Canköy rayonında "Qırımda İslâm tarihı. Qırım hanlarınıñ tarihı" yarışı olıp keçti (FOTO) - ЦРО ДУМКЦРО ДУМК

Пятница

23

апреля

12
Рамазан
1442 | 2021
Утр.4:07
Вос.5:34
Обед.12:46
Пол.16:33
Веч.19:48
Ноч.21:16
Времена намазов
Календарь 2021г

Намаз

Canköy rayonında “Qırımda İslâm tarihı. Qırım hanlarınıñ tarihı” yarışı olıp keçti (FOTO)

Опубликовано:

Canköy rayonınıñ oqutuvı qırımtatar tilinde alıp barılğan Qamacı (Zareçnoye) köyüniñ mektebinde “Qırımda İslâm tarihı. Qırım hanlarınıñ tarihı” adlı VII Bütün Qırım yarışı olıp keçti.

Bu sefer yarışta iştirak etmek içün Canköy rayonınıñ 18 mektebinden 253 talebe yazıldı.

Yarış teşkilâtçıları – Qırım Cumhuriyetiniñ tahsil, ilim ve yaşlar nazirliginiñ destegi ile Qırım Cumhuriyeti ve Sevastopol şeeri musulmanları diniy idaresi, Canköy rayonınıñ memuriyeti ve Qamacı köyü milliy mektebiniñ memuriyetidir.

Yarış başlanmadan evel, Qırım Müftisi adından iştirakçilerni müfti muavini Raim Ğafarov selâmladı. Selâmlav sözlerinde, o, qayd etti ki, Qırım Müftiligi daima barışıqlıqnı ve yapıcılıqnı maqsat etken maarif leyhalarına qol tuta.

“Yarış endi bir qaç kere keçirile, ve er daim yaşlarımıznıñ bilgi seviyesi ayrette qaldıra. Bilgi yolundan ketkenler daima ileride olacaq”, – dep, qayd etti Raim Ğafarov.

Yarış onlayn keçirildi ve bir qaç basamaqtan ibaret oldı. Bundan da ğayrı, talebeler diniy mevzularğa bağışlanğan qoşma 14 sualden ibaret olğan viktorinada iştirak ettiler.

Viktorina ğalipleri hatıralıq bahşışlarnen taqdirlendi.

Esas yarışnıñ neticesinde jüri 18 ğalipni tayin etti – er bir mektepten birer talebe. Olar da bahşışlar ve taqdirnamelernen taqdirlendi.

Mektep müdiri Ruslan Ümerov teşkilâtçılarğa böyle faydalı tedbir içün teşekkürler bildirdi ve talebelerni azırlağan ocalarğa minnetdarlığı arz etti.

“Qırımnıñ uzaq köşelerinde yerleşken umumtahsil müessiselerni diqqatsız qaldırmağanıñız içün sağ oluñız. Yarış tek talebeler içün degil, bizler, ocalar içün de faydalıdır. Bu – dinimiz ve tarihımıznen daa yaqın tanış olmaq içün bir fırsattır”, – dep, qayd etti mektep müdiri.

Yarışnıñ müellifi ve teşkiliy komitetiniñ reisi, tarihçı, cemaat erbabı Reşat Asmanov VIII Bütün Qırım yarışınıñ bundan evel keçirilmegen bölgelerde ötkerilecegini qayd etti.

Qırım MDİ matbuat hızmeti