Haberler - Page 16 of 55 - ЦРО ДУМКЦРО ДУМК | Страница 16

Пн

13

июля

22
Зуль-къаде
1441 | 2020
Утр.3:09
Вос.4:59
Обед.12:54
Пол.16:56
Веч.20:38
Ноч.22:28
Времена намазов
Календари 2020г

Намаз

Haberler - Page 16 of 55 - ЦРО ДУМК

Qırım Müftiligi Aqmescitte iftar keçirdi (FOTO)

Опубликовано:

Aqmescitte Qırım ve Sevastopol şeeri musulmanları diniy idaresi tarafından teşkil etilgen iftar olıp keçti. Tedbirde 250 insan toplandı. Olarnıñ arasında milliy areket veteranları, RF DD deputatı Ruslan Balbek, Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ reisi Lenur Abduramanov, Qırım Cumhuriyeti başı erkânında çalışqan qırımtatar halqı Şurasınıñ azaları, alimler, ocalar, jurnalistler, artisler, iş adamları ve siyasetçilerdir. Qadır gecesi arfesinde teşkil etilgen iftar ezan ve duanen başlandı. Qırım Müftisi hacı Emirali Ablayev musafirlerni selâmlap, musulmanlarnı  hayırladı ve Muqaddes geceniñ er bir musulmannıñ ömürinde müimligini ayırıca qayd etti. Diniy lider: "Halqımıznıñ ekseriyeti tuvğan topraqlarında qalıp, doğru seçim yaptı. Vatanına saip çıqmağa isteseñ, namus ve şerefnen çalış, bu baba-dedelerimizden qalğan bir ikmettir. Bunı balalarımız ve torunlarımızğa ögretmesek, milletimizniñ kelecegi yoq. Allah bizge bir çoq imtianlarnı berdi. Neden? Keçmişte olğan hatalardan ibret alınmağanı içündir. Biri-biriñizge hainlik etmeñiz. Eñ müimi, özara duşman olmayıq, o zaman bizni çetten de bir kimse yeñmez. Evleriñizge bereket, milletimizge amanlıq tileyim", - dep ayttı. Programmada "Haytarma" ansambli, QMDİ "Emanet" bala ansambli ve diniy ilâhilerni icra etken Bekir Adilov çıqışta bulundı. Musafirler, Raim Ğafarov tarafından yazılğan ve oqulğan şiirni de sıcaqlıq ile qarşıladılar. QMDİ matbuat hızmeti [gallery link="file" columns="4" size="medium" ids="29060,29058,29056,29054,29052,29050,29048,29046,29044,29042,29040,29038,29036,29034,29032,29030,29028,29026"]

“Yañı baar” – birinci mezunlar bayramı! (FOTO)

Опубликовано:

Aqmescitte "Yañı baar" kursı talebeleri içün mezunlar aqşamı olıp keçti. "Yañı baar" - Qırım ve Sevastopol şeeri musulmanları diniy idaresiniñ "Faydalı ilim" diniy-maarif leyhasınıñ qısmıdır. Balalar ve olarnıñ ana-babalarını oquvnıñ yekünlengeni ile "Faydalı ilim" leyhasınıñ reberi Zeyneb Bairova hayırladı. "Men ocalarımız merkezge tek çalışmaq ve para qazanmaq içün kelgen insanlar olmağanını bilem. Olar öz işine sadıq adamlardır", - dep ayttı Zeyneb Bairova. Bundan da ğayrı, o, Qırım Müftisi hacı Emirali Ablayev ve Qırım musulmanları diniy idaresine leyhanıñ ömürge keçirmege destek köstergenleri ve diger maarif leyhalarını yapmağa imkân bergenleri içün teşekkürler bildirdi. Teşkilâtçılar balalar içün diniy mevzuda yarışlar ve kvest azırladı, yarışlarda olarnıñ anaları da iştirak etti. Kursnıñ neticesinde altı bala Quran oquvına keçti. Bu 4-6 yaşındaki balalardır. Damir Prtıhov, İbraim Prtıhov, Rinat Kurbanov, Alim Kübedinov, Yusuf Ziyani, Osman Seitâgâyev bahşış olaraq Muqaddes kitapnı elde ettiler. Umumen, "Yañı baar"deki derslerni 8 bala yekünledi, olarğa kelecek birinci sınıf talebelerniñ diplomları ve hatıra bahşışları berildi. Bayramnıñ soñunda balalar içün tatlı sofralar donatıldı. "Yañı baar" ocaları iyün ayı devamında çalışacaq yaz lageri aqqında ilân etti. "Yañı baar" kursına yañı qabul etüv mevsimi sentâbrde başlanacaq. QMDİ matbuat hızmeti [gallery link="file" columns="4" size="medium" ids="28888,28890,28892,28894,28882,28880,28876,28886"]

Qırım Müftiligi taqımı mini-futbol boyunca ğalipler Kubogını aldı (FOTO)

Опубликовано:

Qırım Müftiligi Aqmescit şeerinde faaliyet köstergen diniy teşkilâtlar arasında mini-futbol boyunca turnirde iştirak etti. Tedbir, Aqmescit şeerininiñ 235-yıllığına bağışlanıp, maqsadı – farqlı din vekilleri arasında munasebetlerni qaviyleştirmek ve sağlam ayat tarzını populârlaştırmaqtır. Ğalebe içün altı taqım küreşti: Tavriya diniy seminariyası, Qırım ve Sevastopol şeeri musulmanları diniy idaresiniñ "Müftilik" taqımı,  Yedinci kün adventistleri kilsesiniñ "Adventa" taqımı, Qırım yehudiyler cemaatınıñ "Makkabi" taqımı, Yevangeliya hristian-baptistlerniñ "Blagodat taqımı" ve Roma-katolik kilsesiniñ "Kliment" taqımı. Taqım etapından ve yarıfinaldan keçip, "Müftilik" taqımı bir topnı qaçırmadı ve  "Makkabi" taqımını 3:0 esabı ile yeñdi. Turnir ğalibi ve birinci yer içün medaller – "Müftilik" taqımınıñ sport ğalebeleri arasında ekinci altın qazançıdır. 2018 senesi taqım ekinci yerni qazandı. "Müftilik" taqımınıñ idmancısı Raim Gafarov, taqımnıñ raqipleri pek küçlü olğanını qayd etti. O, bütün turnir iştirakçilerine teşekkürler bildirdi ve ileride farqlı din vekilleri arasında yarışlar ananege çevirilecegine ümüt besledi. Raim Gafarov: "Yigitlerimiz Oraza tutqanını köz ögüne alsaq, olar ğayet güzel oynadılar. Bundan da ğayrı, diger taqımlarnıñ yahşı oyunını qayd etmege isteyim. Olar azırlanğanı körüne. Episine aferin!", – dep ayttı. Turnirge yerli akimiyet vekilleri, din cemiyetleriniñ azaları, paytahtnıñ musafirleri ve sakinleri keldi. Aqmescit şeeri iç siyaset departamentiniñ diniy sualler bölügi ve Aqmescit şeer memuriyetiniñ teşkiliy temin etüv apparatı bölüginiñ reberi Vladimir Datskonıñ sözlerine köre, bugünki oyunda ğalebeni kim qazanğanına baqmadan, esas ğalebe – Qırımda yaşağan farqlı din ve millet vekilleriniñ dostane munasebetleridir. QMDİ matbuat hızmeti [gallery link="file" columns="4" size="medium" ids="29014,29012,29010,29008,29006,29004,29002,29000,28998,28996,28994,28992,28990,28988,28986,28984,28982,28980,28978,28976,28974,28972,28970,28968,28966,28964,28962,28960,28958,28956,28954,28952,28950,28948,28946,28944,28942,28940,28938,28936,28934,28932,28930,28928,28926,28924,28922,28920,28918,28916,28914,28912,28910,28908,28906,28904,28902"]

Qırım musulmanları Qadir gecesine azırlana

Опубликовано:

Qırım musulmanları muqaddes Ramazan ayınıñ eñ müim  devamında Leylât -ül-kadr (Qadir gecesi) –gecesini qarşılamaq içün azırlana. Bu sene Qadir gecesi mayıs 31-iyün 01 künlerini bağlağan gece qayd etilecek. Qırım camilerinde Qadir gecesine bağışlanğan mahsus diniy programmalar keçirilecek. Qadir gecesi küneş batuvından başlanıp, tañ atqanına qadar devam ete. İslâm alimleri bu gece, "Qadir gecesi", dep adlandırılğanınıñ bir sıra sebeplerini tahmin ete: "Onıñ küçü ve büyükligi şunda ki, Quran aynı Qadir gecesi eñdirildi. Aynı bu gece bir çoq melekler dünyağa eñe. Yüce Rabbimizniñ bu gece köstergen merhametligini ve bereketiniñ emiyeti başqa künlernen iç qıyaslanmaz. Geceni dualar ile keçirgen insan, Allahnıñ merhameti ile büyük küç ve energiyanıñ saibi ola. Musulman içün eñ hayırlısı Qadir gecesi em yüreginen, em de tilinen tövbe etmektir ve Allah onıñ günahlarını afu etecegine ümütler olur. Bu Gece nafile namazlar qılına, Quran oqula, yaşalğan kün, aylarnıñ yüz bergen hatalar közden keçirile, kelecekte yapılacaq işlerge niyet etile. Allahnıñ Peyğamberi (s.a.s.) dedi ki, "Qadir gecesini Allahnıñ mukâfatına ümütinen keçirgen insannıñ keçken günahları afu etile" (Buhari, 38; Müslim, 760). Başqa bir hadiste deñile ki, Hz. Ayşe Peyğamberden (s.a.s) soradı: "Allahnıñ Peyğamberi, men Qadir gecesiniñ kelgenini bilsem, ne aytmaq kerekim? O, böyle cevap berdi: "Ayt "O, Allah, Sen – Bağışlayıcı, Sen afu etmege sevesiñ. Meni bağışla!" /Allahumme inneke afuvvun, tuhibbu’l-afve fafuanni/ (Tirmizi, İbn Mace, Hakim). QMDİ matbuat hızmeti

Qırım Müftiligi ve Bütündünya qırımtatarlar cemiyeti qadınlar içün iftar keçirdi (FOTO)

Опубликовано:

QC ve Sevastopol şeeri QMDİ "Faydalı ilim" oquv-maarif merkezinde Qırım musulmanları diniy idaresiniñ "Dünya qırımtatarlar Dernegi (cemiyeti)" ("Dünya Kırım Tatar Derneği") ile birlikte teşkil etken tantanalı iftar keçirildi. İftarğa 70 ziyade insan qoşuldı. Olarnıñ arasında "Faydalı ilim" leyhasınıñ ocaları, Qırım Müftiliginiñ hadimleri, "Büllür" Qırım qadınları cemaat Birleşmesiniñ azaları ve diger musafirlerdir. Tedbir, Quran oquluvı ile başlandı. Bundan soñ, musafirlerni Qırım MDİ "Faydalı ilim" leyhasınıñ reberi Zeyneb Bairova selâmladı. Zeyneb Bairova: "Biz Ramazan ayını, o, epimizni birleştirgeni içün sevemiz! Ümüt etemiz ki, birleşken soñ, Allahqa daa yaqın olurmız ve Yüce Rabbimiz tarafından daa ziyade sevilecekmiz! Çünki quvet – birliktedir", – dep ayttı. "Büllür" Qırım musulman qadınları cemaat Birleşmesiniñ reberi Niyara Canbazova iftar musafirlerine hayriye aktsiyalarında ve tedbirlerde faal iştirak etkenleri içün teşekkürler bildirdi ve er keske, Allahtan rahmet ve Allah yolunda yapılğan işte tükenmez küç ve ilham tiledi. İslâm dini esasları ocası Ayşe Duran "İncitme ve incinme" mevzusındaki subetni keçirdi. Aqşam devamında şiirler oquldı, teşkilâtçılar diniy mevzuda viktorinanı keçirdi, ğaliplerge bahşışlar berildi, Qırım musulmanları diniy idaresiniñ "Emanet" bala studiyası musafirlerni, Ramazan aqqında ilâhinen, ana ve Vatan aqqında yırlarnen quvandırdı. İftar samimiy dostane müitte olıp keçti. QMDİ matbuat hızmeti [gallery link="file" columns="4" size="medium" ids="28797,28795,28793,28791,28789,28787,28785,28783,28781,28779,28777,28775,28773,28771,28769,28766,28763,28761,28759,28757,28755,28753,28751,28749,28747,28745,28743"]

Sevastopol turistik şirketi “Elâl” sertifikatını aldı (FOTO)

Опубликовано:

Qırım Müftiligi, "AriadnA-Krım" şirketine (Sevastopol ş.) "Elâl" sertifikatını berdi. Turistik şirket, "Qırım sarayları ve minareleri" turlarını teşkil ete. Turğa Qırımnıñ meşur sarayları ve İslâm medeniyetiniñ abideleri kirmekte. Turistik şirketiniñ Baş müdiri Yelena Odarükqa "Elâl" sertifikatını şahsen Qırım Müftisi hacı Emirali Ablayev berdi. O, turistik şirketiniñ reberi  ve hadimlerine muvafaqiyetler tiledi. Qırım Müftisi: "Qırım bu saada çalışıp başlağanı quvandıra. Ümüt etem ki, "AriadnA-Krım", turistik saada çalışqan teşkilâtlar içün nümüne olur ve munasip yer alır", – dep ayttı Turistik şirketniñ Baş müdiri Yelena Odarükniñ sözlerine köre, bu yönelişte çalışmaq ğayesi 2017 senesi, Sevastopoldeki "Qazan tatarlar ve başqırtlar milliy-medeniy cemiyeti" sayesinde ve Qazan şeerindeki "Elâl-Ekspo" Halqara sergisini ziyaret etken soñ peyda oldı. Yelena Odarük: "Maña Qırım musulmanları diniy idaresine muracaat etmege tevsiye ettiler. Bir qaç ay devamında mütehassıs ile birlikte biz er şeyni yaptıq, sertifikatsiyadan keçtik ve bugün sertifikatnı elde ettik", – dep paylaştı ve mezkür sertifikat Qırımda turizmniñ inkişafı ceetinden meraqlı olğanını qayd etti.  Yelena Odarük: "Mezkür leyha çeşit teşkilâtlarda meraq doğurdı, hususan, Cumhuriyetimizniñ iqtisadiy inkişaf Nazirliginde, çünki bugün, Yaqın Şarqta iqtisadiy faaliyetiniñ farqlı saalarında çeşit meseleler özüniñ al etüvini beklemekte", – dep ayttı. Turistik şirketiniñ reberi Qırımda elâl turizm populâr olacağına ümütini bildirdi ve: "Elâl" sisteması boyunca çalışmağa imkânlar aqqında bilmegen ötel saipleri de sertifikatsiyadan keçer dep, ümüt etem. Bu ğayet prestij olur ve Qırımda elâl turizmniñ inkişafına siltem berecektir", dep ilâve etti. Qırımda sertifikatsiyadan keçken AVN-Tur Qırım hacılıq-operatorı çalışa, şirket Qırım ve Rusiye musulmanlarınıñ Muqaddes Mekke ve Medinege hacılığını teşkil ete. Malümat: "Elâl" sertifikatı -  berilgen hızmetler İslâm qanunları boyunca çalışqanı aqqında vesiqadır, mahsulatlarnıñ üstünde mahsus "Elâl" tamğası bardır. Sertifikatnı alğan istisalcı, hızmetlerni QMDİ tasdiklağan "Elâl" standartları boyunca bermek kerektir. Qırım Cumhuriyetinde teşkerüvlerni keçirmek ve "Elâl" sertifikatını bermek aqqı tek Qırım ve Sevastopol şeeri musulmanları diniy idaresine aittir. "Elâl" sertifikatınıñ çalışqan müddeti – bir yıldır. Bu müddet keçken soñ, ğayrıdan teşkerüvlerkeçirile ve sertifikatnıñ devam etmesi aqqında qararnı alıp, vesiqanı kelecek senege devam ettirmek mümkün. QMDİ matbuat hızmeti [gallery link="file" columns="4" size="medium" ids="28730,28728"]

“Zıncırlı medrese” Qırım musulmanlarına qaytarıldı

Опубликовано:

2019 senesi mayısnıñ 17-sinde Qırım Cumhuriyeti Nazirler Şurasınıñ 584-R Fermanı ile Bağçasarayda Basenko, 57 adresi boyunca yerleşken "Zıncırlı medrese" diniy külliyesiniñ terkibine kirgen mülk Qırım ve Sevastopol şeeri musulmanları diniy idaresine bedava qullanuvğa berildi. Qırım Müftisi hacı Emirali Ablayev, Qırım musulmanları adından Qırım Başı Sergey Aksönovğa alınğan qarar içün teşekkürler bildire. Bundan da ğayrı, Müfti, Zıncırlı medreseniñ Qırım Müftiligine bedava qullanuvğa qaytarılmasınen bağlı olğan destek köstergenleri içün, Qırım Cumhuriyeti medeniyet naziri Arina Novoselskaya ve "Bağçasaray tarihiy-medeniy ve arheologik müzey-qoruğına", minnetdarlığını bildirdi. Qırım Müftisi, RF DD deputatı Ruslan Balbekke ve Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ Reisi Lenur Abduramanovğa teşekkürler bildirdi. "Zıncırlı medrese" musulman aliy oquv yurtı olaraq temeli Mengli Geray tarafından qoyuldı. 1500 senesi tesis etildi. Medrese, Rusiye Federatsiyasında saqlanıp qalğan  eñ qadimiy islâm diniy oquv yurtu sayılmaqta. "Zıncırlı medrese"de bütün musulman dünyasına belli olğan diniy elita terbiye etildi. Medresede logika, arap filologiyası, felsefe, uquq, esap, nutuq, astronomiya ve diger dersler berildi. Medreseniñ toprağında cami, onı qurğan insanlarnıñ, ulu diniy şahıslar ve alimlerniñ mezarları yerleşken. XIX asırnıñ 70-ncı seneleri mında belli qırımtatar maarifçisi İsmail Gasprinskiy rus tili derslerini berdi. Gasprinskiy, külliyeniñ azbarında defn etildi. "Zıncırlı medrese" diniy külliyesi, Rusiye Federatsiyasında, hususan, Qırımda İslâm tasiliniñ inkişafında emiyetli yer tuta. Rusiye Prezidenti Vladimir Pütin, Rusiyede İslâm tasiliniñ ğayrıdan canlanuvınıñ müimligini qayd etken edi. Prezident: "İslâm tasili er vaqıt teren olıp, büyük tarihnıñ saibidir. 1917 senesine qadar Rusiye musulmanlarınıñ ilâhiyatçıları bütün dünyada ürmetli insanlar olaraq tanıldı, olarnıñ fikirlerine büyük qıymet berildi". Devlet Başı, ükümet, Rusiyede islâm tasiline destek köstermege devam etecegini bildirdi. Qırım Cumhuriyeti Nazirler Şurasınıñ mezkür Fermanı RF Prezidenti sözleriniñ güzel tasdiğidir. QMDİ  matbuat hızmeti

Qalay medresesi “Qalay tatili”ne davet ete

Опубликовано:

İslâm ilimleri Qalay medresesinde balalar içün iyünniñ 17-den 30-na qadar "Qalay tatili" tasil-eglence bala meydançığı çalışacaq. Programmada – islâm dini esaslarınıñ ögrenilüvi ve Quran oquvı, bundan da ğayrı, eglence ve sport tedbirleri, viktorinalar ve intellektual yarışlar kirsetildi. 8-15 yaşlı balalar davet etile. Çoq balalı qorantalar ve iyünniñ 1-ne qadar balalarnı yazdırğanlar içün endirimler mevcut. Bala meydançığı Qırım Cümhuriyeti, Canköy rayonı, Mayskoye köyü, Gasprinskiy soqağı, 1 adresi boyunca çalışacaq: Malümat içün telefon: Oğlanlar bölügi:  +79780490932 Qızlar bölügi:   +79780490931 QMDİ MDT matbuat hızmeti  

1944 senesi sürgünlik qurbanlarınıñ hatırasını añıldı (FOTO)

Опубликовано:

Qırım Müftisi hacı Emirali Ablayev, 1944 senesi mayısnıñ 18-de olıp keçken sürgünlik qurbanlarınıñ hatıra tedbirlerinde iştirak etti. Bağçasaray rayonınıñ Süren demiröl stantsiyasında qurulğan hatıra kompleksinde keçirilgen tedbirde, Qırım Başı Sergey Aksönov, Aqmescit Mitropoliti ve Qırım Lazari, RC DD deputatı Ruslan Balbek, Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ Reisi Lenur Abduramanov, yerli akimiyet, farqlı konfessiyalarnıñ vekilleri iştirak etti. Bağçasaray rayonına Aqmescit, Canköy, Qarasuvbazar, Ermeni Bazar ve Aqyar sakinleri, Qırım aliy oquv yurtlarınıñ studentleri ve orta mekteplerniñ talebeleri keldi. Tedbirniñ başında iştirakçiler memorial komplesiniñ bir abidesine demetlerni qoydılar. Mında Qırım halqınıñ yarımadadan sürgün etilgeniniñ 75-yıllığına bağışlanğan "Taqdirler faciası" sergisi açıldı, kontsert-rekviyem ötkerildi. Sergey Aksönov öz çıqışında, sürgünlik faciasınıñ hatırası bütün Qırım sakinlerini birleştirgenini qayd etti. Qırım Başı: "Bugün Qırımımıznıñ tarihında facialı bir kündir. 1944 senesi yarımadada yaşağan bir çoq milletler, şu cümleden, qırımtatarlar qabaatsız azap çekti. Biz, Vatanından mecburen sürgün etilgen ve dehşetli sınavlardan keçken bir çoq insanlarnıñ fotoresimlerini kördik. Er birimiz tarihnıñ qısımı olamız ve öz borcumıznı yerine ketirip, bu qara künlerde can bergen insanlarnı hatırlamaq kerekmiz", - dep ayttı. Bundan da ğayrı, Sergey Aksönov, bugünki künde Qırım, onıñ toprağında yaşağan milletlerniñ birligi sayesinde inkişaf etkenini qayd etti. Qırım müsulmanlarınıñ Müftisi hacı Emirali Ablayev ise, öz nevbetinde, Qırım sakinleriniñ küçü – olarnıñ birliginde olğanını ayttı. Qırım Müftisi: "Hatıra künü bizim yanımızda bütün din vekilleri bar, biz dostane munasebetler içün çoq minnetdarmız ve bizim birligimiz, qara künlerde ve bahtlı künlerde beraber olğanımız – bütün Qırım sakinlerinde aks etilsin. Er bir milletniñ tarihında bahtlı ve qara künler bar. Biz, elbette, tarihımıznı tavsilâtlı şekilde bilmelimiz, lâkin bu tarihqa riayet eterek yaşamamalımız", - dep ayttı. Hatıra kontserti devamında vatanperver şiirler ve yırlar yanğıradı. "Haytarma", "Qırım" folklor ansamblleri, Qırım devlet akademik muzıkalı-drama teatriniñ artistleri çıqışta bulundı. Tedbirniñ soñunda teşkilâtçılar, iştirakçilerniñ tarafından yazılğan arzuları ile ava toplarını uçurttılar. Malümat: 1944 senesiniñ mayıs 18-20 künleri Süren demiröl stantsiyasından Bağçasaray rayonı ve yalıboyuniñ sakinleri, Yaltadan Aqyarğa qadar 75 biñ insan sürgün etildi. Umumen, Qırımdan sürgünlikke 193 biñ insan oğratıldı. QMDİ MDT matbuat hızmeti [gallery link="file" columns="4" size="medium" ids="28648,28646,28644,28642,28640,28638,28636,28634,28632,28630,28628,28626,28624,28622,28620,28618,28616,28614,28612,28610,28608,28606,28604,28602,28600,28598,28596,28594,28592,28590,28588,28586,28584,28582,28580,28578,28576,28574,28572,28570,28568,28566,28564,28562,28560,28558,28556,28554,28552,28550,28548,28546,28544,28542,28540,28538,28536"]

QMPU studentleri “Abdal” müsulman mezarlığında talaqa keçirdiler (FOTO)

Опубликовано:

2019 senesi mayıs 17 künü Qırım müendislik ve pedagogika universitetiniñ studentleri QMPU Studentler Şurasınıñ teşebbüsi ile Aqmescitte "Abdal" müsulman qabristanında ananeviy talaqa keçirdiler. Aktsiya, Qırımdaki milletlerniñ sürgünligi qurbanlarınıñ hatırasına bağışlandı. Studentler mezarlıqnıñ territoriyasını temizlep, qırımtatar halqınıñ ulu şahısları, Vatanğa avdet içün küreşken, medeniyetimiz, tasilimiz oğrunda çalışqan Refat Appazov, Zampira Asanova, Şakir Selim, Yunus Qandım, Ali Alimov ve digerleri yatqan mezarlıqlarını tertipke ketirdiler. Qırım Müftisiniñ yardımcısı, Aqmescit şeeriniñ baş imamı Muhammed İslamovnıñ sözlerine köre, bu teşebbüs, studentlerniñ, yaş nesilniñ ecatlarına, Vatanğa yol açqanlarğa nisbeten ürmetini köstere. Muhammed İslamov: "Men olarnıñ közlerini ve ecdatlarımız aqqında daa ziyade bilmege isteklerini kördim. Eminliknen ayta bilem ki, bizim itibarğa lâyıq yaş nesilimiz bar", - dep ayttı. QMPU rektorı Çingiz Yakubov ise,  hatıra künleri ve bayram künleriniñ arfesinde mezarlıqlarnı temizlemek – studentlerniñ teşebbüsi olğanını qayd etti. Çingiz Yakubov: "Böyle samimiy işler yaş nesil añlı olğanını tasdıqlay. Bu nesil, ecatlarını şeref ile aña ve özleriniñ de hayatiy vazifesini  - yani Vatanda yaşap, icat etmek, inkişaf etmek kerek olğanını yahşı añlay. Yaşlarımız – qaviy ve sağlam kelecegimizdir", dep ayttı. Talaqadan soñ qırımtatar halqınıñ sürgünlik qurbanlarınıñ hatırasına dua oquldı. QMDİ MDT matbuat hızmeti (QMPU matbuat hızmetiniñ fotoresimleri) [gallery link="file" columns="4" size="medium" ids="28672,28670,28668,28666,28664,28662,28660,28658,28656,28654,28652,28650"]

QMPU studenlerine, qırımtatarlarnıñ tarihında 1944 senesi mayısnıñ 18 matem künü aqqında tarif ettiler (FOTO)

Опубликовано:

Qırım Müftisiniñ muavinleri Ayder İsmailov ve Esadullah Bairov, qırımtatar halqınıñ Qırımdan sürgün etilgeniniñ 75-yıllığına bağışlanğan añuv toplaşuvında iştirak ettiler. Tedbir, Qırım müendislik ve pedagogika universitetinde olıp keçti. Tedbirniñ başında Ayder İsmailov sürgünlik qurbanlarınıñ hatırasına dua oqudı. Toplaşuvda, RF DD deputatı Ruslan Balbek, Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ başı Lenur Abduramanov, QMPU Prezidenti Fevzi Yakubov, QC tasil nazirliginiñ vekilleri, tarihçılar-ülkeşınaslar, içtimaiyatçılar, Qırım medeniy-tarihiy miras müzeyiniñ hadimleri, QMPU-nıñ professorları ve ocaları taqımı, aliy oquv yurtunıñ studentleri iştirak etti. Tedbirniñ maqsadı – yaşlarğa mayısnıñ 1944 senesi 18-nde milletimiz yaşağan dehşetli facia aqqında tarif etmektir. Toplaşuv çerçivesinde professor, tarihiy ilimleri doktorı Vladimir Polâkov maruzasınen çıqışta bulundı. O, sürgünlikniñ sebepleri aqqında tarif etip, onı Türkiyede 20-30 ss. olıp keçken vaqialarnen bağladı. Qırımtatarlar Qırımdan sürgün etilgen soñ, yarımadaki vaziyet, Sovet akimiyetiniñ siyasiy planları, birinci köçkenler kim oldı, olarnıñ hatıralarınen tarih ilimleri namzeti Elvina Seitova paylaştı. Qırımtatar tarihiy-medeniy miras müzeyiniñ hadimi Gülnara Ümerova, sürgünlikke oğrağan qırımtatarlar müzeyge bağışlağan eksponatlar aqqında tarif etti. Er bir eksponatnıñ öz kederli tarihı bar. QMPU Prezidenti Fevzi Yakubov ve Qırımtatar müzeyiniñ ilmiy hadimi Mustafa Mustafayev öz hatıralarınen paylaştılar. Bundan da ğayrı, sürgünlikniñ tarihını yazıcı ve şair Ablâziz Veliyev tarif etti. Ayder İsmailovnıñ sözlerine köre, bu kibi tedbirler yaşlar içün pek müim, olar ecdatlarımız yaşağan vaqialarnı ve Vatanğa qaytuvnıñ qıymetini bütünley añlamaq kerekler. Ayder İsmailov: "Biñlernen kederli vaqialar, on biñlernen bozulğan taqdirler, ğayıp olğan isimler, insanlar ve qorantalar… Bunıñ episi milletimizniñ tarihında qara saifedir. Onı unutmaq mümkün degil. Ecdatlarımız ögündeki borcumız – hatıralarnı saqlamaq, bizim borcumız ise onı kelecek nesillerge yetiştirmek, milletimiz ve Vatanımıznı saqlamaqtır", – dep ayttı. QMDİ matbuat hızmeti [gallery link="file" columns="4" size="medium" ids="28706,28704,28702,28700,28698,28696,28694,28692,28690,28688,28686,28684,28682,28680,28678,28676,28674,28504,28502,28495,28493,28491,28500,28497,28485,28487,28489"]

“Dünya – Yaratıcınıñ ediyesidir” dinlerara Keñeşi mayıs 18 matem kününiñ tedbirlerini muzakere etti (FOTO)

Опубликовано:

Qırım Müftisiniñ muavini Ayder İsmailov "Dünya – Yaratıcınıñ ediyesidir" dinlerara toplaşuvında iştirak etti. Tedbir Qırım nazirler Şurasında Qırım Cumhuriyetiniñ Başı Sergey Aksönovnıñ reberliginde keçirildi. Qırım Müftisi Ayder İsmailov, maruzasında, Prezident Vladimir Pütinge, repressiyalarğa oğratılğan milletler aqqında Fermanı ve olarnıñ ğayrıdan tiklenilmesi ve inkişaf etilmesi içün destegi içün teşekkürler bildirdi. Mezkür Ferman tarihiy adaletni ğayrıdan tikledi, halqımıznıñ yerleşüvi ve reabilitatsiya etilgen milletlerniñ er taraflama destegine temel oldı. Ayder İsmailov: "O deşetli vaqialar şaatlarınıñ çoqusı, bütün milletten, aqsız taqılğan qabaatlar alınğanı künlerine qadar yetip kelmegenine yazıqsınamız", – dep ayttı ve Qırım Başı Sergey Aksönov ve Qırımda yaşağan diniy liderlerge  destekleri içün teşekkürler bildirdi.  Ayder İsmailov: "Bizim milletimiz içün böyle accı künde destek köstergeniñiz içün teşekkürler bildiremiz. Bu kün Qırımnıñ bütün ibadet evlerinde sürgün etilgen milletlerniñ hatırasına dualar yapıla. Biz facialı künlerni unutmaymız, hatıralarğa ürmet ile davranamız, kelecekke ümütnen baqmalımız, barışıq ve inkişaf içün çalışmalımız. Eñ esası – em qara, em bahtlı künlerde biz birliktemiz. Demek, Qırımnıñ kelecegi bar", – dep qayd etti . Hatırlatamız, 2019 senesi mayısnıñ 18-nde, qırımtatar halqınıñ, 1944 senesi mayısnıñ 18-nde Qırımdan canavarca sürgün etilgeni munasebetinen añuv duaları keçirilecek. QMDİ MDT matbuat hızmeti [gallery link="file" columns="4" size="medium" ids="28479,28477,28475,28473"]