci yerge ise, Canköy rayonınıñ ocaları nail oldı. "Bütün taqımlar yahşı azırlandı, oyun meraqlı oldı, er şey dostane müitte keçti. Bu güzel futbol yarışı oldı", – dedi Reşat Asmanov. Buña ilâve olaraq, o, Qırım Müftiligine destegi içün teşekkürini bildirdi. Abdul Teyfuq adına ocalar arasında futbol yarışı Qırım Cumhuriyeti futbol federatsiyasınıñ destegi ile bundan soñra er yıl keçirilecektir. İhtar: Abdul Teyfuq Amitoviç 1915 senesi Tavriya güberniyası Yalta uyezdiniñ Partenit köyünde, 1904-1905 seneleri olıp keçken rus-yapon cenki iştirakçisiniñ qorantasında dünyağa keldi. Milliyeti – qırımtatar. Partenitte sekiz yıllıq mektepni bitirgen soñ, 1935 senesi Yalta pedagogik tehnikumını yekünledi, soñra ise, 1939 senesi M.V. Frunze adına Qırım devlet pedagogika institutınıñ qırımtatar filologiyası fakultetinde tahsil aldı. 1937 senesinden başlap, oquşnen birlikte oca olıp çalıştı, Aluşta rayonında mektep müdiri ve mektep inspektorı edi. 1941 senesinden başlap, Ulu Vatan cenkinde iştirak etti. 1943 senesi dekabr 20 künü Sovetler Birliginiñ qaramanı unvanını aldı. 1945 senesiniñ mart ayında Lehistandaki uruşlarda elâk oldı. Qırım MDİ matbuat hızmeti [gallery link="file" columns="4" size="medium" ids="51622,51618,51616,51620,51614,51612,51610,51608,51606,51604,51602,51600,51598,51596,51594,51592,51590,51588,51586,51582,51580,51578,51576,51574,51572,51570,51568,51566,51564,51562,51560,51558,51556,51554,51552,51550,51548,51546,51526,51522,51520,51518,51504,51496,51498"]