Faydalı ilim - Page 5 of 10 - ЦРО ДУМКЦРО ДУМК | Страница 5

Четверг

22

октября

5
Ребиу'ль-эвель
1442 | 2020
Утр.5:42
Вос.6:58
Обед.12:32
Пол.15:19
Веч.17:56
Ноч.19:13
Времена намазов
Календари 2020г

Намаз

Faydalı ilim - Page 5 of 10 - ЦРО ДУМК

Qızlar “Dostlar aqşamına” davet etile

Опубликовано:

Qırım ve Sevastopol şeeri müsulmanları Diniy idaresiniñ "Faydalı ilim" diniy-maarif leyhası, qızlarnı, "Qızlar aqşamı" dostluq aqşamına davet ete. Tedbir  @krimskie_tatari ve @qirim_li qol tutuvı ile teşkil etildi. Aqşam programması devamında teşkilâtçılar daa sır olaraq tutılğan leyhasını taqdim etecekler. Bundan da ğayrı, iştirakçiler içün din, medeniyet ve urf-adetlerde bilgilerni numayış etmege yardım etecek yarışlar planlaştırıldı. Tedbirde leyha reberi, ilâhiyatçı-ruhiyatçı Zeyneb Bairovanıñ (@zeynebbairova) lektsiyası keçirilecek. Dostluq aqşamında istegenler içün fotosessiya teşkil etilecek. İştirakçilerniñ sayısı sıñırlı! @faydali_ilim leyhasınıñ direktinde yazılmaq mümkün. Tedbir mart 20 künü saat 17:00-de Aqmescit şeeri, Prospekt Pobedı, 128 adresi boyunca keçirilecek QMDİ MDT matbuat merkezi

Qırım Müftiligi “Özüñni köster!” istidatlar festivaliniñ ötkerilmesi aqqında ilân ete!

Опубликовано:

Qırım ve Sevastopol şeeri müsulmanları Diniy idaresiniñ "Altın nesil" bala-gençler klubı, "Özüñni köster!" istidatlar festivaliniñ ötkerilmesi aqqında ilân ete. Yarışta 5-14 yaş arasındaki oğlanlar ve qızlar iştirak ete bilecekler. Umumen, 4 nominatsiya olacaq: balalar natıq ve teatr sanatı, ameliy-süslü sanat, intellektual yarışlarda ve öriginal (sport) saasında istidatlarını numayış etebilecekler. Mında iştirakçi anketasını yüklemek ve toldurmaq mümkün. Arizalar aprel 8 kününe qadar qabul etile. Yarışnıñ finalı 2019 senesiniñ aprelniñ 27-ne planlaştırılğan. Malümat içün telefon nomerası: +7978 014 51 63 (Instagram: faydali_ilim) Arizalar nevbetteki adres boyunca qabul etile: faedali.ilim1@gmail.ru QMDİ MDT matbuat merkezi

Cürçi balalar bağçasına kitaplar bağışlandı (FOTO)

Опубликовано:

Qırım Müftiligi, Cürçi rayonınıñ Sarıbaş köyünde yerleşken "Küneşçik" balalar bağçasınıñ balalarına Quran ve bala kitaplarını bağışladı. Tedbirde bağçanıñ balaları musafirlerge küçük kontsert kösterdiler: analarğa, Vatanğa bağışlanğan şiirler ayttılar, yırlarnı icra ettiler.  Bundan da ğayrı, balalar "İhlâs" suresini oqup berdiler. Olarğa ise bu dua Quranda kösterildi. Böylece, balalar bağçasınıñ kitaphanesine Alyana Osmanovanıñ "Tap, baqayım", Mustafa Aliyevniñ "Balalar içün yırlar", Seyran Üseinovnıñ "Resimli Elifbe" ve "Men anamnen laf etem" kitabı, Emine Asanova Talât qızınıñ "Bismillâh", Nial Memet Nuzet qızınıñ "İlk bilgiler", Ablâziz Veliyevniñ "Yaş dostlarıma. Balalar içün şiirler", bundan da ğayrı, K. Çukovskiyniñ "Tsokotuha-çibinçigi" ve "Arıtır" kitapları ediye etildi. Balalarğa "Er künge dualar" ve "Qırımtatar  sözler  kitabı" kitabı ediye etildi. Qırım Müftisiniñ muavini Esadullah Bairovnıñ sözlerine köre, kitap balalar içün eñ güzel bahşıştır. Esadullah Bairov: "Zemaneviy balalarnı ne yañı gacetler, ne konstruktorlar, ne de diger gacetlernen ayrette qaldırıp olamazsıñ. Kitap ise, yañı meraqlı bir dünyağa qapılarnı aça. Bu – tuvğan til, qonuşuv ve, elbette, faydalı bilgilerdir", – dep qayd etti. QMDİ MDT matbuat merkezi [gallery link="file" columns="4" size="medium" ids="26310,26324,26322,26320,26318,26316,26314,26312"]

“Yañı baar”de eñ sadıq dostlar! (FOTO)

Опубликовано:

Qırım ve Sevastopol şeeri müsulmanları Diniy idaresiniñ "Faydalı ilim" oquv-maarif merkezinde "Yañı baar"niñ mektepten aldın çağındaki balaları içün "Dostluq bayramı" ötkerildi. Programma çerçivesinde balalar ana-babaları ile birlikte milliy yemeklerni taqdim ettiler. Bundan da ğayrı, er bir talebe milliy urba ve qırımtatar medeniyetiniñ hususiyetlerini kösterdi. Balalar tuvğan tilde milliy oyunlarnı icra ettiler, yırladılar ve şiirler ayttılar. İştirakçiler biri-birine bahşışlar azırdı. Teşkilâtçılarnıñ fikirine köre, bu kibi tedbirler balalarnı dostluq ve merhametlikke ögrete. "Bu alğan bilgilerni numayış etmege güzel bir imkân olğanından ğayrı, balalarğa biri-birine daa yaqın olmağa yardım ete", - dep qayd ettiler teşkilâtçılar. QMDİ MDT matbuat merkezi  [gallery link="file" columns="4" size="medium" ids="26289,26287,26285"]

Müftilikte islâm dini ocalarınıñ iş körüşüvi olıp keçti (FOTO)

Опубликовано:

Qırım müsulmanları Diniy idaresinde QMDİ islâm dini ocalarınıñ er aylıq körüşüvi keçirildi. Toplaşuv çerçivesinde ocalar, keçirilecek tedbirlerniñ cedvelini tizdiler ve teşkiliy suallerni muzakere ettiler. Böyleliknen, mart 28 künü balalar arasında islâm bilgilerini sınamaq maqsadınen "Altın nesil" Bütün Qırım yarışınıñ yarı finalı keçirilecek. "Altın nesil" balaları içün istidatlar festivali aprelniñ soñuna planlaştırılğandır. Körüşüv devamında Qırım Müftisi muavini Ayder İsmailov "Namaz" mevzusında seminar keçirdi ve "İslâmda mezhepler" kitabını taqdim etti. Bundan da ğayrı, ocalar diniy mevzuda kitaplarnı bahşış olaraq aldılar. QMDİ MDT matbuat merkezi [gallery link="file" columns="4" size="medium" ids="26109,26107,26105,26103,26101,26099,26097,26095,26093"]

“Hayrunissa” –  “Alicenap hanım” (FOTO)

Опубликовано:

Aqmescit şeerinde "Hayrunissa" adlı IV Bütünqırım islâm intellektual yarışınıñ neticeleri çıqarıldı.  Tedbirde, Qırım müsulmanları Diniy İdaresiniñ "Faydalı ilim" diniy maarif leyhasınıñ talebeleri iştirak etti. Yarışqa qadınlar Qırımnıñ çeşit bölgelerinden toplandı.  Kendi kursını ve ocasını taqdim eterek, 17 iştirakçi Qurandan ayetlerni ezberden ayttılar, aqide ve fıqıh boyunca testlerden keçtiler, peyğamberlerniñ hayatları ile bağlı olğan suallerge cevap berdiler, qırımtatarlarnıñ medeniyeti, tarihı ve urf-adetleri ile bağlı malümatnen paylaştılar. Yarış 4 basamaqtan ibaret edi. Bilgi seviyesine, "Faydalı ilim" leyhasınıñ ocaları ve QMDİ din ocalarından tertip etilgen jüri qıymet kesti. Neticede, yarış ğalibi olaraq Niyara Mamutova tanıldı. Ekinci yerni – Fevziye Abibulayeva, üçünci yerni ise – Fatime Asanova qazandılar.  Hanımlar qıymetli bahşişlar ile taqdirlendi. "Faydalı ilim" leyhasınıñ reberi Zeyneb Bairova, mezkür yarış, ep yañı iştirakçilerniñ adlarını belli etkenini ve yarış coğrafiyasını keñişleterek, Qırımnıñ eñ uzaq qısımlarından da davet etkenleri aqqında ikâye etti. Teşkilâtçılar, qadın-qızlarnı hayırlap, diniy tedbirlerde ğayet faal olğanları ve dinni ögrenip, digerler ile de paylaşmaq ğayret etkenleri içün teşekkürler bildirdi. QMDİ MDT matbat merkezi [gallery link="file" columns="4" size="medium" ids="25862,25860,25858,25856,25854,25852"]

Yaltada balaçıqlar dinimizni ögrene (FOTO)

Опубликовано:

Ay-Vasil camisinde, İslâm dininiñ esaslarını ögrencilerine Quran-ı Kerim taqdim etildi. Bu balaçıqlar – Azov (Qalay) medresesiniñ mezunı   Aişe Rustamovanıñ ilk talebeleridir. Eki ay devamında balalar qaidelerni, peyğamberlerniñ hayatlarını, hadislerni ögrendiler. QMDİ "Faydalı ilim" diniy-maarif leyhasınıñ reberi Zeyneb Bairovanıñ bildirgenine köre, mezkür gruppanı toplamaq işinde teşebüs köstergen Büyük Yaltanıñ baş imamı Osman Topuz oldı. İmam ikâye etkeni kibi, talebelerniñ ekseriyeti Ay-Vasildendir, lâkin endi Yaltanıñ özünden ve etraftaki qasabalardan da ögrenciler yazıla. Zeyneb oca: "Bizim içün büyük bir quvançtır. Yalta ilk filislerni kösterdi. İnşallah, dinimizni ögrenmege istegenlerniñ sayısı ep artacaq. Aişa Rustamovanıñ işini ayrıca qayd etmek ister edim. O, balaçıqlarnı toplap oldı ve olarğa yol kösterip, endi neticeler de peyda oldı", dep ilâve etti. Mezun olğan balaçıqlar içün tatlı sofra quruldı. Olar bu derslerke qatnap, ileride Quran oqumaqnı ve tecvid qaidelerini ögrenecekler. QMDİ MDT matbuat-merkezi [gallery link="file" columns="4" size="medium" ids="25735,25732,25730,25728,25726"]

“İnsan ve Yaratıcı” bağ – alâqası aqqında seminar (FOTO

Опубликовано:

Qırımnıñ Aqmeçit rayonındaki Krasnoselskoye (Qunan) köyünde qadınlar içün "Menim Onıñ ile munasebetlerim" adlı seminar keçirildi. Subet devamında, Yaratıcı ve insan arasındaki bağ-alâqa, Allahqa nisbeten yaqınlıq kibi meseleler muzakere etildi. Seminarnıñ teşkilâtçısı, ilâhiyatçı – psiholog Zeyneb Bairovanıñ bildirgenine köre, er insannıñ içinde yer alğan "blok" ve manialar kibi müim mevzular da unutılmadı. Zeyneb hanım: "Rabbimiz ögünde biz ne sebepten nankör olamız? Soñu olmağan bir alqadan qurtulmaq ve daima er şeyden razı olmaq seviyesine nasıl etip yetmek mümkün? Bu kibi şübeler ve sualler er birimizniñ içinde bardır. Kendini bahtlı is etmek içün, olar, insan tarafından ğayret talap ete", dep qayd ettSeminar iştirakçilerini Aqmeçit rayonınıñ imamı Löman Abduramanov selâmladı. Er keske teşekkür bildirerek, mezkür mevzularnı qaplap alğan körüşüv ve subetlerniñ müimligi aqqında söz yürütti. Löman bey: "İnsan daima bilgisini arttırmalı. Bu taqdirde o, yüz bergen çeşit vaqialarğa qıymet kesip, doğru qararlar alabile ve, neticede, qaviy imanını saqlap qalabile", dep ilâve etti. İşbu seminarda 30-dan ziyade insan iştirak etti. Balalar içün ayrı bir programm kösterilip, islâm mevzusındaki yarışlar ve kvest teşkil etildi. QMDİ MDT matbuat hızmeti

Ümre  – eñ uyğun fiyatlar ile…

Опубликовано:

Qırım müsulmanları Diniy İdaresi ve Qırım AVN-Tur hac-operatorı Ramazan ayında Ümre ibadetini yerine ketirmek davet ete. Keçirilgen Aktsiya çerçivesinde 2019 senesi martnıñ 7-ne qadar Añlaşma imzalamaq aşıqıñız:  – ilk 10 kün – 1100 $-dan; – soñki 10 kün – 1200 $-dan; – Ramazan ayı devamında – 1300 $-dan başlap uyğun fiyatlar. Moskva, Krasnodar, Mineralnıye Vodı ve Rusiye Federatsiyasınıñ diger şeerlerinden uçaq ile Saudiya Arabistanına qadar doğru yol… Musafirhanede suhur ve iftar yemekleri berile. 2 ve 3 yeri olğan odalar teklif etile. Yolğa mayısnıñ 6-dan çıqılacaq. Mezkür turğa Mekke ve Medine şeerleri boyunca kezinti de kire. Malümat ögrenmek içün: + 7 (978) 09 08 202 ve 8 800 551 31 30 telefon nomeraları arqalı muracaat ete bilesiñiz. Tavsilâtlı malümat AVN-Tur hac-operatorınıñ avntour.ru resmiy saytında taqdim etile. QMDİ matbuat merkezi [gallery link="file" columns="4" size="medium" ids="25123"]  

Quran oqumağa ögrenmek davet etemiz

Опубликовано:

Qırım müsulmanları Diniy İdaresinde qadanlar içün tezleştirilgen programma boyunca Quran-ı Kerimni oqumağa ögrenmek içün qadın-qızlar davet etile. Kurs  3 ay devam etecek. Birinci ders 2019 senesi fevralniñ 24-de başlanıp, er bazar künü saat 11.30-dan 12.30-ğa qadar, Aqmescit şeeri, Kurçatov soqağı, 4  (Kebir cami yanında) adresi boyunca keçirilecek. Malümat almaq içün: + 7 (978) 0317560 nomeralı telefon arqalı muracaat ete bilesiñiz. QMDİ matbuat merkezi

Müftiyatta İslâm dinini ögretken ocalar içün on-layn kursı açıla

Опубликовано:

Qırım müsulmanları Diniy idaresiniñ "Faydalı ilim" leyhası çerçivesinde mektepten evel yaşındaki balalarğa İslâm dini temelleri ocaları kursına davet ete. Dersler on-layn rejiminde keçirilecek. Mezkür kurs internet vastası ile tasil almağa imkân berecek. Kurs programması islâm dini temelleri, mektepten evel çağına ait olğan pedagogika, bala ruhiyatı, nutuq inkişafı, ritorika, pedagogika usulları, pediatriya kibi fenlerden ibaret olacaq. Kurs 7 ay devam etecek. Dersler aftada eki kere berilecek. Bilgilerniñ teşkerilüvi testler şekilinde olacaq. İmtiandan muvafaqiyet ile keçken mezunlar oquv aqqında şeadetname alacaq. Leyha ocaları arasında ihtisaslı ilâhiyatçı ve ruhiyatçılar, mektepten evel devirindeki islâm pedagogikası saasında çalışqan tecribeli mütehassılar olacaq. Kurs reberleri - Qırım Müftili, "Faydalı ilim" leyhasınıñ din ocası, mektepten evel deviriniñ pedagogika ve ruhiyat magistri, QMDİ "Yañı Baar" kursınıñ mektepten evel diniy tasil bölüginiñ reberi, Müsulmanlarğa ruhiy yardım etüv birleşmesiniñ azası Emine Asanova ve ilâhiyatçı, filolog, "Faydalı ilim" leyhasınıñ usuliyet bölüginiñ idarecisi Safiye Kurtdede. Kursnıñ fiyatı – 9500 ruble. Tavsilâtlı malümat nevbetteki telefonlar boyunca almaq mümkün: +7 (978) 867-78-84, +7 (978) 038-17-05 QMDİ matbuat hızmeti

Diniy tasil: emiyeti ve printsipleri

Опубликовано:

Fevral 6 künü Aqmescitte "Mektepten aldın diniy terbiyesine yañı metodikalarnıñ kirsetilüvi ile Qırım müsulmanları maneviy qıymetleriniñ saqlanıluvı ve inkişafı" mevzusında tögerek masa ötkerilecek. Forumnıñ teşkilâtçısı – Qırım Cumhuriyet ve Sevastopol şeeri  Qırım müsulmanları Diniy idaresiniñ informatsion-maarif yöñelişi Departamentidir. "Tögerek masa"da İslâm dini esasları ocaları, internet- bağlanuvlar vastasınen RF regionlarınıñ islâm dini ocaları, usuliyetşınaslar, ilâhiyatçılar, ruhiyatçılar, mektepten evel çağındaki terbiye mütehassısları iştirak etecek. Teşkilâtçı teolog-ruhiyatçı Zeyneb Bairovanıñ sözlerine köre, "tögerek masa" devamında iştirakçiler mektepten evel yaşında olğan balalarnıñ diniy terbiyesinde olğan problemlerniñ analizini yapacaq,  umumiy bala terbiyesi ceryanında diniy tasilniñ esas printsiplerini açıqlaycaqlar. Bundan ğayrı, QMDİ MDT "Yañı baar" sistemasınıñ esasında işlenip çıqarılğan ve qullanılğan usullar ve terbiye şekilleri açıqlanacaq. Zeyneb Bairova: "Mektepten eveldeki zemaneviy tasilniñ teşkilâtlandıruv meselesi ğayet aktual ve müimdir. Aynı bu yaşta balanıñ esas şahsiy çizgileri şekillene, onıñ ilerideki fizik ve ruhiy inkişafı belgilene. Bu devirde kelecekteki büyük adamnıñ dünyabaqışı ve degerleri belli ola. Bu sebepten mektepten evel çağındaki balalarnıñ maneviy-ruhiy terbiyesi zemaneviy tasilniñ eñ müim yöñelelişlerinden biri oldı. Balanıñ kelecegi, onıñ etraftaki dünya ile munasebeti, ve, eñ esası, diniy ve milliy duyğuları bu çağda oca ve ana-babalar balağa bergen bilgilernen bağlıdır", - dep ayttı. "Tögerek masa" fevral 6 künü saat 11:00 Qırım ve Sevastopol şeeri musulmanları Diniy idaresiniñ binasında Kurçatov soqağı, 4 /Volodarskiy, 3 adresi boyunca keçirilecek. Malümat içün telefon: +79780502660 ya da direkt @faydali_ilim QMDİ matbuat hızmeti