Faydalı ilim - Page 3 of 10 - ЦРО ДУМКЦРО ДУМК | Страница 3

Четверг

22

октября

5
Ребиу'ль-эвель
1442 | 2020
Утр.5:42
Вос.6:58
Обед.12:32
Пол.15:19
Веч.17:56
Ноч.19:13
Времена намазов
Календари 2020г

Намаз

Faydalı ilim - Page 3 of 10 - ЦРО ДУМК

Qırım Müftiliginiñ “Faydalı ilim” leyhası Türkiyede taqdim etildi! (FOTO)

Опубликовано:

Türkiye Cumhuriyetinde (Kappadokiya ş.), Qırım ve Sevastopol şeeri musulmanları diniy idaresiniñ "Faydalı ilim" diniy-maarif leyhasınıñ taqdimi olıp keçti.  Taqdimname "Biznes/Qoranta/Sağlıq" Halqara qadın biznes-forumı çerçivesinde ötkerildi. Teşkilâtçılar – İslâm biznesiniñ Halqara Birleşmesi ve "Umma" musulman qadınlarınıñ klubıdır. Umumen, forumda farqlı devletlerden kelgen 40 insan iştirak etti. Qırım Cumhuriyetini "Faydalı ilim" leyhasınıñ reberi, ruhiyatçı-ilâhiyatçı Zeyneb Bairova taqdim etti. Forumnıñ iştirakçileri İslâm biznesiniñ alıp baruv meseleleri, zemaneviy musulman qorantasınıñ problemleri ve qadın sağlığınıñ problemlerini muzakere ettiler. Zeyneb Bairovanıñ sözlerine köre, "Faydalı ilim", Rusiye musulmanları arasında diniy maarif saasında qadınlarnıñ tecribesi olaraq taqdim etildi. Zeyneb oca: "Biz "Faydalı ilim"niñ misalinde İslâm formalsiz tasiliniñ inkişafı imkânlarımıznen ve tecribemiznen paylaştıq. Bu bizim içün pek qıymetlidir ve çetelde, Qırım musulmanlarınıñ faaliyetini taqdim etmek – büyük şereftir", – dep ayttı . Forum çerçivesinde cemiyetniñ içtimaiy derecesini yükseltmek içün çalışqan farqlı leyhalarnıñ taqdimi olıp keçti. Hayriye, maarif, musulman biznes-cemiyetleri içün emiyetli olğan qadın inkişaf leyhaları muzakere etildi. QMDİ matbuat hızmeti [gallery link="file" columns="4" size="medium" ids="31037,31035,31039,31041,31043"]

Qırımda III ananeviy “Musulman qadınlarınıñ liderlik mektebi” olıp keçecek

Опубликовано:

Qırım musulmanları diniy idaresi ve "Büllür" Qırım qadınları cemaat Birleşmesiniñ teşebbüsi ile 2019 senesiniñ iyün 23-25 künleri Qırımda III er yıllıq "Musulman qadınlarınıñ liderlik mektebi" keçirilecek. Forumda yaşı 16-35 arasında olğan musulman qadın-qızları iştirak etecek. "Musulman qadınlarınıñ liderlik mektebiniñ" teşkilâtçısı Zeyneb Bairovanıñ sözlerine köre, bu sene forumda tek Qırımdan degil de, Rusiyeniñ diger regionlarından kelgen musulman qadınları arasındaki liderler iştirak etecek. Bu cümleden, iştirakçiler ögünde Maryam Bariyeva (Moskva), Leysan Bariyeva (Qazan) ve diger spikerler çıqışta bulunıp, qadın ve şahs inkişafı mevzusını açıqlaycaqlar.  "Liderlik mektebi" çerçivesinde meraqlı seminarlar, maneviy-ahlâqiy mevzularda lektsiyalar, diniy ve ruhiy mevzularda subetler, oyunlar, treningler, iş oyunları ve ekskursiyalar keçirilecek. Zeyneb Bairova: "Biz cemaat ayatında ve şahsiy ömürinde liderlik qabiliyetini inkişaf etmege istegen musulman qadın-qızlarını davet etemiz.  Bağçasaray rayonında Mangup-Qale qadimiy şeeriniñ yanında toplaşmağa planlaştıramız. Seminarlardan ğayrı, iştirakçilerni üç künlük  halal raatlıq, maneviy ve şahsiy inkişaf boyunca effektiv treningler bekley", dep ayttı. "Musulman qadınlarınıñ liderlik mektebine" yazılmaq içün kontaktlar: +7(978)8716258 (viber, what’s app).  Yerlerniñ sayısı sıñırlı. QMDİ matbuat hızmeti

Aqmesctte psihologik seminar-praktikum keçirilecek

Опубликовано:

2019 senesi iyülniñ 16-sında Aqmescitte, "Medeniyet erkânında şahıs: özgünlik ve medeniyetara kommunikatsiya" mevzusındaki seminar-praktikum olıp keçecek. Teşkilâtçılar – Qırım ve Sevastopol şeeri musulmanları diniy idaresi ve musulmanlarğa ruhiy destek kösterüv Birleşmesidir. Seminar-praktikum "Seit-Settar"  diniy külliyesinde Aqmescit şeeri, K. Tsetkin, 34 adresi boyunca keçirilecek. Seminar-praktikum saat 15:00 – 18:00 aralarında ötkerilecek. Seminar çerçivesinde iştirakçiler, medeniyetara işbirliginiñ esas ruhiy mehanizmleri ve ömürge keçirüvniñ effektiv usulları ile tanış olacaqlar. Seminarnıñ alıp barıcısı: Pavlova Ölga Sergeyevna, pedagogik ilimleri namzeti, dotsent, musulmanlarğa ruhiy destek kösterüv Birleşmesi reberliginiñ reisi, "Moskva devlet ruhiyat-pedagogik universiteti" FGBOU VO etnopsihologiya ve çoqmedeniy tasilniñ ruhiy problemleri kafedrasınıñ dotsentidir. Meraqlanğanlar davet etile. Qayd etilmek içün telefon nomerası: +79780490951; (Vayber)  +79780178552. QMDİ matbuat hızmeti

Saq rayonındaki Quran oquvı kurslarınıñ birinci mezunları! (FOTO)

Опубликовано:

Saq rayonınıñ Otar Moynak köyündeki camisi erkânında birinci mezunlar Quran oquvı kursları yekünlendi. Saq rayonı ve Kezlev regionı imamınıñ muavini Nariman Mamedaliyevniñ sözlerine köre, şimdilik Quran oquvı kurslarını eki insan keçti – tata- qardaş Elnara ve Edemdir. Balalar, Qırım Müftisi ve QC musulmanları diniy idaresi adından Muqaddes Quran kitaplarını aldılar. Nariman Mamedaliyev: "Balalar kurslarnı muvafaqiyetnen yekünledi, yaqın zamanda İslâm dini esasları ve Quran oquvınıñ nevbetteki kursını başlamağa niyetindemiz, kurslarğa yazılmağa istegenler bar, istegenlerniñ sayısı artqanı quvandıra", – dep ayttı. Cuma namazında Nariman Mamedaliyev, insanlarğa, yaz tatili devamında balaları ve torunlarını Quran oquvı kurslarına yazdırıluvı aqqında beyan etti. QMDİ matbuat hızmeti [gallery link="file" columns="4" size="medium" ids="30902,30900,30898"]

Moskvada sürgünlikniñ ruhiy aqibetleri muzakere etildi (FOTO)

Опубликовано:

Qırım musulmanları diniy idaresiniñ ilâhiyatçı-ruhiyatçısı, musulmanlarğa ruhiy destek kösterüv Birleşmesiniñ regional idaresiniñ azası Zeyneb Bairova: "İslâm: ruhiy küç– şahsiy ve cemaat amanlığınıñ temelidir"  mevzusındaki III Bütünrusiye ilmiy-ameliy konferentsiyasında iştirak etti. Konferentsiyanıñ teşkilâtçısı – musulmanlarğa ruhiy destek kösterüv Birleşmesidir. Psiholog Zeyneb Bairovanıñ sözlerine köre, onıñ maruzasınıñ mevzusı – qırımtatarlarnıñ sürgünligi kibi tarihiy faciasınıñ misalinde kollektiv ruhiy yaranıñ aqibetlerine bağışlanıldı. Zeyneb Bairova maruzasında: "Qırımtatar milleti başından keçirgenlerni tüşüngende, añlaymız ki, 1944 senesi sürgünliginiñ neticesi olğan içtimaiy, iqtisadiy ve siyasiy meselelernen bir sırada, zemaneviy qorantalarda yüz bergen aktual ruhiy neticeler bar. Bu aspekt künümizde ayrı diqqatqa lâyıqtır", – dep qayd etti. Bundan da ğayrı, ilâhiyatçı-psiholog, regional vekâletlik mezkür saada işini devam etkenini ve mütehassıslarnı işbirlikke davet etkenini bildirdi. "İslâm: ruhiy küç – şahsiy ve cemaat amanlığınıñ temelidir"  III Bütünrusiye ilmiy-ameliy konferentsiyası çerçivesinde Qırım musulmanları diniy idaresiniñ MRDB regional vekâletligine Qırım Cumhuriyetinde musulmanlarğa ruhiy destek kösterilgeniniñ inkişafı saasında salmaqlı isse qoşqanları içün teşekkürname berildi. QMDİ matbuat hızmeti [gallery link="file" columns="4" size="medium" ids="30880,30886,30884,30888"]

QMDİ eyyeti Moskvadaki konferentsiyada iştirak etti (FOTO)

Опубликовано:

Moskva şeerinde: «İslâm: ruhiy küç– şahsiy ve cemaat amanlığınıñ temelidir"  mevzusındaki III Bütünrusiye ilmiy-ameliy konferentsiya keçirildi. Konferentsiyanıñ teşkilâtçısı – musulmanlarğa ruhiy destek kösterüv Birleşmesidir. Qırım musulmanları diniy idaresi eyyetiniñ terkibine MRDB regional vekâletliginiñ reberi, Qırım MDİ "Faydalı ilim" diniy-maarif leyhasınıñ reberi, ilâhiyatçı- ruhiyatçı Zeyneb Bairova, MRDB azaları – imam Vaid Bilâlov ve ruhiyatçı Ruslan Kumalâk kirdi. Konferentsiyanıñ işinde 100-ge yaqın alim iştirak etti, olarnıñ arasında Mısır, İndoneziya, İordaniya, Birleşken Arap Emirlikleri ve Rusiyeniñ diger regionlarından: Arsk, Qazan, Mahaçkala, Moskva, Nalçik, Örenburg, Pâtigorsk, Râzan, Aqmescit, Ufadan kelgen ruhiyatçılar, ocalar, ilâhiyatçılar, felsefeciler, ekimler ve jurnalistler, tedqiqat dairesi İslâm dini ile bağlı olğan alimler iştirak etti. Konferentsiyanıñ mevzusı üç esas yöñelişke bağışlanğandır: Musulmanlarnen çalışmaq içün mahsus ruhiyatçı tasiliniñ şekili ve mündericesi: vaziyeti ve inkişaf yolları. FSİN şaraitinde musulmanlarğa ruhiy destekniñ kösterilüvi. Temelinde diniy esas olğan ekstremizmniñ profilaktikası. Migrant musulmanlar aileleri ile ruhiy çalışuv. Konferentsiya devamında APPM ve İndoneziya İslâm Universiteti arasında halqara añlaşma imzalandı. Añlaşma, işbirlik, ilmiy tedqiqatlar, ihtisas yükseltüvi boyunca çalışmalar, tasil programmalarınıñ ömürge keçirilüvi ve diger umumiy çalışmalarnı qaplap ala. Bundan da ğayrı, Abu Zayd al-Balhiniñ "Qalp ğıdası" kitabınıñ taqdimnamesi olıp keçti. Konferentsiyanıñ soñunda iştirakçiler rezolütsiyanı imzaladılar. QMDİ matbuat hızmeti  

Saq rayonında İslâm esasları kursları açıldı (FOTO)

Опубликовано:

Saq rayonınıñ Zernovoye köyünde erkekler, qadınlar ve balalar içün İslâm temelleri ve Quran oquvı kursları açıldı. Kurslarnı Saq rayonınıñ imamı Mesfer Settarov ve QMDİ din ocası Gülsum Settarova alıp bara. Mesfer ocanıñ sözlerine köre, Zernovoye köyüniñ musulmanları Saq şeeriniñ baş camisine muracaat etip, olarnıñ köyünde İslâm dininiñ esaslarını ögretken kurslarnı teşkil etmege rica ettiler. Mesfer Settarov: "İnsanlarğa, hususan, balalarğa Saq şeerine barmağa uzaqtır. Zernovoye köyü – büyük yerdir, o yerde çoq bala yaşay. Şimdi yaz tatilleri devamında dersler olar içün faydalı olur. Bala gruppasına 15 insan qatnay. Bu pek güzeldir",  – dep ayttı. Bundan da ğayrı, Mesfer oca, kurslar, tahminen, sentâbr ayına qadar çalışacaq, soñra ise mektep cedveline köre, vaqıt deñişecektir. Dersler er bazarertesi künü saat 11:00-13:00 arasında keçirile. QMDİ matbuat hızmeti [gallery link="file" columns="4" size="medium" ids="30375,30383,30381,30379,30377"]

Qırım Müftiliginiñ qadınlar leyhası – Rusiyede eñ güzel leyhadır! (FOTO)

Опубликовано:

Qırım ve Sevastopol şeeri musulmanları diniy idaresiniñ "Faydalı ilim" diniy-maarif leyhası endi 2 kere Rusiye Federatsiyasınıñ eñ güzel musulman qadın leyhası olaraq tanıldı. Ğalipler kubogı 2019 senesi iyün 21 künü Moskvada "Aile – İslâm medeniyetiniñ baqışı ile cemiyetniñ içtimaiy institutı olaraq" VII musulman qadınlar teşkilâtlarınıñ Bütünrusiye toplaşuvı devamında berildi. Birinci kubok 2018 senesi berilgen edi. "Aişa" Halqara qadınlar klubı tarafından teşkil etilgen tedbirde Rusiyeniñ 30 regionından kelgen 100-den ziyade qadın teşkilâtınıñ reberleri iştirak etti. Qırım Cumhuriyetini ilâhiyatçı-ruhiyatçı Zeyneb Bairova, sual-cevap diniy rubrikasınıñ alıp barıcısı Niyare Ablayeva ve Qırımdaki musulman blogeri Niyara Nagayeva temsil ettiler. Zeyneb Bairovanıñ sözlerine köre, bu sene eñ güzel musulman qadın teşkilâtları yarışında 13 birleşme iştirak etti. Eñ güzel leyha olaraq "Faydalı ilim" (Qırım Cumhuriyeti) ve Saratov ş. MDİ "Çoqraq" Qadın cemaat teşkilâtı tanıldı. Zeyneb Bairova: "Biz forumğa ciddiy azırlandıq. Qasevet ettik, çünki eñ güzel teşkilât seçilmek kerek edi. Eñ yüksek baalarnı alğanımız içün, pek quvanamız. Bu –ocalarımıznıñ, çalışıp teşkilâtımıznı inkişaf etken insanlarnıñ ğalebesidir. Elbette, daimiy destek ve yardım içün, ğayelerimizni, fikirlerimizni ömürge keçirmege yardım etken Müftimizge – hacı Emirali Ablayevge büyük teşekkürler bildiremiz. Biz bahtlımız!", - dep teessüratlarnen paylaştı. "Faydalı ilim" – faaliyetini 2014 senesiniñ iyül ayında başlağan Qırım ve Sevastopol şeeri musulmanları diniy idaresiniñ diniy-maarif leyhasıdır. "Faydalı ilim" leyhasınıñ ocaları mektepten evelki ve mektep çağındaki balalar içün İslâm dinini ögreten usuliy qullanmalarını işlep çıqara, qadınlar, erkekler ve balalar içün til kursları çalışa. Bundan da ğayrı, leyha çerçivesinde 8-16 yaşlı balalar içün "Altın nesil" intellektual klubı, küçük musulmanlar içün "Yañı baar" mektebi açıldı, "Emanet" vokal studiyası faaliyet köstere, diniy mevzuda farqlı tedbirler, viktorinalar ötkerile. "Faydalı ilim" leyhasında 100-den ziyade qadın din ocası çalışmaqta. İyünniñ 21-nde forum çerçivesinde iştirakçiler aile quruluvı, qoranta munasebetleriniñ qaviyleşmesi ve eyileşmesine tesir etken faktorlar, yaş nesilniñ terbiyelenüvi, qoranta munasebetlerinde musulman qadınınıñ rolü ve ömür arqadaşlarınıñ vazifeleri muzakere etildi. QMDİ matbuat hızmeti [gallery link="file" columns="4" size="medium" ids="30356,30354,30350,30348,30346,30352"]  

 Qalay medresesinde “Qalay tatili” başlandı!

Опубликовано:

İslâm ilimleri Qalay medresesinde balalar içün "Qalay tatili" tasil-eglence yaz meydançığınıñ tantanalı açıluvı olıp keçti. Meydançıq 2019 senesiniñ iyün 17-30 künleri arasında çalışacaq. Balalarğa İslâm dininiñ esasları, Quran oquvı, ibadetlerniñ qılınuvı ögretilecek. Bundan da ğayrı, balalarnı eglence ve sport tedbirleri, viktorinalar ve yarışlar,  meraqlı kezintiler bekley. Açıluv tedbirinde balalarnı Qırım Müftisiniñ muavini Ayder İsmailov hayırladı. O, balalarğa faydalı ve quvançlı tatiller, ocalarğa ise muvafaqiyetler ve ilham tiledi. Ayder İsmailov: "Balalar – bizim kelecegimizdir. Bugün balalarğa ne ögretsek, yarın onıñ qarşılığını körermiz. Belli ki, Muhammed Peyğamber dedi: "Bir baba balasına güzel ahlâqtan daa yahşı miras qaldırıp olamaz", - dep ayttı. Er bir musulman ana-baba bu hadiske esaslanıp, balağa yüksek ahlâqnı, İslâm temelleri bilgilerini, doğru ve sağlam yaşayış tarzını aşlamaq ve Quran oqumağa ögretmek kerek. "Qalay tatili" - balalar içün yañı bilgilerni almaq, ögrengen malümatlarnı pekitmek, vaqıtnı çağdaşlşarınen keçirmek, yañı dostlarnı tapmaq içün güzel bir fırsattır. QMDİ matbuat hızmeti [gallery link="file" columns="4" size="medium" ids="30318,30316,30314,30324,30320,30322,30332,30330,30326,30328"]

Qırımda Oraza bayramğa bağışlanğan bayram tedbirleri keçirilecek

Опубликовано:

Qırımda muqaddes, Ramazan ayınıñ yekünlengeni sebebinden bayram tedbirleri keçirilecek. Böylece, iyün 5 künü Aqmescitteki Beloye-5 qasabasınıñ camisinde bayram tedbiri saat 17:00-de başlanacaq. Musafirlerni medeniy programma ve ziyafetler bekley. İyünniñ 6-sında Bağçasarayda balalar içün bayram keçirilecek. Balalarnı farqlı viktorinalar, "Küreş" sport çeşiti boyunca yarışlar, tatlılar ve dondurma bekley. Orta Camide tedbir saat 13:00 başlanacaq. Aynı böyle bayram iyün 6 künü Bağçasaray rayonınıñ Kökköz köyünde olacaq. Balalarnı meraqlı programma bekley. İyünniñ 8-nde Aqmeçit rayonında "Hoş keldiñ, Oraza bayramı" bayramı keçirilecek. Programmada bala icadiy taqımları ile kontsert, qına qoyuv boyunca master-klass, gips şekilleriniñ boyalanuvı, küreş, armresling, animatorlar ile oyunlar, batutlar, kartingler, poni üstünde kezintiler olacaqtır. Musafirlerni pilâv ve tatlılar bekley. Bayram saba saat 10:00 stadionda başlanacaq. Bundan da ğayrı, "Büllür" Qırım musulman qadınları Birleşmesi, bayramnıñ birinci künü sağlıqları zayıf olğan  balalar içün bayramnı teşkil etece. İyün 6 künü Bağçasaray rayonınıñ Malosadovoye köyünde muhtac qorantalar içün bayram ötkerilecek. Tedbir "Ferma "İşaçok" eglence kompleksinde olacaq. Bayram tedbirleri Qırımnıñ bütün regionlarında olacaqtır. Anonslarğa diqqat etiñiz. QMDİ matbuat hızmeti

Tatiller – yañı bilgi almaq zamanıdır!

Опубликовано:

Qırım ve Sevastopol şeeri musulmanları diniy idaresiniñ "Faydalı ilim" oqutuv-maarif merkezinde "Yaşasın tatil!" yazlıq tasil-eglence meydançığı öz işini başlay. Meydançıq 2019 senesiniñ iyün 10-23 künleri devamında er kün saat 10:00 - 14:00 arasında çalışacaq. Programmada islâm dini esasları ve Quran sureleriniñ ezberden ögrenilüvi, ibadetlerniñ yerine ketirilmesi, eglence ve sport tedbirleri, viktorinalar ve intellektual yarışlar olacaq.  İstegen qız ve oğlanlarnı yaznı fayda ile başlamağa davet etemiz. Bala meydançığı nevbetteki adres boyunca çalışacaq: Qırım Cumhuriyeti, Aqmescit ş., Pobeda caddesi, 128. Malümat içün telefonlar: +7 (978) 065-19-88 +7 (978) 867-78-84 QMDİ matbuat hızmeti  

“Yañı baar” – birinci mezunlar bayramı! (FOTO)

Опубликовано:

Aqmescitte "Yañı baar" kursı talebeleri içün mezunlar aqşamı olıp keçti. "Yañı baar" - Qırım ve Sevastopol şeeri musulmanları diniy idaresiniñ "Faydalı ilim" diniy-maarif leyhasınıñ qısmıdır. Balalar ve olarnıñ ana-babalarını oquvnıñ yekünlengeni ile "Faydalı ilim" leyhasınıñ reberi Zeyneb Bairova hayırladı. "Men ocalarımız merkezge tek çalışmaq ve para qazanmaq içün kelgen insanlar olmağanını bilem. Olar öz işine sadıq adamlardır", - dep ayttı Zeyneb Bairova. Bundan da ğayrı, o, Qırım Müftisi hacı Emirali Ablayev ve Qırım musulmanları diniy idaresine leyhanıñ ömürge keçirmege destek köstergenleri ve diger maarif leyhalarını yapmağa imkân bergenleri içün teşekkürler bildirdi. Teşkilâtçılar balalar içün diniy mevzuda yarışlar ve kvest azırladı, yarışlarda olarnıñ anaları da iştirak etti. Kursnıñ neticesinde altı bala Quran oquvına keçti. Bu 4-6 yaşındaki balalardır. Damir Prtıhov, İbraim Prtıhov, Rinat Kurbanov, Alim Kübedinov, Yusuf Ziyani, Osman Seitâgâyev bahşış olaraq Muqaddes kitapnı elde ettiler. Umumen, "Yañı baar"deki derslerni 8 bala yekünledi, olarğa kelecek birinci sınıf talebelerniñ diplomları ve hatıra bahşışları berildi. Bayramnıñ soñunda balalar içün tatlı sofralar donatıldı. "Yañı baar" ocaları iyün ayı devamında çalışacaq yaz lageri aqqında ilân etti. "Yañı baar" kursına yañı qabul etüv mevsimi sentâbrde başlanacaq. QMDİ matbuat hızmeti [gallery link="file" columns="4" size="medium" ids="28888,28890,28892,28894,28882,28880,28876,28886"]