Haberler - Page 17 of 55 - ЦРО ДУМКЦРО ДУМК | Страница 17

Пн

13

июля

22
Зуль-къаде
1441 | 2020
Утр.3:09
Вос.4:59
Обед.12:54
Пол.16:56
Веч.20:38
Ноч.22:28
Времена намазов
Календари 2020г

Намаз

Haberler - Page 17 of 55 - ЦРО ДУМК

“Kelinler mektebi” kursı yekünlendi (FOTO)

Опубликовано:

Qırım müsulmanları diniy idaresinde "Faydalı ilim" leyhası çerçivesinde kelecekte kelinler olacaq qızlar içün "Kelinler mektebi" kursı tantanalı müitte yekünlendi. "Kelinler mektebi"nde 16 yaşından başlap 15 qız iştirak etti. "Mektep…" çerçivesinde qızlar bir sıra trening, lektsiyalar ve seminarlar diñlediler. Kurs 8 modulden ibaret oldı. Er bir modulge qoranta uquqı ya da qoranta ruhiyatı boyunca mütehassıslar celp etildi. "Faydalı ilim" leyhasınıñ reberi, ilâhiyatçı-ruhiyatçı Zeyneb Bairovanıñ sözlerine köre, teşkilâtçılar daa çoq mevzularnı açıqlamağa tırıştılar. Zeyneb Bairova: "Kelecek ömür arqadaşlarınıñ seçilüvi, sağlam sevgi añlamı ve biri-birine nisbeten tabiy olğan munasebetler, bahtlı qorantanıñ esas qaideleri kibi mevzularğa büyük diqqat ayırıldı", – dep ayttı ve ocalar ömür arqadaşlarınıñ aqları, nikâh ve ayırılıq kibi mevzularnı da aydınlatqanlarını ilâve etti. Kursnıñ soñunda iştirakçilerge Qırım müsulmanları diniy idaresi adından tantanalı müitte bahşışlar berildi, şu cümleden, qoranta uquqı boyunca kitaplar ediye etildi. Tedbir iftarnen yekünlendi. Teşkilâtçılarnıñ sözlerine köre, "Kelinler mektebi" er sene keçirilecektir. QMDİ MDT matbuat hızmeti [gallery link="file" columns="4" size="medium" ids="28464,28462,28460"]

Qırım camilerinde sürgünlik qurbanlarınıñ hatırasına dualar keçirilecek

Опубликовано:

Dua mayısnıñ 18-nde saat 12:00 Qırımnıñ camilerinde keçirilecek. Bu aqta qarar Qırım Müftiligi tarafından qabul etildi. Qırım ve Sevastopol şeeri müsulmanları diniy idaresi vatandaşlarnı duağa qoşulmağa çağıra. Qırım Müftisiniñ muavini Ayder İsmailo:. "Camilerge kelip olamağanlar saat 12:00 qollarını köterip, yaqınlarıñız, tuvğanlarıñız, sürgünlikte elâk olğanlar, Vatanğa qaytıp olamağanlar içün "Fatiha" suresini oqumağa çağıramız", – dep ayttı ve mayısnıñ 18 – qırımtatar milleti içün facialı bir kün olğanını, bu kün dehşetli sürgünlikte elâk olğan insanlarnıñ hatırasına dualar oqulğanını qayd etti. Ayder İsmailov: "Bu kün aqqında hatıranı saqlamaq – ecdatlarımız ögünde olğan borcumızdır. Facia iç bir vaqıt ve bir kimse ile bağlı olıp tekrarlanmasın, dep saqlamaq. Biz Vatanımızdamız ve Qırımnıñ seadeti yolunda ğayretimizde bir olıp, bu dünyağa eñ eyisini ketirmelimiz. İnsanlar buña muhtac", dep ayttı. Mayısnıñ 17-sinde cuma künü cuma namazından evel sürgünlik qurbanlarınıñ hatırasına "Yasin" suresi oqulacaq. QMDİ MDT matbuat hızmeti

Zıncırlı medresede mayıs 18 kününe planlaştırılğan kontsert lâğu etildi, – Qırım Müftiligi

Опубликовано:

Qırım ve Sevastopol şeeri muyuulmanları diniy idaresi bildirgenine köre, mayıs 18 – 19 bağlağan gece devamında keçirilüvi planlaştırılğan "Müzeyde gece" umumRusiye aktsiyası çerçivesindeki Qırım devlet filarmoniyası Kamernıy örekstrniñ kontserti lâğu etildi. Tedbir "Salaçıq" tarihiy-arheologik kompleksiniñ Zıncırlı medrese binasında ötkerilecek edi. Qırım Müftisiniñ muavini Ayder İsmailovnıñ sözlerine köre, Qırım Müftiligi RF DD deputatı Ruslan Balbekke ve Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ reisi Lenur Abduramanovğa, Qırım Cümhuriyetiniñ medeniyet Nazirligi ile mezkür sualniñ çezilüvinde destek köstermek muracaatı ile bulundı. Ayder İsmailov: "Diniy qaidelerge köre, tarihiy şahıslarnıñ mezarları yerleşken  binalarda kontsertlerniñ keçirilüvi yasaqtır. Em de qırımtatar milletiniñ sürgünlik qurbanlarınıñ hatıra kününde… Profil strukturalar ile añlaşma tizildi. Mesele çezildi", – dep ayttı ve  "Müzeyde gece" aktsiyasınıñ programması çerçivesinde Zıncırlı medresede yalıñız ekskursiyanıñ keçirilüvi planlaştırılğanını bildirdi. Malümat: "Müzeyde gece" - halqara medeniy-tasil aktsiyası. 2005 senesi Avropa Şurası Frenkistannıñ teklifi ile er sene halqara aktsiyasınıñ keçirilüvini qabul etti. Al-azırda aktsiyada 40 devletniñ 3500-den ziyade müzey iştirak ete. Bütünavropa aktsiyası Avropa Şurası ve Halqara müzeyler Şurasınıñ (ICOM) teşebbüsi ile mayıs 18 Halqara müzeyler kününe yaqın olğan raatlıq künleri keçirile.  QMDİ MDT matbuat hızmeti

Ramazan – hayır işleri zamanıdır! (FOTO)

Опубликовано:

Aqşeyh rayonınıñ Berezovka köyünde (1945 senesine qadar Smidoviçi) caminiñ qurucılığı devam ete. Yaqında qurucılar plita qoydılar ve camide qadınlar bölügi yerleşecek ekinci qatnıñ temelini yaptılar. Cami lâqayd qalmağan insanlarnıñ sadaqalarına qurula, olar köyde Allahnıñ evi olması içün qolundan kelgenini becereler. Al-azırda cami binasını avanıñ tesirinden – suvuqlar, yağmurlar ve yellerden saqlamaq içün damını yapmaq kerek. Buña sermiya ihtiyacı bardır. Er bir yardım faydalı olur. İnsan kendisi içün yapqan eñ büyük eyiliklerden biri – sadaqadır. Allah, emegi keçken ve  olarnıñ qorantalarından razı olsun. Ramazan – hayır işler zamanıdır! QMDİ MDT matbuat hızmeti [gallery link="file" columns="4" size="medium" ids="28415,28429,28427,28425,28423,28421,28419,28417"]  

İslâm dini aqqında sualler ve cevaplar – Qırım MDİ leyhası

Опубликовано:

Qırım müsulmanları diniy idaresi erkânında faaliyet köstergen "Faydalı ilim" diniy-maarif leyhası Facebook  ve Instagram içtimaiy ağlarında "Sual-cevap" onlayn konsultatsiyasını devam ete. İslâm dinine ait suallerge islâm uquqı magistri, Qırım Müftisiniñ muavini Ayder İsmailov, ilâhiyatçı, Qırım Müftisiniñ muavini Esadullah Bairov, ilâhiyatçı-ruhiyatçı Zeyneb Bairova ve QMDİniñ diger din ocaları cevap bere. Sualler – diniy bilgi almaq içün, eñ güzel vastalardan biridir. Olar insanlarnıñ meraqlarını köstere ve munaqaşa içün zemin azırlay, böyle bilgilerni aqılda qaldırmaq qolaydır. Quran – aynı usulnen bilgi berüviniñ eñ güzel örnegidir, çünki ayetlerde defalarca: "Ve olar senden … aqqında soray" degen sözlerge rastkelmek mümkün. Yani sual bildirile ve soñ cevap berile. Allah: "Özüñiz bilmeseñiz, bilgenlerden sorañız", dep buyurdı  ("Nahl" suresi, 43 ayet). Suallerni bermek, muzakere etmek ve dinni ögrenmek – doğru adımdır. Qoşulıñız, sualleriñizni beriñiz. Suallerni içtimaiy ağlarda @faydalyilim adresi boyunca ve Facebook "Faydalı ilim" saifesinde bermek mümkün. QMDİ MDT matbuat hızmeti

 Moskvada “Ramazan çadırı”nda “Qırım aqşamı” olıp keçti (FOTO)

Опубликовано:

2019 senesi mayıs 8 künü Moskvada, Poklonnaya dağında "Ramazan çadırı"nda toplanğan musafirler muqaddes Ramazan ayınıñ bir iftarını beraber keçirip, qırımtatarlarnıñ medeniyetinen tanış oldılar ve Qırım avasına daldılar. Aqşam, Müftilikniñ faaliyetini açıqlağan mini-filmden başlandı. Musafirlerge, QMDİ "Faydalı ilim" diniy-maarif leyhası, Qırım müsulmanları içün çoq beklenilgen Cuma caminiñ qurucılığı, Qırım ve Sevastopol şeeri müsulmanları diniy idaresiniñ meydanğa ketirilüvi aqqında ikâye ettiler. Medeniy programma devamında "Qırım aqşamı"nıñ musafirleri ögünde ilâhilerni icra etken Bekir Adilov, al-azırla Moskvada akapel icra etilüvi yarışında iştirak etip, Moskvada bulunğan "Qırım qızları" QMPU vokal ansambli ve diger icadiy taqımları çıqışta bulundı. "Ramazan çadırı" musafirlerini Qırım Müftisiniñ muavini Esadullah Bairov selâmladı. O, Qırım müsulmanları diniy idaresi ve şahsen Qırım Müftisi hacı Emirali Ablayevniñ selâmlarını bildirdi ve "Ramazan çadırını" teşkil etken er keske teşekkürler bildirdi. Esadullah Bairov:  "Biz, qırımtatarlarğa, devlet, akimiyet ve Rusiyeniñ diger regionlarından, maneviy liderler tarafından büyük diqqat ayırılğanını köremiz. Qırımda ananeviy islâm, ananeviy qıymetliker ve diniy institutlarnıñ inkişafına diqqat ayırılmaqta.  Anane – bir de bir ğayeniñ asırlar devamında yaşağan şekili, bu adet asırlar devamında pekitildi ve biz, çeşit eksperiment yapmadan, diger yollar qıdırmayıq, çünki islâmnıñ ananeviy añlavını kütken  Ehlü sunna vel cemaat  yolundan ketemiz",  – dep ayttı. Müfti muavini, "Ramazan çadırı"nı teşkil etkenlerge, hususan, diniy lider Ravil Gaynutdinge, Ali Vâçeslavoviç Polosinge ve Rusiyeniñ diger maneviy liderlerine, devlette islâmnıñ inkişafına büyük isse qoşqanları ve Qırım Rusiye cemaatçılığına integratsiya ceryanında Müftilikke destek köstergenleri içün teşekkürler bildirdi. Bundan da ğayrı, Esadullah Bairov, Moskvadaki qırımtatar cemiyetine çeşit meselelerde yardım etkenleri içün, minnetdarlığını bildirdi ve: "Qırımtatarlar birlikte yaşağan millettir. Bu aqta defalarca aytılğan edi. Tarihımız devamında biz farqlı zorluqlardan keçtik, bugün ise kelecegimiz içün qasevet etmege sebebimiz yoq, çünki, birinciden, biz Vatanımızda yaşaymız, ekinciden, aqlarımız qorçalana, biz medeniyetimizni, ananelerimizni ve turmuşımıznı saqladıq. Bu pek müimdir. Biz tilimizni ğayıp etmedik ve onıñ ğayrıdan canlandırılması işinde ğayret kösteremiz. Diniy institumıznı ğayrıdan tikledik, milliy institutlarımıznı ğayrıdan tiklemege tırışamız. Kelecekke quvanç ile baqmalımız, balalarımızğa Vatanğa nisbeten sevgi aşlamalımız ve, eminim ki, kelecegimiz aydın olur", – dep ayttı. Malümat: "Ramazan çadırı" – Rusiye Federatsiyasınıñ Diniy idaresi ve Moskva akimiyetiniñ destegi ile Moskva musulmanları diniy idaresi tarafından teşkil etilgen er senelik medeniy –hayriye leyhasıdır. "Ramazan çadırı" leyhası çerçivesinde Rusiye milliy cumhuriyetleriniñ, yaqın ve uzaq tış memleketleriniñ aqşamları, elâl industriya, tögerek masalar, sağlıqları zayıf olğan insanlar ve saqat olğanlar, veteranlar, arbiyler içün içtimaiy programmalar, mahsus bala künleri ve diger tedbirler keçirile. Moskva şeerindeki "Ramazan çadırı" tedbiri oraza boyu devam etecek. QMDİ MDT matbuat hızmeti [gallery link="file" columns="4" size="medium" ids="28395,28393,28391,28389,28387"]

Qırım Müftiligi – Elektroenergiyasız qalğan Qırım camilerinde yarıq ğayrıdan berilecek – (FOTO)

Опубликовано:

Qırım Müftiliginde, Qırım müsulmanları Diniy idaresiniñ reberligi ve Sudaq rayonınıñ Bogatovka, Bağçasaray rayonınıñ Viktorovka köyü, Aqmescit rayonınıñ Molodöjnoye ve Krasnolesye köyleriniñ din cemiyetleri ile körüşüv keçirildi. Caminiñ vesiqaları resmiyleştirilmegeni içün, elektroenergiyasız qalğan camiler meselesi muzakere etildi. Din cemiyetleri mezkür meseleni çezmek içün, Müftilikke muracaat etti. Bundan da ğayrı, körüşüvde RF Devlet Dumasınıñ deputatı Ruslan Balbek ve milletlerara munasebetler ve sürgün etilgen vatandaşlarnıñ işleri boyunca Devlet komitetiniñ reisi Lenur Abduramanov iştirak etti. Müfti muavini Ayder İsmailovnıñ sözlerine köre, 2014 senesi, Qırım Müftiligi, yarımadada çalışqan ibadet evlerinde vesiqalar resmiyleştirilecegine qadar elektro, gaz ve suv ağlarını söndürmemek ricası ile kefalet mektüplerini yolladı. Amma buña baqmadan, bugünde bugün vesiqalarını resmiyleştirmegen, energiyanen temin etken şirketler ile añlaşmalarnı tizmegen ve borcqa kirgen  din cemiyetleri bar. Bu vaziyet, mezkür camilerniñ elektroenergiyasız qalmasına sebep oldı. Ayder İsmailov: "Bizim tarafımızdan, yerli RES-lerge,  elektroenergiyasız qalğan camilerge, Ramazan ayı devamında yarıqnı bermek ricası ile ve camilerniñ, çalışqan qanunlar mücibi resmiyleştirilmesi şartınen kefalet mektüplerini yolladıq", - dep ayttı. Bundan da ğayrı, Ayder İsmailov, al-azırda, Qırım musulmanları diniy idaresiniñ destegi ile, problemli meseleler olğan camilerde topraq ve inşaat vesiqalarınıñ resmiyleştirilüvi  ve mesken yerlerde din cemiyetleriniñ meydanğa ketirilüvi ve resmiyleştirilüvi başlanğanını bildirdi. RF DD deputatı Ruslan Balbek ve Devlet komitetiniñ başı Lenur Abduramanov ise, öz nevbetinde, elektroenergiya ve cemilerniñ tezleştirilgen resmiyleştirüv meselesinde destek köstermege vade ettiler. Yarıqsız qalğan camilerge elektroenergiya yaqın zamanda qaytarılacaq. QMDİ MDT matbuat hızmeti [gallery link="file" columns="4" size="medium" ids="28375,28379,28377"]  

Kebir camide iftarlar keçirilip başlandı (FOTO)

Опубликовано:

Mayısnıñ 6-sında Ramazan aynınıñ birinci künü Aqmescitniñ merkeziy Kebir camisinde birinci hayriye iftarı keçirildi. İftarğa 250 yaqın insan toplandı. Olarnıñ arasında musulman devletlerinden kelgen Qırım aliy oquv yurtlarınıñ studentleri, yerli cemaat ve Aqmescitke kelgen musafirlerdir. Hayriye iftarından evel oraza tutqan qadın ve erkekler aqşam namazını qıldılar. Bütün Ramazan ayı devamında iftarlar Kebir camide ve Qırımnıñ diger camilerinde de ötkerilecek. Bu sene Muqaddes Ramazan ayı mayıs 6 künü başlandı ve iyünniñ 3 qadar devam etecek. Oraza bayramı ise iyün 4, 5 ve 6 künleri qayd etilecek. Ramazan vaqıtında oraza tutqan musulmanlar künniñ yarıq qısımında aş ve suvdan vazgeçeler. Yüklü ve bala emizdirgen qadınlarğa, yedi yaştan küçük olğan balalarğa, hastalarğa, esli başlı adamlarğa ve yolcularğa oraza tutmaq farz degil. QMDİ MDT matbuat hızmeti [gallery link="file" columns="4" size="medium" ids="28361,28359,28357,28355,28353,28351,28349,28347,28345,28343,28341"]

Къырым Муфтиси Шереметьевода юзь берген фаджианен багълы тазиелерини бильдирди 

Опубликовано:

Къырым Муфтиси хаджы Эмирали Аблаев Москвадаки Шереметьево авалиманында юзь берген къаза къурбанларынынъ къоранталарына терен тазиелерини бильдирди. Фаджиа нетиджесинде 41 инсан эляк олды, онларнен адамлар фаркълы агъырлыкъ севиесинде  яраландылар. «Къырым мусульманлары ве  шахсен озюмнинъ адымдан Шереметьево авалиманында юзь берген къазада якъынларыны джойгъан инсанларгъа тазиелеримни бильдирем. Бу буюк бир аджджы ве биз оны эляк олгъанларынынъ къоранталарынен бирликте пайлашамыз. Аллахтан, якъынларыны джойгъанларгъа сабыр бермесини, зарар корьгенлерге исе тездже тедавийленмесини тилеймиз». КЪМДИ МДТ матбуат хызмети

Къырым Муфтиси Хыдырлез байрамыны зиярет этти (ФОТО)

Опубликовано:

Къырым Муфтиси хаджы Эмирали Аблаев Хыдырлез къырымтатар байрамында иштирак этти. Тедбир майыс 4 куню 2014 сенеси Багъчасарай шеэринде олып кечти. Хыдырлезнинъ итибарлы эйетининъ теркибине Къырым башы Сергей Аксёнов, Девлет Думасынынъ депутатлары Руслан Бальбек ве Наталья Поклонская, КъДЖ Назирлер Шурасынынъ реис муавини Дмитрий Полонский, Къырым Джюмхуриети Девлет Шурасынынъ реис муавини Эдип Гафаров, Девлет комитетининъ реиси Ленур Абдураманов ве Къырымнынъ дигер район ве шеэр башлары кирди. Байрамнынъ ресмий ачылувыны Къырым Джюмхуриетининъ Башы, Назирлер Шурасынынъ реиси Сергей Аксёновнынъ хайырлавындан башланды. Селямлав сёзлеринде Сергей Аксёнов, эр сене бу къуванчлы баарь ве берекет байрамыны къырымтатарларнен бирликте дигер миллет ве дин векиллери де къайд эткени акъкъында айтты. Бундан да гъайры, Къырым Башы, тантаналы тедбирлер миллий ве медений инкишафнынъ дестеги, къырымтатарларнынъ урф-адетлерининъ сакъланувына, барышыкъ ве миллетлерара достлугъына сильтем олгъаныны иляве этти. Бундан да  гъайры, Сергей Аксёнов тедбир тешкилятчыларына, Багъчасарай акимиет векиллери ве район мемуриетлерининъ азаларына, байрамнынъ иштиракчилерине ве Къырым Муфтиси хаджы Эмирали Аблаевгъа тешеккюрлер бильдирди. Къырым мусульманларынынъ Муфтиси хаджы Эмирали Аблаев исе озь невбетинде ветандашларны ве байрам мусафирлерини Хыдырлез байрамынен ве келеджек Рамазан айынен хайырлады. О, Къырым Башы Сергей Аксёнов ве онынъ такъымына, япкъан ишлери ве мувафакъиетли ишбирлик ичюн тешеккюрлер бильдирди. Муфти: «Майыс 6 куню бизде Ораза башлана. Бу дюнья тек эгленджелерден ибарет дегильдир. Биз эпимиз Яратыджымызгъа борджумызны одемек керекмиз. Бизим ичюн энъ къыйметлиси – бирлигимиз, бири-биримизге нисбетен мерхаметли давраныштыр. Бу къырымтатар байрамы, амма биз оны дигер миллет ве дин векиллери иле бирликте къайд этемиз. Илериде исе о бизим бирлигимиз ве достугъымызны темсиль этеджек. Хыдырлез байрамынъыз хайырлы олсун, Къырым топрагъы эр даим берекет толсун», –  деп айтты. Къырым Муфтиси, эйетнинъ теркибинде Хыдырлезнинъ тимсали олгъан эки метрлик джезвенинъ тантаналы ачылувында иштирак этти. Къырым усталары дюньяда энъ балабан джезвени яптылар, онынъ узунлыгъы 2,2 метрдир. О, эски тунчке ошатылгъан мадденден япылгъан, ичине 700 литр, яни 10 бинъ фильджан къавени сыгъдыра. Ресмий къысымдан сонъ эйет, Къырымнынъ фаркълы шеэр ве районларны темсиль эткен чадырларны зиярет этти. Адет узьре, мусафирлерни къырымтатар миллетининъ урф-адетлери, миллий ашхане ве амелий-сюслю санатнен таныш эттилер. Урьметли мусафирлер къырымтатар емеклерининъ дадыны алды, къаве ичти ве къырымтатар медениетинен таныш олдылар. Мейданда емеклер иле чадырлар, балалар ичюн анимацион мейданчыкълар чалышты, истегенлер ат устюнде кезинтини япабильди. Къайд этилюв черчивесинде амелий-сюслю санат усталарынынъ сергиси чалышты, къырымтатар миллий «Куреш» спорт чешити боюнджа ярышлар кечирильди. Бундан да гъайры, байрам мусафирлерини миллий оюнлар, ярышлар, спорт ярышлары (юкнинъ котерилюви, армреслинг) къувандырды. Санада къырымтатар миллий «Хайтарма» ве «Къырым» ансамблининъ артистлери, фаркълы шеэрлер ве районлардан кельген иджадий такъымлар чыкъышлар япты. Тедбир тешкилятчылары – Миллетлерара мунасебетлер ве сюргюн этильген гражданларнынъ ишлери боюнджа Девлет комитети, къырымтатар «Миллет» телеканалы ве «Ватан седасы» радиосы. Хыдырлезнинъ къайд этилюви акъшамгъа къадар девам этти. Фаркълы малюматларгъа коре, байрамгъа 50 бинъге якъын инсан къошулды. Хыдырлез – язнынъ кельгенини темсиль эткен къырымтатар миллий байрамыдыр. КЪМДИ МДТ матбуат хызмети [gallery link="file" columns="4" size="medium" ids="28167,28320,28318,28316,28314,28312,28310,28308,28306,28304,28302,28300,28298,28296,28294,28292,28290,28288,28286,28283,28281,28279,28277,28275,28273,28271,28269,28267,28265,28263,28261,28259,28257,28255,28253,28251,28249,28247,28245,28243,28241,28239,28237,28235,28233,28231,28229,28227,28225,28223,28221,28219,28217,28215,28213,28211,28209,28207,28205,28203,28201,28199,28197,28195,28193,28191,28189,28187,28185,28183,28181,28179,28177,28175,28173,28171,28169"]

Qırım hacıları içün kvotanıñ yarısı toldı (FOTO)

Опубликовано:

Moskvada, Federatsiya Şurasında, Rusiye Federatsiyasınıñ Federatsiya Şurası Reisiniñ muavini İlyas Magomed-Salamoviç Umahanovnıñ yolbaşçılığında Rusiye hacılıq-missiyasınıñ nevbetteki toplaşuvı olıp keçti. Hacılıq-operatorları Hacılıq-2019 senesi hacılarnıñ azırlanuvı boyunca esabat berdiler. Böylece, AVN-Tur Qırım hacılıq-operatorınıñ reisi Artur Reşitovnıñ sözlerine köre, bugünki künge qadar Qırım içün berilgen kvotanıñ (600 yer) yarısı toldı. Mekke ve Medinege barıp, hacılıq ibadetini yerine ketirmege istegenler içün arizalarnıñ qabul etilüvi devam ete. Biletlerniñ 80% satıp alındı, bundan da ğayrı, hacılar içün musafirhanelerde yerler sımarlanıldı. Al-azırda RF Çetel İşleri Nazirligi ile hacılarnıñ pasportlarınıñ yapıluvı boyunca muzakereler yapıla, hacılarnıñ tezleştirilgen şekilde biometrik pasportlarnı almaq içün añlaşmalar imzalana. Bundan da ğayrı, Qırım Cümhuriyetiniñ sağlıqsaqlav Nazirligi ile hacılarnıñ aşlanuvı boyunca añlaşma yapıldı. Aşlanuv Ramazan ayından soñ başlanacaq. 2019 senesi hacılıq mevsiminde Saudiya Arabistanı Qırallığına yolğa çıqmaq -  iyül 23 künü başlanacaq, qaytuv reysleri ise avgustnıñ ekinci yarısına planlaştırılğan.  OOO "AVN TUR" -  QMDİ MDT içün kvota 600 insandan ibaret. Qırım ve Sevastopol şeeri MDİ MDT resmiy turoperatorıdır. QMDİ MDT matbuat hızmeti [gallery link="file" columns="4" size="medium" ids="27863,27859,27861"]

Aqmescitte “Özüñni köster!” bala istidatları yarışı olıp keçti (FOTO)

Опубликовано:

Mezkür yarış, Qırım ve Sevastopol şeeri müsulmanları diniy idaresi erkânında çalışqan "Altın nesil" bala-gençler klubı ve "Büllür" Qırım qadınları cemaat birleşmesi tarafından teşkil etildi. Yarış-festivalde Qırımnıñ farqlı köşelerinden kelgen 35 bala iştirak etti. 5-14 yaşlı balalar 4 nominatsiyada – nutuq sanatı, teatr sanalaştırıluvı, ameliy-süslü sanat, intellektual ve sport yarışlarında istidatlarını numayış ettiler. "Faydalı ilim" oqutuv-maarif leyhasınıñ reberi Zeyneb Bairovanıñ sözlerine köre, Müftilik balalarnıñ oqutuvı ve inkişafına daima ayrı bir emiyetni ayıra. Balalarğa maneviy-diniy ve milliy degerliklerini aşlamaq içün farqlı tedbirlerni keçire. Zeyneb Bairova: "Bu yarış er bir balanıñ istidatları olğanını kösterdi, eñ müimi – onı vaqıtında körmek, balağa inkişaf etmege yardım etmek, özüni köstermege, bilgilerini amelge keçirmege destekçi olmaqtır", - dep qayd etti. Mütehassıs jüri iştirakçilerniñ qabiliyetine qıymet kesti. Neticede ğalebeni nevbetteki iştirakçiler qazandı: Nutuq ve teatr sanatı: Alime Ametova ve Aliye Bebişeva, Santraç yarışları: Seytumer Yakubov, Ameliy-süslü sanat: Meryem Dervişeva. Safiye Ablâzova, Saadet Abdullayeva ve Melek Anafiyeva İ.Gasprinskiy adına Mediamerkezden mahsus bahşışlar aldılar. "Seyircilerniñ ve jüri azalarınıñ alğışı"nı yarışnıñ eñ küçük iştirakçisi beş yaşlı Aybike Bairova qazandı. Festivalge 200 musafir keldi. Teşkilâtçılarnıñ sözlerine köre, istidatlar yarışı er sene keçirilecek. Teşkilâtçılar: "Şimdiden nevbetteki festivalni daa keñiş yapmağa planlaştıramız, daa çoq balalar istidatlarını köstersin, tedbir büyük meydanda qayd etilsin. Onı Bütünqırım yapayıq!", - dep ayttı. Festivalniñ soñunda balalar içün tatlı sofralar donatıldı. QMDİ MDT matbuat hızmeti [gallery link="file" columns="4" size="medium" ids="28115,28113,28111,28109,28107,28105,28103,28101,28099,28097,28095,28093,28091,28089,28087,28085,28083,28081,28079,28077,28075,28073,28071,28069,28067,28065,28063,28061,28059,28057,28055,28053,28051,28049,28047,28045,28043,28041,28039,28037,28035,28033,28031,28029,28027,28025,28023,28021,28019,28017,28015,28012,28010,28008,28006,28004,28002,28000,27998,27996,27994,27992,27990,27988,27986,27984,27982,27980,27978,27976,27974,27972,27970,27968,27966,27964,27962,27960,27958,27956,27954,27952,27950"]