Haberler - Page 14 of 56 - ЦРО ДУМКЦРО ДУМК | Страница 14

Пн

10

августа

20
Зуль-хидждже
1441 | 2020
Утр.3:58
Вос.5:30
Обед.12:53
Пол.16:45
Веч.20:07
Ноч.21:39
Времена намазов
Календари 2020г

Намаз

Haberler - Page 14 of 56 - ЦРО ДУМК

“Musulman qadınlarınıñ liderlik mektebi” (FOTO)

Опубликовано:

Qırımnıñ Bağçasaray rayonında endi üçünci kere "Musulman qadınlarınıñ liderlik mektebi" adlı üç künlük seminar olıp keçti. Mezkür tedbir, ve Qırım Cumhuriyeti ve Sevastopol şeeri musulmanları diniy idaresiniñ "Büllür" Qırım qadınları Cemaat Birleşüvi teşebbüsi ile keçirile. Bu sefer Bağçasaray rayonınıñ güzel manzaralı yerinde, orta asırlıq Manğup-Qaleniñ yanında ötkerildi. "Musulman qadınlarınıñ liderlik mektebi"niñ teşkilâtçılarıdan biri Zeyneb Bairovanıñ sözlerine köre, bu sene tek Qırımdan degil de, Rusiyede musulman qadınları arasında lider olaraq sayılğan qadınlar iştirak etti. Bundan da ğayrı, yıl-yıldan mektep inkişaf ete, bu sene teşkilâtçılar, iştirakçiler içün daa oñaytlı şaraitlerni teşkil etkenleri bildirildi. Programma üç künden ibarettir. Şahsiy inkişaf, maneviy-ahlâqiy lektsiyalardan ğayrı, iştirakçiler farqlı ögretüv derslerinde iştirak etti. Böyle ders, davet etilgen spikerlerden  ruhiyatçı Maryam Bariyeva tarafından teşkil etildi. Ruhiyatçı, insannıñ özü yapqan qoqlalarğa baqıp, adamnıñ ruhiy portretini tizmege mümkün olğanını tarif etti. İştirakçiler içün de, kendisinde yañı qabiliyetni açmaq maqsadınen daa bir imkândır. Qazan şeerinden kelgen spiker -  marketolog ve biznes-trener Leysan Bariyeva, kendi tecribesinen paylaşmaq içün keldi. O, şahsiy biznesni nasıl etip başlamaq, para qazanmaq ve muvafaqiyetlerge nasıl etip irişmek mevzusını açıqladı. "Büllür" Birleşüviniñ reberi Niyara Canbazovanıñ sözlerine köre, "Liderlik mektebi" qadınlar içün qısqa zamanğa olsa da, qasevetlerini biraz unutmaq, maneviy ceetten daa bir basamaq zenginleşmek ve yañı mearetlerni ögrenmege güzel imkândır. Bundan da ğayrı, iştirakçiler içün eglence-bilgi arttırıcı programma, bu cümleden, Qırımnıñ diqqatqa lâyıq yerlerge ve İslâm medeniyetiniñ abidelerine ekskursiyalar teşkil etildi. Liderlik mektebinde, cemiyette ve şahsiy işlerinde öz liderlik çizgilerini inkişaf etmege maqsad qoyğan qızlar iştirak etti. Olar, bilgilerini ömürge keçirmek içün, energiya, faydalı tevsiye ve, eñ esası, ruhiy destek alıp, evlerine qayttılar. QMDİ matbuat hızmeti [gallery link="file" columns="4" size="medium" ids="31445,31443,31441,31439,31437,31435,31433,31431,31429"]

Rusiye İslâm institutı Qırımdan studentlerini davet ete!

Опубликовано:

Qırım abituriyetleriniñ diqqatına! Rusiye İslâm İnstitutı 2019/2020 oquv yılına abituriyentlerni nevbetteki fakultetlerge davet ete:   İlâhiyat (bakalavr, magistratura); Tilşinaslıq (bakalavr, magistratura); Jurnalistika (bakalavr). Oquv ceryanınıñ bölükleri – kündüzgi ve ğıyabiy. İlâhiyat boyunca, oquv devamında zemaneviy tehnologiyalar vastası ile uzaqtan tasil almaq imkân bar. Oquvnı yekünlegen soñ, devlet nümünesi boyunca diplom berile. Diger yerlerden kelgen studentlerge yataqhanede yer ayırıla. Qırım sakinleri içün imtian 05.08.2019 s. Aqmescit ş., Kurçatov soqağı, 4 adresi boyunca keçirilecek. Tavsilâtlı malümat http://kazanriu.ru saytında aydanlatıla. QMDİ matbuat hızmeti

“Faydalı ilim” ile Qırım seyahatı! (FOTO)

Опубликовано:

Cürçi qasabasınıñ orta mektebi ve rayonnıñ Krestyanovka, Ostrovskoye köyleriniñ talebeleri Bağçasaray şeeri ve Manğup-Qale adlı orta asırlıq şeer-qaleni ziyaret etti. Kezinti, Qırım MDİ "Faydalı ilim" diniy-maarif leyhası çerçivesinde yerli musulman din cemiyeti ve "Faydalı ilim" ocaları tarafından teşkil etildi. Balalarnı baqqan büyüklernen beraber 41 insan, Hansaraynı ziyaret etti, dağlarğa köterildi, Manğup-Qale boyunca kezdi, katamaran ile gölni aylanıp keçtiler. Ekskursiya alıp barıcıları, Qırım hanlığı ve qadimiy Manğup kermanınıñ tarihı aqqında tarif etti, bir çoq suallerge cevap berdi. Teşkilâtçılar: "Biz balalarnıñ tatili meraqlı ve faydalı olsun, dep tırışamız. İleride, Qırımnıñ diqqatqa lâyıq olğan yerlerde ekskursiyanı teşkil etmege isteymiz", – dep ayttı. QMDİ matbuat hızmeti [gallery link="file" columns="4" size="medium" ids="31354,31352,31350,31348,31346,31344,31342,31340,31338,31336,31334,31332,31330,31328,31326,31324,31322,31320,31318"]

Qırım hacıları içün hacılıq boyunca seminar keçirildi (FOTO)

Опубликовано:

İyülniñ 18-nde Aqmescitte, bu sene hacılıqqa baracaqlar içün seminar keçirildi. Aqmescitniñ merkeziy Kebir camisinde 300 yaqın insan toplaştı. Hacılar ögünde Qırım Müftisi hacı Emirali Ablayev çıqışta bulundı. O, musulmanlarğa hacılıqnı yahşı keçip, tuvğanlarına sağ-selâmet qaytmasını tiledi. Bundan da ğayrı, Müfti, musulmanlarnı birlik, muabbet, biri-birine nisbeten diqqatlı olmağa ve er bir vaziyette yardım etmekni tiledi. Qırım Müftisi: "Fitne-fesat çıqarıp, doğru yolnı şaşırğanlardan çetleşiñiz. Qırımdan tış siz Cumhuriyetimizni, milletimizni temsil eteceksiñiz. Bayrağımıznı ğurur ile köteriñiz, milletimizniñ lâyıq evlâdları oluñız. Dünya bizni, dinini, Vatanını ve milletini sevgen aqiqiy musulmanlar olaraq bilsin. Mekke ve Medineniñ muqaddes topraqlarında milletimiz, Vatanımız ve Qırımımız içün dua etmege unutmañız", – dep ayttı. Bundan da ğayrı, Müfti, Qırım musulmanları içün hacılıqnı teşkil etmege destek köstergenlerge, ayrıca, Cumhuriyet reberligine, profil nazirlikler ve komitetlerge teşekkürler bildirdi. Aqmescit şeerindeki Rusiye Çetel İşleri Nazirligi temsilcisiniñ vazifesini eda etken Artöm Berezovskiy hacılıqnıñ muvafaqiyetli olıp keçmesini tiledi. Artöm Berezovskiy: "Eminim, yıl-yıldan müessiseara seviyesinde añlaşıp, bu kibi müsbet tedbirlerniñ teşkil etilüvine destek kösterecemiz. Men Çetel İşleri Nazirligi tarafından er taraflama destek köstermege azırım", – dep ayttı  "Rospotrebnadzor" temsilcisi Sergey Tsıganov hacılarğa nisbeten olğan tibbiy-sanitar talaplar aqqında tarif etti. Bu cümleden, mıtlaqa yapılacaq aşlanuv aqqında, olğan hastalıq ve diagnoz aqqındaki spravka ve lâzim olğan ilâclar cedvelini tasdiqlağan sertifikat mevcut olmalı. Bundan da ğayrı, Sergey Tsıganov, hacılarğa Saudiya Arabistanına alıp kirmege yasaq olğan ilâclarnıñ cedvelinen tanış olmağa tevsiye etti ve: "Unutmañız ki, yolculıqtan qaytqan soñ, 21 kün devamında sağlığıñızğa muqayt olmaq kerek. Alıñız olmasa, öksürük, burun tımavı, içiñiz bozulsa, mıtlaqa ekimge muracaat etmek kerek. Hacılıq devamında, deve sütüni, qaynatılmağan suv içmeñiz, alışmağanıñız yemeklerni aşamañız. Hacılıqnı güzel şekilde keçirip, sağ-selâmet olıp qaytıñız", – dep, ilâve etti. Hacılarğa yolculıqqa eyi tarzda azırlanmaq, vesiqalarnı teşkermek ve devletten çıqmağa yasaqnıñ sebebi olabilecek devlet borclarınıñ barlığını/yoqluğını (kredit, para cezası) teşkermege tevsiye etildi. Seminar devamında QMDİ MDT İslâm ilimleri ocaları, hıcılıq nasıl qısımlardan ibaret olğanını ve neler yapmaq kereklegini añlattılar. Musulmanlarğa, yolğa nasıl etip azırlanmaq ve bütün dünyadan kelgen millionlarnen insanlar bulunğan hacılıqta neler yapmaq/yapmamaq kerekligi aqqında malümat berildi. AVN-Tur hacılıq-operatorınıñ reberi ise, bütün vesiqalarnıñ mevcutlığı aqqında hatırlattı. Qırımdan hacılar iyül 26 künü yolğa çıqacaqlar. Taqımlar 49-50 insandan, şu cümleden, tibbiyet hadimlerinden ve taqım reberlerinden ibaret olacaq. QMDİ matbuat hızmeti [gallery link="file" columns="4" size="medium" ids="31225,31223,31221,31219,31217,31215,31213,31211,31209,31207,31205,31203,31201,31199,31197,31195,31193,31191,31189,31187,31185,31183,31181,31179,31177,31175,31173,31171,31169,31167,31165,31163,31161,31159"]

Zıncırlı medrese maneviyat ve maarif merkezi şanını qaytarmalı (FOTO)

Опубликовано:

Qırım Müftisi ve milletlerara munasebetler ve sürgün etilgen vatandaşlarnıñ işleri boyunca Devlet komitetiniñ reisi Lenur Abduramanov, "Zıncırlı medrese" külliyesiniñ topraqlarını, bu cümleden, Qırım musulmanları diniy idaresine berilgen obyektlerini ziyaret etti. Mezkür obyektler uzun vaqıt devamında vazifesi boyunca qullanılmağanı sebebinden, ayrı binalarda tamir işlerini yapmaq, müendis-kommunikatsion ağlarını tamir etmek ve medrese yanındaki topraqlarnı abadanlaştırmaq kerektir. Hatırlatamız, "Zıncırlı medrese" diniy külliyesiniñ topraqlarında sovetler zamanında ruhiy-nevrologik dispanser yerleşken edi. Bir sıra binalar hastahaneniñ ihtiyaclarına uyğun yapıldı. Qırım Müftisiniñ sözlerine köre, er obyekt mütehassıslar tarafından ögrenilecek ve ileride ğayrıdan tiklenüv işlerini yapmaq içün ekspertiza keçirilecek: "İş pek çoq. Eminim, yerli cumhuriyet akimiyet vekilleri, Bağçasaray tarihiy-medeniy ve arheologik müzey-qoruğınıñ reberligi ile birlikte biz külliyeniñ evelki tarihiy körünüşini ğayrıdan tiklermiz ve, o, kendi çoqasırlıq vazifesini – ananeviy diniy tasil ve maneviy maarif funktsiyasını becermege devam etecek". Hatırlatamız, 2019 senesi mayıs 17 künü Qırım Cumhuriyeti Nazirler Şurasınıñ 584-R Emiri ile Bağçasaray şeeriniñ Basenko soqağı, 57 adresi boyunca yerleşken "Zıncırlı medrese" diniy-medeniy külliyesiniñ mülkü Qırım ve Sevastopol şeeri musulmanları diniy idaresine qullanuvğa berildi. Qırım Müftisi Qırım Başı Sergey Aksönov, QC medeniyet Naziri Arina Novoselskaya ve "Bağçasaray tarihiy-medeniy ve arheologik müzey-qoruqqa" mezkür mülkni QMDİ MDT bedava qullanuvğa berilüvinen bağlı tedbirlerde iştirak etkenleri içün teşekkürler bildirdi. "Zıncırlı medrese" aliy İslâm tasil yurtu Mengli Geray hanı tarafından 1500 senesi quruldı ve Rusiyede saqlanıp qalğan eñ qadimiy İslâm maneviy oquv yurtu sayıla. "Zıncırlı medrese"de bütün musulman dünyasında belli olğan qırımtatar maneviy elita terbiye etildi. Medresede diniy derslerden ğayrı, logika, arap filologiyası, felsefe, uquq, ritorika, esap, astronomiya ve diger dersler oquldı. Medrese topraqlarında cami, onıñ qurucınıñ, meşur din erbapları ve ziyalılarnıñ mezarları yerleşken edi. XIX asırnıñ 70-nci seneleri mında belli qırımtatar erbabı İsmail Gasprinskiy çalıştı, rus tili derslerini berdi. O, külliye topraqlarında defn etildi. QMDİ matbuat hızmeti [gallery link="file" columns="4" size="medium" ids="31148,31146,31144,31142,31140,31138,31136,31134,31132,31130,31128,31126,31124,31122,31120,31118,31116,31114,31112,31110,31108,31106,31104,31102"]

Yaz – yañı bilgiler zamanıdır! (FOTO)

Опубликовано:

Qırım regionlarında camilerniñ yanında yazlıq bala meydançıqları ve lagerleri işini devam ete. Bugünki künde biñden ziyade bala raatlandı ve faydalı bilgi elde etti. Teşkilâtçılar Qırım musulmanları diniy idaresiniñ yardımı ile meraqlı programmanı teşkil etti. Ekskursiyalar, sport oyunları, yarışlar ve seyahatlarnen bir sırada balalar dinimiz aqqında yañı bilgilerni ala, tuvğan tilini, qırımtatar medeniyetini ve urf-adetlerini ögrene. Evlâtlarıñıznı bala lagerine ya da meydançığına yollamağa imkânıñız daa bar. Bunıñ içün yerli imamğa ya da din cemiyetiniñ reisine muracaat etmek kerek. Fotoresimde. Kökköz köyüniñ bala lageridir. "Kütler camisi" adlı tarihiy camide keçirilgen ekskursiyadan devamında, "Musulmanlarnıñ ömürinde camilerniñ emiyeti" seminarı keçirildi. QMDİ matbuat hızmeti [gallery link="file" columns="4" size="medium" ids="31021,31031,31029,31027,31025,31023"]

Qırım Müftiliginiñ “Faydalı ilim” leyhası Türkiyede taqdim etildi! (FOTO)

Опубликовано:

Türkiye Cumhuriyetinde (Kappadokiya ş.), Qırım ve Sevastopol şeeri musulmanları diniy idaresiniñ "Faydalı ilim" diniy-maarif leyhasınıñ taqdimi olıp keçti.  Taqdimname "Biznes/Qoranta/Sağlıq" Halqara qadın biznes-forumı çerçivesinde ötkerildi. Teşkilâtçılar – İslâm biznesiniñ Halqara Birleşmesi ve "Umma" musulman qadınlarınıñ klubıdır. Umumen, forumda farqlı devletlerden kelgen 40 insan iştirak etti. Qırım Cumhuriyetini "Faydalı ilim" leyhasınıñ reberi, ruhiyatçı-ilâhiyatçı Zeyneb Bairova taqdim etti. Forumnıñ iştirakçileri İslâm biznesiniñ alıp baruv meseleleri, zemaneviy musulman qorantasınıñ problemleri ve qadın sağlığınıñ problemlerini muzakere ettiler. Zeyneb Bairovanıñ sözlerine köre, "Faydalı ilim", Rusiye musulmanları arasında diniy maarif saasında qadınlarnıñ tecribesi olaraq taqdim etildi. Zeyneb oca: "Biz "Faydalı ilim"niñ misalinde İslâm formalsiz tasiliniñ inkişafı imkânlarımıznen ve tecribemiznen paylaştıq. Bu bizim içün pek qıymetlidir ve çetelde, Qırım musulmanlarınıñ faaliyetini taqdim etmek – büyük şereftir", – dep ayttı . Forum çerçivesinde cemiyetniñ içtimaiy derecesini yükseltmek içün çalışqan farqlı leyhalarnıñ taqdimi olıp keçti. Hayriye, maarif, musulman biznes-cemiyetleri içün emiyetli olğan qadın inkişaf leyhaları muzakere etildi. QMDİ matbuat hızmeti [gallery link="file" columns="4" size="medium" ids="31037,31035,31039,31041,31043"]

Qırım Müftiligi yaş mütehassıslar ile tekmillendi (FOTO)

Опубликовано:

Qırım ve Sevastopol şeeri musulmanları diniy idaresine yaş ilâhiyatçılar – İsmail Ablayev ve Celil Azizov  – işke qabul etildi. Bu sene yaşlar, tasilini Rusiye İslâm institutınıñ (Qazan ş., Tatarstan) "ilâhiyat" fakultetinde yekünledi. İnstitutqa gençler 2015 senesi QMDİ-niñ yollanması boyunca oquvğa kirdiler. İş faaliyetiniñ başlanuvı ile ballarnı Qırım Müftisiniñ muavini Esadullah Bairov hayırladı. O, Qırım Müftisi adından yaşlarğa milletniñ kelecegi oğrunda semereli çalışmalar tiledi. Esadullah Bairov: "Diniy erbap kibi yüksek unvanğa lâyıq oluñız, insanlarğa eyi fikirler beyan etiñiz, dinimizge sevgi ve işanç aşlañız",  – dep ayttı. Bugünki künde İsmail Ablayev Aqmescitniñ Beloye-5 qasabasında, Celil ise Aqmescit rayonınıñ Sofiyevka köyüniñ camisinde cuma namazını keçire. Balalar Or-Qapu rayonınıñ İşün ve Voinka köylerinden keldi. Olarnıñ sözlerine köre, mektepni bitirgeninen, İslâm ilimleri Qalay medresesinden soñ, Qazan İslâm institutı ekinci evi kibi olğandır. İsmail ve Celil: "Oquv deviri pek meraqlı olıp keçti. Yañı şeer, yañı insanlar, bir din, amma başqa medeniyet. Elbette, yañı bilgiler. İslâm institutında alğan bilgilerden tuvğan Qırımımızda faydalanmağa azırmız. Qırımtatar milletine hızmet etmek, onıñ maneviy derecesini kötermek, alğan bilgilerimiznen paylaşmaq azırmız", – dep ilerideki planlarınen paylaştılar. QMDİ matbuat hızmeti

Qırım Müftiligi Fahri Mustafayevniñ qorantasına taziye bildirdi

Опубликовано:

Qırım Müftisi hacı Emirali Ablayev, cinayetçilerniñ qollarından facialı tarzda elâk olğan Bağçasaray şeeriniñ sakini Fahri Mustafayevniñ qorantasına teren taziyelerini bildirdi. Fahri Mustafayev 2019 senesi iyül 10 künü ğayıp oldı. Saba oña telefon açtılar. O, qorantasına Aqmescitke yol alacağı aqqında ayttı. Biraz vaqıt keçken soñ, oñıñnen bağ coyuldı. Fahri Mustafayevniñ cesedi Bağçasaray rayonındaki Aromatnoye köyünde tapıldı. Fahri Mustafayevniñ qorantası – üç balası, ömür arqadaşı ve esli başlı ana-babaları qaldı. "Bu cinayet bizni şaşırttı. Elâk olğanınıñ qorantasına büyük accı keldi. Facia büyük ğayıptır. Bu accını qorantasınen birlikte paylaşamız ve tuvğanlarına teren taziyelerimizni bildiremiz. Biz olarnen beraber facianıñ ağırısını içimizden keçiremiz ve  baş sağlığı tileymiz. Kerçekten, Allahtan keldik ve Allahqa qaytacamız. Allahtan, merhumnıñ günahlarını af etmege ve onı cennet bağçalarına kirsetmege dua eterek, tileymiz!. Bu künleri vatandaşlarımıznıñ öldürilüvi cinayetleri sebebinden uquqqoruyıcı organlarğa muracaat etip, qabaatlılarnı tapmağa ve olarnı qanun boyunca cezalandırmağa muracaat etemiz. Cinayetçiler qanun boyunca tolusınen ceza çekse, bu kibi cinayetlerniñ ögüni almaq mümkün olur. Diniy noqta-i nazardan ise bir adamnıñ ölümi bile faciadır,  insannı öldürmek – büyük günahtır. Hadiste: "Qıyamet künü yarım söznen bile qabaatsız adamnıñ ölüminen bağlı olğan insannıñ mañlayında "Allahnıñ merhametinden marum qalğan" yazısı olacaq", dep aytıla. Sayğılı vatandaşlar. Bugünki mürekkep vaqıt devamında, insan ömüriniñ qıymeti coyuldı. Öldürüvler, facialar… olarnıñ neticesinde onlarnen qabaatsız adamlar can bere. Bunıñ episi insan ayatındaki degerlerniñ ğayrıdan baqılıp çıqmasına sebep olmalı. Bu dünyadaki hayat tez keçe, er kes kendi areketleri içün mesülietli olacaq. Allah bizni doğru yoldan şaşırtmasın. Amin. Qırım Müftisi hacı Emirali Ablayev  

Qırımda III ananeviy “Musulman qadınlarınıñ liderlik mektebi” olıp keçecek

Опубликовано:

Qırım musulmanları diniy idaresi ve "Büllür" Qırım qadınları cemaat Birleşmesiniñ teşebbüsi ile 2019 senesiniñ iyün 23-25 künleri Qırımda III er yıllıq "Musulman qadınlarınıñ liderlik mektebi" keçirilecek. Forumda yaşı 16-35 arasında olğan musulman qadın-qızları iştirak etecek. "Musulman qadınlarınıñ liderlik mektebiniñ" teşkilâtçısı Zeyneb Bairovanıñ sözlerine köre, bu sene forumda tek Qırımdan degil de, Rusiyeniñ diger regionlarından kelgen musulman qadınları arasındaki liderler iştirak etecek. Bu cümleden, iştirakçiler ögünde Maryam Bariyeva (Moskva), Leysan Bariyeva (Qazan) ve diger spikerler çıqışta bulunıp, qadın ve şahs inkişafı mevzusını açıqlaycaqlar.  "Liderlik mektebi" çerçivesinde meraqlı seminarlar, maneviy-ahlâqiy mevzularda lektsiyalar, diniy ve ruhiy mevzularda subetler, oyunlar, treningler, iş oyunları ve ekskursiyalar keçirilecek. Zeyneb Bairova: "Biz cemaat ayatında ve şahsiy ömürinde liderlik qabiliyetini inkişaf etmege istegen musulman qadın-qızlarını davet etemiz.  Bağçasaray rayonında Mangup-Qale qadimiy şeeriniñ yanında toplaşmağa planlaştıramız. Seminarlardan ğayrı, iştirakçilerni üç künlük  halal raatlıq, maneviy ve şahsiy inkişaf boyunca effektiv treningler bekley", dep ayttı. "Musulman qadınlarınıñ liderlik mektebine" yazılmaq içün kontaktlar: +7(978)8716258 (viber, what’s app).  Yerlerniñ sayısı sıñırlı. QMDİ matbuat hızmeti

Aqmesctte psihologik seminar-praktikum keçirilecek

Опубликовано:

2019 senesi iyülniñ 16-sında Aqmescitte, "Medeniyet erkânında şahıs: özgünlik ve medeniyetara kommunikatsiya" mevzusındaki seminar-praktikum olıp keçecek. Teşkilâtçılar – Qırım ve Sevastopol şeeri musulmanları diniy idaresi ve musulmanlarğa ruhiy destek kösterüv Birleşmesidir. Seminar-praktikum "Seit-Settar"  diniy külliyesinde Aqmescit şeeri, K. Tsetkin, 34 adresi boyunca keçirilecek. Seminar-praktikum saat 15:00 – 18:00 aralarında ötkerilecek. Seminar çerçivesinde iştirakçiler, medeniyetara işbirliginiñ esas ruhiy mehanizmleri ve ömürge keçirüvniñ effektiv usulları ile tanış olacaqlar. Seminarnıñ alıp barıcısı: Pavlova Ölga Sergeyevna, pedagogik ilimleri namzeti, dotsent, musulmanlarğa ruhiy destek kösterüv Birleşmesi reberliginiñ reisi, "Moskva devlet ruhiyat-pedagogik universiteti" FGBOU VO etnopsihologiya ve çoqmedeniy tasilniñ ruhiy problemleri kafedrasınıñ dotsentidir. Meraqlanğanlar davet etile. Qayd etilmek içün telefon nomerası: +79780490951; (Vayber)  +79780178552. QMDİ matbuat hızmeti

Saq rayonındaki Quran oquvı kurslarınıñ birinci mezunları! (FOTO)

Опубликовано:

Saq rayonınıñ Otar Moynak köyündeki camisi erkânında birinci mezunlar Quran oquvı kursları yekünlendi. Saq rayonı ve Kezlev regionı imamınıñ muavini Nariman Mamedaliyevniñ sözlerine köre, şimdilik Quran oquvı kurslarını eki insan keçti – tata- qardaş Elnara ve Edemdir. Balalar, Qırım Müftisi ve QC musulmanları diniy idaresi adından Muqaddes Quran kitaplarını aldılar. Nariman Mamedaliyev: "Balalar kurslarnı muvafaqiyetnen yekünledi, yaqın zamanda İslâm dini esasları ve Quran oquvınıñ nevbetteki kursını başlamağa niyetindemiz, kurslarğa yazılmağa istegenler bar, istegenlerniñ sayısı artqanı quvandıra", – dep ayttı. Cuma namazında Nariman Mamedaliyev, insanlarğa, yaz tatili devamında balaları ve torunlarını Quran oquvı kurslarına yazdırıluvı aqqında beyan etti. QMDİ matbuat hızmeti [gallery link="file" columns="4" size="medium" ids="30902,30900,30898"]