Merhametlik aktsiyasi - ЦРО ДУМКЦРО ДУМК

Четверг

29

июля

19
Зуль-хидждже
1442 | 2021
Утр.3:36
Вос.5:15
Обед.12:54
Пол.16:52
Веч.20:23
Ноч.22:03
Времена намазов
Календарь 2021г

Намаз

Merhametlik aktsiyasi - ЦРО ДУМК

Qırım Müftiliginde “Merhametlik-2021” aktsiyası keçirildi (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde "Merhametlik-2021" hayriye aktsiyasınıñ neticeleri çıqarılıp, tedaviylevge muhtac ağır hasta balalarnıñ qorantalarına maddiy destek kösterildi. Hayriye aktsiyası çerçivesinde yıl devamında, keçken yılnıñ Ramazan ayından başlap, bu yılnıñ Ramazan ayınıñ soñuna qadar Qırımnıñ bütün camilerinde hasta balalar içün sadaqalar toplanıldı. Umumen, yıl devamında 2 mln ruble toplanıldı. Şu paralardan 1 millionı Alim Muratov ve Elvina Jurayevanıñ tedaviylevleri içün berildi. Şimdi de aktsiya çerçivesinde 1 million ruble darqatıldı. Paralar hastalıqnıñ ağırlığı ve tedaviylenüvniñ paalığına köre, hastalarnıñ qorantalarına darqatıldı. Umumen, yıl devamında Qırım Cumhuriyeti ve Sevastopol şeeri musulmanları diniy idaresine maddiy destekni almaq içün 36 ariza keldi, bundan da ğayrı, yıl devamında 40 acele ariza qabul etildi. Qırım Müftisi hacı Emirali Ablayev hastalarnıñ qorantalarına sabır ve, iç bir şeyge baqmadan, tedaviylenüvge işançnı coymamaqnı tiledi. Bundan da ğayrı, Müfti efendi toplanğanlarnıñ diqqatını koronavirus infektsiyasınen bağlı vaziyetniñ ciddiyetine çekti. "Er birimiz özümiz qarar alamız. Elbette, aşılav aqqında çoq emiş-demişler, laflar yüre. Bazıda olmaycaq şeyler aytıla. Amma epimiz öz sağlığımız, yaqınımızdaki ve etrafımızdaki insanlarnıñ sağlağı içün mesülietli olğanımıznı unutmayıq. Bizge tevsiye etecek ekimler, mütehassıslar bar, amma qararnı biz özümiz alamız. Özümizniñ ve yaqınlarımıznıñ havfsızlığına doğru adım atmaq qararını. Adetimizde körüşkende, quçaqlaşmaq, cemaatnı toplap, büyük toylar ve dualar keçirmek bar. Afsus ki, şimdi böyle cıyınlardan vazgeçip, mesafe qaidelerine uymaq ve antiseptikler, maskalar qullanmaq vaqıtıdır. Biz şu devirni mümkün olğanı qadar az zararnen keçirmelimiz, amma şimdi vaziyet bayağı kergin. Müftilikke kelgen muracaatlarğa esasen, eñ çoq hasta sayısı halqımız arasında. Lütfen, kendiñizge ve yaqınlarıñızğa muqayt oluñız. Allahqa dua etip, şu imtianlardan sağ-selâmet keçmekni niyaz etemiz", — dep ayttı Müfti efendi. Qırım musulmanları diniy idaresi ağır hasta balalarnıñ tedaviylenüvi içün müddetsiz "Merhametlik" hayriye aktsiyasını devam ete. Sadaqalar bütün Qırım camilerinde, qırımtatarlar toplu yaşağan yerlerde çalışqan tükânlarda, kütleviy tedbirlerde ve bayramlarda toplana. Şu aktsiyağa Qırımdaki musulman din cemiyetleri, metsenatlar, iş adamları ve adiy vatandaşlarımız büyük destek köstereler. "Merhametlik" aktsiyası boyunca Ramazan ayından başlap, nevbetteki Ramazan ayına qadar sadaqalar toplanıla, arada acele tedaviylevge muhtac olğanlarğa yardım kösterile. 2009 senesinden başlap, bugünki künge qadar aktsiya çerçivesinde 23.182.009 ruble toplanıldı. Paralarnıñ ekseriyeti ağır hasta balalarnıñ tedavilevine berildi. Qırım musulmanları diniy idaresi hasta balalarğa yardım etmeñizge çağıra, çünki olarnıñ kelecegi bizge bağlıdır. "Merhametlik" aktsiyasına qoşulıñız. Lâqayd qalmañız. Qırım MDİ matbuat hızmeti [gallery link="file" columns="4" size="medium" ids="49516,49466,49476,49486,49456,49464,49462,49460,49458,49474,49472,49470,49468,49484,49482,49480,49478,49494,49492,49490,49488,49504,49502,49500,49498,49496,49512,49522,49520,49518,49514,49508,49510,49506"]

“Merhametlik-2020” aktsiyası. Lâqayd qalmayıq! (FOTO)

Опубликовано:

Qırım Cumhuriyeti ve Sevastopol şeeri musulmanları diniy idaresinde "Merhametlik-2020" hayriye aktsiyasınıñ neticeleri çıqarılaraq, tedaviylevge muhtac hasta balalarnıñ qorantalarına maddiy destek kösterildi. İşbu hayriye aktsiya çerçivesinde keçken Ramazan ayından başlap, bu seneniñ Ramazan ayına qadar bütün Qırım camilerinde ağır hasta balalar içün sadaqa toplanıldı. Umumen, bir yıl devamında 2 mln 53 biñ ruble toplanıldı. Paralar hastalıqnıñ ağırlığı ve tedaviylevniñ paalılığına köre hasta balalarnıñ qorantaları arasında darqatıldı. Umumiy olaraq, bir yıl devamında Qırım Cumhuriyeti ve Sevastopol şeeri musulmanları diniy idaresine maddiy yardım almaq içün 96 muracaat keldi. Qırım Müftisi hacı Emirali Ablayev ağır hasta balalarnıñ ana-babalarına sabır tiledi, ve, iç bir şeyge baqmadan, hastalarnıñ şifa tapmasına ümüt etmelerine çağırdı. "Bala hasta olğanını körmek pek qıyın. O, bizden, büyüklerden, yardım bekley. Allahqa şükürler olsun, halqımızda digerlerniñ belâsına lâqayd qalğan insan yoq, hususan, bala hastalansa. Çette qalmağan ve, imkânına köre, hastalarğa yardım etken vatandaşlarımızğa teşekkür bildiremiz. Balalar – bizim eñ büyük degerimizdir. Allah sizge bu ayat imtianlarından keçmege küç bersin, biz ise, böyle vaziyette qalğan, acele ya da paalı tedaviylevge, ameliyatqa muhtac olğan insanlarğa destek köstermek içün elimizden kelgenini yapacaqmız. Epimiz Allahqa işanmaq, dua etmek ve ümüt coymamaq kerekmiz", – dedi Qırım Müftisi. Qırım musulmanları diniy idaresi ağır hasta balalarnıñ tedaviylevi içün müddetsiz "Merhametlik" hayriye aktsiyasını devam ete. Sadaqalar bütün Qırım camilerinde, qırımtatarlar toplu yaşağan yerlerde çalışqan tükânlarda, kütleviy tedbirlerde ve bayramlarda toplana. Şu aktsiyağa Qırımdaki musulman din cemiyetleri, metsenatlar, iş adamları ve adiy vatandaşlarımız büyük destek köstereler. "Merhametlik" aktsiyası boyunca Ramazan ayından başlap, nevbetteki Ramazan ayına qadar sadaqalar toplanıla, arada acele tedaviylevge muhtac olğanlarğa yardım kösterile. 2009 senesinden başlap, bugünki künge qadar aktsiya çerçivesinde 21 182 009 ruble toplanıldı. Paralarnıñ ekseriyeti ağır hasta balalarnıñ tedavilevine berildi. Qırım musulmanları diniy idaresi sizni hasta balalarğa yardım etmege çağıra, çünki olarnıñ kelecegi biznen bağlıdır. "Merhametlik" aktsiyasına qoşulıñız. Lâqayd qalmañız.   QMDİ matbuat hızmeti   [gallery link="file" columns="4" size="medium" ids="39174,39172,39170,39168,39166,39164,39162,39160,39158,39156,39154,39152,39150,39148,39146,39144,39142"]

Balalar – Allahnıñ emanetidir! (FOTO)

Опубликовано:

2019 senesi, dekabr 3 künü Halqara saqatlar künü çerçivesinde Qırım Müftiligi bala müessiselerinde bir sıra hayriye tedbirlerini keçirdi. QMDİ hadimleri Aqmescitteki Beden ve aqıl sağlıqları sıñırlı balalar ve ösmürler boyunca içtimaiy reabilitatsiya bölügini ziyaret ettiler ve balalarğa "Fındıq" şarq tatlıları tükânından tatlılar taqdim ettiler. Qırım Müftisi ve Qırım musulmanları diniy idaresinden sağlıq, bereket, küç ve kelecekke işanç kibi sıcaq tilekler ayttılar. Beden ve aqıl sağlıqları sıñırlı balalar ve ösmürler boyunca içtimaiy reabilitatsiya bölügininiñ reberi İnna Sviridova Qırım Müftiligine teşekkürler bildirdi ve şu eki müessise arasında işbirlik çoqtan dostluq munasebetlerine çevirilgenini qayd etti. Nevbetteki tedbir №53 "Rusaloçka" adındaki qarışıq usul tipli bala bağçasında olıp keçti. Mında bulunğan balalarnıñ kiçik gruppasına televizor-smart ve "Fındıq" tükânından tatlı ediyeler berildi. Bala bağçasınıñ İrina Balaker yolbaşçılığındaki tibbiy-pedagogik taqımı ve balalar musafirlerge samimiy teşekkürler bildirdiler. "Yoloçka" balalar evine Qırım musulmanları diniy idaresi tarafından pirniç, şeker, kürpeler, bala yemekleri ve diger aşaytlar yollanıldı. "Yoloçka"nıñ müdiri Aleksandr Vasükov ayırılğan diqqat içün Qırım Müftiligine teşekkürler bildirdi. Qırım Müftiligi çoq yıllar devamında mektepten aldın ve mahsus müessiselerde hayriye aktsiyalarını keçire. Bundan da ğayrı, 2019 senesinden başlap, "Merhametlik" aktsiyası deyeyevam ete. Aktsiya çerçivesinde ağır hastalarğa para toplanıla. Sadaqalar bütün Qırım camilerinde ve qırımtatarlar toplu yaşağan yerlerde yerleşken alış-veriş noqtalarında, büyük merasimlerde ve diniy bayramlarda toplanıla. Büyük destekni Qırımnıñ musulman din cemiyetleri, iş adamları ve sıradan vatandaşlar köstere. 2009 senesinden başlap, bugünki künge qadar aktsiya çerçivesinde 19.129.009 ruble toplanıldı. Paralarnıñ büyük qısımı hasta balalarnıñ tedaviylenüvine berildi. QMDİ matbuat hızmeti [gallery link="file" columns="4" size="medium" ids="35415,35417,35455,35453,35451,35449,35447,35445,35443,35441,35439,35437,35435,35433,35431,35429,35427,35425,35423,35421,35419"]  

“Balanı quvandırğannı Allah quvandırır” (FOTO)

Опубликовано:

Qırım Müftiligi Halqara saqatlar kününe bağışlanğan hayriye aktsiyasında iştirak etti. Aktsiya, Aqmescit İçtimaiy-reabilitatsion merkeziniñ beden ve ruhiy sağlıqları zayıf olğan balalar ve ösmürler bölüginde olıp keçti. "Yahşı keyf künü" tedbiri çerçivesinde balalarğa ediyeler – yımşaq oyuncaqlar ve tatlılar berildi. Qırım ve Sevastopol şeeri müsulmanları Diniy idaresi adından balalarnı QMDİ diniy tedbirlerniñ teşkil etüv bölüginiñ reberi Zenife Ablayeva hayırladı. Zenife Ablayeva: "Qırım müsulmanları Diniy idaresi balalarnı iç bir vaqıt unutmay, olarğa güzel duyğular is ettirmek içün er bir imkândan faydalanamız. Sizge sağlıq tileymiz. Biliñiz ki, biz sizni pek sevemiz", - dep ayttı. Tedbir çerçivesinde balalar "Sıçrağan şahzade" qoqla spektaklini seyir etti. Küçük seyirciler büyük eyecan ile masalnıñ qaramanları ile birlikte eyecanlanıp, olarnıñ ğalebelerine quvandılar. Numayıştan soñ, er bir balağa yımşaq oyuncaq ve tatlı bahşışlar berildi. Aqmescit İçtimaiy-reabilitatsion merkeziniñ beden ve ruhiy sağlıqları zayıf olğan balalar ve ösmürler bölüginiñ reberi İnna Sviridovanıñ sözlerine köre, er ay bölükni 30, yılda ise 70 bala ziyaret ete. Balalarnen ruhiyatçı, logoped, LFK instruktorları çalışa. Medeniy tedbirler teşkilâtçısı farqlı bayramlarnı keçire, balalar ile murabiye yardımcısı ve balalarğa er angi bir yardım köstergen mahsus hadim meşğul ola. Patronaj hızmetiniñ lâğu etilmesi sebebinden bölük iştirakçileriniñ özleri, imkânlarına köre, vucut areketleri sıñırlı olğan balarnı ziyaret eteler. İnna Sviridova: "Bizim vazifemiz – balalarğa er kün lâzim olğan areketlerni ögretmek, olar ileride de öz-özlerini baqabilsin. Bundan da ğayrı, bizde icat ustahanesi bar, mında balalar içün master-klass, meraqlı dersler keçirile. Bizim içün eñ müimi – balalarnıñ yüzünde tebessümni ve közlerindeki quvançnı körmektir", - dep qayd etti. Balalar ve olarnıñ tuvğanları "Yahşı keyf künü" bayramınıñ musafirlerine bahşışlar ve, eñ esası, diqqat içün, büyük teşekkürler bildirdi. Aktsiya teşkilâtçısı Müfti yardımcısı Raim Ğafarovnıñ sözlerine köre, balalarğa bayramnıñ teşkil etilüvi teşebbüsine bir çoq vetandaşlarımız, iş adamları qol tuttı. Raim Ğafarov: "Merhametlik bir insandan digerine, hayır işler ve yaqınnı quvandırmaq isteginen keçmekte. İslâmda balanı quvandırmaq – büyük sevaptır. İştirak etken er keske büyük teşekkürler bildirem. Qısqa müddet devamında 30-dan ziyade tatlılar paketini ve güzel oyuncaqlarnı azırladıq. Allah hayır işlerni sevaplarğa yazdırsın!",  – dep ayttı. QMDİ matbuat hızmeti [gallery link="file" columns="4" size="medium" ids="22440,22438,22436,22434,22432,22430,22428,22426,22424,22422,22420"]

“Merhametlik” aktsiyası – beraberlikte yeñilgen dert ve facialar

Опубликовано:

Ramazan ayınıñ soñuna qadar bir qaç kün qaldı. Çok beklenilgen Oraza bayramı yaqınlaşa ve er allı-taqatlı müsülman ihtiyac olğan soy-sopu, qomşusı, hasta balalar ve qartlarnı tüşünmeli. İslâm dini er müsülmannı bu hayırlı ayda fitir sadaqasını berip, sevap qazanmağa teşviq ete. Fitir sadaqası ihtiyacı olğan  - fuqare, hasta, öksüzler arasında taqsimlene. Peyğamberimiz Muhammed Mustafa (s.a.v) fitirni bayram namazına qadar bermege tevsiye etti. Bu yıl Qırım Müftiyatı fitir sadaqasınıñ eñ azı - 200 ruble olaraq belgiledi. Bunıñnen beraber, "Merhametlik" aktsiyasına qoşulıp, sadaqalarnı hasta balaçıqlarğa bermege davet ete. Er kün paalı tedaviylevge muhtac olğan hastalarğa yardım qolunı uzatmaq yalvaruv – rica, çağıruvlarnen  rastkelemiz. Ağır vaziyette bulunğan ana-babalar olğan bütün küç ve mülküni sarf etip, cemaatqa muracaat etmek zorunda qalalar. Olarğa yardım etmek – boyun – borcumızdır. Qırım ve Sevastopol müsüslmanları Diniy idaresine aman-aman er kün muracaat etip, yardım soraylar. Ekseriyetine tedaviylev ve ilâclarnı almaq içün büyük para lâzim.  Qırım Müftiyatı  cemaatçılıq, iş-adamları, devlet hadimleri, siyasetçiler ve balalarımıznı qurtaracaq er kimge rica ete! Keliñiz, balalarımızğa ümüt bağışlayıq!  "Merhametlik" aktsiyası devam ete. Onıñ çerçivesinde 2009 senesinden başlap 2016 senesiniñ noyabr ayına qadar 12 mln. ruble toplandı. Bu paranınıñ büyük bir qısımı hasta balalarğa berildi. Olğan dert ve facia - yalıñız etraftakilerniñ degil. Er birimizge aittir. "Merhametlik"ke qoşulıñız! Sadaqañıznı Aqmescit ş.. Kurçatov soq., 4 adresi boyunca yerleşken Müftiyatqa ya da yerli imamlarğa bermek mümkün. QMDİ MDT matbuat hızmeti

Муфтият Крыма продолжает акцию «Мерхаметлик»

Опубликовано:

Муфтият Крыма оказал материальную помощь семье Гафаровых из Кировского района Крыма для проведения операции ребенку Мухамеду Гафарову. (more…)