Haberler - Page 13 of 54 - ЦРО ДУМКЦРО ДУМК | Страница 13

Суббота

30

мая

7
Шевваль
1441 | 2020
Утр.3:00
Вос.4:51
Обед.12:46
Пол.16:48
Веч.20:31
Ноч.22:21
Времена намазов
Календари 2020г

Намаз

Haberler - Page 13 of 54 - ЦРО ДУМК

Qırımda tantanalı şekilde İslâm ilimleri Qalay medresesiniñ doğğan künü qayd etildi (FOTO)

Опубликовано:

Aqmescitte Haci İhsan adına İslâm ilimleri Qalay medresesiniñ doğğan künü qayd etildi. Tantanalı tedbir Qırımtatar devlet akademik muzıkalı-drama teatrinde olıp keçti. Bayram merasiminde ürmetli musafirler, regional ve rayon imamları, İslâm ilimleri ocaları, İslâm tasil müessiseleriniñ mezunları iştirak etti. Tedbir, medreseniñ tarihı, onıñ ocaları ve oquv bitken soñ, bilgilerni almağa devam etken, İslâm darqatıluvında öz yerini tapqan mezunlar aqqında vesiqalı filmden başlandı. Bundan soñ, Qırım Müftisi toplanğanlarnı, medreseniñ 20-yıllığınen hayırlap, müessisege ilerilemekni tilerek, medreseniñ yubileyi tek Qırım musulmanları içün müim olğan vaqia olmağanını qayd etti ve Qalay medresesiniñ yigirmi yıllıq faaliyeti devamında diniy tasil ve maarif saasında çoq şeyler yapılğanını ve ileride daa büyük işler yapılacağını bildirdi. Müfti: "Bilgi ve tasilsiz inkişaf olmaycaq", – dep ayttı ve ocalarğa, medresege destek köstergen er keske teşekkürler bildirdi. Bayram künü Qırım musulmanları diniy idaresi ve Qalay medresesiniñ ocalar taqımına Qırım Cumhuriyetinde Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ başı Lenur Abduramanov tarafından hayırlav sözleri aytıldı ve Devlet komiteti ve İ. Gasprinskiy adına Mediamerkezniñ adından Qalay medresesiniñ kitaphanesine Mediamerkez tarafından neşir etilgen kitaplar taqımını ediye etti. Qalay medresesiniñ temelinde turğan reberler, ocaları ve hadimlerine teşekkürnameler berildi. Tedbirniñ güzel devamı olaraq, 2019 senesi medresede oquvını yekünlegen mezunlarğa diplomlarnıñ berilmesi oldı. Dinimizniñ ögrenilüvi saasında kelecekte muvafaqiyetler elde etmek tilegi ile Qırım Müftisiniñ muavini Esadullah Bairov çıqışta bulundı ve farqlı yıllarda medresede tasilini yekünlegen mezunlarğa, ocalarğa ve Qırım MDİ reberlerine teşekkürler bildirdi. Tasil müessisesiniñ müdiri Emirasan Ümerov ise, öz nevbetinde, ocalar taqımı adından bayram tedbirine qoşulğan er keske minnetdarlıq bildirdi. Emirasan oca: "Bu bizim umumiy bayramımızdır. Medresemizniñ kelecegi epimizge bağdılır", – dep ayttı. Musafirler ögünde, Qırım musulmanları diniy idaresiniñ "Emanet" vokal studiyasınıñ küçük solistleri, "Ateş" folklor ansambliniñ erkekler taqımı, dudukta milliy nağmeni çalğan Ruslan Çir-Çir, "Haytarma" ansambliniñ kemanecisi Edem Ablayev, ilâhi icra etken Bekir Adilov çıqışta bulundılar. Şair ve söz ustası Riza Yusuf Vatan aqqında, imam Raim Ğafarov ise medrese aqqında şiirlerni oqudılar. Bayram tedbiriniñ soñunda "Emanet" taqımı "Faydalı ilim"niñ  marşını icra etti. QMDİ matbuat hızmeti [gallery link="file" columns="4" size="medium" ids="30811,30797,30795,30805,30803,30809,30793,30785,30789,30783,30781,30779,30777,30775,30767,30769,30771,30763,30761,30759,30757,30753,30749,30747,30741,30739,30737,30735,30731,30729,30727,30721,30719,30717,30706,30702,30696,30694,30692,30688,30686,30684,30680,30674,30672,30670,30666,30664,30660,30658,30656,30654,30650,30648,30646,30644,30642,30652,30662,30743,30745,30751,30773,30787,30791,30799,30807,30815"]

Qırım Müftiligi mahküm etilgenler içün lektsiyalarnı keçirmege devam ete (FOTO)

Опубликовано:

İyünniñ 27-sinde 2019 senesi Qırım Müftisiniñ yardımcısı, Aqmescit şeeriniñ baş imamı Muhammed İslamov, Aqmescit rayonı, Aqmescit şeeriniñ Merkeziy ve Kiyev rayonlarında ve Qırım Cumhuriyeti ve Sevastopol şeeri FKU Uİİ ÜFSİN cezanıñ yerine ketirilmesi ve cinaiy-uquq qararlarınıñ yerine ketirilmesi bölüginde bulunğan mahküm etilgenler içün lektsiyanı keçirdi. Lektsiyanıñ mevzusı: "Din esaslarınıñ kütülmesi ve ekstremizm, terrorizm darqatıluvınıñ ögüni alınması"dır. Muhammed İslamov, cemiyetten ayırıluvınen bağlı olmağan cezasını çekken insanlar içün lektsiya, seminar ve subetlerniñ esas maqsadı – yaşlarnı yaramay neticelerge ketire bilecek areketlerden saqlamaq ve ekstremizm, terrorizmniñ darqatıluvına yol bermemek olğanını qayd etti. QMDİ matbuat hızmeti

Beloye-5 qasabasında qırımtatar milliy Bayraq künü qayd etildi (FOTO)

Опубликовано:

İyünniñ 26-sında 2019 senesi Aqmescitniñ Beloye-5 qasabasında qırımtatar Bayraq kününe bağışlanğan bayram olıp keçti. Tantanalı tedbirge yerli sakinler ve Aqmescit musafirleri qoşuldı. 150-den ziyade bayram iştirakçisi meraqlı programmanı azırladı, tedbir, balalarnıñ milliy bayraqlar ile tantanalı yürüşinen başlandı. Bundan soñ, 5 metrlik bayraq açıldı, balalar onı bir qaç soqaq boyunca açıp keçtiler, bundan soñ cami yanındaki balalar meydanında bayram kontserti olıp keçti. Balalar milliy bayraq ve Vatanğa bağışlanğan yırlarnı ve şiirlerni icra etti. Teşkilâtçılar olarğa tatlı ziyafet azırladı. Bayram tedbiri yerli din cemiyeti, yerli faaliyetçiler ve qasabanıñ teşebbüsli sakinleri tarafından teşkil etildi. QMDİ matbuat hızmeti [gallery link="file" columns="4" size="medium" ids="30486,30406,30488,30484,30482,30480,30478,30476,30474,30472,30470,30468,30466,30464,30462,30460,30458,30456,30454,30452,30450,30448,30446,30444,30442,30440,30438,30436,30434,30432,30430,30428,30426,30424,30422,30420,30418,30416,30414,30412,30410,30408"]

 Qırım Müftisi vatandaşlarnı milliy Bayraq kününen hayırladı (FOTO)

Опубликовано:

Qırım Müftisi hacı Emirali Ablayev qırımtatar milliy Bayraq kününe bağışlanğan tantanalı tedbirde iştirak etti. Tedbir teşkilâtçıları – Milletlerara munasebetler ve sürgün etilgen vatandaşlarnıñ işleri boyunca Devlet komiteti, "Qırım Cumhuriyetinde qırımtatarlarnıñ regional milliy-medeniy muhtariyeti" cemaat birleşmesi, QC DBM "Milletler dostluğı evi", Qırım Cumhuriyeti Aqmescit şeeriniñ memuriyetidir. Qırım Müftisi vatandaşlarnı ve bayram musafirlerini qırımtatar milliy Bayraq kününen hayırlap, er evge muabbetlik ve bereket tiledi. Qırım Müftisi:  "Biz Allah yaratqan er şeyni sevemiz. Bayraq – milletniñ temsili. Onıñ içün yüreklerimiz samimiy vatanperverler içün açıqtır. Bayrağımızğa deger bergen ve qoruğan, fitne-fesat ve yalandan uzaq turğanlarğa destek kösteremiz. Muabbetlik ve barışıq içinde yaşamağa istegen – qomşusına eki qat büyük barışıq ve baht tilemeli. Allah bizge küç, sabır ve ikmet bersin, balalarımıznıñ ferahlarını ve muvafaqiyetli olğanlarını körmege nasip etsin", - dep ayttı. Bundan da ğayrı, Bayraq kününen vatandaşlarını, milletlerara munasebetler ve sürgün etilgen vatandaşlarnıñ işleri boyunca Devlet komitetiniñ reisi Lenur Abduramanov, Aqmescit şeeri memuriyeti başınıñ muavini Yakub Zeytulayev, Qırım Cumhuriyetiniñ Başı yanındaki qırımtatar halqı Milliy Şurasınıñ Kâtibi Lemara Selendili, "Qırım" regionlarara qırımtatar cemaat areketi Prezidiumınıñ Başı Fevzi Kübedinov hayırladılar. Qırımtatar Bayraq kününiñ qayd etilüvi çerçivesinde avtoyürüş keçirildi. Avtoyürüş iştirakçileri Qarasuvbazar rayonınıñ "Tavrida" yolundaki Aq-qaya yanında toplaştılar. Bundan soñ, avtoyürüş merkeziy avtomagistral yolundan keçti, Aqmescitke kirgen soñ, Pobeda caddesi, "FM" ve "Könnekt Tsentr" taqdim merkeziniñ aylanma yolu, Kiyevskaya soqağı, Moskovskaya meydanı, Kiyevskaya soqağı, Tolstoy adına soqaq, Yu. A. Gagarin adına parkqa qadar yolunı devam etti. Avtoyürüşte farqlı millet vekilleri, istegenler iştirak etti. Gagarin adına parkta milliy ameliy sanat ustalarınıñ işi, milliy üslüpteeşyalarnı taqdim etken çadırlar qoyuldı. Bundan da ğayrı, parkta balalar içün animatorlar çalıştı, bayram musafirleri qırımtatar milliy yemekleriniñ dadını baqtı. Tedbir bayram kontserti ile yekünlendi, musafirler ögünde qırımtatar folklor ansamblleri, milliy oyun taqımları ve qırımtatar yırcıları çıqışta bulundı. Malümat: Qırımtatar milliy Bayrağı künü, iyünniñ 26-sında qayd etile. Qırımtatar bayrağı – mavı tüslü sarı tamğa ile ketendir. Taraq tamğa – Qırımda ükümdarlıq etken Geraylarnıñ aile tamğasıdır, Geraylar sülâlesi onı milliy tamğa olaraq qabul etti.  QMDİ matbuat hızmeti [gallery link="file" columns="4" size="medium" ids="30504,30496,30494,30492,30490,30500,30502,30508,30506"]

Ufada Başqortostan MDİ sabıq reisi Nurmuhamet hazrat Nigmatullin vefat etti

Опубликовано:

Qırım Müftisi hacı Emirali Ablayev ve Qırım ve Sevastopol şeeri musulmanları diniy idaresi Başqortostan musulmanları diniy idaresi ve regionnıñ ümmetine Başqortostan musulmanları diniy idaresiniñ sabıq reisi Nurmuhamet hazrat Nigmatullinniñ vefat etkeni sebebinden teren taziyelerini bildire. Nurmuhamet Nigmatullin 1946 senesi dünyağa keldi, Başqortostan musulmanları diniy idaresiniñ reisi vazifesini 1992 senesinden başlap 2019 senesiniñ aprel ayına qadar eda etti. "Biz Başqortostan dindaşlarımız ile birlikte  Nurmuhamet hazrat Nigmatullinniñ qorantasına, yaqınlarına ve dostlarına teren taziyelerimizni bildiremiz. Bizim samimiy dualarımızda Yüce Rabbimizge, oña nisbeten merhamet köstermek ve cennet bağçalarına kirsetmege dua etemiz. Qırım ve Sevastopol şeeri musulmanları diniy idaresi MDT Reisi, Qırım Müftisi hacı Emirali Ablayev QMDİ matbuat hızmeti

Saq rayonında İslâm esasları kursları açıldı (FOTO)

Опубликовано:

Saq rayonınıñ Zernovoye köyünde erkekler, qadınlar ve balalar içün İslâm temelleri ve Quran oquvı kursları açıldı. Kurslarnı Saq rayonınıñ imamı Mesfer Settarov ve QMDİ din ocası Gülsum Settarova alıp bara. Mesfer ocanıñ sözlerine köre, Zernovoye köyüniñ musulmanları Saq şeeriniñ baş camisine muracaat etip, olarnıñ köyünde İslâm dininiñ esaslarını ögretken kurslarnı teşkil etmege rica ettiler. Mesfer Settarov: "İnsanlarğa, hususan, balalarğa Saq şeerine barmağa uzaqtır. Zernovoye köyü – büyük yerdir, o yerde çoq bala yaşay. Şimdi yaz tatilleri devamında dersler olar içün faydalı olur. Bala gruppasına 15 insan qatnay. Bu pek güzeldir",  – dep ayttı. Bundan da ğayrı, Mesfer oca, kurslar, tahminen, sentâbr ayına qadar çalışacaq, soñra ise mektep cedveline köre, vaqıt deñişecektir. Dersler er bazarertesi künü saat 11:00-13:00 arasında keçirile. QMDİ matbuat hızmeti [gallery link="file" columns="4" size="medium" ids="30375,30383,30381,30379,30377"]

Lâyıq şekilde defn etilüv aqqı (FOTO)

Опубликовано:

Qırım Müftisi hacı Emirali Ablayevniñ avalesi ile, Kezlev şeerinde, Kezlev regionınıñ baş imamı Eskender Memetov ve İsmail bey qasabasında defn etilüv meseleleri ile oğraşqan yerli musulman mezarlığınıñ temsilcilerinen körüşüv olıp keçti. Körüşüvniñ sebebi – yerli mezarlıqta tuvğanınıñ mezarını tapıp olamağan İsmail bey qasabasınıñ yerli sakininiñ muracaatı oldı. Körüşüvde, Kezlev şeer şurasınıñ deputatı Eldar İbragimov, "Abdal" şirketiniñ müdiri Muhammed İslamov, yerli din cemiyetiniñ reisi Seit-Yakub Seitosmanov ve cemiyetniñ diger vekilleri iştirak etti. Toplaşuvda Muhammed İslamov, RF qanunlarına köre, cenazeniñ tertibi ve qaidelerini añlattı. Bundan da ğayrı, qabirniñ baquv şartlarını – qora, baş taşı qoymaq, yazılar, ösümlikler ve saire – açıqladı. Toplaşuv devamında, defn etilüv vaqıtında peyda olğan problemlerni çezmek içün, angi müessiselerge muracaat etmek ve defn etilüv qaideleriniñ bozuluvı yüz berilgeni alda mesüliet aqqında tarif etildi. QMDİ matbuat hızmeti [gallery link="file" columns="4" size="medium" ids="30392,30373,30371,30369,30367,30365"]

Qırım Müftiliginiñ qadınlar leyhası – Rusiyede eñ güzel leyhadır! (FOTO)

Опубликовано:

Qırım ve Sevastopol şeeri musulmanları diniy idaresiniñ "Faydalı ilim" diniy-maarif leyhası endi 2 kere Rusiye Federatsiyasınıñ eñ güzel musulman qadın leyhası olaraq tanıldı. Ğalipler kubogı 2019 senesi iyün 21 künü Moskvada "Aile – İslâm medeniyetiniñ baqışı ile cemiyetniñ içtimaiy institutı olaraq" VII musulman qadınlar teşkilâtlarınıñ Bütünrusiye toplaşuvı devamında berildi. Birinci kubok 2018 senesi berilgen edi. "Aişa" Halqara qadınlar klubı tarafından teşkil etilgen tedbirde Rusiyeniñ 30 regionından kelgen 100-den ziyade qadın teşkilâtınıñ reberleri iştirak etti. Qırım Cumhuriyetini ilâhiyatçı-ruhiyatçı Zeyneb Bairova, sual-cevap diniy rubrikasınıñ alıp barıcısı Niyare Ablayeva ve Qırımdaki musulman blogeri Niyara Nagayeva temsil ettiler. Zeyneb Bairovanıñ sözlerine köre, bu sene eñ güzel musulman qadın teşkilâtları yarışında 13 birleşme iştirak etti. Eñ güzel leyha olaraq "Faydalı ilim" (Qırım Cumhuriyeti) ve Saratov ş. MDİ "Çoqraq" Qadın cemaat teşkilâtı tanıldı. Zeyneb Bairova: "Biz forumğa ciddiy azırlandıq. Qasevet ettik, çünki eñ güzel teşkilât seçilmek kerek edi. Eñ yüksek baalarnı alğanımız içün, pek quvanamız. Bu –ocalarımıznıñ, çalışıp teşkilâtımıznı inkişaf etken insanlarnıñ ğalebesidir. Elbette, daimiy destek ve yardım içün, ğayelerimizni, fikirlerimizni ömürge keçirmege yardım etken Müftimizge – hacı Emirali Ablayevge büyük teşekkürler bildiremiz. Biz bahtlımız!", - dep teessüratlarnen paylaştı. "Faydalı ilim" – faaliyetini 2014 senesiniñ iyül ayında başlağan Qırım ve Sevastopol şeeri musulmanları diniy idaresiniñ diniy-maarif leyhasıdır. "Faydalı ilim" leyhasınıñ ocaları mektepten evelki ve mektep çağındaki balalar içün İslâm dinini ögreten usuliy qullanmalarını işlep çıqara, qadınlar, erkekler ve balalar içün til kursları çalışa. Bundan da ğayrı, leyha çerçivesinde 8-16 yaşlı balalar içün "Altın nesil" intellektual klubı, küçük musulmanlar içün "Yañı baar" mektebi açıldı, "Emanet" vokal studiyası faaliyet köstere, diniy mevzuda farqlı tedbirler, viktorinalar ötkerile. "Faydalı ilim" leyhasında 100-den ziyade qadın din ocası çalışmaqta. İyünniñ 21-nde forum çerçivesinde iştirakçiler aile quruluvı, qoranta munasebetleriniñ qaviyleşmesi ve eyileşmesine tesir etken faktorlar, yaş nesilniñ terbiyelenüvi, qoranta munasebetlerinde musulman qadınınıñ rolü ve ömür arqadaşlarınıñ vazifeleri muzakere etildi. QMDİ matbuat hızmeti [gallery link="file" columns="4" size="medium" ids="30356,30354,30350,30348,30346,30352"]  

Ramazan –eyi işler zamanıdır (FOTO)

Опубликовано:

Muqaddes Ramazan ayı devamında Qırım ve Sevastopol şeeri musulmanları diniy idaresi yerli musulman din cemiyetleri ile birlikte Qırımnıñ farqlı köşelerinde kütleviy iftarlarnı keçirdi. Bundan da ğayrı, "Dünya qırımtatarlar dernegi (cemiyeti)" ("Dünya Kırım Tatar Derneği") ile birlikte "Faydalı ilim" oqutuv-maarif merkeziniñ İslâm dini ocaları, Qırım MDİ "Yañı baar" leyhasınıñ balaları, Kebir camide keçirilgen Ramazan çadırında ve Aqşeyh qasabasınıñ merkeziy camisinde iftarlarnı teşkil ettiler. Türkiye Diniy Fondınıñ iştiragi ile iftarlar Aqmescitte teşkil etildi. İftarlarğa 150-300 insan qoşuldı. Bundan da ğayrı, adet üzre, Ramazan ayı devamında Qırım ve Sevastopol şeeri musulmanları diniy idaresi muhtac olğanlar ve çoq balalı qorantalarğa aşayt mahsulatları ile torbalarnı darqata. Bu sene Qırım Müftiligi Türk Diniy Fondı ile aşayt mahsulatları ile beş yüz torbanı darqattı. Torbağa şeker, pirniç, yağ, kürpeler ve diger aşaytlar kirdi. Hayriye aşayt torbaları Qarasuvbazar, İslâm Terek, Qurman, Cürçi, Aqşeyh, Aqmeçit, Aqmescit rayonlarından muhtac olğanlarğa darqatıldı.  Bundan da ğayrı, yardımnı cemaat faaliyetçileri, ocalar, din ocaları aldı. Ramazan ayı devamında hayriye aktsiyaları er yıl keçirilmekte. QMDİ matbuat hızmeti [gallery link="file" columns="4" size="medium" ids="30303,30301,30299,30297,30295,30293,30291,30289,30287,30285,30283,30281,30279,30277,30275,30273,30271,30269,30267,30265,30263,30261,30259,30257,30255,30253,30251,30249,30247,30245"]

 Qalay medresesinde “Qalay tatili” başlandı!

Опубликовано:

İslâm ilimleri Qalay medresesinde balalar içün "Qalay tatili" tasil-eglence yaz meydançığınıñ tantanalı açıluvı olıp keçti. Meydançıq 2019 senesiniñ iyün 17-30 künleri arasında çalışacaq. Balalarğa İslâm dininiñ esasları, Quran oquvı, ibadetlerniñ qılınuvı ögretilecek. Bundan da ğayrı, balalarnı eglence ve sport tedbirleri, viktorinalar ve yarışlar,  meraqlı kezintiler bekley. Açıluv tedbirinde balalarnı Qırım Müftisiniñ muavini Ayder İsmailov hayırladı. O, balalarğa faydalı ve quvançlı tatiller, ocalarğa ise muvafaqiyetler ve ilham tiledi. Ayder İsmailov: "Balalar – bizim kelecegimizdir. Bugün balalarğa ne ögretsek, yarın onıñ qarşılığını körermiz. Belli ki, Muhammed Peyğamber dedi: "Bir baba balasına güzel ahlâqtan daa yahşı miras qaldırıp olamaz", - dep ayttı. Er bir musulman ana-baba bu hadiske esaslanıp, balağa yüksek ahlâqnı, İslâm temelleri bilgilerini, doğru ve sağlam yaşayış tarzını aşlamaq ve Quran oqumağa ögretmek kerek. "Qalay tatili" - balalar içün yañı bilgilerni almaq, ögrengen malümatlarnı pekitmek, vaqıtnı çağdaşlşarınen keçirmek, yañı dostlarnı tapmaq içün güzel bir fırsattır. QMDİ matbuat hızmeti [gallery link="file" columns="4" size="medium" ids="30318,30316,30314,30324,30320,30322,30332,30330,30326,30328"]

Keriç cezahanesiniñ musulmanlarını Oraza bayramınen hayırladılar

Опубликовано:

Muqaddes Oraza bayramınıñ qayd etilüvi sebebinden Rusiyeniñ Qırım Cumhuriyeti ve Sevastopol şeerindeki ÜFSİN umumiy nizam İK-1 Keriç tüzeltüv cezahanesinde bulunğan musulmanlarnı Oraza bayramınen hayırladılar. Koloniyanı Aqmescit şeeriniñ baş imamı, Qırım Müftisiniñ QC ve Sevastopol şeeri ÜFSİN ile işbirlik boyunca yardımcısı Muhammed İslamov yardımcıları ile ziyaret etti. Koloniyada bulunğan maküm etilgenleri içün 200 kg plov pişirildi, 250 kg tatlılar darqatıldı. Muhammed İslamov Qırım Müftisi adından hayırlav sözlerini seslendirip, cezahanede bulunğanlarğa tezce evlerine, qorantalarına qaytmağa tiledi. Muhammed İslamov: "Qırım musulmanları diniy idaresi ve şahsen Qırım Müftisi adından, vatandaşlarımızğa tezce evlerine, tuvğanlarına qaytmağa, bu devirni deşetli bir tüş kibi unutmağa ve ömürni yañı saifeden başlamağa tileyim", - dep ayttı. Bundan da ğayrı, Müfti yardımcısı, Qırım MDİ adından hayriye aktsiyasında iştirak etken iş adamlarına ve cezahaneniñ memuriyeti ve reberligine bayram tedbiriniñ teşkil etilmesinde yardım etkenleri içün teşekkürler bildirdi. QMDİ matbuat hızmeti

Qırım hacıları içün çetel pasportlarınıñ resmiyleştirilüvi qolaylaştırıldı

Опубликовано:

Çetel pasportlarını almağanlar 2019 senesiniñ iyül 20 kününe qadar, Rusiyeniñ Qırım Cumhuriyeti boyunca UFMS binasında mahsus pencere açıldı. Aqmescit ş., Gagarin soqağı, 18 adresi boyunca muracaat etmek mümkün. Yanıñızda - iç pasportı -toldurılğan anketa - Qırım MDİ MDT resmiy muracaat  olmalı. Tavsilâtlı malümat içün telefon nomerası: +7 978 090 8202 QMDİ matbuat hızmeti