Haberler - ЦРО ДУМКЦРО ДУМК

Четверг

29

июля

19
Зуль-хидждже
1442 | 2021
Утр.3:36
Вос.5:15
Обед.12:54
Пол.16:52
Веч.20:23
Ноч.22:03
Времена намазов
Календарь 2021г

Намаз

Haberler - ЦРО ДУМК

Aqmescitte balalar içün Qurban bayramı keçirildi! (FOTO)

Опубликовано:

Aqmescitniñ Beloye-5 qasabasında Qurban bayramı munasebetinen balalar içün bayram tedbiri ötkerildi. Tedbir teşkilâtçısı – Qırım Cumhuriyeti ve Sevastopol şeeri musulmanları diniy idaresiniñ destegi ile yerli din cemiyetidir. Tedbir cami azbarında keçirildi. Bayram programmasında icadiy taqımlarnıñ çıqışları oldı. Mikrorayonnıñ musafirleri ve sakinlerini Ernes Prtıhovnıñ rehberligindeki "Nesil" ansambli quvandırdı. Emine Asanova "Tım-tım" milliy oyunını icra etti, Mavile Abkerimova milliy yırlar yırlap, er kesni quvandırdı, Asan Bilâlov ise, türkülerinen er kesniñ alqışını qazandı. Beloye-5 qasabasınıñ "İlim çoqrağı" maarif leyhasınıñ balaları Qurban bayramına bağışlanğan şiirler oqudılar, yır ve oyunlar icra ettiler. Balalarnı "Pole çudes" studiyasınıñ animatorları ve balalarnıñ icra merkezinden Robot-transformer eglendirdi. Meydanda hna boyunca master-klasslar keçirildi. Bu balalar içün güzel bir eglence oldı. Tedbirge "Osobıy vzglâd" hayriye fondunıñ balaları davet etildi. Buña ilâve olaraq, tedbirde "Aynur" hayriye fondunıñ rehberi Nazife Abibullayeva iştirak etti. Bayram musafirleri ve iştirakçileri içün güzel bahşışlar azırlandı. Qırım Müftisi adından bayram iştirakçilerini QMDİ tedbirlerni teşkil etüv bölüginiñ rehberi Zenife Ablayeva hayırladı. Buña ilâve olaraq, Aqmescit şeer memuriyeti başlığınıñ muavini İslâm Üseinov da sözge çıqtı. Qırım MDİ matbuat hızmeti [gallery link="file" columns="4" size="medium" ids="50060,50058,50062,50056,50054,50052,50050,50048,50046,50044,50042,50040,50038,50036,50034,50032,50030,50028,50026,50024,50022,50020,50018,50016,50013,50011,50009"]

Kezlev şeer teatrinde Qurban bayramı munasebetinen kontsert keçirildi (FOTO)

Опубликовано:

Kezlev şeer teatrinde Qurban bayramı munasebetinen bayram kontserti keçirildi. Tedbir Quran oqunışı ile açıldı, soñra Kezlevniñ baş imamı Eskender Memetov musafirlerni muqaddes bayramnen hayırladı. Qırım ve Sevastopol şeeri musulmanları Müftisi hacı Emirali Ablayevniñ adından Kezlev sakinlerini QMDİ tedbirler teşkil etüv bölüginiñ rehberi Zenife Ablayeva hayırladı. "Bugün bayramğa bütün qorantalarınen kelgen musafirler bar. Bu ise, balalar adetlerimizge balalıqtan alışqanını köstere. İşte, buña nesilden nesilge aqtaruv deyler", – dedi Zenife Ablayeva. Şeer sakinlerini Kezlev şeer memuriyetiniñ başlığı Roman Tihonçuk ve yerli millet vekili Eldar İbragimov hayırladılar. "Haytarma" ansambli bayram müitini yaratıp, milliy yır ve oyunlarnen çıqışta bulundı, ilâhiyler yırcısı Bekir Adilov musafirlerge muzıkal çıqışlarnı bağışladı. Kezlev şeer memuriyetiniñ başlığı matbuat hızmetiniñ fotoları Qırım MDİ matbuat hızmeti [gallery link="file" columns="4" size="medium" ids="49999,49995,50001,50003,49997,50005,49993,49991,49989"]

Qırım Müftiligi Aqmescit apishanelerinde hayriye aktsiyasını keçirdi (FOTO)

Опубликовано:

Qırım Müftiligi Qurban bayramı munasebeti ile Aqmescitteki № 1 tahqiqat izolâtorında bulunğan tahqiqattan keçkenler ve mahkümler içün hayriye aktsiyasını keçirdi. Qırım Müftisiniñ ÜFSİN ile işbirlik boyunca yardımcısı, Aqmesjit şeeriniñ baş imamı Muhammed İslamov yardımcısı İbraim Zineddinovnen ÜFSİN nezaretinde çalışqan müessiselerge bahşışlarnı ve aşayt mahsulatlarını ketirdi. "Yazıq ki, al-ı azırda pandemiya sebebinden mahkümlerge ve tahqiqattan keçkenlerge kiriş sıñırlıdır, mında qattı karantin kirsetildi, amma biz olarğa aşayt mahsulatları, tatlılıqlar, çay, qave, suv yiberdik. Qırım Cumhuriyeti ve Sevastopol şeeri Müftisi hacı Emirali Ablayevniñ adından olarnı bayramnen hayırlap, hidayet yolunda olmalarını ve tezce tuvğanlarına qaytmalarını tiledik", – dedi Muhammed İslamov. Qırım Cumhuriyeti ve Sevastopol şeeri musulmanları diniy idaresi adından №1 tahqiqat izolâtorı başlığına tedbirniñ keçirilüvinde destek köstergeni içün teşekkür bildirildi. Qırım MDİ matbuat hızmeti [gallery link="file" columns="4" size="medium" ids="49973,49971,49969,49967,49965,49963"]

Qırım Müftiligi mahkümlerni Qurban bayramınen hayırladı (FOTO)

Опубликовано:

Qırım Müftisiniñ ÜFSİN ile işbirlik boyunca yardımcısı, Aqmescitniñ baş imamı Muhammed İslamov yardımcısı İbraim Zinedinovnen birlikte Aqmescitniñ №1 tüzeltüv koloniyasını ziyaret etip, mahkümlernen körüştiler ve olarnı Qırım Müftisi hacı Emirali Ablayev adından Qurban bayramı munasebeti ile hayırladılar. "Mahkümlerge tatlılıqlar, çay, qave, aşayt mahsulatları, suv ketirildi. Olarğa hidayet yolunda olmalarını ve yaqın zamanda sağ-selâmet qorantalarınen qavuşmalarını tiledik. Belâlarğa tüşken vatandaşlarımızğa diqqat ayırmaq kerekmiz, olar özlerini kereksiz ve yañğız duymasınlar", – dedi Muhammed İslamov. Ziyaret devamında Muhammed İslamov bayram namazını keçirip, qomşu arası güzel munasebetler, ürmet ve İslâmda temizlik mevzusında vaaz oqudı. Qırım Cumhuriyeti ve Sevastopol şeeri Müftiligi Aqmescitte çalışqan №1 TK rehberligine bayram tedbiriniñ keçirilüvinde destek köstergenleri içün teşekkür bildire. Apishane ziyareti devamında imam Qırım Müftisi hacı Emirali Ablayev adından tahqiqattan keçkenlerni ve mahkümlerni hayırlap, olarğa qaviy sağlıq, iman, tezce qorantalarınen qavuşmaqnı tiledi. "Pandemiya sebebinden bütün havfsızlıq qaidelerine riayet etildi. Er kesge bayram müitini yetkizdirmek içün mahkümlerge ziyafetler berildi", – dep, qayd etti Muhammed İslamov. Buña ilâve olaraq, №1 tüzeltüv koloniyasında imam tayin etildi, vazifeni mahküm etilgen 65 yaşındaki vatandaş aldı. Qırım MDİ adından oña vazifesini şerefnen becermek tilegi seslendirildi. Qırım MDİ matbuat hızmeti [gallery link="file" columns="4" size="medium" ids="49951,49957,49955,49953"]

Qırım Müftisiniñ Qurban bayramı munasebetinen hayırlavı

Опубликовано:

Ürmetli musulmanlar! Aziz vatandaşlar! Qırım Cumhuriyeti ve Sevastopol şeeri musulmanları diniy idaresi ve şahsen öz adımdan sizni mubarek Qurban bayramınen hayırlayım! Yüce Rabbimizniñ rahmeti ile biz kene musulmanlarnıñ büyük bayramına qavuştıq. Ekinci yıldır toqtamağan koronavirus hastalığı pandemiyası sebebinden bayram alışmağanımız şekilde qayd etile. Artıq ekinci yıldır Qırım musulmanları muqaddes Mekke ve Medine topraqlarına hacılıqnı yapıp olamay. Amma bütün imtianlar Allahtandır. Bu imtianlardan nasıl keçecegimiz biznen bağlıdır. Bayramlarımız – milletimizni birleştirgen qıymetlerdir. Qurban bayramı bereket ketire, birlik ve muabbetlikni qaviyleştire, er birimizde cümertlik, merhametlik, birdemlik duyğularını pekite. Qurban bayramı ğam-qasevetler ve eski can ağırtuvları unutılğan zamandır. Bu vaqıtta yaqın insannıñ destegini duymaq pek müimdir. Bayram künleri, şeñlik ve sevinç künleri olmaqnen beraber, mesüliet ve destek vaqıtıdır. Bu künleri musulmanlar bir-birine yardım qolunı uzata ve qurbanlıq ayvannı çalıp, Rabbine daa yaqın olmağa, muhtaclarğa yardım etmege tırışa. Tuvğanlarımız ve yaqınlarımıznı hayırlağanda, öksüz balalarnı, qartlarnı, ağır hastalarnı, yardımsız qalğanlarnı da unutmamalımız. Bugünki künde hızmetlerinen vatandaşlarımıznı qurtarğan insanlarnı – ekim ve emşirelerni de dualarımızda unutmayıq. Biz Yüce Rabbimizge dua etip, musulmanlarğa sabır bermesini, yüreklerimizni imannen toldurmasını tileymiz. Musulmanlarnıñ birleşmesi, barışıqlıqnıñ saqlanması içün niyaz etemiz, Vatanımıznıñ güllemesini isteymiz! Er bir musulmannıñ evinde amanlıq ve bereket olsun. Qırım Cumhuriyeti ve Sevastopol şeeri Müftisi hacı Emirali Ablayev

Qırım din erbapları yaşlarğa neofitler aqqında tarif ettiler (FOTO)

Опубликовано:

Qırım Cumhuriyeti ve Sevastopol şeeri Müftisiniñ QC ve Sevastopol şeeri boyunca ÜFSİN ile işbirlik boyunca yardımcısı, Aqmescit şeeriniñ baş imamı Muhammed İslamov QC ve Sevastopol şeeri boyunca ÜFSİN başlığınıñ yardımcısı Roman Tsurkan ile birlikte dinlerara iş taqımınıñ oturışını keçirdi. Oturışta tüzeltüv koloniyalarında tertipniñ pekitilmesi ve, hususan, mahkümlerge yasaq olğan eşyanıñ ketirilmesiniñ ögüni almaq meselesi muzakere etildi. Buña ilâve olaraq, neofitler, yani farqlı diniy aqımlarnıñ yañı adeptleri, azaları aqqında söz lektsiya oquldı. "Neofitler – esasen yaşlardır, olarnıñ fikir ve mevamları daa tolusınen şekillenmegeni içün, olar mevamlarını sıq-sıq deñiştire bile ve qolaylıqnen digerlerniñ tesirine tüşe bileler. Birinci zamanlarda olar diniy saada qarardan zâide ğayret köstereler ve, afsus ki, çoqusı vaqıt radikallar sırasına kireler. Er saada, hususan, diniy meselelerde davranışlarımız aqıl ile olmalı. Tek işançlı menbalarğa muracaat etmek, ihtisaslı imamlarğa sual ile kelmek, şübeli internet saytları ve türlü vaizlerden saqınmaq kerek", – dedi Muhammed İslamov. Tedbir Aqmescitteki №1 Tüzetüv koloniyası erkânında çalışqan Tüzetüv merkezinde olıp keçti. Qırım MDİ matbuat hızmeti [gallery link="file" columns="4" size="medium" ids="49680,49678,49676,49674,49672"]

Qırım Müftiligi Qurban bayramında tedbirlerniñ keçirilüvini sıñırlay

Опубликовано:

Qırım Cumhuriyeti ve Sevastopol şeeri musulmanları diniy idaresi (Tavriya Müftiyatı) Qırım musulmanlarınıñ Qurban bayramı munasebetinen keçirilgen tedbirlerniñ sıñırlanmasını beyan ete. Soñki zamanlarda cumhuriyetimizde koronavirus infektsiyasınıñ keñ darqaluvı munasebetinen Qırım müftiligi Qurban bayramını qayd etüv çerçivesindeki kütleviy tedbirlerniñ keçirilüvini sıñırlay. "Biz insanlarnıñ hastalanmasını minimumğa tüşürmek içün kerekli tedbirlerni almaq kerekmiz. Bilgenimiz kibi, insanlar toplanğan yerler – infektsiyanıñ darqalması içün eñ elverişli müitlerdir. Hastalıqnen bağlı işbu ağır vaziyetni köz ögüne alıp, biz insanlarnı havf astında qaldırıp olamaymız", – dedi Müfti efendi. Bunen beraber, Müfti qayd etti ki, cami azbarında 50-ge qadar bala içün bayram tedbirlerini keçirmek, balalarımıznı sevindirip, olarğa ediyeler tarqatmaq mümkündir. Hatırlatamız, soñki künleri Qırım Cumhuriyeti ve Sevastopol şeerinde künde tahminnen 490 insan koronavirus infektsiyasına oğrap, hastalana. Şu sebepten, Qırım Müftiligi vatandaşlarnı havfsızlıq qaidelerine riayet etmege, insanlar toplu olğan yerlerde maskalarnı kiymege, antiseptikler qullanmağa ve ara mesafesini közetmege, kütleviy tedbirlerni (dua ve toylarnı) keçirmemege çağıra. Qırım MDİ matbuat hızmeti

Qırım Müftiliginde Müftiniñ rayon imamlarınen iş körüşüvi olıp keçti (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde Müfti efendiniñ rayon imamlarınen iş körüşüvi olıp keçti. Adet üzre, din erbapları içün seminar olıp keçti, o, musulmanlarnıñ eki bayramından biri olğan Qurban bayramına bağışlanğan edi. Qırım Müftisiniñ muavini Raim Ğafarov insaniyetlikniñ tarihında farqlı milletlerde qurban etilmesiniñ tarihı ve İbraim ile İsmailnen (a.s.) bağlı vaqialar işbu ananelerni lâğu etkeni aqqında tarif etti. Seminarnıñ soñunda imamlar içün test keçirildi. Qurban meselesi aqqında, hususan, qurban çaluvına nasıl azırlanmalı, kim qurban çalmaq kerek, qurbanlıq ayvanda nasıl şartlar olmaq kerek, quraban çalınacaqta mekruh olğan areketler aqqında Qırım Müftisiniñ muavini Ayder İsmailov tarif etti. Rayon imamları ile körüşüvi esnasında Qırım Müftisi hacı Emirali Ablayev imamlarğa daa bir kere muracaat etip, koronavirus infektsiyasınıñ darqalmaması içün kerekli tedbirlerge riayet etmek meselesinde ealinen aktiv şekilde çalışmağa çağırdı. "Artıq ekinci yıl devamında pandemiya toqtamay, biz tehlikenen yüz-yüzgemiz, ekinci yıldır dünya musulmanları hacılıq ibadetini yerine ketirip olamay. Bu künler tarihqa keçecek. Amma, er kün ve er saat biz milletimiz, onıñ sağlığı ve eyiligi içün mesüliet duymaq kerekmiz. Vaziyet ğayet ciddiy, ve bu halqnıñ tehlikesizlik meselesidir. Er kes qararını özü ala. Ekimler, mütehassıslar bar, işançlı menbalarğa muracaat etiñiz ve farqlı emiş-demişler ve qorquzuvlar peşinden ketmeñiz. Bugün aynı siz milletimiz içün mesülietlisiñiz", – dedi Müfti. İş körüşüvi çerçivesinde din erbapları keçken ayda yapqan işlerinden esabat berdiler ve kelecek ayğa planlarını muzakere ettiler. Hususan, cami topraqlarınıñ resmiyleştirilüvi, kommunal hızmet ücretiniñ vaqıtında tölenilüvi, camilerniñ qurucılığı ve tamirlevi, mekteplerdeki yaz tatili devamında balalar içün diniy tahsil tedbirlerniñ teşkil etilüvi. Qırım MDİ matbuat hızmeti [gallery link="file" columns="4" size="medium" ids="49736,49734,49732,49730,49728,49726,49724,49722"]

Qırım Müftisi Bağçasaray şeeri ve Bağçasaray rayonınıñ cenk iştirakçileri ve partizanları aqqında kitapnıñ taqdiminde iştirak etti (FOTO)

Опубликовано:

Qırım Cumhuriyeti ve Sevastopol şeeri Müftisi hacı Emirali Ablayev yazıcı, jurnalist Gülnara İlyasova tarafından azırlanğan "Bessmertnı vaşi imena" ("Adlarıñız ebediy yaşaycaq") kitabınıñ tantanalı taqdim merasiminde iştirak etti.Tantanalı tedbir İ.Ya.Franko adına Qırım cumhuriy universal kitaphanesinde olıp keçti. Bundan da ğayrı, tedbirde QC İçki işler nazirliginiñ imic siyaseti, malümat ve bağ idaresiniñ başlığı Ruslan Abdureşitov, Qırım Parlamenti Reisiniñ mesleatçısı Ayder Ablâtipov, Qırım yaşlar siyaseti devlet komitetiniñ başlığı Sergey Selimov, "Rusiye birligi" regionlarara cemaat teşkilâtınıñ başlığı Yelena Aksönova, Milletlerara munasebetler boyunca devlet komitetiniñ ve QC Medeniyet nazirliginiñ temsilcileri, "Altın Maydan" leyhasınıñ müellifi ve rehberi, "Tatarstan Cumhuriyeti" gazetasınıñ mahsus korrespondenti Gamira Gadelşina, Rusiye yazıcılar birliginiñ azası, Adıgeya Cumhuriyetinde nam qazanğan artist Adam Açmiz iştirak ettiler. Qırım Müftisi hacı Emirali Ablayev çıqışında çoqmilletli yarımadada yaşağan halqlarnı birleştirgen Ulu Vatan cenki aqqında kitaplarnıñ derc etilüviniñ müimligini ayrıca qayd etti. "Biz tarihımıznı bilmek kerekmiz, aydın kelecegimiz içün qaramanane keçmişimizni hatırlamalımız. Millionlarca qurbanlarınen tarihiy aqiqat ne qadar acı olsa da, biz baba-dedelerimizniñ cesürliginden ibret almalımız. Ve bu cesürlikni balalarımız ve torunlarımızğa aşılamaq kerekmiz. Devletimizde neşir etilgen kitaplar milletlerni birleştirmek, birdemlik duyğusını şekillendirmek kerek, halqlarara munasebetlerge kin ve nefretni soqmamaq kerek. Ancaq cumhuriyetimizde yaşağan farqlı milletlerniñ dostluğı, bir-birine olğan sevgisi ülkemizniñ kerçekten inkişaf etmesini temin ete bile", – dep, qayd etti hacı Emirali Ablayev. Buña ilâve olaraq, Müfti efendi kitap müellifine tarihnıñ saqlanılmasına salmaqlı issesini qoşqanı içün teşekkür bildirdi. "Bessmertnı vaşi imena" ("Adlarıñız ebediy yaşaycaq") kitabı 2020 senesi Qırım Cumhuriyetiniñ İçki siyaset, malümat ve bağ nazirliginiñ destegi ile derc etilip, Ulu Vatan cenkiniñ 75-yıllığına bağışlanğan. Kitapta Ulu Vatan cenkinde Bağçasaray şeeri ve Bağçasaray rayonında olıp keçken müim vaqialar aqqında tarihiy malümat berile. Neşirde cenk iştirakçileri, partizanlar aqqında biografik malümatlar ve olarnıñ hatıraları, Bağçasaray şeeri ve rayonıdaki abideler ve ve hatıra yerleri aqqında malümat toplanğan. Mezkür cıyıntıqnıñ müellifi Gülnara İlyasova tarif etkenine köre, malümat bir yıl devamında Bağçasarayda neşir etilgen "Slava trudu" ("Emekke şeref") gazetasınıñ, Bağçasaray rayonı ve şeerindeki oquv yurtları yanında açılğan cenk ve partizan areketine bağışlanğan müzeylerniñ ve şeer ile rayon sakinleriniñ, cenk iştirakçileri soy-sopunıñ hatıralarına ve arhivleriniñ malümatlarına esaslanıp, toplanıldı.   Qırım MDİ matbuat hızmeti [gallery link="file" columns="4" size="medium" ids="49666,49664,49662,49660,49658,49656,49654,49652,49650,49648,49646,49644,49642,49640,49638,49636,49634,49632,49630,49628,49626,49624,49622,49620,49618,49616"]

Qırım camileri Qurban bayramına azırlana!

Опубликовано:

2021 sene, iyül 11 künü Aqmescit rayonınıñ Levadki qasabasındaki Qadır camisinde talaqa keçirilecek. Talaqa işlerine köyniñ civarında yerleşken Priyatnoye Svidaniye, Acı Qal (Çistenkoye) ve Terek Eli (Tröhprudnoye) köyleriniñ sakinleri ve hayırlı işke qoşulmağa istegen er kes davet etile. Talaqa saat 08:00 başlanacaq. Qırım camilerinde musulmanlarnıñ eki diniy bayramından biri olğan Qurban bayramına azırlıqlar başlandı. Yerli sakinlerniñ qoltutuvınen camilerniñ etrafları abadanlaştırıla, azbarlarda terekler ve çeşit ösümlikler ekile ve binalar aqlana ve boyana. Qırım MDİ matbuat hızmeti

Büyük Cuma caminiñ qurucılığı devam etile (FOTO)

Опубликовано:

Qırım Cumhuriyetiniñ Nazirler şurasında Aqmescitteki Büyük Cuma caminiñ qurucılığını yekünlemek maqsadınen bir sıra tedbirlerniñ becerilmesi boyunca iş muşaveresi keçirildi. Muşaverede qurucılıqqa alâqası olğan nazirlikler, idareler, teşkilâtlar ve Qırım Müftiligi iştirak etti. Tedbir QC Nazirler şurası Reisiniñ muavini Mihail Nazarov yolbaşçılığında ötkerildi. Mihail Nazarov kiriş sözünde qayd etti ki, Büyük Cuma cami külliyesinde qurucılıq işlerniñ çoqusı artıq yekünlendi, qurucı şirket deñişti, ve yaqın zamanda işler tezleştirilecek. Öz nevbetinde, Qırım MDİ mesül kâtibi Ayder Acimambetov bir sıra çezilecek meselelerni seslendirdi. Olarnıñ arasında elektrik ceryannı teminlegen ağnıñ qurulıp, külliyeniñ saasından 110 kV yüksek voltlıq ağlarnıñ çıqarıluvı, hocalıq ve yağmurlıq kanalizatsiyalarınıñ yapılıp, umumiy ağlarğa qoşulması, radio, internet ve telefon ağlarınıñ keçirilmesi, gaz ağınıñ keçirilip, çalıştırılması  ve diger meseleler añaldı. Buña ilâve olaraq, naqliye içün qoşma yol yolağınıñ yapılması, yol astı keçitiniñ qurulması, cemaat naqliye turağınıñ başqa yerge avuştırılması, Büyük Cuma Cami külliyesi yanından keçken avadaki kabel ağlarınıñ cami saasından uzaqlaştırılması, trolleybus ağlarınıñ da yerleri deñişmesi zaruriyeti seslendirildi. Bundan da ğayrı, tedbir iştirakçileri Büyük Cuma cami yanında yerleşken ormanlıq saanıñ Qırım MDİ mülkiyetine keçirilüvi protsedurasını ve bu topraqnıñ abadanlaştırıluvı meselesini muzakere etttiler. Muşavereniñ neticesinde er afta vitse-premyerniñ yolbaşçılığında muşavelerni keçirmek ve qurucılıq esnasında peyda olğan meselelerni operativ şekilde çezmek qararı alındı. Hatırlatamız, 2021 senesi, mayıs 17 künü Rusiye Prezidenti Vladimir Pütin RF ve Qırım akimiyetlerine, alâqadar teşkilâtlarnı celp etip, Aqmescitteki Büyük Cuma caminiñ qurucılığını yekünlemege destekçi olmalarını avale etti. Bunı ifade etken madde mart 18 künü Qırım Cumhuriyeti ve Sevastopol şeeriniñ cemaatçılığı vekillerinen keçirilgen körüşüvniñ neticesinde berilgen avaleler arasında mevcuttır. Qırım MDİ matbuat hızmeti [gallery link="file" columns="4" size="medium" ids="49531,49529,49527"]

Qırım Müftisiniñ koronavirus hastalığınıñ tekrar darqatıluvınen bağlı muracaatı

Опубликовано:

Qırım Müftisi Qırım musulmanlarını vatandaşlıq mesülietini kösterip, koronavirus infektsiyasınıñ darqalmaması içün kerekli tedbirlerni almağa çağırdı. Ürmetli dindaşlar, qıymetli semetdeşeler. Qırımda koronavirus hastalığınıñ tekrar darqaluvı sebebinden biz er kün yaqınlarımıznı, tuvğanlarımıznı, dostlarımıznı, vatandaşlarımıznı ğayıp etemiz. Bugün de bugün vaziyet daa da kerginleşe. Qırım Müftiligine kelgen malümatlarğa köre, qırımtatar halqı arasında hastalarnıñ sayısı nisbeten daa ziyadedir. Belki de bu musulmanlar içün ananeviy olğan büyük toylar, kütleviy dua merasimleri ve cenazeler, diger tedbirlernen bağlıdır. Aziz musulmanlar, sizge muracaat etip, özüñizniñ ve yaqınlarıñıznıñ sağlığına muqayt olmañıznı rica etem. Dinimiz bizni er bir insannıñ ve, umumen, cemiyetniñ sağlığını saqlamaqnı emir ete. Bugün ise, daima olğanı kibi, bu er birimizniñ mesülietidir. Quranda böyle buyurıla: "Özüñizni tehlikege atmañız!" ("Baqara" suresi, 2/195). Al-ı azırda Qırımda ealiniñ koronavirus infektsiyasından aşılanuvı areketi faal şekilde keçirile. Ricam, emiş-demişlerge ve esassız delillerge itibar etmeñiz, özüñizniñ ve etrafıñıznıñ sağlığını tüşüñiñiz, özüñizni ve etraftakileriñizni hastalıqtan qorçalanıñız. Havfsızlıq qaidelerine riayet etmege rica etem. Musulmanlarğa lâyıq olğanı kibi, şahsiy temizlik qaidelerine riayet eteyik, insanlar çoq olğan yerlerden uzaqlaşayıq, imkânğa köre, maksimum şekilde qatnavlarımıznı azlaştırayıq. Hususan, bu üyken nesil içün aktualdir. İmkânğa köre, büyük toylar ve kütleviy tedbirlerni soñrağa qaldırayıq, cenaze merasimlerni qısqartayıq, cenazelerde havfsızlıq mesafesine riayet eteyik. Camige kelgende, şahsiy namazlıqlarımıznı alayıq. Cuma namazlarında bir yarım metr mesafe tutayıq ve mıtlaqa maskalar qullanayıq. Böylece, em özümizni, em etraftakilerni tehlikeden uzaqlaştırımız. Hastalıq alâmetlerini duysaq, alsızlınsaq, camige kelmeyik, hastalıqnıñ darqalması içün sebepçi olmayıq. Hastalıq alâmetlerini körsek, mıtlaqa ekimge muracaat etiyik, özümizce hastalığımıznı tedaviy etüvge başlamayıq. Allahqa dua etip, bizni qaza-belâlardan saqlamasını, hastalarğa şifa bermesini ve bu dünyanı terk etkelerge rahmet etmesini niyaz etemiz. Qırım MDİ matbuat hızmeti